Собянин Гавриил Епифанович

Босьтӧма Рувикиысь
Рувикиын эмӧсь мукӧд йӧз йылысь статьяяс, кодъяслӧн овыс Собянин.
Видлалӧм гижӧд
Гавриил Епифанович Собянин
Sobyanin1.jpg
Чужан лун 1896 вося ода-кора тӧлысь 25-ӧд лун
Чужанін  Шайтановка грезд, Мылдін район, Кардор губерня, Россия империя
Кулан лун 1944 вося ӧшым тӧлысь 23-ӧд лун
Куланін  Гаракас, Латвия, СССР
Войска сикас пехота
Служитан вояс 1942—1944
Звание
Красноармеец
Часьт Прибалтийскӧй фронтвывса 42-ӧд армиялӧн 48-ӧд стрелкӧвӧй дивизияса 301-ӧд стрелкӧвӧй полк
Тышъяс/вӧйнаяс Медводдза мирӧвӧй вӧйна
Айму вӧсна Ыджыд тыш
Наградаяс да премияяс
Сӧветскӧй Союзса Герой — 1945
Ленин орден — 1945 Гӧрд Дӧрапас орден

Собянин Гавриил Епифанович (1896 вося ода-кора тӧлысь 25-ӧд лун, Шайтановка грезд, Мылдін вӧлӧсьт, Кардор губерня, Россия империя — 1944 вося ӧшым тӧлысь 23-ӧд лун, Гаракас, Латвия, СССР) — Комиысь Сӧветскӧй Союзса Герой (1945), Айму вӧсна Ыджыд тыш кадӧ снайпер[1][2].

Олантуй

Гавриил Собянин чужӧма Мылдін районса Шайтановка грездын 1896 вося ода-кора тӧлысь 25-ӧд лунӧ. Помалӧма начальнӧй школа. Дас кык арӧссянь вӧралӧма. Ветлӧма медводдза мирӧвӧй тыш вылӧ[3].

1918 воын вуджӧма овны Вылыс Нарыкарыӧ, вӧралӧма. 1936 восянь олӧма Ханты-Манси асвеськӧдлан кытш — Йӧграмуын Берёзов районса Анеев сикт сӧвет улӧ пырысь Игрим посёлокын, веськӧдлӧма чери кыйысьяслӧн артельӧн.

1941 воын ас кӧсйӧм серти мунӧма Айму вӧсна Ыджыд тыш вылӧ[4], сы вӧсна мый сійӧс эз босьтны арлыд сертиыс — сылы вӧлі 45 арӧс[5]. Медводз сійӧс индӧмаӧсь овмӧс юкӧнӧ, а сэсся — М. И. Калинин нима 48-ӧд номера Ропшаса дивизиялӧн стрелковӧй полкӧ, коді тышкасьӧма Ленинград фронтын. Г. Е. Собянинӧс мӧдӧдӧмаӧсь снайпер школаӧ, кӧні кӧкъямысӧд лунас сетӧмаӧсь винтовка да мӧдӧдӧмаӧсь полкас. Фронт вылын 1942 восянь[6].

Йирым тӧлысь 7-ӧд лунӧ Собянинлӧн отделениеыс медводзӧн пырис Латвийскӧй ССР-лӧн Рига уездса Гайгалиниӧ, мыйысь Гавриил Епифановичлы сетісны медводдза награда — «Отвагаысь» медаль[4].

Йирым тӧлысь 23-ӧд лун Собянинлы вӧлі сетӧма «Тышын заслугаясысь» медаль[4].

Ӧшым тӧлысь 1 лунӧ Гавриил Епифановичӧс наградитӧмаӧсь Гӧрд Дӧрапас орденӧн[4].

Усьӧма Айму вӧсна Ыджыд тыш кадӧ 1944 вося ӧшым тӧлысь 23-ӧд лунӧ немеч пехотакӧд траншеяын тышкасигӧн. Гуалӧма Латвияын Салдус районса Курсиши грездын[4].

Подвигъяс

Арталӧм серти, Айму вӧсна Ыджыд тыш вылын виӧма 60 сайӧ салдат да офицерӧс.

Красноармееч Г. Е. Собянинлы Сӧветскӧй Союзса Герой ним сетӧма кулӧм бӧрас нин 1945-ӧд вося лӧддза-номъя тӧлысь 29-ӧд лунӧ СССР-са Медвылыс Сӧветлӧн Президиум Шуӧмӧн сыысь, мый петкӧдлӧма повтӧмлун Маза-Югла ю вуджигӧн да Латвия мездігӧн[7].

Тӧдса некымын подвиг йылысь:
• 1944-ӧд вося урасьӧм тӧлысь 25-ӧд лунӧ Саакада грезд вӧсна тышын рядӧвӧй Собянин мунӧма рота водзас вӧрті, лыйӧма винтовкасьыс куим немеч снайперӧс; ставнас — вӧрӧглысь 10 сайӧ салдат да офицерӧс. Ранитчӧма, но тышысь петӧма сӧмын командирлӧн тшӧктӧм бӧрын[6].
• 1944-ӧд вося йирым тӧлысь 7-ӧд лунӧ Сунтажи вӧсна тышын медводдзаяс лыдын вуджӧма Маза-Югла ю, лыйӧма кык снайперӧс да бырӧдӧма пулемётчикъяслысь расчёт, мыйӧн отсалӧма водзӧ писькӧдчыны ротаыслы[6].
• 1944-ӧд вося вӧльгым тӧлысь 2-ӧд да 3-ӧд лунъясӧ Лиелауцес тысянь рытыв-лунвылын винтовкаысь лыйӧма вӧрӧглысь 11 салдат да офицерӧс.
• 1944-ӧд вося вӧльгым тӧлысь 4-ӧд лун гӧра босьтігӧн тышын водзӧ нуӧдӧма ротасӧ. Ас кинас виӧма некымын вӧрӧгӧс[6].

Наградаяс

• Сӧветскӧй Союзса Герой ним (1945.06.29);
• Ленин орден (1945.06.29);
• Гӧрд Дӧрапас орден;
• Гӧрд Кодзув орден.

Паметь

• Ханты-Мансийск карын Вермӧм паркса Слава аллеяын сувтӧдӧма бюст[8][9].
• Ханты-Манси асвеськӧдлан кытш — Йӧграмуса Берёзовскӧй районса Игрим посёлокын сувтӧдӧма паметник.
• Ханты-Манси асвеськӧдлан кытш — Йӧграмуса Берёзово посёлокын сувтӧдӧма бюст.
• Латвияса Курсиши посёлокын воинскӧй братскӧй шойнаын гу вылын сувтӧдӧма паметник.
• Москваын, Вооружённӧй Вынъяслӧн музейса Вермӧм залын еджыд из стенъясын зарниӧн ӧзйӧны налӧн нимъясыс, кодъяс нэм кежлӧ колисны боевӧй стройын. На пӧвстын Гаврил Епифанович Собянин.
• Война помасьӧм бӧрын 13 во мысти, 1958 вося ӧшым тӧлысь 21-ӧд лунӧ СССР-са оборона министр лэдзис 255 №-а приказ «Сӧветскӧй Союзса Геройлысь, рядӧвӧй Собянин Гаврил Епифановичлысь паметьсӧ нэм кежлӧ нэммӧдӧм могысь пыртны 333-ӧд мотострелкӧвӧй полкса медводдза рота лыддьӧгӧ»[5].
• Геройлысь нимсӧ сетӧма Ханты-Манси асвеськӧдлан кытш — Йӧграмуса Берёзово посёлокын уличалы; Ханты-Мансийскӧй кытшса Берёзово районса Игрим посёлокын уличалы; Ханты-Мансийск карын уличалы; Тюмень обласьтса Берёзовоса чери кыян комбинатлӧн буксирлы.
• «Владислав Малюгин — о подвиге Собянина Гавриила Епифановича» видеосюжет

Пасйӧдъяс

  1. ↑ Александров А. Собянин Гавриил Епифанович // Республика Коми. Энциклопедия. Том III. — Сыктывкар: Коми книжное издательство, 2000. — С. 61.
  2. ↑ Книга памяти Республики Коми. Собянин Гавриил Епифанович
  3. ↑ Собянин Гавриил Епифанович (рус.). Сайт «Герои страны».
  4. ↑ 1 2 3 4 5 Собянин Гавриил Епифанович :: Память народа. pamyat-naroda.ru. Шыӧдчан кадпас: 20 моз тӧлысь 2022.
  5. ↑ 1 2 Прибыльский Борис. В строю живых // Ленинская правда : Ханты-Мансийская окружная газета. — 1959. — 9 мая (№ 90). — С. 2—3.
  6. ↑ 1 2 3 4 Собянин Гавриил Епифанович. warheroes.ru. Шыӧдчан кадпас: 20 моз тӧлысь 2022.
  7. ↑ Репортаж 37. Наш Герой — красноармеец, снайпер Собянин Гавриил Епифанович.
  8. ↑ Сайт администрации ХМАО — Югры. Галерея героев на сайте администрации округа. Шыӧдчан кадпас: 31 йирым тӧлысь 2010. Архивируйтӧма 3 йирым тӧлысь 2006.
  9. ↑ Собянин Гавриил Епифанович - Советские снайперы 1941-1945 гг. soviet-aces-1936-53.ru. Шыӧдчан кадпас: 20 моз тӧлысь 2022.

Литература

• «Герои страны» проектын Г. Е. Собянин йылысь
• Герои Советского Союза: крат. биогр. слов. Т.2. — Москва, 1988.
• Книга памяти Республики Коми. Т. 8 / сост. В. М. Котельников, А. М. Калимова. — Сыктывкар, 1999.
• Книга памяти Республика Коми. Т. 10 / сост. В. М. Котельников, А. М. Калимова, А. А. Карпов. — Сыктывкар, 2004.
• Герои земли Тюменской : [Сборник]. — 2-е изд., доп. — Свердловск, 1975.
• Навечно в строю Кн. 4. — М., 1962.
• Считать живыми! : [Сборник / Сост. Д. Чаркин]. — Кишинев, 1978.
• Александров, А. Н. Звезды отважных. Наши земляки — Герои Советского Союза и полные кавалеры ордена Славы. — Сыктывкар, 1991.
• Фотолетопись Республики Коми. Книга первая. 1921—1970 годы. — Сыктывкар, 2011.

Босьтӧма "https://kv.ruwiki.ru/w/index.php?title=Собянин_Гавриил_Епифанович&oldid=452579"-ысь