Блогерлӧн войтыркостса лун
| Блогерлӧн войтыркостса лун | |
|---|---|
| Сикас | Профессиональнӧй |
| Официальнӧя | International Weblogger’s Day |
| Вынсьӧдӧма | 2004 |
| Пасйӧны | быд во |
| Кадпас | лӧддза-номъя тӧлысь 14-ӧд лун |
| Йитчӧма | блогйӧм |
Блогерлӧн войтыркостса лун (англичан International Weblogger’s Day, тӧдса кыдз и InWeDay) — быдвося гаж, пасйӧны лӧддза-номъя тӧлысь 14-ӧд лунӧ. Лунсӧ сиӧма мир пасьталаысь ӧтуввезса авторъяслы да лӧсьӧдӧма найӧс ӧтувтӧм могысь, медым сӧвмӧдны блогйӧмсӧ кыдзи асьсӧ петкӧдлан да мӧвпъясӧн юксян средство.
Профессия йылысь
Блогер - сійӧ морт, коді нуӧдӧ блог, тшӧкыда йӧзӧдӧ гижӧдъяс, юксьӧ аслас мӧвпъясӧн, опытӧн да тӧдӧмлунъясӧн видзӧдысьяскӧд. Блог нуӧдӧм вермас лоны кыдзи хоббиӧн, сідзи и профессияӧн.
Профессиональнӧй блогеръяс вермӧны нажӧвитны асланыс блог вылын уна сикас методъяс отсӧгӧн:
- Реклама: блог вылӧ реклама баннеръяс да контекстнӧй реклама меститӧм.
- Партнеръяслӧн уджтасъяс: мукӧд компанияяслысь прӧдуктъяс да могмӧс вӧзйӧмысь нажӧтка.
- Спонсорство: спонсируйтӧм постъяс йӧзӧдӧмысь компанияяссянь отсӧг босьтӧм.
- Ас прӧдуктъяс да могмӧс вузалӧм: небӧгъяс, курсъяс, консультацияяс да мукӧд прӧдукт, мый лӧсьӧдӧма блогер. Профессиональнӧй блогеръяслӧн тшӧкыда эм ыджыд опыт гижӧмын, маркетинг да социальнӧй везъясӧн веськӧдлӧмын. Найӧ лӧсьӧдӧны сэтшӧм контент, мый кыскӧ да кутӧ аудиториясӧ, анализируйтӧны блогӧ волысьяслысь статистикасӧ да зільӧны бурмӧдны ассьыныс кужанлунъяссӧ ыджыдджык вермӧмъяс шедӧдӧм могысь[1].
История
Блогеръяслысь ставмирса лун лӧсьӧдӧм йылысь мӧвпыс чужис 2004 воын блогеръяслӧн котырын. Найӧ кӧсйисны ӧтувтны ставнысӧ, кодъяс занимайтчӧны блогӧн. Медводдзаысьсӧ 400 сайӧ странаысь 500 гӧгӧр блогер ошкисны тайӧ водзмӧстчӧмсӧ, и 2004 вося лӧддза-номъя тӧлысь 14-ӧд лунӧ вӧлі нуӧдӧма медводдзаысь блогерлысь войтыркостса лун[2]. 2007 воын тайӧ лунсӧ кутісны пасйыны и мукӧд блог кутысьяс, асланыс лист бокъяс вылын йӧзӧдісны уджъёртъяскӧд сӧгласлун йылысь юӧр[3].
Тайӧ гажлӧн могыс вӧлі лӧсьӧдны ӧтувъя лун, кор блогеръяс вермисны юксьыны асланыс вермӧмъясӧн, сёрнитны тӧдчана темаяс йылысь да прӧстӧ пасйыны ассьыныс пырӧдчӧмсӧ ӧтуввезса авторъяслӧн глобальнӧй котырӧ. Сідзжӧ сылӧн могъяс лыдын - пыдди пуктыны ӧтуввез да медиа сӧвмӧдӧмӧ блогеръяслысь пайсӧ, ышӧдны выль авторъясӧс лӧсьӧдны блогъяс да сӧвмӧдны налысь кужанлунъяссӧ.
Медводдза воас найӧ йӧзӧдлісны асланыс онлайн дневникъясын торъя гижӧдъяс, а ӧткымын карын котыртлісны офлайн-аддзысьлӧмъяс, кӧні блогеръяс вермисны аддзысьлыны ас костаныс да сёрнитны асланыс проектъяс йылысь[4].
2000-ӧд вояс шӧрланьыс Блогерлӧн ставмирса лун лои блогосфераын тӧдчана лоӧмторйӧн. Тайӧ лунӧ мир пасьталаысь блогеръяс йӧзӧдісны торъя гижӧдъяс, юксисны асланыс мӧвпъясӧн да шедӧдӧмторъясӧн, а сідзжӧ пырӧдчисны уна сикас онлайн да офлайн мероприятиеясӧ.
Традицияяс
Тайӧ лунӧ блогеръяс гижӧны ӧта-мӧдныслы ошкана кывъяс, юксьӧны радейтана каналъясӧн да ресурсъясӧн, а сідзжӧ нуӧдӧны видзӧдысьяскӧд интерактивъяс. Ӧткымын странаын нуӧдӧны блогеръяслысь офлайн аддзысьлӧмъяс, кӧні контент лӧсьӧдысьяс вермӧны тӧдмасьны уджъёртъясыскӧд. Рочмуын тайӧ лунӧ сідзжӧ быд во нуӧдӧны блогеръяслысь "ловъя" аддзысьлӧмъяс.
Блогерлӧн войтыркостса лункӧд тшӧтш эм и блоглӧн лун (англичан Blog Day). Сійӧс пасйӧны моз тӧлысь 31-ӧд лунӧ[5].
Блогерлысь войтыркостса лунсӧ вермӧ пасйыны быд ӧтуввез-контент лӧсьӧдысь, гижӧдчысь лыд да блог тема вылӧ видзӧдтӧг[6].
Видзӧдӧй тшӧтш
Ыстӧгъяс
- ↑ Международный день блогера. ast.ru (14 лӧддза-номъя тӧлысь 2023). Шыӧдчан кадпас: 29 ода-кора тӧлысь 2024.
- ↑ «Международный день блогера» час общения. ФКУ «Цифровая культура» (14 лӧддза-номъя тӧлысь 2024). Шыӧдчан кадпас: 29 ода-кора тӧлысь 2024.
- ↑ Международный день блогера. «Тюменская областная научная библиотека имени Дмитрия Ивановича Менделеева». Шыӧдчан кадпас: 29 ода-кора тӧлысь 2024.
- ↑ Wayback Wednesday: International Webloggers Day 2004. Cosmic Observation. Шыӧдчан кадпас: 29 ода-кора тӧлысь 2024.
- ↑ 14 июня отмечается Международный день блогера. Информационный портал «РЕВИЗОР.РУ» (14 лӧддза-номъя тӧлысь 2022). Шыӧдчан кадпас: 29 ода-кора тӧлысь 2024.
- ↑ Международный день блогера в 2023 году — история и особенности праздника. «МИЦ «Известия» (13 лӧддза-номъя тӧлысь 2023). Шыӧдчан кадпас: 29 ода-кора тӧлысь 2024.