Варыш поз (Е.Шаховлӧн кывбур)

Варыш поз — Егор Шаховлӧн кывбур. Гижӧма 1928 воын.

История

Е. Шаховлысь «Варыш поз» кывбурсӧ вӧлі йӧзӧдӧма 1928 вося «Ордым» журналын (5 №-ын, 42 л.б.). Пасйысьӧма кыдзи Шахов Ӧ.Е.^[1].

Гижанног сертиыс кывбурыс матын Нёбдінса Витторлӧн «Варыш поз» кывбур дорӧ. Авторыс сиӧма кывбурсӧ том велӧдчысьяслы.

ВАРЫШ ПОЗ
Сиа том велӧдчысьяс войтырлы

Парма шӧрын нӧрыс йылын
Варыш котыр быдмӧны.
Лӧсьыд налы шоныд позйын,
Лунысь лунӧ дзольгӧны.

Сӧвмӧй, ёнмӧй, эзысь пиян,
Чой-вок котыр гажӧдчӧй, —
Олӧм водзын лоас тіян,
Сійӧ кадсӧ виччысьӧй.

Шонді югӧр пуяс пӧвстӧ
Сетӧ шоныд, сетӧ вын.
Нӧрыс йылӧ варыш позйӧ
Лысъяс пӧвстӧ сюйӧ ныр.

Парма пӧвстын жугыль олӧм.
Век на важ кодь оласног.
Йӧзлӧн пыр на выйим полӧм.
Олӧмад ӧд эм на шог.

Повтӧм сьӧлӧм, варышпиян,
Ӧні эм нин вынйӧр тіян...
Коми йӧзсӧ гажӧдӧй.

Кырнышъяскӧд косясьӧй.
Парма шӧрын нӧрыс йылын
Варыш котыр быдмӧны.
Лӧсьыд налы шоныд позйын,
Лунысь лунӧ дзольгӧны^[2].