Россияса войтыръяслӧн кывъяслы сиӧм лун
| Россияса войтыръяслӧн кывъяслы сиӧм лун | |
|---|---|
 | |
| Кадпас | кӧч тӧлысь 8-ӧд лун |
Россияса войтыръяслӧн кывъяслы сиӧм лун (рочӧн День языков народов России) — гаж, мый вӧзйис лӧсьӧдны Россия Федерацияса президент Владимир Путин роч кыв да Россияса войтыръяслӧн кывъяслы отсӧг сетан юкӧнын канму политика олӧмӧ пӧртан сӧветлӧн чукӧртчӧм дырйи 2025 вося лӧддза-номъя тӧлысь 5-ӧд лунӧ[1]. Гажсӧ вӧлі вӧзйӧма пасйыны кӧч тӧлысь 8-ӧд лунӧ — поэт Расул Гамзатовлӧн чужан лунӧ[2].
Ставнас, РНА-са Кыв туялан институтлӧн юӧр серти, Россияын эм 277 кыв да сёрнисикас[3].
История
Роч кыв да Россияса войтыръяслӧн кывъяслы отсӧг сетан юкӧнын канму политика олӧмӧ пӧртан сӧветлӧн чукӧртчӧм дырйи 2025 вося лӧддза-номъя тӧлысь 5-ӧд лунӧ вӧлі вӧзйӧма лӧсьӧдны Россияса войтыръяслӧн кывъяслы сиӧм лун[1]. Россия Федерацияса президент Владимир Путин вӧзйис пасйыны сійӧс кӧч тӧлысь 8-ӧд лунӧ — поэт Расул Гамзатовлӧн чужан лунӧ[2].
Та дырйи президент пасйис, мый колӧ видзны да сӧвмӧдны Россия Федерацияса войтыръяслысь кывъяссӧ, сетны налы канмусянь системнӧй отсӧг да дорйыны страналысь ӧтувъя кыв пространство[1]. Сідзжӧ Владимир Путин индіс, мый колӧ дасьтыны Россия Федерацияса войтыръяслӧн кывъяс йылысь выльмӧдӧм оланпас да лӧсьӧдны Россияса став кывлысь канму реестр[1].
Статистика
• Россияса Наукаяс Академияса Кыв туялан институт юӧр серти, Россияын олысь 193 войтыр сёрнитӧны 277 кыв да сёрнисикас вылын[3].
• Кывъяслӧн лыдыс унджык войтыр лыдысь, ӧткымынъяслӧн эм кык официальнӧя признайтӧм кыв, шуам, марилӧн, мордвалӧн да алтайсаяслӧн[3].
• Россияса велӧдан юкӧнын вӧдитчӧны 105 кывйӧн, на пиысь 24 кыв вылын велӧдӧны став предметсӧ, 81 кыв велӧдӧны кыдз предмет[3].
Пасйӧдъяс
- ↑ 1 2 3 4 Заседание Совета по реализации госполитики в сфере поддержки русского языка и языков народов России, Президент России (05.06.2025). Шыӧдчан кадпас: 5 лӧддза-номъя тӧлысь 2025.
- ↑ 1 2 Путин предложил учредить День языков народов России, РБК (05.06.2025). Шыӧдчан кадпас: 5 лӧддза-номъя тӧлысь 2025.
- ↑ 1 2 3 4 277 языков и диалектов используют народы России. Минобрнауки (21 урасьӧм тӧлысь 2021). Шыӧдчан кадпас: 5 лӧддза-номъя тӧлысь 2025.