Мамлӧн лун Россияын
| Мамлӧн лун Россияын | |
|---|---|
 | |
| Лӧсьӧдысь | Россия Федерацияса президентлӧн 1998 во тӧвшӧр тӧлысь 30-ӧд лунся 120 №-а Россияын «Мамлӧн лун йылысь» Индӧд. |
| Пасйӧны | вӧльгым тӧлысьын бӧръя вежалунӧ |
Мамлӧн лун Россияын (рочӧн День матери в России) — вӧльгым тӧлысьын бӧръя вежалунӧ пасъян гаж (Россия Федерацияса президентлӧн 1998 во тӧвшӧр тӧлысь 30-ӧд лунся 120 №-а Россияын «Мамлӧн лун йылысь» Индӧд серти). Тайӧ лунӧ, традиция серти, чолӧмалӧны став мамъясӧс да пӧчьясӧс, торйӧн нин, аньясӧс, кодъяс вермӧмаӧсь бура быдтыны челядьӧс, уна челядя мамъясӧй да ӧтка мамъясӧс[1].
Медводдзаысь буретш татшӧм ним улын тайӧ мероприятиесӧ нуӧдісны СССР-лӧн бӧръя кадӧ, 1988 вося йирым тӧлысь 30-ӧд лунӧ Баку карса школаын. Гажсӧ котыртіс роч кыв да литература велӧдысь Эльмира Гусейнова. Сылӧн зільӧмӧн дасьтісны да нуӧдісны мамъяслы сиӧм концерт. Сэки юргис чукӧстчӧм став школьникъяслы быд во пасйыны тайӧ лунсӧ кыдзи гаж, кор эськӧ нимӧдісны буретш мамъясӧс, а эз став нывбабаясӧс, кыдзи рака тӧлысь 8-ӧд лунӧ. Тайӧ шыӧдчӧмсӧ йӧзӧдіс уна газет. А Эльмира Гусейноваӧн дасьтӧм гаж сценарийсӧ йӧзӧдісны «Воспитание школьников» журналын, некымын во мысти — 1992 воын[2][3][4] .
Россияын тайӧ гаж символӧн лоӧ лӧз йыла турун. Эм эскӧм, мый дзоридзыс петкӧдлӧ пыдди пуктӧм, сьӧлӧмын видзӧм да радейтӧм — ставыс, мый медся ёна йитчӧма мамлӧн образкӧд[5].
Мамлӧн лунӧ да сы водзын Россия пасьта нуӧдӧны уна сикас тематическӧй мероприятие: концертъяс, выставкаяс. Акцияяс мунӧны и велӧдчанінъясын – школаясын да челядь видзанінъясын. Сы кындзи, страна пасьта мунӧ Мам лунлы сиӧм социальнӧй акция «Мам, ме тэнӧ радейта!». Вежонӧн водзджык либӧ мероприятиеяс дырйи сеталӧны тематическӧй чолӧмпасъяс, найӧс позьӧ козьнавны мамъяслы[1].
2022 вося моз тӧлысьын Россияса президент Владимир Путин вынсьӧдіс «Мам-героиня» ним. Сійӧс сетӧны нывбабаяслы, кодъяс чужтісны да быдтісны 10 да унджык челядьӧс. Наградитӧм аньлы ӧтпырйӧ мынтӧны ӧти миллион шайт[5][6].
СССР-ын вӧліны мамъяслы торъя наградаяс. Мамлун медаль сетлісны аньяслы, кодъяс чужтісны да быдтісны 5 либӧ 6 кагаӧс. Найӧс, кодъяс чужтісны да быдтісны 7, 8 либӧ 9 челядьӧс, наградитісны «Мам слава» орденӧн. А челядьыс кӧ вӧлі 10 да унджык — сетлісны орден да «Мам-героиня» ним[7] .
Пасйӧдъяс
- ↑ 1 2 День матери: история и традиции празднования в разных странах. РИА Новости (25 вӧльгым тӧлысь 2012). Шыӧдчан кадпас: 28 моз тӧлысь 2023.
- ↑ День матери: как появился праздник и где его принято отмечать. Рамблер (27 вӧльгым тӧлысь 2016). Шыӧдчан кадпас: 28 моз тӧлысь 2023.
- ↑ День матери - краткая история праздника. istmira.com. Шыӧдчан кадпас: 28 моз тӧлысь 2023.
- ↑ Владислав Шанин. День матери в России: История и традиции праздника. rg.ru (25 вӧльгым тӧлысь 2022). Шыӧдчан кадпас: 28 моз тӧлысь 2023.
- ↑ 1 2 Владислав Шанин. День матери в России: История и традиции праздника. Российская газета (25 вӧльгым тӧлысь 2022). Шыӧдчан кадпас: 28 моз тӧлысь 2023.
- ↑ Путин подписал указ об учреждении звания «Мать-героиня». ТАСС (15 моз тӧлысь 2022). Шыӧдчан кадпас: 28 моз тӧлысь 2023.
- ↑ День матери 2023 в России и мире: история и традиции праздника. kp.ru. Шыӧдчан кадпас: 28 моз тӧлысь 2023.
Тайӧ статья вылас оз ыстысьны Рувикиысь мукӧд статьяяс. |
.svg){kind=link}