Синтӧмъяслы Луи Брайль нима Коми Республикаса торъя библиотека

Синтӧмъяслы Луи Брайль нима Коми Республикаса торъя библиотека
«Синтӧмъяслы Луи Брайль нима Коми Республикаса торъя библиотека» Коми Республикаса канму сьӧмкуд учреждение
Страна	Россия
Инпас	Коми Республика, Сыктывкар, Ленин ул., 27 к.
Лӧсьӧдӧма	1970 вося кӧч тӧлысь 1 лунӧ
Фонд
Мый пырӧ фондӧ	Криптозащитаӧн флэш-картаяс вылын йӧзӧдӧмторъяс, газет-журналъяс, тактильнӧй небӧгъяс, библиотекаӧн йӧзӧдӧмторъяс, тифлотехника да мукӧдтор
Фондлӧн ыджда	60000 (2024)
Вӧдитчанног
Лыддьысьысь лыд	940 (2022)
Мӧд юӧр
Директор	Безносикова Галина Михайловна
Уджалысьяс	11
Веб-сайт	komisbs.ru

Синтӧмъяслы Луи Брайль нима Коми Республикаса торъя библиотека (рочӧн Специальная библиотека для слепых Республики Коми им. Луи Брайля) — торъя библиотека, Коми Республикалӧн юӧртан пространство юкӧн, библиотека-юӧртан, культура да реабилитация шӧрин. Библиотекасӧ восьтӧма 1970 воын. Тайӧ республикаын медводдза да дзик ӧти торъя библиотека, кӧні могмӧдӧны йӧзӧс (верстьӧясӧс да челядьӧс), кодъяслы сьӧкыд лыддьыны печатайтӧм текстъяс, налӧн семьяӧ пырысьясӧс, специалистъясӧс, кодъяс велӧдӧны, быдтӧны да реабилитируйтӧны вермытӧмъясӧс.

История

Синтӧмъяслы Сыктывкарса торъя библиотека воссис 1970 вося кӧч тӧлысь 1 лунӧ. Библиотекаӧн шуисны неыджыд жыр, кутшӧмӧс пӧтӧлӧкӧдзыс вӧлі тыртӧма брайль небӧгъясӧн, кор лоис медводдза штатнӧй уджалысь. Сійӧ меститчис Синтӧмъяслӧн ставроссияса котырлӧн (ССК) велӧдан-производство предприятиеса административнӧй корпуслӧн мӧд судтаын. Штатсӧ содтӧны куим мортӧдз да медводдза библиотекарӧн индӧны Раиса Александровна Парначеваӧс (Нестероваӧс).

1970 во — заводитісны лӧсьӧдны магнитнӧй катушкаяс вылын «сёрнитысь» небӧгъяслысь фонд.

1973 во — фондсӧ содтӧны грампластинкаяс вылын медводдза «сёрнитысь» небӧгъясӧн.

1976 во — Синтӧмъяслы Сыктывкарса торъя библиотекаӧн веськӧдлысьӧн индӧны Полина Диана Михайловнаӧс.

«Сёрнитысь» небӧг петӧмкӧд содӧ и лыддьысьысь лылдыс, на лыдын сёрӧн синтӧммӧм йӧз — найӧ, кодъяс арлыд вӧснаыс эз вермыны велӧдны Брайльлысь системасӧ. Тифломагнитофонъяслӧн тырмытӧмлуныс ышӧдіс котыртны библиотекаын гораа лыддьысян кружок, а ССК-ын котыртӧны «сёрнитысь небӧгъяс» кывзӧм.

ССК-лӧн Коми республиканскӧй правление сетіс библиотекалы консультпунктлысь, синтӧмъяслы да омӧля аддзысьяслы Ленинградса очно-заочнӧй школалӧн филиаллысь, жыр.

Синтӧмъяслы Сыктывкарса торъя библиотекаӧс Коми АССР-са культура министерстволӧн 1981 во сора тӧлысь 27-ӧд лунся 201/ОД №-а тшӧктӧдӧн, кутшӧмӧс йӧзӧдӧма Коми АССР-са Министръяс Сӧветлӧн 1981 во лӧддза-номъя тӧлысь 25-ӧд лунся 214 №-а Шуӧм подув вылын, нимтісны Синтӧмъяслы республиканскӧй торъя библиотекаӧн Луи Брайльлысь ним сетӧмӧн.Библиотекаын заводитӧны уджавны интересъяс серти клубъяс да кружокъяс: «Шойччан лунся клуб», «Хозяюшка» клуб, «Литературно-музыкальнӧй салон», гораа лыддьысян кружок.

Библиотека лӧсьӧдӧ йитӧдъяс велӧдан-производство предприятиесын уджалысьяскӧд, велӧдан-консультируйтан пунктса велӧдысьяскӧд, ССК-лӧн мутасса первичнӧй организацияясӧн веськӧдлысьяскӧд, нуӧдӧ консультацияяс, печатайтан машинкаӧн бурджыка вӧдитчӧм серти конкурсъяс, реабилитация конкурсъяс, Брайльӧн гижан да лыддян конкурсъяс.

80-ӧд воясӧ библиотека лэдзӧ «сёрнитысь» небӧгъяс:

• «Система Брайля: пособие для самостоятельно изучающих рельефно-точечный шрифт» (пособие тифлопедагога В. Дорняка);
• «Пособие для поступающих в медицинское училище»;
• «Пособие по |шахматам»;
• коми кыв вылын научно-популярнӧй да художествоа литература (П. Шахов «Зачем живём, зачем нужны», Н. Попов «Настя», М. Игнатов «Дорогие лебеди, скажите же…»);
• «Сборник литературно-художественных произведений незрячих авторов Коми организации ВОС».

1982 во — Полина Диана Михайловна лоӧ библиотекаса директорӧн.

1987 во — пыртӧма техник-реставратор чин, кодлӧн уджӧ пырисны: торъя произведениеяс лыдмӧдӧм, лыддьысьысьясӧн воштӧм (тшыкӧдӧм) гижӧдъяс бӧр лӧсьӧдӧм.

1989 во — ССК-лӧн вынъясӧн библиотекасӧ капитальнӧя дзоньталӧны, содіс библиотекалӧн жырйыс (абонемент, лыддьысян зал, директорлӧн кабинет да содтӧд жыръяс).

1992 во — вынсьӧдӧма библиотекар-лыддьысьысьлысь чин, коді небӧгъяс да газет-журналъяс лыддьӧм кындзи отсалӧ оформитны торъя мортлы письмӧяс, делӧвӧй бумагаяс, литература уджъяс.

1995 во — индӧма выль директорӧс — Светлана Николаевна Кекӧс, выльмӧдӧма кадрӧвӧй составсӧ, пыртӧма литература комплектуйтан да обработайтан уджалысьлысь, овмӧсӧн веськӧдлысьлысь чинъяс. Библиотекаын уджалӧ 8 морт.

Библиотека кутіс уджавны Коми Республикаса йӧзӧс социальнӧя доръян министерствокӧд да Коми Республикаса пенсия фондкӧд. Лӧсьӧдӧма Коми Республикаса культура министерстволысь да Коми Республикаса йӧзӧс социальнӧя доръян министерстволысь синтӧм вермытӧмъясӧс библиотекаын могмӧдӧм серти ӧтувъя уджтас. Пенсия фондлӧн Сыктывкарса юкӧн вичмӧдіс библиотекалы сьӧм, медым ньӧбны компьютер, принтер, электроннӧй ыдждӧдан прибор да «Эверест» принтер, коді печатайтӧ мылькъя-чутъяса Брайль шрифтӧн.

1997 во — библиотекаса директорӧн индӧма Татьяна Павловна Безносиковаӧс. Пыртӧма библиографлысь штатнӧй единица.

Тайӧ жӧ воас ССК-са «Логос» издательско-полиграфическӧй тифлокомплекс (ССК «Логос» ИПТК) вайӧ библиотекаӧ вит тифлоплейер, «Panasonic» кык тифломагнитофон. Техническӧй средствояссӧ вӧлі индӧма сетны лыддьысьысьяслы недыр кежлӧ вӧдитчӧм вылӧ (дон босьттӧг), сідзжӧ наӧн вӧдитчисны лыддьысян залын уджалӧм вылӧ.

1998 во — помалӧма видлавны фондсӧ, редактируйтӧма каталогъяссӧ да картотекаяссӧ, выльысь заводитӧма уджавны радиоузел. Библиотекасӧ пыртӧма «Олӧмын омӧля ветлысь йӧзлы судзсяна гӧгӧртас лӧсьӧдӧм» республикаса социальнӧй торъя мога уджтасӧ (1998—2003).

Библиотека зіля пырӧдчӧ ССК-лӧн Коми республиканскӧй организация котыртӧмсянь 70 во тырӧмкӧд йитӧдын гажӧдчан мероприятиеясӧ: котыртӧ ССК-лӧн мутасса первичнӧй организацияясӧн веськӧдлысьяслы да секретаръяслы семинар, йӧзӧдӧ библиотека пунктъяслысь уджсӧ урчитысь документъяс.

Комплектация юкӧн босьтчӧ лӧсьӧдны «MARC» юӧртан да библиотека системаын электроннӧй каталог, лӧсьӧдсьӧ электроннӧй юӧркутӧд вылын фонд.

1999 во — лӧсьӧдӧма «КонсультантПлюс» юӧр сетан-корсян система. И. Куратовлӧн чужан лунсянь 160 во тыригкежлӧ шыӧдӧма «Куратов И. Избранное» «сёрнитысь» небӧг.

2000 во — библиотека котыртӧмсянь 30 во. Лыддьысьысьыс — 546 морт. Библиотека пырӧ «Коми Республикаса культура да искусство сӧвмӧдӧм да видзӧм» (2000—2005 вояс) республикаса социальнӧй торъя мога уджтасӧ.

ССК «Логос» ИПТК вайӧ библиотекаӧ «Aiwa» маркаа 19 тифломагнитофон.

Библиотека пырӧдчӧ «Синтӧм вермытӧмъясӧс юӧрӧн да библиографияӧн могмӧдан серпас» ставроссияса мониторингӧ. «2001—2003 вояс вылӧ Коми Республикаын вермытӧмъяслы социальнӧй отсӧг сетӧм» уджтас серти библиотека могмӧдӧ став категорияа вермытӧмъясӧс. Лыддьысьысьяс лыдысь омӧля аддзысь вермытӧмъясыс — 81 %, мукӧд категорияа вермытӧм — 9 %.

Федеральнӧй сьӧмкудйысь «ССК „Логос“ ИПТК» ичӧт кывкутана котырсянь библиотекалы вичмӧ синтӧмъяслы юӧр дорӧ визуальнӧй контрольтӧг сёрниӧн пырӧдчан «JAWS» лицензия уджтаса медводдза компьютер, омӧля аддзысьяслы ыдждӧдан электроннӧй устройство, выль Брайль принтер. Спонсоръяс тшӧт весьтӧ лӧсьӧдӧма локальнӧй вез, мый отсӧгӧн йӧзӧс могмӧдан юкӧнъяс вермӧны пырны электроннӧй каталогъясӧ.

2002 во — содіс заочнӧй абонементӧн вӧдитчысьяслӧн лыд. Кырымавсьӧны сёрнитчӧмъяс Сыктывкарса бурдӧдан учреждениеяс бердын, муниципальнӧй районъясын торъя формата литература сетан библиотека пунктъяс восьтӧм вылӧ. Участвуйтӧ Сорос Фондлӧн «Мы сограждане» конкурсын «Формирование установок толерантного сознания на пути создания безбарьерной среды для незрячих инвалидов» проектӧн да CAF войтыркостса бурвӧчан фонд лӧн конкурсын «Создание технического адаптивного центра незрячих пользователей» проектӧн. Йӧзӧдӧ синтӧм тифлопедагог В. Ч. Дорняк йылысь брошюра, печатайтӧ да йӧзӧдӧ Коми Республикаса нимӧдана уджалысь Н. Д. Есинлысь «Соловецкое чудо» да «Северная жемчужина» уджъяс. ССК «Логос» ИПТК сетӧ библиотекаӧ 14 тифломагнитофон.

2003 воын библиотека пырӧ «Коми Республикаса челядь» социальнӧй торъя мога уджтасӧ, «Вермытӧм челядь» (2003—2006) уджтасулӧ, пырӧдчӧ корпоративнӧй проектъясӧ да уджтасъясӧ: «Память поколений: сохранение книжных фондов», «Республиканский коллектор краеведческой литературы в Национальной библиотеке Республики Коми», «Сельская библиотека — культурный, образовательный и информационный центр местного сообщества».

Луи Брайль чужан лунсянь 195 во тыригкежлӧ лэдзӧ «Луи Брайль — создатель современной системы рельефно-точечного письма для слепых» библиография индалысь, «Таланты земли Коми» серияын — синтӧм коми композитор И. М. Козлов йылысь брошюра.

2004 во — водзӧ мунӧ «Коми мулӧн енбиа войтыр» йӧзӧдан серия, кӧні йӧзӧдӧма синтӧм самодеятельнӧй поэт А. Ванеевлысь «Максаковкаысь Гомер» кывбуръяса брошюра. Пырӧдчӧ «Коми Республикаса йӧзӧдчысь учреждениеяслӧн печатнӧй да аудиовизуальнӧй прӧдукциялӧн выставка-презентацияӧ». «РБА-лӧн юӧртан бюллетеньын» медводдзаысь йӧзӧдсьӧ шӧр библиотекар В. Н. Мильковалӧн «Тифлографическӧй пособиеяс синтӧмъясӧс велӧдны отсалӧм могысь» статья.

Библиотека пырӧдчӧ «Ӧнія кадӧ комплекснӧя реабилитируйтӧмын мытшӧдъяс» РФ субъектъясысь челядьӧс реабилитируйтысь специалистъяслӧн ставроссияса сӧвещаниеӧ, «Рытыв-Войвыв регионса публичнӧй библиотекаясын вермытӧмъясӧс могмӧдӧм» регионса семинарӧ (Вӧлӧгда кар), участвуйтӧ «Сьӧкыда ветлысь йӧзкӧд библиотекаяслӧн удж» семинарын (Сыктывкар). Республикаса культура колледжкӧд кырымалӧ библиотека юкӧнса студентъяслысь практика котыртӧм вылӧ сёрнитчӧм.

2005 воын библиотекаын уджалысь пырӧдчӧ Россия-Финляндияса VІ культура форум дырйи (Вӧлӧгда кар) уджъёртасян сёрнитчӧмъясӧ ИФЛА-лӧн Синтӧмъяслы библиотекаяслӧн секцияса пыр уджалысь комитетӧ пырыськӧд, Хельсинки карысь лёка аддзысь йӧзлы «Селия» библиотекаса директорӧс вежыськӧд. Сёрниыс мунӧ сы йылысь, позьӧ-ӧ велӧдны библиотекаын уджалысьӧс вӧчны тактильнӧй небӧгъяс.

Библиотека йӧзӧдӧ ичӧт формаа тифлобиблиографическӧй пособиеяс:

• «Профессионалы с большой буквы»;
• «Французский просветитель, основоположник тифлопедагогики Валентин Гаюи»;
• ыдждӧдӧм шрифтӧн йӧзӧдсьӧ ССК-лӧн Коми дінму организацияса синтӧм авторъяслӧн кывбур чукӧр, «Коми мулӧн енбиа йӧз» синтӧм авторъяслӧн гижӧдъяслысь антология йӧзӧдӧм" проект серти, кутшӧмӧс сьӧмӧн могмӧдӧма «Коми Республикаса культура» (2003—2006 вояс) республиканскӧй торъя мога уджтас серти;

«Синтӧмъяслы компьютернӧй студия лӧсьӧдӧм» проект серти ньӧбӧны компьютер, лазернӧй принтер, факс (2003—2006). Библиотекалӧн фондыс содӧ МР3 формата выль небӧгъясӧн.

Библиотека водзӧ ёртасьӧ республикаса телерадиокомпанияяскӧд. Библиотекаын лоӧмторъяс, сылӧн лыддьысьысьяс йылысь сюжетъяссӧ петкӧдлӧны «СТС-Коми» каналын. Лыддьысьысьяскӧд медводдза интервью-чолӧмалӧмъяс юргӧны библиотекалы 35 во тыран лун кежлӧ «Коми гор» радио пыр.

2006 воын «Козьналӧм вылӧ небӧгъяс» уджтас серти «Синтӧм ичӧт челядьлы серпаса небӧгъяс» регионса бурвӧчан ӧтйӧза фонд козьналісны библиотекалы зэа лёка аддзысь челядьлы небӧг чукӧр

«Тайӧ козинсӧ позьӧ лыддьыны мойдын кодьӧн. Тайӧ зэв бур, мый омӧля аддзысь челядьлӧн ӧні лоӧ позянлун нимкодясьны яръюгыд, интереснӧй да колана небӧгъясӧн», — библиотекаса директор Татьяна Павловна Безносиковалӧн «Трибуна» республикаса газетын интервьюысь (2006 вося лӧддза-номъя тӧлысь 9-ӧд лун (24 №)

.

Медводдзаысь библиотекаса уджалысь пырӧдчӧ «Син серти вермытӧм челядьлы тактильнӧй небӧгъяс» войтыркостса семинар-практикумӧ, кутшӧмӧс котыртіс «Celia» син серти вермытӧмъяслы библиотека (Хельсинки кар, Финляндия)), а директор Безносикова Т. П. — Киров карын «Дзоньвидзалунын дзескӧдӧм позянлуна челядьлы да том йӧзлы велӧдан да юӧртан гӧгӧртас лӧсьӧдӧм» регионкостса конференцияын, участвуйтӧ Коми Республикаса национальнӧй музейын восьтӧм «Ки восьтӧм» выставкаын.

Библиотека вермӧ йитчыны ӧтуввезкӧд.

2007 воын «Коми Республикаса челядь» уджтас серти «Синтӧм да омӧля аддзысь челядьлы компьютернӧй студия» библиотека проектлы сетӧм сьӧм отсӧгӧн ньӧбӧма киӧн вӧдитчан электроннӧй видеоувеличитель (ЭРВУ), кутшӧмӧс лӧсьӧдӧма омӧля аддзысьяслы текстъяс лыддьӧм вылӧ.

2008 во — Галина Михайловна Безносиковаӧс индӧны библиотекаса директорӧн.

Библиотека пырӧдчӧ «Этноинициатива, 2008» да Прп. Серафим Саровский фондлӧн грант босьтӧм вылӧ конкурсъясӧ.

2009 вося тӧвшӧр тӧлысь 27-ӧд лунӧ библиотека вуджӧ стрӧйбаысь, кӧні сійӧ меститчис 38 во, недыр кадся жыръясӧ татшӧм инпас серти: Орджоникидзе ул., 2 а керка. 40 м² ыджда кык жыр 9 тӧлысь кежлӧ лоӧны и лыддьысян залӧн, и абонементӧн. ССК-лӧн Сыктывкарын меставывса организация бердын воссьӧ торъя формата литература сетан передвижнӧй библиотека пункт. Библиотекаса став мероприятиесӧ да проект уджсӧ (презентацияяс, велӧдан семинаръяс) нуӧдӧны республикаса (Коми Республикаса том йӧзлы библиотекаын, С. Я. Маршак нима библиотекаын, Коми Республикаса национальнӧй библиотекаын) да карса библиотекаясын (Сыктывкарса шӧр библиотекаын), Сыктывкарса челядьлӧн да велӧдчысь том йӧзлӧн творчество дворечын, И. А. Куратова нима Сыктывкарса гуманитарно-педагогическӧй колледжын, «Надежда» дзоньвидзалунын дзескӧдӧм позянлуна челядьӧс да томуловӧс реабилитируйтаня шӧринын.

Библиотекаса штатӧ пыртӧма программистлысь чин.

Йирым тӧлысь 14-ӧд лунӧ библиотека вуджӧ дзоньталӧм да дзоньвидзалунын дзескӧдӧм позянлуна йӧзлы гӧгӧртаслысь судзсянлунсӧ могмӧдан став корӧмъяслы лӧсялысь жырйӧ. Сылӧн инпасыс: Ленин ул., 27 к.

Воссьӧ «Мир на кончиках пальцев» пыр уджалысь экспозиция. Экспозицияӧ пырӧны: велӧдчан да нагляднӧй пособиеяс, синтӧмъяслы гижан приборъяс, брайльӧн печатайтысь машинка, торъя формата небӧгъяс да журналъяс, тифлотехника, бытӧвӧй да велӧдчан тифлоприборъяс, пызанвывса ворсӧмъяс, синтӧмъясӧн вӧчӧмторъяс, а сідзжӧ Коми Республикаын синтӧмъяслӧн олӧм да удж йылысь документъяс, архив материалъяс да фотографияяс.

Экспозициялӧн медшӧр юкӧнъяс:

• «Феномен Луи Брайля — шеститочечная письменность»;
• «История „говорящей“ книги и тифлотехники»;
• «Литература специальных форматов»;
• «История Коми регионального отделения Всероссийского общества слепых»;
• «Талант всегда зрячий»;
• «Средства бытовой реабилитации незрячих».

Заводитӧ уджавны синтӧм челядьлы да налӧн бать-мамлы «Челядьӧн лыддьысьӧм» клуб.

Библиотека «Надежда» дзоньвидзалунын дзескӧдӧм позянлуна челядьӧс да ныв-зонмӧс реабилитируйтан шӧринкӧд ӧтвылысь дасьтӧ «Вермытӧм челядьӧс социально-культурнӧя реабилитируйтӧм» уджтас, ёртасьӧ И. А. Куратов нима Сыктывкарса гуманитарно-педагогическӧй колледжын «Ӧтлаын» доброволечьяслӧн отрядкӧд, кырымалӧ КР-са социальнӧя сӧвмӧдан агентствокӧд да сылӧн стационарнӧй учреждениеяскӧд ёртасьӧм йылысь сёрнитчӧмъяс. Социальнӧй учреждениеяс бердын воссьӧны торъя формата литература сетан библиотека пунктъяс. Кырымалӧ республикаса библиотекаяслӧн шӧр система бердын библиотека пунктъяс восьтӧм вылӧ сёрнитчӧмъяс: «Семьяӧн лыддьысян библиотекаын» («Вӧркута» ККМЮ-ын «Библиотекаяслӧн шӧр система» МКУ), Я. М. Рочев нима Сосногорск районса шӧр библиотекаын («Сосногорск» МР МЮ-ын БШС" МУ), 14 №-а библиотека-филиалын («Усинскса БШС» МКУ), Микуньса библиотекаын — Б. А. Старчиков нима филиалын («Емдінса ОШБС» МУ).

2010 во — Синтӧмъяслы Луи Брайль нима Коми Республикаса торъя библиотека пасйӧ гӧгрӧс пас — котыртчӧмсянь нелямын во.

Пыртӧма выль чинъяс: библиотека да инновация удж серти директорӧс вежысь, юралысь бухгалтер. Библиотекалӧн штатыс — 12 морт. Лыддьысьысьыс — 800 сайӧ морт.

Библиотекаын Сыктывкарса да Воркутаса епархиялӧн епископ Питиримлӧн бласлӧвитӧмӧн да вежа Серафим Саровскийлӧн бурвӧчан фонд отсӧгӧн воссьӧ «Возрождение души» дзоньвидзалунын дзескӧдӧм позянлуна йӧзлы духовно-просветительскӧй шӧрин.

«Этноинициатива, 2009» конкурслӧн грант отсӧгӧн библиотека йӧзӧдӧ коми авторъяслысь «сёрнитысь» небӧгъяс: Е. Габовалысь «Любовь на семи ветрах», Н. Куратовалысь «Куим вожа тополь», С. Пылаевалысь «Мойдъяс», О. Юдиналысь «Я не был в этой жизни на войне», Е. Козловалысь «Лӧз клянича».

Библиотека лоӧ культура да искусство юкӧнын став войтырлы тӧдчана творческӧй проектъяслы отсӧг сетӧм вылӧ Россия Федерацияса президентлӧн грантъяс серти конкурсын вермысьяс лыдын. Проектлӧн бӧртасъяс: «Семьяӧн лыддьысян библиотека» (Воркута карса библиотекаяслӧн шӧр система) да Шӧр библиотека (Ухта карса библиотекаяслӧн шӧр система) бердын восьтӧма «МИР» тифлошӧринъяс" (Милосердие, Юӧр, Реабилитация) син серти вермытӧмъясӧс социокультурнӧя реабилитируйтан шӧринъяс. Шӧринъясын эмӧсь JAWS сёрниа компьютеръяс да омӧля аддзысьяслы 17 дюйма монитор экранъяс. Луи Брайль нима библиотека кыдзи ресурснӧй шӧрин ньӧбӧ «Focus» Брайль дисплей — Коми Республикаын татшӧм тшупӧда дзик ӧти техника приспособление.

Библиотека пырӧдчӧ Россия—Финляндияса XI культура форумӧ (Хямеенлинна кар, Финляндия), нуӧдӧ «Celia» лёка аддзысь йӧзлы библиотекаса пресс-секретаркӧд (Хельсинки, Финляндия уджъёртасьӧм серти сёрнитчӧмъяс, выступайтӧ «Россиялӧн да Финляндиялӧн библиотка уджын ёртасьӧм» тематическӧй семинар вылын. Уджъёртасьӧм отсӧгӧн артмис «Войвывса мойдъяс» финн-йӧгра войтырлысь мультимедия мойд чукӧр лэдзӧм" ӧтувъя проект (коми, финн да роч кывъяс вылын)

2012 во — библиотека лоис Коми Республикаса культура сьӧмкуд учреждениеӧн. Библиотекалӧн тыр ним — «Синтӧмъяслы Луи Брайль нима Коми Республикаса торъя библиотека» Коми Республикаса канму сьӧмкуд учреждение.

Фонд

Библиотекалӧн фондыс — 60 сюрсысь унджык небӧг. На пиысь 45 сюрсысь унджык экземпляр — тайӧ торъя формата йӧзӧдӧмторъяс: мылькъя-чутъяса, «сёрнитысь», мылькъя-графикаа пособиеяс, ыдждӧдӧм шрифтӧн лэдзӧм небӧгъяс да журналъяс.

SARA сканируйтысь да лыддьысьысь машина	«Индекс-Эверест» Брайль принтер	Focus Брайль дисплей

Тэчас

Могмӧдан группа сетӧ гортӧ литература, юӧртӧ воӧм выльторъяс йылысь, отсалӧ бӧрйыны колана изданиеяс да материалъяс, консультируйтӧ тифлотехническӧй средствоясӧн, уджтасуловӧн да мобильнӧй телефонъясӧн вӧдитчӧм серти, котыртӧ культурно-просветительскӧй да юӧртан-библиографическӧй мероприятиеяс, кыдзи библиотекаын, сідзи и сыысь бокын.

Библиотека, инновацияда йӧзӧдчан удж серти группа кывкутӧ проектнӧй, йӧзӧдчан, методическӧй да маркетинг удж вӧсна. Участвуйтӧ нормативнӧй документъяс, инструкцияяс, методика материалъяс лӧсьӧдӧмын; кывкутӧ проектнӧй да туялан уджысь; лэдзӧ йӧзӧдан прӧдукция.

Фондъяс да каталогъяс комплектуйтан, обработайтан, котыртан группа кывкутӧ библиотекалысь фонд лӧсьӧдӧм да сійӧс видзӧм вӧсна, обработайтӧ выль воӧм изданиеяс да нуӧдӧ электроннӧй каталог.

Луи Брайль нима библиотека — сійӧ и культура да прӧст кад коллялан шӧрин. Библиотекаын уджалӧны интересъяс серти шӧринъяс, клубъяс да кружокъяслӧн. Уджалӧ гортса абонемент — небӧгъяссӧ вайӧны лыддьысьысьяслы гортӧдзыс, кодъяслӧн абу позянлун ветлыны библиотекаӧ, да заочнӧй абонемент — небӧгъяссӧ мӧдӧдӧны пошта пыр Коми Республикаса ылі районъясын олысь лыддьысьысьяслы.

Йӧзӧдчан удж

Йӧзӧдчан уджсӧ Луи Брайль нима библиотека нуӧдӧ 1978 восянь. Медшӧр нырвизьыс — чужан му туялан небӧгъяс роч да коми кывъяс вылын быд юӧркутӧд вылын лӧсьӧдӧм. Вонас йӧзӧдӧны 5-ысь унджык небӧг (50 сайӧ экз.), на лыдын: коми авторъяслӧн художествоа гижӧдъяс, тшӧтш и самодеятельнӧй авторъяслӧн, историко-краеведческӧй сюрӧса небӧгъяс, научно-популярнӧй, челядьлы да мукӧд литература.

Библиотека нуӧдӧ уна сикас формата изданиеяс йӧзӧдӧм серти удж. На лыдын:

• «Коми Республикаса канму символъяс» да «Коми Республикаса административнӧй карта» (мылькъя-графикаа пособиеяс);
• «Сыктывкарса храмъяс» (уна формата петас);
• Сыктывкарса нималанторъяс да культура объектъяс" да «Коми Республикаса нималанторъяс» (альбом-индалысьяс);
• «Коми Республикаса художникъяс: Рэм Ермолин» (небӧгӧн йӧзӧдӧмтор).

Петавлӧны сборникъяс «Золотой фонд коми литературы в „говорящей“ книге для незрячих» библиотека серияын. На лыдын аудио небӧгъяс — коми литературалы подув пуктысь Иван Куратовлӧн гижӧдъяс, коми поэт да драматург, ӧтйӧза уджалысь, коми национальнӧй театрлы подув пуктысь Виктора Савинлӧнкывбуръяс. Фондын эмӧсь ӧнія тӧдса коми гижысьяслӧн да поэтъяслӧн небӧгъяс, кодъяс петкӧдчӧны дикторъяс пыдди. Тайӧ небӧгъяссӧ ӧтувтӧма "Живые голоса коми писателей"серияӧ.

Йӧзӧдчан уджын тӧдчана нырвизь — тайӧ аудиобобинаясысь ас му туялан небӧгъяссӧ ӧнія юӧркутӧдъяс вылӧ — флэш-картаяс вылӧ — выльысь йӧзӧдӧм (выльысь гижӧм) да криптозащитаа «сёрнитысь» небӧгъяслӧн базаын документъяс видзӧм.

Пасйӧдъяс

Литература

• Культурная летопись столицы: из истории отрасли культуры г. Сыктывкара / авт.-сост. О. Ю. Елфимов ; Администрация МО ГО «Сыктывкар», Управление культуры МО ГО «Сыктывкар». — Сыктывкар, 2018. — 147 с.
• Трибуна: народная газета [Текст] / Федерация профсоюзов Республики Коми, Акционерная нефтяная компания «Коми ТЭК», ФСУ "Издательство «Трибуна». Сыктывкар : АО «Коми республиканская типография», 2006.
• Егоров Пантелеймон Романович. Использование информационных технологий в издании учебно-методической и научно-популярной литературы по системе Л. Брайля // Вестник Северо-Восточного федерального университета им. М. К. Аммосова. — 2009. — № 2.
• Суворова В. М. Об оптимизации специальных библиотек // Культура: теория и практика. — 2021. — № 2 (41).

Ыстӧгъяс

• Официальный сайт