Козин лун

Козин лун
Рӧштвося коз улын козинъяс
Сикас	Рӧштвося гаж
Мӧд ногӧн	Кӧрӧбка лун, Boxing Day
Пасйӧны	Ыджыд Британия  Австралия  Канада  Выль Зеландия  Кирибати  Самоа да мукӧд.
Кадпас	ӧшым тӧлысь 26-ӧд лун
Празднуйтӧм	ӧшым тӧлысь 26-ӧд лун
Йитчӧма	Рӧштвокӧд
Медиафайлы на РУВИКИ.Медиа

Козин лун (рочӧн День подарков, англичан Boxing Day) — Ыджыд Британияын, Австралияын, Выль Зеландияын, Канадаын да мукӧд странаын пасйӧм гаж. «Козин лун» пасйӧны быд во ӧшым тӧлысь 26-ӧд лунӧ.

История да пасйӧм

«Boxing day» англичан кывтэчассӧ пырджык вуджӧдӧны роч кыв вылӧ кыдз «День подарков», но сылӧн веськыд вежӧртасыс — «Кӧрӧбка лун» (козинъяс улӧ кӧрӧбкаяс).

Эм некымын версия, кыдзи артмӧма гаж нимыс:
• Ыджыд Британияын традиция серти Рӧштволӧн мӧд лунӧ семья гартлӧма праздничнӧй пажын колясъяссӧ да ичӧтик козинъяссӧ кӧрӧбкаясӧ да новлӧдлӧма найӧс висьысьяслы да гӧльяслы козин пыдди. Пырджык козинъяссӧ да гӧснечьяссӧ кӧрӧбкаясӧ тэчӧмаӧсь челядь, кодъяс сэсся отсалӧмаӧсь разӧдны найӧс гӧльяслы.
• Ӧшым тӧлысь 25-ӧд лунӧ став мирын протестантъяс да католикъяс пасйӧны Кристослысь Рӧштво, коді лоӧ медшӧр христианскӧй гажӧн. Рӧштвося традицияяс серти, ӧшым тӧлысь 24-ӧд лунсянь 25-ӧд лун войӧ Санта Клаус пуктӧ выльвося коз улӧ козинъяс. Асывнас, кор ставӧн садьмӧны, заводитӧны восьтавны кӧрӧбкаяс, кӧні эмӧсь козинъяс. Семья кӧ ыджыд да уна челядя, керкаыс тырӧ тыртӧм кӧрӧбкаясӧн. Найӧс челядь оз век тэрмасьны идравны, ӧд налы кажитчис пытшкӧсыс... Тыдалӧ, та вӧсна тайӧ лунсӧ англи кывъя странаясын и кутісны шуны «кӧрӧбка лунӧн», но некымын кыв вылӧ вуджӧдігӧн аддзисны, мый «Козин лун» нимыс лӧсьыдджык.
• Эм мӧд версия, мый нимсӧ гажлы сетӧмаӧсь кӧрӧбкаяс, мыйясӧн козин босьтысьяс бӧр волісны вузасянінӧ, медым вежны козинсӧ, эз кӧ сійӧ во налы сьӧлӧм вылас (вузасянінъясын векджык сетӧны татшӧм позянлунсӧ).
• Эмӧсь йӧз, кодъяс лыддьӧны, мый буквальнӧй вуджӧдӧмыс — «Бокс лун» (т.к. тайӧ спорт сикасыс английскӧй кыв вылын гижсьӧ кыдзи boxing), и тайӧ нимыс артмӧма сы вӧсна, мый Рӧштво пасйыны чукӧртчӧм йӧз ворслӧмаӧсь боксӧн. Британия содружествоса Африкаса некымын странаын «Козин лунӧ» збыльысь нуӧдӧны профессионалъяс пӧвстын боксёръяслысь вермасьӧмъяс.
• Важӧн аристократъяс пӧвстын вӧлі примитӧма ӧшым тӧлысь 26-ӧд лунӧ козьнавны козинъяс вассалъяслы да слугаяслы, кодъяслы тайӧ лунӧ сетлісны шойччан лун, ӧд Рӧштво дырйи слугаяс вӧліны гаж дырйи кӧзяева ордын.
• Ӧшым тӧлысь 26-ӧд лунӧ купечьяс сеталісны асланыс уджалысьяслы (вузасьысьяслы, слугаяслы, приказчикъяслы) аслыспӧлӧс рӧштвося премияяс — чӧскыд сёян да чӧсмасянторъяс тыра кӧрӧбкаяс. Ӧткымынъяс лыддьӧны, мый тайӧ и сетіс нимсӧ гажлы .

Эм нӧшта на некымын версия тайӧ гаж ним артмӧм йылысь. Веськыда кӧ, странаясын, кӧні пасйӧны «Козин лун», торйӧн нин та йылысь оз мӧвпавны. Тырмымӧн, мый тайӧ шойччан лун да бур католическӧй рӧштво традицияяс пиысь ӧти.

Пасйӧдъяс