Котельникова, Валентина Николаевна
| Валентина Николаевна Котельникова | |
|---|---|
| Чужан лун | 1949 вося кӧч тӧлысь 13 лун |
| Чужанін | Перым обласьт, Кукуштан посёлок |
| Мыйся уджыс | велӧдысь, ректор, общественнӧй удж вӧчысь |
Котельникова Валентина Николаевна (1949) — философия наукаяс кандидат, 1996-2002 воясӧ Канму службаӧ да веськӧдлыны велӧдан Коми Республикаса академияса медводдза ректор.
Олан туй
Чужис 1949 вося кӧч тӧлысь 13 лунӧ Перым обласьт Перым районса Кукуштан посёлокын.
1974 воын помаліс А.Жданов нима Ленинградса канму университетын философия факультет, сэсся 1974-1977 воясын сэні жӧ велӧдчис аспирантураын.
1978-1989 воясын уджаліс Сыктывкарса канму университетса философия да научнӧй коммунизм кафедраын ассистентӧн, старшӧй преподавательӧн да доцентӧн.
1980 вося лӧддза-номъя 26 лунӧ В. Н. Котельниковалы сетӧма философия наукаяс кандидатлысь учёнӧй степень, "Личность и ее индивидуальность в развитом социалистическом обществе" тема серти диссертация дорйӧм бӧрын [1].
1989 вося ӧшым тӧлыссянь 1991 вося тӧвшӧр тӧлысьӧдз уджаліс йӧзӧс политикаӧ велӧдан системаын: КПСС ОК ОПЦ-ын политическӧй тӧдӧмлунъяс институтса ректорӧн; РСФСР-са Коммунистическӧй партиялӧн Коми рескомса общественно-политическӧй шӧринӧн заведуйтысьӧн.
1991 вося тӧвшӧр тӧлысьын сійӧс пуктісны «Велӧдӧм» Коми фондса кадръяслысь квалификация кыпӧдан да найӧс выльысь велӧдан шӧринса директорӧн.
1992 вося урасьӧм тӧлыссянь вӧлі Коми ССР-са Министръяс Сӧвет бердын Коми республиканскӧй отраслькостса кадрӧвӧй шӧринса директорӧн [2].
1996 вося косму тӧлыссянь 2002 вося ода-кора тӧлысьӧдз уджаліс Коми Республикаса Юралысь бердын Канму службаӧ да веськӧдлыны велӧдан Коми Республикаса академияса ректорӧн, веськӧдлан да кадрӧвӧй политика кафедраса заведующӧйӧн.
2002 восянь В. Н. Котельникова олӧ Санкт-Петербургын. Уджаліс ДПО серти Санкт-Петербургса лесотехническӧй канму академияын проректорӧн; ДПО факультетса деканӧн, персоналкӧд удж да войтыркостса удж серти проректорӧс вежысьӧн, Госслужбалӧн Рытыв-Войвыв академияын профессорско-преподавательскӧй составлысь квалификация кыпӧдан шӧринса директорӧн, Санкт-Петербургса сервис да экономика канму университет бердын ДПО шӧринса директорӧн да с.в.
Наградаяс
СССР-са МВД-лӧн грамота (1976);
«Коми Республикаса нимӧдана уджалысь» Почёт ним (1999);
«Россия Федерацияса вылыс тшупӧда уджсикасӧ велӧдӧмын почёта уджалысь» морӧсвывса пас.