Госбанк керка
| Нималантор | |
| Госбанк керка | |
|---|---|
| Госбанк керка | |
 Госбанк керка, 1940-50-ӧд вояс | |
| 61°40′14″ с. ш. 50°50′17″ в. д.GЯO | |
| Страна | |
| Ин | Сыктывкар |
| Архитектура стиль | конструктивизм |
| Архитектор | В. П. Степанов |
| Стрӧитӧм | 1932 во |
 |
|
Госбанк керка (рочӧн Здание бывшего Госбанка) — сыктывкарса архитектуралӧн памятник. Керкаыс сулалӧ Сӧветскӧй улича вылын, 18 №-а керка.
История
Госбанклӧн медводдза юкӧн воссис Усть-Сысольскын 1923 воын, сійӧ меститчис вӧвлӧм купеч М.А. Суворовлӧн торъя керкаын Набережнӧй улича вылын (ӧні — Киров улича)[1]. Но бӧрынджык стрӧитісны выль керка. Госбанклысь стрӧйбасӧ вӧлі лэптӧма архитектор В. П. Степанов проект серти 1930-1932-ӧд воясӧ. Сійӧ лоӧ конструктивизм сяма архитектуралӧн петкӧдчӧмӧн.
Кык судтаа, «Г» сяма стрӧйба лӧсьыда петкӧдлӧ кар стрӧитӧмлысь бур сямлунсӧ и ыджда сертиыс, и ӧтув архитектоника сертиыс, и мукӧд, водзынджык лэптӧм, гӧгӧртасыскӧд. Керка баныс вӧлі зэв прӧст, шыльыда штукатуритӧм. Параднӧй фасадсӧ вӧчӧма стрӧга, зэв лаконичнӧя, неыджыд архитектурнӧй аслыспӧлӧслунъясыс тӧдчӧдӧны стрӧйбалысь конструкциясӧ: пӧдса ризалит, гӧгрӧс ӧшинь, балкон, ыджыд стеклӧа ӧшиньяс.
Стрӧйбалӧн цокольнӧй судтаас вӧліны бумагаысь вӧчӧм сьӧм, монетаяс, зарни, дона бумагаяс видзӧм вылӧ специальнӧя оборудуйтӧм жыръяс. Жыръяссӧ вӧлі ёнмӧдӧма бетон перекрытиеясӧн.
1990-ӧд вояс бӧрын стрӧйбалӧн ортсыыс лоис вежыштӧма. Керкаас меститчис Россияса Сбербанклӧн Коми юкӧн. Керкасӧ мичмӧдіс Россияса Сбербанклӧн логотипыс.
Ӧнія кад
Керкаыс лоӧ культура озырлун объектӧн. Россияса Сбербанк пасйис тайӧ стрӧйба вылас эмбуралан инӧдсӧ 2005 вося вӧльгым тӧлысьын. Но 2018-ӧд воын кӧсйис вузавны стрӧйбасӧ, стрӧйба комплексысь корӧма 34,2 миллион шайт, сэсся донсӧ чинтӧмаӧсь 32,8 миллион шайтӧдз, сы мында и ньӧбӧмаӧсь стрӧйбасӧ. Эмбурсӧ ньӧбис Коми Республикаса печать да юӧр сетан агентствоӧн вӧвлӧм веськӧдлысь Ирина Брагина (Коми Республикаса Каналан Сӧветын вӧвлӧм депутат Михаил Брагинлӧн гӧтырыс).
2020 вося гожӧмын тайӧ стрӧйбасӧ кӧртымӧ босьтіс Коми Республикаса вынйӧр сӧвмӧдан да спорт министерство. Министерствокӧд тшӧтш татчӧ вуджисны Комиысь сборнӧй командаясӧс спортивнӧя дасьтан шӧрин, вермытӧмъяслӧн спорт шӧрин, министерстволысь удж могмӧдан шӧрин. 2023 воын министерство вуджис республикаӧн ньӧбӧм стрӧйбаӧ, медым не мынтыны кӧртымсӧ торъя йӧзлы[2].
Ӧні сэні меститчӧма семейнӧй школа.
Галерея
Госбанк 1930-1940-ӧд воясӧ
Сбербанк 2000-ӧд воясӧ
Частнӧй школа, 2024 во
Пасйӧдъяс
- ↑ Музей ЦБК (рус.). ЦБК. Шыӧдчан кадпас: 17 йирым тӧлысь 2025.
- ↑ Зданию бывшего Госбанка в Сыктывкаре вернут прежний облик (рус.). БНКоми (12 сора тӧлысь 2024). Шыӧдчан кадпас: 17 йирым тӧлысь 2025.
Литература
- Дом родной, знакомый с детства: экскурсия-путешествие по городу Сыктывкару/ Центральная городская библиотека. Сыктывкар, 2006. 188 с.
- Коми Республикалӧн культура карта