Варыш поз (В.Савинлӧн кывбур)
| Варыш поз | |
|---|---|
| Варыш поз | |
| Жанр | кывбур |
| Автор | Нёбдінса Виттор |
| Оригинал кыв | коми |
| Медводдзаысь йӧзӧдӧма | 1923 |
Варыш поз (рочӧн Соколиное гнездо) — Нёбдінса Витторлӧн кывбур. Гижӧма 1923 воын.
История
1923 вося моз тӧлысьын Усть-Сысольскын муніс литератураын уджалысьяслӧн I Коми областнӧй конференция. Сэтчӧ чукӧртчисны гижысьяс, публицистъяс, редакторъяс, журналистъяс, вуджӧдчысьяс, филологъяс эз сӧмын Коми АССР-ысь, но и мукӧдлаысь, кӧні олісны коми-зыряна да коми-пермякъяс. Делегатъяслӧн уджлӧн бӧртасӧн лои пролетарскӧй гижысьяслысь Коми ассоциация котыртӧм могысь оргкомитет бӧрйӧм. Сійӧс вӧлі котыртӧма куим во мысти, 1926 воын, да ӧтувтіс 30 литератураын уджалысьӧс. Конференция сідзжӧ индіс коми литература сӧвмӧдан водзӧ вылӧ колана туйяс.
И стӧч тайӧ лоӧмтор водзас В. Савин гижис ассьыс «Варыш поз» кывбурсӧ да сиис сійӧс гижысьяслы.
Недыр кад мысти кывбурыс лоис сьыланкывйӧн, шыладсӧ гижис ачыс Нёбдінса Виттор.
Текст
ВАРЫШ ПОЗ
(Коми гижысь чукӧрлы)
Ылын-ылын, войвылын
Джуджыд парма сулалӧ.
Парма пасьта шувгӧ вӧр,
Кӧдзыд вой тӧв шутьлялӧ.
Парма пӧвстын пемыд йӧз —
Коми войтыр олӧны;
Югыдінӧ петан туй
Нэм чӧж найӧ корсьӧны.
Парма пӧвстын олӧмысь
Жугыльтчӧма сьӧлӧмъяс:
Жугыль коми войтырлӧн
Эз вӧв гажа сьылӧмъяс.
Парма шӧрын варыш поз,
Варыш котыр быдмӧны,
Йӧзлысь шуштӧм сьылӧмсӧ
Парма пӧвстысь кылӧны.
Лэбзьӧй, повтӧм варышъяс,
Вына бордъяс шеныштлӧй,
Джуджыд парма садьмӧдӧй,
Гажа гажсӧ петкӧдлӧй!
Коми йӧзӧс, лэбачьяс,
Веськыд туйӧд нуӧдӧй,
Жугыль олӧм пальӧдӧй,
Коми мусӧ югдӧдӧй![1].
Тӧдчанлун
• Кывбурыс лоис подулӧн Коми Республикаса кыплы[2].
• Тайӧ кывбур сертиыс Францияысь "Chet Nuneta" ансамбль лӧсьӧдіс сьыланкыв да пыртіс аслас "Pangea" выль альбомӧ[3].