Маденов Игорь Владимирович
| Игорь Владимирович Маденов | |||
|---|---|---|---|
 | |||
| Чужан лун | 1976 вося урасьӧм тӧлысь 6-ӧд лун | ||
| Чужанін | Лӧкчимдін посёлок, Кӧрткерӧс район, Коми Республика | ||
| Кулан лун | 1999 вося йирым тӧлысь 22-ӧд лун | ||
| Куланін | Грозный район, Чечня, Россия | ||
| Канму |
 Россия |
||
| Войска сикас | пехота | ||
| Служитан вояс | 1994-1999 | ||
| Звание | старшина | ||
| Тышъяс/вӧйнаяс |
Чечняын медводдза вӧйна, Чечняын мӧд вӧйна |
||
| Наградаяс да премияяс |
|
||
Маденов Игорь Владимирович (1976 вося урасьӧм тӧлысь 6-ӧд лун, Лӧкчимдін посёлок, Кӧрткерӧс район, Коми Республика — 1999 вося йирым тӧлысь 22-ӧд лун, Грозный район, Чечня) — старшина, Комиысь Россияса Герой (2000)[1].
Олантуй
Игорь Маденов чужис 1976 вося урасьӧм тӧлысь 6-ӧд лунӧ Коми Республикаса Кӧрткерӧс районса Лӧкчимдін посёлокын. Ичӧтсяньыс олӧма Волгоград обласьтса Паллас районса Золотари сиктын, помалӧма сэні шӧр школа. 1994 воын Маденовӧс босьтӧмаӧсь служитны Россия Федерацияса армияӧ. Участвуйтіс Чечняын медводдза вӧйна вылын. 1996 вося тулысын Маденовӧс демобилизуйтӧмаӧсь, но сійӧ жӧ вося вӧльгым тӧлысьын нин мунӧма контракт серти[2].
Участвуйтіс Чечняын мӧд вӧйна вылын, вӧлі Войвыв Кавказса военнӧй кытшса 20-ӧд гвардейскӧй мотострелкӧвӧй дивизияысь 68-ӧд гвардейскӧй торъя разведка нуӧдан мотострелкӧвӧй батальонса пулемётчикӧн. 1999 вося йирым тӧлысь 21-ӧд лунӧ Маденов разведка группаӧ пырысьяс лыдын вуджис Терек вомӧн Толстой-Юрт сикт гӧгӧрын да нуӧдіс разведка. Кор мӧд луннас югдігӧн группа паныдасис боевикъяскӧд, разведчикъяс атакуйтісны противникӧс, та дырйи Маденов ранитчис пельпомас, но водзӧ тышкасис. Кор боевикъяс дорӧ воисны содтӧд вынъяс, Маденов кольччис сайӧдны ассьыс ёртъяссӧ. Би улысь ранитчӧм ёртсӧ петкӧдны зілигӧн сійӧ бара ранитчис, тайӧ пӧрйӧ смертельнӧя, но водзӧ нуӧдіс противник кузя бисӧ дзик кувтӧдзыс. Сійӧ тышас Маденов бырӧдіс некымын боевикӧс да прӧтивниклысь пулемётнӧй расчёт. Дзебӧмаӧсь Золотари сиктын[2][3].
Россия Федерацияса Президентлӧн 2000 во рака тӧлысь 16-ӧд лунся Индӧдӧн «Войвыв Кавказ регионын воинскӧй мог олӧмӧ пӧртігӧн повтӧмлун да героизм петкӧдлӧмысь» гвардияса старшина Игорь Маденовлы кувсьӧм бӧрас сетӧма Россияса Герой ним. Сідзжӧ сетӧмаӧсь Повтӧмлун орден[2].
Наградаяс
• Россияса Герой ним (2000.03.16);
• Повтӧмлун орден.
Паметь
• Маденовлысь нимсӧ сетӧма Золотари сиктын уличалы да школалы[2].
• 2022 воын Золотари сиктын пуктісны Маденовлы паметник[4].
Пасйӧдъяс
- ↑ Уроженцы Коми — Герои России: кто они
- ↑ 1 2 3 4 Маденов Игорь Владимирович (рус.). Сайт «Герои страны».
- ↑ Лобанов В. П. Книга памяти Республики Коми. Они живы в памяти нашей… Сыктывкар, 2023.
- ↑ Памятник Герою России Игорю Маденову открыли в поселке Золотари Палласовского района