Коми кыв фонетика

Фонетика (греч φωνητικός — «шыа»; φωνή — «шы» кывйысь) – сэтшöм наука, мый велöдö сёрни шыяссö да налысь артмöм-юргöмсö, быдпöлöс вежласьöмсö, кодöс позьö казявны торъякыв быд инын да мöд кыв öшмöсысь ас кывйын ладмöдiгöн, а сiдзжö торъякывйын личкöмсö (ударениесö), туялан-видлалан кывйын шуанногсö (интонациясö), слогъяс да гырысьджык юкöнъяс вылö торйöдан подувъяссö.

Фонетикалӧн сикасъяс

Фонетика аслас велöдантор да могъяс сертиыс торъялö уна нырвизь вылö:

• Серпасалан (описательнöй) фонетика велöдö урчитöм кадколастса (синхрония тшупöдын) торъя кывлысь шы тэчассö, системасö. Шуам, торъя сiйö либö мöд кывлысь фонетическöй системасö позьö петкöдлыны сылöн öнія тшупöдын.
• Описательнöй фонетикаыс констатируйтö да вайöдö öтувъя системаö торъя фактъяссö, петкöдлö быд кывйын фонетикаа аслыпöлöслунъяссö.
• Историческöй фонетика велöдö, кыдзи муніс шы системаыслöн вежсьöмыс, кутшöм шы единицаясыс водзті вöліны кывйын и мый вылö найö вежсисны бöрынджык, кыдзи вежсявлісны шы вежласьöмъясыс (чередуйтчöмъясыс) торъя нэмö, эпохаö.
• Орччöдан (сопоставительнöй) фонетика велöдӧ типология боксяньыс кык торъялана кывйыслысь шыкуд тэчассö да тöдчöдны öткодьлунсö да торъяланлунсö. Пырджык тайö туялöмыс овлö чужан да велöдан кывъяс велöдігöн. Тайö колö, медым тöдмавны абу чужан кывйыслысь аслыспöлöслунсö, кыккывъя республикаясын, шуам комиа-роча либö роча-комиа кыккывъялунсö.
• Öткодялан (сравнительнöй) фонетика велöдö öткодь кывъяслысь шыкуд тэчассö типология боксяньыс да туялігас пасйöны öткодь да торъялана признакъяссö. Тайö колö, медым аддзыны рöдвуж кывъяслысь öтувъялунсö, да сійö, мый найöс йитö шыкуд тэчасын.
• Ӧтувъя (общöй) фонетика велöдö мортыслысь шы артмöдан аппаратсö (речевöй аппарат) да шыяссö артмöдöмын аппаратнас вöдитчöмсö, видлалö сёрни шыяссö акустика боксяньыс, а сідзжö найöс тöдмалöм боксяньыс. Общöй фонетикаыс тöдчöдö сёрниын шыяслысь вежласянногъяссö, налысь закономерносьтъяссö, сетö шы сикасалöмсö да петкöдлö шы да фонема (абстрактнöй фонетическöй единица) костын соотношениесö, шысетöмлысь подулалö öтувъя принципъяссö шыяс, слогъяс да ыджыдджык единицаяс вылö юклігöн. Общöй фонетикаыс гöгöрвоöдö и единицаяс туялан методъяссö.

Öнія коми литературнӧй кывйын фонема тэчас

Ӧнія коми литературнӧй кывлӧн фонема тэчасыс артмӧ 33 сёрни шы единицаысь, таысь кындзи торйöдöны нёль сёрни шы единица, кодъяс бергалöны заимствуйтан кывъясын.
Сёрни шыяс пöвстын торъялö 26 согласнöй да 7 гласнöй шы.
Збыльвывса коми согласнöй сёрни шыяс: /б/, /п/, /м/, /в/, /д/, /т/, /з/, /с/, /н/, /л/, /р/, /ж/, /ш/, /ž/, /ž'/, /ч/, /ч'/, /д'/, /т'/, /з'/, /с'/, /н'/, /л'/, /j/, /г/, /к/.
Збыльвывса коми гласнöй сёрни шыяс: /и/, /е/, /ы/, /ö/, /а/, /у/, /о/. Коми кывйын гласнӧй да согласнӧй шыяслысь сикасалӧм сетӧма улынджык:

Гласнӧй шыяс

Гласнöйяс – тайö гöлöсысь артмöм шыяс. Артикуляция боксяньыс артмöны кокниа, мытшöдъястöг. Сынöдыс свободнöя (кокниа) петö вом пытштi, кылö сöмын тон и оз кыв ни öти шум. Ставнас гласнöйяслысь системасö шуöны вокализмöн (лат. vokalis – гöлöсöвöй).
Артикуляция боксянь коми гласнöйяс торъялöны куим медшöр признак серти:

• кыв лыбан тшупöд серти (вылна);
• кыв водзö либö бöрö вешъян тшупöд серти (рад);
• вомдоръяс удж серти.
  

Кыв лыбан тшупöд серти гласнöйяс торъялöны сiйöн, кутшöм удж вöчö кывным вом пытшкын вертикаль визьын. Сiйö вермö лэччыны увлань, кайны вылö да куйлыны вöрзьытöг (сулавны места вылын). Тайö признаксö шуöны вылнаöн (подъёмöн). Торъялöны вылыс, шöр да улыс вылнаа гласнöйяс.
Гласнöйяс торъялöны и сы серти, кутшöм удж вöчö кывйыс горизонтальнöй визьын. Сiйö вермö вöрны бöрö, водзö, куйлыны вом шöр визьын. Татшöм артикуляцияяс петкöдчöм боксяньыс торъялöны водз, шöр да бöр рада гласнöйяс.
Гласнöйяс артмöм серти торъялö и вомдоръяс удж. Вомдоръяс вермöны нюжавны водзö да гöгрöсмыны, а сiдзжö кольны вежсьытöг. Та серти торъялöны вомдоралöм да абу вомдоралöм гласнöйяс. Вомдоралöмаяс лыдö колö пыртны /о/ да /у/ гласнöйяс, абу вомдоралöмаяс лыдö пырöны /а/, /е/, /ö/, /и/, /ы/ гласнöйяс.
Воддза рада фонемаяс лыдö пыртöны /и/ да /е/ шыяс. Шöр рада фонемаяс торъялöны шöрö либö бöрö вешъян петкöдчöмöн да лоöны тырвыйö шöр радаöн /ö/ да шöр-бöр радаöн /ы/ да /а/ фонемаяс. Бöр рада гласнöйяс пöвстын торъялöны /о/ да /у/ гласнöйяс.

Согласнӧй шыяс

Согласнöйяс – тайö гöлöсысь да шумысь артмöм шыяс. Акустика боксянь кö, согласнöйяс артмигöн ыджыд тöдчанлун кутöны шумъяс, а оз тонъяс, кыдзи гласнöйяс дырйи, кöть эськö тоныс эм и öткымын согласнöйöс шуöмын, медводз, гора согласнöйясöс да сонантъясöс. Гортöм согласнöйяс артмöны гöлöстöг, сöмын шумысь, гораяс – гöлöсысь да шумысь, но гöлöс ёнлун (вылна) сертиыс торъялöны жö. Вевтыртö кö тон, либö шумыс да тоныс шыын петкöдчö öтмында, тайö согласнöйыс сонант.
Коми кыв согласнöйяс тэчасын 26 шы единица, на лыдын: /б/, /п/, /м/, /в/, /д/, /т/, /з/, /с/, /н/, /л/, /р/, /ж/, /ш/, /ž/, /ž'/, /ч/, /ч'/, /д'/, /т'/, /з'/, /с'/, /н'/, /л'/, /j/, /г/, /к/ фонемаяс. Таысь кындзи, коми кывйын паныдасьлö рочысь пырöм нёль шы, на лыдын: /ф/, /х/, /ц/, /щ/ фонемаяс.
Согласнӧй шыясыс торъялӧны ас костаныс некымын признак серти:

• Уджалан орган серти согласнöйяс вермöны торъявны паръяяс, кывъяяс (водзкывъяяс, шöркывъяяс, бöркывъяяс), увулярнöйяс (увула – фарингальнöйяс (фаринкс – глотка)) да гортаннöйяс вылö. Коми кывйын асшöр фонема туйын согласнöйяс эмöсь сöмын медводдза кык сикасын (паръя да кывъя согласнöйяс). Паръя согласнöйяс артмöны вомдоръяс вöран уджысь. Найöс артмöдiгöн-шуигöн вомдоръясыс матысмöны мöда-мöд дораныс (либö ылысса пиньяслöн доръясыс матысмöны улысса пар дорö). Та серти согласнöйяс торъялöны: 1) паръяскостса (/б/, /п/, /м/) да 2) паръя-пиня (/в/) фонемаяс вылö. Кывъя согласнöйяс юксьöны водзкывъя, шöркывъя да бöркывъяяс вылö. Водзкывъя согласнöйяс торъялöны: 1) дорсально-пиняяс вылö, кор кывлöн воддза юкöныс, улыс водз пиньяс дорö лэччöм кыв пом кындзи, инмö вылыс пиньясö да альвеолаясö, на лыдö пырöны: /д/, /т/, /з/, /с/, /н/ фонемаяс; 2) какуминально-альвеолярнöйяс вылö, кор кывлöн воддза юкöныс ставнас лыбö вылö и инмö альвеолаясö вылыс водз пиньясысь вешйöмöн, кыв шöрыс сэк лэччыштöма, на лыдö пырöны: /ж/, /ш/, /р/, /ž/, /ч/ фонемаяс; 3) апикально-альвеолярнöйяс вылö, кор альвеолаяслöн воддза юкöнö инмö кыв йыв, коми кывйын татшöм артикуляцияа согласнöйыс öти – /л/ фонема. Шöркывъя-палатальнöй фонемаяс артмигöн кыв вылыслöн шöр юкöныс инмö пинь анъясö да ан доръясö, на лыдö пыртöны /j/, /д'/, /т'/, /з'/, /с'/, /ž'/, /ч'/, /л'/, /н'/ фонемаяс. Бöркывъя фонемаяс лыдö пыртöны /г/ да /к/ шыяс.

• Гöлöс лапöдъяс удж серти торйöдöны гора да гортöм согласнöйяс, кодъяс паныд сулалöны мöда-мöдныслы. Тайö корреляцияыс шымыртö системасö дзоньнас да артмöдö шума согласнöйяс пöвстын шы гозъяс. Коми кывйын эм öкмыс шы гоз: /б – п/, /д – т/, /д' – т'/, /з – с/, /з' – с'/, /ж – ш/, /ž – ч/, /ž' – ч'/, /г – к/. Орччöдöй, роч кывйын торъялö 11 шы гоз, на лыдын: /в – ф/, /в' – ф'/, /б – п/, /б' – п'/, /д – т/, /д' – т'/, /з – с/, /з' – с'/, /ж – ш/, /г – к/, /г' – к'/. Видлöгъяссьыс тыдалö, мый роч кыв фонетика тэчасас шума согласнöйяс пöвстын эмöсь согласнöйяс, кодъяс оз артмöдны шы гозсö гора-гортöмлун серти, тайö водзкывъя потаса /щ/, бöркывъя потаса /х/ да /х'/ шыяс, а сідзжö /ц/ да /ч'/ аффрикатаяс. Сонантъяс оз пырны тайö корреляцияас, найöс шуигöн гöлöс лапöдъяс век уджалöны, та понда сонантъяс пыр гораяс, налöн гортöм шы гозъяс абуöсь.

• Артманног серти коми кывйын согласнöйяс водзö юксьöны: шума согласнöйяс пöвстын: 1) смычнöйяс (сöстöм взрывнöйяс да аффрикатаяс) да 2) потасаяс вылö; сонорнöйяс пöвстын: 1) потасаяс, 2) ныр пыр шусян смычнöйяс да 3) тiрöдана (вибрант) вылö. Сöстöм взрывнöйяс да аффрикатаяс торъялöны ас костаныс мытшöд воссьöмöн. Взрывнöйяс дырйи топалöмсö артмöдысь органъясыс торъялöны зэв öдйö, петысь сынöдыс акустика боксяньыс сыркмунöм моз (петкöдчö взрыв ногöн). Взрывнöйяс лыдö пырöны /б/, /п/, /д/, /т/, /д'/, /т'/, /г/, /к/ фонемаяс. Аффрикатаяс артмигöн ёрта-ёртыс дорö топалöм шы сетан органъясыс воссьöны оз другöн, кыдзи взрывнöйяс дырйи, а вочасöн, и сöмын артмöдöны сынöд петöм вылö потас. Потастiыс мунысь сынöдыс артмöдö аффрикатаяслы лöсялана шум. Коми кывйын аффрикатаяс лыдö пырöны /ž/, /ž'/, /ч/, /ч'/ шыяс. Сонорнöйяс пöвстын /м/, /н/, /н'/ ныр пыр шусян смычнöй согласнöйяс артмигöн-шуигöн кыв либö паръяс отсöгöн артмö тупйöд, но сэк ичöт кыв да небыд ан лэччöм вöснаыс сынöдыс тырö ныр пытшкöсö да артмöдö сэнi урчитöм резонанс. Та вöсна татшöм согласнöйяссö шуöны ныр пыр шуанаясöн. Кыдзи шумнöйяс, сiдзи и сонорнöй согласнöйяслöн потасаяс торъялöны: 1) потас петкöдчöм серти да 2) потаслöн ин серти. Потас петкöдчöм серти паныдасьöны гöгрöс потасаяс (шумаяс пöвстын: /с/, /з/, /ш/, /ж/, сонорнöйяс пöвстын: /j/) да плавкöс потасаяс (шумаяс пöвстын: /с'/, /з'/, сонорнöйяс пöвстын /в/). Потаслöн ин серти паныдасьлöны боквыв (сöмын сонорнöйяс пöвстын: /л/, /л'/) да шöра (шумаяс пöвстын: /с/, /с'/, /з/, /з'/, /ш/, /ж/, сонорнöйяс пöвстын: /j/, /в/). Став шума потаса (щелевöй) согласнöй коми кывйын лоöны шöр гöгрöс потасаясöн, на лыдö пырöны /з/, /с/, /з'/, /с'/, /ж/, /ш/. Потас артманног сертиыс найöс торйöдöны öти фокусаяс вылö (/з/, /с/, /з'/, /с'/) да кык фокуса шыяс вылö (/ж/, /ш/). Сонорнöй потасаясысь торйöдöны /j/, /в/, /л/, /л'/ фонемаяс. Ныр пыр шусяна согласнöйяссö (/м/, /н/, /н'/ шыяс) артмигöн-шуигöн кыв либö паръяс артмöдöны топалöм, но ичöт кыв да небыд ан лэччöм вöснаыс сынöд сюрö ныр пытшкöсö и артмöдö сэнi урчитöм резонанс. Та вöсна татшöм согласнöйяссö шуöны ныр пыр шуанаясöн. Тiрöдана, дзöрана (вибрант) /р/ согласнöй артмигöн петысь сынöдыс дзöрöдö вылыс ан дорö лыбöм кыв йывсö, сiйöн и нимтöны сiйöс тiрöданаöн (дрожащöйöн).

• Кывлöн шöр юкöн ин серти торъялö согласнöйяслöн чорыд-небыдлун признак серти паныд сувтöдöм. Коми кывйын 16 шы артмöдöны чорыд-небыдлун признак серти шы гозъяс: /н – н'/, /л – л'/, /д – д'/, /т – т'/, /с – с'/, /з – з'/, /ž – ž'/, /ч – ч'/ – ставыс 8 шы гоз. Оз артмöд шы гозсö тайö паныдлун сертиыс 10 согласнöй: /б/, /п/, /м/, /в/, /р/, /ж/, /ш/, /j/, /г/ да /к/ шыяс. /j/ шы пыр небыд, мукöд öкмысыс – пыр чорыдöсь.

• Шум артмöм серти согласнöйясыс торъялöны шум либö гöлöс петкöдчöмнас и юксьöны кык чукöр вылö: шума согласнöйяс да сонантъяс.

Литература

• Пунегова Г.В. Фонетические особенности функционирования русского языка в условиях коми-русского двуязычия в Республике Коми (на материале экспериментально-фонетического исследования согласных): Монография / Г.В.Пунегова. – Сыктывкар: Изд-во СыктГУ, 2008. – 220 с.
• Пунегова, Г.В. Öнія коми кыв фонетика (Фонетика современного коми языка) [Электронный ресурс] : велöдан пособие : текстовое учебное электронное издание на компакт- диске / Г.В. Пунегова ; Федер. гос. бюдж. образоват. учреждение высш. образования «Сыктыв. гос. ун-т им. Питирима Сорокина».
• Пунегова Г.В. Коми кывлöн фонетика, графика да орфография (Фонетика, графика и орфография коми языка) [Электронный ресурс] : учебное пособие / Г. В. Пунегова. - Сыктывкар : Изд-во СГУ им. Питирима Сорокина, 2022. - 112 с. - ISBN 978-5-87661-761-3.
• Бубрих Д.В. Грамматика литературного коми языка. Л.: ЛГУ, 1949, - 206 с.
• Карманова А.Н. Коми кывлöн фонетика: СГУ коми отделениеса студентъяслы современнöй коми кыв кузя методическöй индöдъяс. Сыктывкар, 1989. - 26 л.б.
• Пунегова Г.В. Система согласных в коми и русском языках // Динамика структур финно-угорских языков: сб. научных статей на материалах Всероссийской финно-угорской языковедческой конференции. Сыктывкар, 2011. - С. 214–223.
• Пунегова Г.В. Согласнöйяс тэчасын фонемаяслöн паныдлун // Пермистика 13: Вопросы пермского языкознания. Сыктывкар, 2012. - С. 173–181. (Тр. Ин-та языка, литературы и истории Коми НЦ УрО РАН. Вып. 69).
• Пунегова Г.В. Фоностатистические характеристики фонем в литературном коми языке // Фонетический фонд финно-угорских языков: Материалы постоянно действующего семинара. Вып. 1 Йошкар-Ола; Санкт-Петербург: МарНИИ, 1996. - С. 90-113.
• Бараксанов Г. Г. Формирование языковых норм коми литературного языка. Сыктывкар, 1964.
• Бубрих Д. В. Грамматика литературного коми языка. Л., 1949.
• Карманова А. Н. Коми кывлӧн фонетика. Методическӧй пособие. Сыктывкар, 1991.
• Лыткин В. И. Историческая грамматика коми языка. Введение. Фонетика. Сыктывкар, 1957.
• Лыткин В. И. Исторический вокализм пермских языков. М., 1964.
• Лыткин В. И. К вопросу о вокализме пермских языков. — Труды Института языкознания АН СССР, т. I. М., 1952.
• Лыткин В. И. Древнепермский язык. М., 1952.
• Молодцов В.А. Фонетика зырянского диалекта коми языка. М., 1929.
• Основы финно-угорского языкознания. Вопросы происхождения и развития финно-угорских языков. М., 1974.
• Современный коми язык, ч. I. Фонетика, лексика, морфология. Сыктывкар, 1955.
• T.E. Uotila Zur Geschichte des Konsonantismus in den permischen Sprachen. — Mímoires de la Sociítí Finno-Ougrienne, LXV. Helsinki, 1933.