Квадробер

Квадробер
Лоис	2020
Паськалӧма	Став мир пасьтала

Квадро́бер (лат. quattuor — «нёль» и англ. aerobics — «аэробика») — квадробикаӧн занимайтчысь морт, абу официальнӧй спорт, челядь да 7-14 арӧса томуловлӧн субкультура петкӧдлысь. Квадроберъяс пасьталӧны пемӧс маскаяс да кутӧны асьныссӧ на моз.

Квадроберъяс йылысь кутісны ёна вензьыны, тшӧтш и философъяс, профессиональнӧй психологъяс и психиатръяс, политикъяс.

Россияын квадроберъяс дорӧ интерес ышӧдіс бизнессӧ заводитны вӧчны налы тӧваръяс. Маркетплейсъяс вылын лоисны квадроберъяслы лӧсялана да лӧсявтӧм парфюмерия, искусственнӧй куысь атрибутика, кӧрым да мукӧд тӧвар. Субкультуралы тӧвар пыдди кутісны рекламируйтны весиг сыкӧд некутшӧм йитӧдтӧм прӧдукция.

Ортсыладор да ӧбича

Квадроберъяс бӧрйӧны аслыныс кажитчана пемӧс да лӧсьӧдӧны сылысь образсӧ маскаяс, пуктӧм лапаяс, пельяс, бӧж отсӧгӧн. Тшӧкыда квадроберъяс асьныс вӧчӧны костюм юкӧнъяссӧ, ӧткымын квадробер пасьтавлӧны пемӧслысь костюмсӧ ставнас, имитируйтӧны сылысь движениеяссӧ, ворсӧны мукӧд квадроберъяскӧд, аддзӧны ассьыныс местасӧ «стада» иерархияын. Квадроберъяс велӧдчӧны унатор вӧчны пемӧсъяс ногӧн, шуам, котравны, чеччавны, турун вылын ворсны. Найӧ лӧсьӧдӧны асланыс персонажъяслысь историяяс, котыртӧны офлайн да онлайн группаяс, котыртӧны сходкаяс, снимайтӧны роликъяс соцвезъяслы да юксьӧны опытӧн ӧта-мӧдыскӧд .

Спорт и субкультура

Квадроберъяс вӧчӧны аэробнӧй упражнениеяс: места вылын котӧртӧм, мытшӧд вывті чеччалӧм да с.в. Та дырйи квадроберъяслӧн ортсыладорыс петкӧдлӧ налысь субкультурасӧ. И сійӧ оз сет сорлавны квадроверъясӧс спортсменъяскӧд либӧ кутшӧмкӧ неформальнӧй ӧтмунӧмкӧд. Но овлывлӧ и сідз, мый субкультура лоӧ тырвыйӧ спорт дисциплинаӧн, шуам, хоббихорсинг.

Квадроберъяс, терианъяс, фуррияс

Квадроберъяслӧн ортсыладорыс матын мӧд субкультуракӧд — фурри. Но эмӧсь ӧткымын принципиальнӧй торъялӧмъяс: квадроберъяс зільӧны кыдз позьӧ стӧча повторитны пемӧсъяслысь движениеяссӧ, а фуррияс петкӧдлӧны антропоморфнӧй (морт сяма) пемӧсъясӧс. Квадроберъяс ёнджыкасӧ занимайтчӧны аэробикаӧн, фуррияс ёнджыка лӧсьӧдӧны ассьыныс образсӧ творчество могысь. Квадроберъяс пӧвстын паныдасьлӧны терианъяс либӧ териантропъяс — йӧз, кодъяс оз прӧстӧ мыйкӧ вӧчны пемӧс моз, а идентифицируйтӧны асьныссӧ пемӧсӧн.

Паськалӧм

Квадроберъяслӧн медводдза котыр «ВКонтакте» соцвезйын вӧлі лӧсьӧдӧма 2022 вося рака тӧлысьын. 2024 вося йирым тӧлысь кежлӧ вӧлі 46 татшӧм котыр, ставнас 17 503 гижӧдчысь. Та вӧсна Рунетын квадробинг — неыджыд лоӧмтор. Но 2024 вося моз тӧлысь 31-ӧд лунӧ Надымын сьылысь Миа Бойколӧн концерт вылын лоӧмтор бӧрын, кор сцена вылӧ петіс нывка-квадробер, СМИ-ын да соцвезъясын тайӧ тема йывсьыс казьтылӧм лыдыс ёна содіс (суткинас 5,1-30 сюрс казьтылӧм). Заводитчис паськыд общественнӧй дискуссия, кытчӧ пырӧдчисны Федерация Сӧветса сенаторъяс да Госдумаса депутатъяс, а сідзжӧ медиа- да политтехнология юкӧнын специалистъяс.

«Ӧні тема йылысь ёна сёрнитӧны, тшӧтш и политикъяс, и быд выль ролик петӧм либӧ быд выль шыӧдчӧм бӧрын сійӧ нӧшта на ёсьмӧ», — Игорь Лащевский, АГТ коммуникационнӧй агентствоса директор.

Оланпастэчасӧн ладмӧдӧм

2024 вося йирым тӧлысьын Госдумаса депутат Сергей Колунов вӧзйис кыскыны кывкутӧмӧ челядь-квадроберъяслысь бать-мамӧс. Шуам, мырддьыны бать-мамлысь инӧдъяссӧ, кыскыны административнӧй либӧ уголовнӧй кывкутӧмӧ. Депутат ыстіс водзмӧстчӧмсӧ Россияса президент бердын кагалысь правояс дорйысь уполномоченнӧйлӧн аппаратӧ.

2024 вося йирым тӧлысьын Госдумаса депутатъяслӧн котыр босьтчис дасьтыны 16 арӧссянь тыр арлыдтӧмъясӧс да асьнысӧ квадроверъясӧс официальнӧя петкӧдлысьяслы Административнӧй кодексӧ вежсьӧмъяс. Йӧз да гортса пемӧсъяс вылӧ усьласьӧмысь кӧсйӧны мыждыны хулиганствоысь да штрапуйтны 5 сюрс шайт дон. Квадроберлы кӧ абу на 16 арӧс, сылысь бать-мамсӧ вермасны содтӧд штрапуйтны 500 шайтӧн воспитательнӧй могъяс абу колана ногӧн олӧмӧ пӧртӧмысь.

Узбекистанса МВД-лӧн юӧр серти, челядь кӧ квадробер, то тайӧ лыддьыссьӧ бать-мамӧн ассьыныс могъяс олӧмӧ пӧрттӧмӧн. Таысь урчитӧма штрап 1,875 миллион сум — 14 сюрс гӧгӧр шайт.

Бизнеслӧн реакция

2024 во чӧжӧн Россия пасьта шӧркодя квадроберъяслы тӧвар коланлуныс содіс 12 пӧв, Петыркарын - 37 пӧв, Москваын - матӧ 45 пӧв. Маркетплейсъясын паськыда петкӧдлӧма маскаяс, лапаяс, пельяс да бӧжъяс, будка-керкаяс да куйланінъяс, велӧдан курсъяс, стилистъяслысь услугаяс. 2024 вося йирым тӧлысьын маркетплейсъясын кутісны вӧзйыны квадроберъяслы торъя кӧрым. Кӧрымлӧн тэчасыс: сакар, какао вый вежысь — пальма ядро вый, ниртӧм какао, кос йӧв сыворотка, косьтӧм кос йӧв, кокос вый, какао порошок, экструдируйтӧм шыдӧсъясысь продукт (рис, шобді пызь, сакар, какао порошок, сов).

Фонтанка.ру газет дасьтіс квадроберъяслы вузӧслысь торъя видлалӧм. Паськалӧмаӧсь ки помысь вӧчӧм наборъяс: маркетплейсъясын искусственнӧй куысь бӧжъяссӧ донъявлӧмаӧсь 200-300 шайтысь, но бӧжъяс да пельяс вылӧ 1,5 метр искусственнӧй куыс сулалӧма нин 6000-7000 шайт. Парфюмеръяс лӧсьӧдісны «збыль квадроберлы» ароматъяс, а сідзжӧ квадроберъясӧс повзьӧдысь ароматъяс (шуӧны, мый тайӧ - груша, арбуз либӧ яблӧк дук). Вузавлісны тренируйтчӧм вылӧ пластик барьеръяс (900 - 4000 шайт), профессиональнӧй модельеръяслысь тӧваръяс — найӧ дасьӧсь вӧліны вӧчны костюмсӧ 20-30 сюрс шайтысь. Ёна зілисны и быдлунъя тӧваръяс вузалысьяс: «тигр принта вельвет гачьяс маркетинг зільӧмӧн пӧрӧны "квадроберлы гачӧ"».

Ыстӧгъяс

Тайӧ материал вылӧ право кутысьнас лоӧ «РУВИКИ» ӧтуввез-энциклопедия» асшӧрлуна абу коммерческӧй организация.
Мукӧд сайтъяс вылын тайӧ материалнас позьӧ вӧдитчыны сӧмын сэк, кор «РУВИКИ» ӧтуввез-энциклопедия» ААКО сетас позянлунсӧ.