Россияса печать лун
| Россияса печать лун | |
|---|---|
| Вынсьӧдӧма | 1991 воын |
| Пасйӧны | быд во |
| Кадпас | тӧвшӧр тӧлысь 13-ӧд лун |
Россияса печать лун (рочӧн День российской печати) — Россияса уджсикас гаж, пасйӧны тӧвшӧр тӧлысь 13-ӧд лунӧ. Лӧсьӧдӧма сійӧс Россия Федерацияса Медвылыс Сӧвет Президиумлӧн 1991 вося ӧшым тӧлысь 28-ӧд лунся Шуӧмӧн да йитчӧма историческӧй кадпаскӧд — «Ведомости» медводдза россияса печатайтӧм газет лэдзны заводитӧмкӧд (абу йитчӧма ӧнія «Ведомости» газеткӧд), мый вӧлі лӧсьӧдӧма Пётр Великӧйлӧн индӧд серти. 1703 вося тӧвшӧр тӧлысь 2-ӧд лунӧ (выль стиль серти тӧвшӧр тӧлысь 13-ӧд лунӧ) Москваын петіс роч кыв вылын «Ведомости о военных и иных делах, достойных знания и памяти, случившихся в Московском Государстве и во иных окрестных странах» печатайтӧм газетлӧн медводдза номер (ӧнія нимыс — «Санкт-Петербургские ведомости»)[1]. Пётр I лыддис газетсӧ реформаяс нуӧдӧмын да Российскӧй империясӧ вынсьӧдӧмын зэв коланаторйӧн.
Статистика
2009 во заводитчигӧн Россия Федерацияын вӧлі пасйӧма 33 сюрсысь унджык газет-журнал. Шӧркодя быд лун йӧзӧдісны 20 миллионысь унджык экземпляр.
2025 вося тӧвшӧр тӧлысьын Россияын, Роскомнадзорлӧн мыччӧдъяс серти, пасйӧма 155 сюрсысь унджык СМИ[2].
Россияса журналистлӧн шӧркодь удждоныс 2024 воын вӧлі 54 сюрс шайт.
Журналистъяслы наградаяс
1997 восянь Россияса печатьлӧн лунӧ сетӧны Россия Федерацияса Веськӧдлан котырлысь СМИ юкӧнын премияяс да том журналистъяслы проектъяс вылӧ грантъяс. Сідзжӧ 2018 воын Россия Федерацияса президентлӧн индӧдӧн вӧлі лӧсьӧдӧма «Россия Федерацияса нимӧдана журналист» почёт ним[3].
Сӧветскӧй печать лун
Газет-журналъясын уджалысьяслӧн уджсикас гаж медводдзаысь вӧлі лӧсьӧдӧма СССР-ын. РСФСР-са Медвылыс Сӧветлӧн 1991 вося тӧвшӧр тӧлысь 13-ӧд лунся Индӧдӧн «Сӧветскӧй печать лун» — ода-кора тӧлысь 5-ӧд лун пыдди, мый вӧлі сиӧма большевистскӧй «Правда» газетлӧн медводдза номер петӧмлы, вӧлі лӧсьӧдӧма выль нима гаж.
Беларусьын «Печать лун» пасйӧны ода-кора тӧлысь 5-ӧд лунӧ.
1994 восянь быд во пасйӧны ода-кора тӧлысь 3-ӧд лунӧ Ставмирса пресса лун.
Комиын пасйӧм
Коми Республикаса Юралысьлысь могъяс недыр кад кежлӧ олӧмӧ пӧртысь Р.Э. Гольдштейн журналистъясӧс чолӧмалӧмын пасйис[4]:
Тіян кыв пыр вӧлі да кольӧ тӧдчанаӧн республикаса олысьяслы. Тайӧ аслыспӧлӧс воас — Ыджыд Вермӧмсянь 80 во тыран да Комиысь Геройяслӧн воӧ — ми торйӧн нин вылӧ донъялам тіянлысь кужанлуннытӧ корсьны да висьтавны йӧз йылысь, кодъяс асланыс уджӧн да вӧчӧмторъясӧн нимӧдӧны миянлысь ичӧт чужан мунымӧс. Ті — республикалысь историясӧ видзысьяс, вежсьӧмъяс йылысь веськыда да объективнӧя гижысьяс. Тіян материалъясыд отсалӧны миянлы лоны матынджык йӧз дінӧ, бурджыка гӧгӧрвоны налысь мытшӧдъяссӧ да кӧсйӧмъяссӧ. Аттьӧ сыысь, мый видзанныд да сӧвмӧданныд коми журналистикалысь традицияяссӧ, гижанныд кык кыв вылын, отсаланныд видзны аслыспӧлӧс культуранымӧс. Торйӧн аттьӧала ветеранъясӧс, кодъяслӧн опытыс да мывкыдлуныс отсалӧ том йӧзлы аддзыны колана кывъяс да интонацияяс.
Пасйӧдъяс
- ↑ Лисовский Н. М. Россияса печать лун // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907.
- ↑ Перечень наименований зарегистрированных СМИ. Роскомнадзор. Шыӧдчан кадпас: 12 тӧвшӧр тӧлысь 2025.
- ↑ Премия в области средств массовой информации - Правительство России. government.ru. Шыӧдчан кадпас: 12 тӧвшӧр тӧлысь 2025.
- ↑ Поздравление с Днём российской печати