Веськыд эфир Владимир Путинкӧд (2024)

Веськыд эфир Владимир Путинкӧд (2024)
Россияса президент Владимир Путин веськыд эфир дырйи (2024)
Медводдзаысь нуӧдӧма	2001 вося ӧшым тӧлысь 24-ӧд лун
Тшӧкыдлун	быд во
Котыртысь	Россияса президентлӧн администрация
Сайт	москва-путину.рф

Веськыд эфир Владимир Путинкӧд (2024) (рочӧн Прямая линия с Владимиром Путиным (2024) — Россияса президент Владимир Путинлӧн быдвося пресс-конференция, нуӧдӧма веськыд эфирын 2024 вося ӧшым тӧлысь 19-ӧд лунӧ, муніс 4 час 27 минут. Телефон пыр, ӧтуввез пыр да СМС-юӧртӧмъяс отсӧгӧн шыӧдчис 2,5 миллионысь унджык морт.

Дасьтысьӧм

2024 вося ӧшым тӧлысь 8-ӧд лун 00:00 чассянь ӧшым тӧлысь 19-ӧд лунӧдз позис ыстыны Россияса президент дорӧ текста да видео юалӧмъяс торъя мобильнӧй приложение, СМС-юӧръяс отсӧгӧн, телефон пыр, «ВКонтакте» да «Одноклассники» социальнӧй везъяс пыр, а сідзжӧ moskva-putinu.ru (москва-путину.рф) сайт вылын.

2024 воын «Народнӧй фронтлӧн» штабын колл-центрса уджалысьяс медводдзаысь вӧдитчисны гражданалысь шыӧдчӧмъяс анализируйтӧм могысь искусственнӧй интеллектӧн. GigaChat нейросеть сикасаліс социальнӧй везъясын гижӧдъяссӧ, аудиогижӧдъяссӧ да СМС-яссӧ бӧрйӧм темаяс серти.

2024 вося ӧшым тӧлысь 11-ӧд лунӧ Владимир Путин воліс Москваӧ «Сбербанклӧн» шӧр офисӧ, кӧні видзӧдліс искусственнӧй интеллект юкӧнын вӧчӧмторъяслысь выставка. Та дырйи GigaChat водзвыв тӧдмӧдіс канмуӧн веськӧдлысьӧс, кутшӧм мытшӧдъяс тшӧкыдджыка кыпӧдлісны граждана шыӧдчигӧн:

Гӧгӧрвоана, кутшӧм юалӧмъяс дорӧ колӧ дасьтысьны: оланінъяс, транспорт инфраструктура, медицина, канму структураяс да организацияяс, сьӧма отсӧг.

Владимир Путин тӧдмасис медшӧр темаясӧн йӧзлӧн шыӧдчӧмъясын (2024)

2024 вося ӧшым тӧлысь 19-од лун кежлӧ телефон пыр, ӧтуввез пыр да СМС-юӧртӧмъяс отсӧгӧн шыӧдчис 2,5 миллионысь унджык морт. Медуна шыӧдчӧм воис Шӧр, Рытыв-Войвыв да Лунвыв федеральнӧй кытшъясысь.

2024 вося бӧртасъяс

Эфирлӧн медшӧр темаясӧн вӧліны Россияын социальнӧй политика (20 % шыӧдчӧм), оланінкӧд йитчӧм (9 %), экономикакӧд йитчӧм (9 %), йӧзлысь дзоньвидзалун видзӧмкӧд йитчӧм (8 %), ЖКХ-кӧд йитчӧм (8 %), СВО-кӧд йитчӧм (6 %) темаяс.

Экономика

2024 воын экономикалысь серпассӧ канмуӧн веськӧдлысь донъяліс «кыдзи зумыд да ён», ВВП-лысь 3,9% гӧгӧр содӧмсӧ донъялӧмӧн, а 2025 во вылӧ прогнозируйтіс сылысь содӧмсӧ 2,5% вылӧ. Та дырйи орччӧдіс ЕС-ын (ВВП 2024 воын эз сод) да АӦШ-ын (6% гӧгӧр) серпасӧн. Торйӧн тӧдчӧдіс Россияын уджтӧмалӧмлысь вывті ичӧт тшупӧд (2,3%). Сідзжӧ Владимир Путин пасйис Россия Федерацияса обрабатывающӧй промышленносьтлысь ыджыд содӧм, мый лоӧ страна асшӧрлун ёнмӧдӧмлӧн пасӧн.

Владимир Путин: «Экономикаыс зумыд да ён».

2024 воын 9%-ӧдз инфляция содӧм йылысь висьталігӧн президент шуис, мый сылы помкаыс кыдзи объективнӧй, сідзи и субъективнӧй. Объективнӧй помкаясӧн лоисны:

• Россияын унджык кутісны видзны ставсӧ, тшӧтш и сёян-юан;
• логистика вылӧ тӧдчысь мирса донъяс содӧм.

Субъективнӧй помкаяс:

• Центробанклӧн инфляция вылӧ тӧдчан инструментъяс, кутшӧмъяс абу йитчӧмаӧсь ключевӧй ставкакӧд, абу ас кадӧ используйтӧм;
• Россия Федерацияса правительство эз уджав ас кадӧ торъя отрасльяс сӧвмӧдӧм вылын.

Торйӧн президент пасйис Россияса сідз шусяна выль регионъяслысь экономика серпассӧ, пасйис, мый содӧны вотъяс ЛНР-ын (содіс 90% вылӧ), ДНР-ын (79%), Херсон да Запорожье обласьтъясын (200%).

ТВО

Владимир Путин саридзса пехота 155-ӧд торъя гвардейскӧй бригадалӧн дӧрапасӧн (2024)

ТВО йылысь юалӧм вылӧ вочавидзтӧдз Владимир Путин висьталіс, мый саридзса пехоталӧн 155-ӧд торъя гвардейскӧй бригадаса боечьяс сетісны сылы ассьыныс боевӧй дӧрапассӧ да корисны паськӧдны сійӧс студияын, а сідзжӧ сиис налы шуд, Вермӧм да бура бергӧдчыны гортаныс. Канмуӧн веськӧдлысьлӧн кывъяс серти, быд лун военнослужащӧйяс мунӧны фронтлӧн став линия кузя, мездӧны мутас «квадрата километръясӧн». Курск обласьтса олыськӧд сёрнитігӧн, коді юаліс, кор вештасны Россиякӧд граница дорысь ВСУ-ясӧс, президент шуис, мый «йӧз воюйтӧны, буретш ӧні мунӧ тыш» да эскӧдіс, мый «ми дзикӧдз найӧс вӧтлам». Курск обласьтын жугӧдӧм техника лыдыс, пасйис Россияса президент, вевтыртіс 2023 во кежлӧ фронт вылын бырӧдӧм танкъяслысь, БМП-яслысь да мукӧдторлысь лыдсӧ. Та дырйи Владимир Путин висьталіс, мый став жугӧдӧм гражданскӧй да социальнӧй объектсӧ лоӧ дзоньталӧма, ассьыныс керка-патерасӧ воштӧм гражданалы сетасны оланін босьтӧм вылӧ сертификатъяс, та вылӧ вичмӧдӧма 108 миллиард шайт. Сідзжӧ сёрниыс пансис Херсон, Запорожье обласьтъяс, ЛНР да ДНР бӧр кыпӧдӧм йылысь. Торйӧн кӧ, куим во чӧжӧн тайӧ регионъяслысь туй везсӧ лоӧ вайӧдӧма нормативнӧй состояниеӧ, Азов саридз гӧгӧр вӧчасны нёль визя кытша трасса. Выльмӧдӧма нин 20 сюрсысь унджык социальнӧй тӧдчанлуна объект да оланін.

Владимир Путин веськыд эфирын (2024)

Президент висьталіс и ТВО-ын военнослужащӧйяслы боевӧй действиеясын участвуйтысьяслысь, а абу КТО-ын участвуйтысьяслысь статус сетӧм йылысь юалӧмъяс. Тӧдчӧдіс, мый тырмытӧмторсӧ лоӧ веськӧдӧма, военнослужащӧйяслы сетасны «ставсӧ, мый колӧ, бӧрӧн лыддям».

Владимир Путин донъяліс «Геройяслӧн кад» уджтас збыльмӧдӧмсӧ, мый серти дасьтӧны ТВО-ын участвуйтысьяслысь кадрӧвӧй резерв. Татшӧмсяма курсъяс лӧсьӧдӧм йылысь мӧвпыс сылы воис торъя военнӧй операцияӧ пырӧдчысь студентъяскӧд аддзысьлӧм бӧрын. Сылӧн кывъяс серти, военнослужащӧйяс пӧвстысь колӧ бӧрйыны йӧзӧс, кодъяс эськӧ веськӧдлісны гырысь компанияясӧн, муниципалитетъясӧн, министерствоясӧн да ведомствоясӧн:

Тані эз вӧв ни ӧти шыбӧль... Уналы вӧзйӧма нин, и бизнесӧ веськалӧны, и быд тшупӧда власьт органъясӧ.

Владимир Путин сідзжӧ шуис, мый ТВО заводитӧм йылысь решение колӧ вӧлі примитны водзджык, дасьтысьны та кежлӧ, да висьталіс, кыдзи сійӧс вежисны торъя военнӧй операциялӧн куим во:

Ме куті этшаджык шмонитны да пӧшти дугді серавны.

Стратегическӧй безопасносьт

Рытыввывса СМИ-лӧн «Орешник» лыйӧмсӧ НАТО-лӧн юкӧнъясӧн паныдавны позянлун йылысь висьталӧмъяссӧ гӧгӧрвоӧдігӧн Владимир Путин вӧзйис нуӧдны эксперимент:

мед Рытыввыв да Украина урчитасны Киевын район, сэтчӧ чукӧртасны ассьыныс став ПВО системаяссӧ, ми сэтчӧ кучкам «Орешникӧн», а найӧ видласны сійӧс паныдавны, и видзӧдлам, мый лоӧ.

Тайӧ баллистическӧй ракетаыслы татшӧм нимсӧ бӧрйӧм йылысь президент шуис: «Честнӧя? Ог тӧд» .

Войтыркостса тема

Веськыд эфирын Владимир Путин вочавидзис войтыркостса уджкӧд йитчӧм ӧткымын юалӧм вылӧ. Торйӧн кӧ, висьталіс, мый Москваӧ воӧм бӧрын эз на аддзысьлы Сирияса вӧвлӧм президент Башар Асадкӧд, да пасйис, мый Россияӧн Сирияын пуктӧм могъяссӧ пӧртӧма олӧмӧ, сы вӧсна мый Россия Федерацияса ӧружьеа вынъяс эз лэдзны сэні чужны «терроризм анклавлы». NBC-са репортёрлысь висьталӧм вылӧ, мый «Россия эз шедӧд ТВО-лысь могъяссӧ, воштіс генералъясӧс, слабмис», вочавидзис, мый Россия, мӧдарӧ, бӧръя воясӧ ёнмӧдіс и экономикасӧ, и суверенитетсӧ, и дорйысьны верманлунсӧ:

Тіянлы эськӧ зэв окота вӧлі, медым Россия вӧлі слабмӧдӧма, но менам мӧд видзӧдлас.

Сідзжӧ Владимир Путин кутіс американскӧй репортёрӧс, коді шуис Москваын генерал Игорь Кирилловӧс виӧмсӧ покушениеӧн. Та вылӧ видзӧдтӧг президент пасйис, мый спецслужбаяс «лэдзисны тайӧс вӧчны».

Китайса «Синьхуа» юӧр сетан агентство корис донъявны РФ-КНР костын ёртасьӧмлысь тшупӧд. Президент вочавидзис, мый кык страналӧн вузасьӧмыс воис 200 миллиард долларӧдз, инвестиция проектъяслӧн лыдыс лоис 600, содіс и регион тшупӧдын ӧтувъя уджыс:

Зэв тӧдчанаӧн лоӧ и миян регионъясса веськӧдлысьяслӧн Китайса представительяскӧд ӧтву уджыс.

Социальнӧй политика

Россиялӧн демография боксянь сьӧкыдлунсӧ президент шуис медся тӧдчанаяс пиысь ӧтиӧн, сы вӧсна мый чужысь лыдыс чиніс зэв ичӧт тшупӧдӧдз — 1,41 прочентӧдз, кага ваян арлыда аньяслӧн лыдыс чиніс 30 прочент вылӧ. Владимир Путинлӧн кывъяс серти, чужысьяслысь лыдсӧ колӧ кыпӧдны этша вылӧ 2,3%-ӧдз. Канмусянь отсӧг сетӧм йылысь Россияса президент пасйис:

• мам капитал уджтас;
• семейнӧй ипотека уджтас;
• челядя семьяяслы единӧй сьӧм отсӧг сетӧм.

Сёрнитісны и миграционнӧй политика йылысь, кодӧс президент шуис «зэв чувствительнӧйӧн». Медым чинтыны мигрантъяслысь лыдсӧ, колӧ, сылӧн видзӧдлас серти, кыпӧдны удж производительносьтсӧ вылыс технологияа уджъяс вылӧ веськӧдчӧмӧн. Сідзжӧ колӧ чорзьӧдны Россияӧ удж вылӧ локтысьяслысь корӧмъяссӧ, кыпӧдны велӧдчан юкӧнсӧ, медым суйӧрсайса граждана гӧгӧрвоисны Россия Федерациялысь культура аслыспӧлӧслунсӧ, тӧдісны кывсӧ. Россияса президент пасйис, мый воськовъяс вӧчӧма нин. Шуам, вынсьӧдӧмаӧсь роч кыв тӧдысь челядьӧс школаӧ босьтӧм йылысь оланпас.

Йӧзлысь дзоньвидзалун видзӧм йылысь

Президент вочавидзис Улыс Новгородса аньлӧн поликлиникаясын кадръяс тырмытӧм вылӧ норасьӧм вылӧ. Канмуса веськӧдлысьлӧн видзӧдлас серти, медся ёна оз тырмыны бурдӧдысьяс буретш йӧзлысь дзоньвидзалун видзан первичнӧй юкӧнын. Такӧд йитӧдын меставывса власьтъяс водзын сулалӧ мог — кыскыны том кадръясӧс, а сідзжӧ бура юклыны нагрузкасӧ. Сідзжӧ сёрнитісны фармацевтическӧй промышленносьт сӧвмӧдӧм да ас препаратъяс вӧчӧм йылысь.

Ӧтуввез йылысь

Блогер Влад А4 юаліс Владимира Путинлысь Россияын YouTube ньӧжмӧдӧм йылысь. Президент вочавидзис, мый Google компания кутіс этшаджык сьӧмӧн могмӧдны Россияын ассьыс юкӧнъяссӧ, этшаджык кутіс вайны техника, мый вӧсна и кутіс лёка уджавны сервисыс.

Политикъяс йылысь

Владимир Путин шуис некымын кыв и политикъяс йылысь. «Кодкӧд эськӧ юис чай?» юалӧм вылӧ вочавидзигӧн казьтыштіс Гельмут Коль йылысь:

Паныдаси эськӧ канцлер Колькӧд...тайӧ вӧлі ыджыд политическӧй деятель, коді уна вӧчис Германиялы.

Комментируйтіс Владимир Жириновскийлысь Украина, Матысса Восток йылысь шуӧмъяссӧ:

Сійӧ радейтіс эпатаж, но вӧлі зэв эрудированнӧй да дасьтысьӧм мортӧн. Та вӧсна сылӧн водзвыв шуӧмъясыс и збыльмисны.

Байден йылысь, коді мылыштіс ассьыс Хантер писӧ:

Пыр зэв тӧдчана, коді тэын вынаджык, политик либӧ морт. Байденын вынаджык лоис морт.

Борис Ельцин йылысь:

Рытыввылын Ельцинӧс радейтісны, но мыйӧн сӧмын сійӧ кутӧс сёрнитны паныд Белград бомбитӧмлы, сійӧс пыр жӧ кутісны увтыртны да нимтыны вина юысьӧн.

Владимир Зеленский йылысь:

Сійӧс кутасны видзны сійӧ йӧзыс, кодъясӧс сійӧ ӧні обслуживайтӧ.

Коми Республикасянь юалӧмъяс

Коми Республикаысь В. Путинкӧд пресс-конференция вылӧ ветліс 4 журналист: Дарья Шучалина, Елизавета Морохина, Александр Кузнецов и Андрей Фетисов.

Шучалина Д. медводз аттьӧаліс Владимир Путинӧс «Ростислав Гольдштейнӧс Комиӧ бӧр вайӧмысь, сійӧ ӧні юралысьлысь удж вӧчысь, коді пыр жӧ босьтчис уджӧ, сы вӧсна мый бура тӧдӧ республиканымӧс». Путин вочавидзис, мый «сійӧ бур веськӧдлысь, гӧгӧрвоысь морт, зумыд да системнӧй». Сэсся сетіс Арктика мутасса ичӧт овмӧдчанінъясын, тшӧтш и Коми Республикаын, кинозалъяс лӧсьӧдӧм йылысь юалӧм. Зэв уна йӧз Коми Республикаысь критикуйтісны сійӧс татшӧм юалӧмысь, сы вӧсна мый эм уна коланаджык юалӧм да тӧдчанаджык мытшӧд.

Пасйӧдъяс