Пионерия лун
| Пионерия лун | |
|---|---|
 Пионеръяслӧн пас | |
| Сикас | Социалистическӧй |
| Официальнӧя | В.И. Ленин нима Ставсоюзса пионеръяслӧн организация лун. |
| Вынсьӧдӧма | сиӧма пионеръяслӧн ӧтмунӧмлы |
| Пасйӧны | вӧвлӧм СССР-са канмуясын |
| Кадпас | 1922 вося ода-кора 19-ӧд лун |
| Празднуйтӧм | уна сикас |
| Йитчӧма | пионеръяслӧн ӧтмунӧмкӧд |
Пионерия лун (ӧнія Россияын — Челядь ӧтйӧза ӧтувъяслӧн лун[2]) — челядьлы да томуловлы, а сідзжӧ вожатӧйяслы да школадырся челядькӧд уджалысь педагогъяслы гаж.
«Пионерия лун» пасйӧны ода-кора тӧлысь 19-ӧд лунӧ — В. И. Ленин нима Ставсоюзса пионеръяслӧн организация чужан лунӧ. Котыртӧны гажсӧ пионеръяслӧн да челядьлӧн мукӧд организация. СССР-ын Пионерия лун вӧлі сӧветскӧй школьникъяслӧн медыджыд гажӧн.
История
1922 вося ода-кора тӧлысь 19-ӧд лунӧ комсомоллӧн 2-ӧд ставроссияса конференция вылын вӧлі шуӧма быдлаын лӧсьӧдны пионеръяслысь отрядъяс. Тайӧ луныс пасйӧма кыдз пионериялӧн чужан лун.
Сӧвет кадӧ Пионерия лун дырйи школаясын нуӧдісны «Ленин урокъяс», вӧчисны кывкӧртӧдъяс звенояс, отрядъяс да дружинаяс костын велӧдчӧм серти ордйысьӧмъясын, металлолом, макулатура да мукӧдтор чукӧртӧм серти ордйысьӧмъясын. Пионерия лунӧ нуӧдісны и нуӧдӧны на уна сикас чукӧртчӧмъяс, концертъяс, конкурсъяс, сетӧны наградаяс пионеръяслы да велӧдчысьяслы, пионерскӧй парадъяс да митингъяс.
Рытъя кадӧ школа дорын либӧ микрорайонъясын вӧчлісны традиционнӧй «пионерскӧй бипуръяс». ӧнія Россияын развлекательнӧй шӧринъясын да клубъясын Пионерия лун дырйи нуӧдӧны тематическӧй дискотекаяс, акцияяс, флешмобъяс.
В. И. Ленин нима Ставсоюзса пионеръяслӧн организация дугӧдӧм бӧрын Пионерия лунсӧ пасйӧны челядь котыръяс да ӧтмунӧмъяс, кодъяс видзӧны пионеръяслысь традицияяс да уджаланног.
Пионерия гажъяс нуӧдӧны кыдз Россияын, сідз и вӧвлӧм СССР-са мукӧд канмуын.
Быд во Гӧрд изэрд вылын В. И. Ленинлӧн Мавзолей дорын пионеръясӧ пыртӧ КПРФ. Кыпыд церемонияӧ пырӧдчӧ 3000 челядьысь унджык (юбилейнӧй 2012 воын вӧлі 5000 челядьысь унджык). Та вӧсна изэрдсӧ тупкӧны, став Рочмуса каръясысь воӧм челядь водзын сёрнитӧ ютырӧн веськӧдлысь Г. А. Зюганов, сэсся налы кӧрталӧны гӧрд галстукъяс, а сэсся налы петкӧдлӧны неыджыд концерт.
Севастопольын быд во ода-кора тӧлысь 19-ӧд лунӧ школаын велӧдчысьяс ӧтув мунӧны кар шӧрті[3].
Пасйӧдъяс
- ↑ «Эхо Москвы»: Российские коммунисты приняли в пионеры школьников сразу из нескольких регионов страны. Шыӧдчан кадпас: 15 ода-кора тӧлысь 2011. Архивируйтӧма 25 ода-кора тӧлысь 2021.
- ↑ Школьники по всей России отметили День детских общественных объединений. Российское движение школьников (19 ода-кора тӧлысь 2017).
- ↑ Парад детства вернулся в Севастополь в день 100-летия пионерии. Шыӧдчан кадпас: 19 ода-кора тӧлысь 2022. Архивируйтӧма 19 ода-кора тӧлысь 2022.