Артистлӧн лун
| Артистлӧн лун | |
|---|---|
 | |
| Сикас | Уджсикас |
| Лӧсьӧдысь | Россия Федерацияса веськӧдлан котыр |
| Пасйӧны | быд во |
| Кадпас | тӧвшӧр тӧлысь 17-ӧд лун |
Артистлӧн лун (рочӧн День артиста) — Россияын уджсикас гаж, лӧсьӧдӧма 2025 вося сора тӧлысьын. Гажсӧ лӧсьӧдісны Россия Федерацияса театральнӧй деятельяслӧн котырӧн веськӧдлысь Владимир Машковлӧн водзмӧстчӧм серти. Гажӧдчан лунсӧ сиӧма актёрскӧй мастерство система лӧсьӧдысь Константин Станиславскийлӧн чужан лунлы[1]. Тайӧ музыкантъяслӧн, сьылысьяслӧн, киноса, театрса да циркса артистъяслӧн уджсикас гаж[2].
Россия Федерацияса культура министерстволы колӧ лэдзны ведомствоса нормативнӧй акт, мый вынсьӧдас тайӧ шуӧмсӧ[3].
История
1917 воын Россияын медводдзаысь вӧлі Роч актёрлӧн лун, сійӧс котыртліс Роч театральнӧй котыр, медым чукӧртны театр сӧвмӧдӧм да гӧль актёръяслы отсӧг вылӧ сьӧм[4].
2024 вося ӧшым тӧлысь заводитчигӧн Россия Федерацияса театральнӧй деятельяслӧн котырса секретариатлӧн паськӧдӧм чукӧртчылӧм дырйи Владимир Машков вӧзйис лӧсьӧдны Артистлысь лун. Сылӧн кывъяс серти: «тайӧ луныс лоӧ театральнӧй котырлы тӧдчанаӧн. Сылысь нимсӧ бӧрйӧма абу прӧста сідз, сійӧ йитчӧм почёт нимъяскӧд: нимйӧза да нимӧдана артист, найӧс сетӧны театральнӧй, музыкальнӧй, циркӧвӧй, эстраднӧй да киноискусство юкӧнын тӧдчана заслугаясысь да шедӧдӧмторъясысь»[5].
Сідзжӧ Машков пасйис, мый татшӧм ногӧн Россия Федерацияса театральнӧй деятельяслӧн котыр кӧсйӧ бӧр лӧсьӧдны Мария Гавриловна Савиналысь да Театральнӧй котырлысь историческӧй водзмӧстчӧмсӧ, кор во чӧжӧн актёр лунӧ артистъяс петкӧдлісны спектакль, а сьӧмсӧ мӧдӧдлісны Петыркарын сценавывса ветеранъяслысь медводдза керка стрӧитӧм вылӧ[5].
Актёръяслӧн мукӧд гажъяс
Моз тӧлысь 26-ӧд лунӧ став мирын, тшӧтш и Россияын, пасйӧны Актёръяслысь войтыркостса лун, мый вӧлі лӧсьӧдӧма миян эраӧдз III нэмын олысь Важ Римса актёр Генесий Римскийлӧн казьтылӧм могысь, коді сцена вылын христианаӧс пародируйтігӧн пырис сэкся выль религияӧ да ачыс лоис христианинӧн, мый йылысь восьсӧн висьталіс йӧз водзын да вӧлі казнитӧма. Бӧрынджык сійӧс вӧлі канонизируйтӧма да шуӧма актёръясӧс, музыкантъясӧс да эпилептикъясӧс дорйысьӧн[6][7].
Пасйӧдъяс
- ↑ В России 17 января будет отмечаться День артиста, Interfax.ru (15 моз тӧлысь 2025). Шыӧдчан кадпас: 3 моз тӧлысь 2025.
- ↑ В России 17 января будут отмечать новый праздник — День артиста, Коммерсантъ (3 моз тӧлысь 2025). Шыӧдчан кадпас: 15 моз тӧлысь 2025.
- ↑ В России будет отмечаться День артиста (рус.). government.ru (3 моз тӧлысь 2025). Шыӧдчан кадпас: 15 моз тӧлысь 2025.
- ↑ День русского актера. Проект 1917 (рус.). project1917.ru. Шыӧдчан кадпас: 15 моз тӧлысь 2025.
- ↑ 1 2 Машков предложил учредить День артиста, TACC. Шыӧдчан кадпас: 15 моз тӧлысь 2025.
- ↑ Генесий Мим. www.pravenc.ru. Шыӧдчан кадпас: 15 моз тӧлысь 2025.
- ↑ Catholic Encyclopedia: Genesius (англ.). www.newadvent.org. Шыӧдчан кадпас: 15 моз тӧлысь 2025.