«Зырянская жизнь»
«Зырянская жизнь» — Коми муын медводдза общественно-политическӧй, экономическӧй да литературнӧй газет.
История
1918 вося лӧддза-номъя тӧлысь 10-ӧд лунӧ «З. Д. Следников да К°» типографияын петіс «Зырянская жизнь» газетлӧн медводдза петас[1]. Сійӧ петіс рочӧн, комиӧн йӧзӧдісны торъя материалъяс.
Сійӧс официальнӧя учредитіс салдат, рабочӧй да крестяна депутатъяслӧн Усть-Сысольск уездлӧн Сӧветса исполком.
Газетлӧн редакцияыс меститчис Усть-Сысольскын татшӧм инпас серти: «вӧвлӧм купеч Комлинлӧн керка, Исполнительнӧй комитетлы паныд».
Петаліс газетыс роч кыв вылын вежоннас кыкысь. Медводдза номеръяслӧн доныс вӧлі 25 ур.
«Зырянская жизнь» газетлӧн медводдза номерыс эз коль. Тӧдса, мый тиражыс сылӧн вӧлі 400 экземпляр.
Газетса медводдза редакторӧн лоис 21 арӧса Дмитрий Сергеевич Попов. Перымса университетысь студент-юристӧ велӧдчӧмсӧ дугӧдӧм бӧрын сійӧ пырис шуйга эсеръяслӧн Усть-Сысольскса организацияӧ. Сылӧн юрнуӧдӧм улын петіс дас ӧти номер, а 1918 вося сора тӧлысь 22-ӧд лунӧ выль большевикъяслӧн уезднӧй исполком вештіс Дмитрий Поповӧс должность вывсьыс продотрядъяс йылысь инструкция йӧзӧдны ӧткажитчӧмысь.
«Зырянская жизнь» газетӧн Дмитрий Попов бӧрын веськӧдлісны ӧта-мӧд бӧрсяыс врач Дмитрий Розанов, медводдза главредыслӧн тьӧзкаыс — Дмитрий Попов да Виктор Савин.
Газетӧ медводдза гижысьясысь ӧтиӧн лои сэки Усть-Сысольскын олысь Рочмуса Временнӧй революционнӧй правительствоса премьер-министр Александр Керенскийлӧн гӧтырыс — Ольга Керенская. Сійӧ мамыскӧд да пияныскӧд — Олегкӧд да Глебкӧд 1918 воын нёль тӧлысь чӧж олісны Усть-Сысольск дорын — Кӧджпом грездын (ӧні — Сыктывкарлӧн Кӧджпом юкӧн). Коми муӧ Керенскийясӧс вайис Питерсянь медводдза коми архитектор Александр Холопов, коді чужлӧма-быдмылӧма Кӧджпомын. Та йылысь сійӧс вермис корны Коми муын чужлӧм мӧд нималана морт Питирим Сорокин (сійӧ вӧлі А. Керенскийлӧн личнӧй секретарӧн)[2].
Газетын йӧзӧдісны Нёбдінса Витторлысь, Михаил Лебедевлысь, Илля Васьлысь, мукӧд коми гижысьлысь статьяяс да кывбуръяс.
Гражданскӧй война помасьӧм бӧрын, 1921 вося тӧвшӧр тӧлысь 1 лунӧ, «Зырянская жизнь» газетлы сетӧны выль ним — «Удж».
«Зырянская жизнь» газетӧдз Коми муын 1917 вося ода-кора тӧлысьын вӧлі йӧзӧдӧма «Известия Общества обновления местной жизни крестьянского и трудового населения Усть-Сысольского уезда» газет, но сылӧн петіс сӧмын 3 номер[3].
«Зырянская жизнь» газетлӧн 1918 да 1929 воясся ӧткымын номер оцифруйтӧма да йӧзӧдӧма Коми Республикаса Национальнӧй электроннӧй библиотекаын[4].