Холопов Александр Викентьевич

Босьтӧма Рувикиысь
Рувикиын эмӧсь мукӧд йӧз йылысь статьяяс, кодъяслӧн овыс Холопов.
Холопов Александр Викентьевич
Чужан лун 1880-ӧд вося косму тӧлысь 13-ӧд лун(1880-04-13)
Чужанін
Кулан лун 1942-ӧд вося тӧвшӧр тӧлысь 19-ӧд лун(1942-01-19) (61 ар)
Куланін
А.В. Холоповлӧн автопортрет, 1918 во

Холопов Александр Викентьевич (1880 вося косму тӧлысь 13-ӧд лунӧ (важ стиль серти -1) Вӧлӧгда губернияын Усть-Сысольск уездлӧн Выльгорт вӧлӧсьтса Кӧджпом грезд — 1942 вося тӧвшӧр тӧлысь 19-ӧд лун, Ленинград) — Коми Республикаса медводдза архитектор, серпасасьысь.

Олантуй

Чужис 1880 вося косму тӧлысь 13-ӧд лунӧ (важ стиль серти -1)[1][2] Вӧлӧгда губернияса Усть-Сысольск уездлӧн Выльгорт вӧлӧсьтса Кӧджпом грездын крестьяна семьяын, - иконописец Холоповъяслӧн рӧдысь, кодъясӧс тӧдӧны XVIII нэмсянь, кор рӧдсьыныс ӧти ("Зотей бать") гижис Усть-Сысольскын Трӧича соборлы «Спас Нерукотворнӧй» ӧбраз. Сылӧн батьыс, Викентий Павлович Холопов (1852-1912), уджалӧма Великоустюжскӧй ремесленнӧй управаса ӧбразъяс серпасалан мастерскӧйын. Мамыс, Мария Афанасьевна (1852-1943), Александр кындзи чужтіс нӧшта вит пиӧс да кык нылӧс.

Велӧдчӧма ӧбраз вӧчан гортса мастерскӧйын да Усть-Сысольск карса приходскӧй училищеын. Училище помалӧм бӧрын батьыскӧд ӧтлаын ветлӧма Соловкиӧ, велӧдчӧма Соловецкӧй иконописецъяс ордын. Тайӧ кадколастас сійӧ гижӧ медся водз тӧдса уджсӧ - «Стариклӧн юрыс» (1893). 1897 вося гожӧмын пырис Живопись, ваяние да зодчество кузя Москваса училищелӧн архитектура юкӧнӧ; велӧдчис профессор Л. М. Браиловский ордын. Училище помалӧм бӧрын (1900 во) кольччис сэтчӧ босьтны архитектура кузя диплом. 1903 воын сійӧ ветліс Браиловскийкӧд Новгородӧ, копируйтны Нередица вылын Спас вичколысь росписьяс.

1904 вося ода-кора тӧлысь 14-ӧд лунӧ Александр Викентьевич Холопов гӧтрасис дворянка Вера Дмитриевна Новодворская вылӧ[3] — Дмитрий Ивановичлӧн да Алла Владимировна Новодворскийяслӧн нывкӧд, кодъяс ордын сійӧ оліс - "Трубниковскӧй переулокса 1 участоклӧн Арбатскӧй юкӧнын, Соловьёва керка, 16 патера".

1906 воын училище помалӧм бӧрын сійӧ водзӧ велӧдчис Петыркарын - Искусствояслӧн Императорскӧй академияын. Сэні сійӧ уджаліс Леонтий Бенуа мастерскӧйын. 1907-1909 воясӧ Холопов ветлӧдлӧма серпасасян натурнӧй классӧ.
1907 воын сійӧ лоис отсасьысьӧн нималана зодчӧй Ф. И. Лидвальлы.
1908-1909 воясӧ участвуйтіс Петыркарын ӧта-мӧдлы кредит сетан мӧд обществолы стрӧйба стрӧитӧмын (Садовӧй улича, 34).
Академияын занятиеяс вылӧ тшӧкыда эз волы, да та вӧсна Холоповӧс 1909 вося тулысын вӧтлісны академияысь; бӧрынджык - бӧр босьтчис да 1913 воын помаліс сійӧс.

Вочасӧн сійӧ кутіс ёнджыка кутіс вӧчны интерьер уджъяс, босьтчис проектируйтны мебель, тайӧ уджлы сиис матӧ дас во Мельцер фирмаса мастерскӧйын. 1914 воын сійӧ пырӧчис Двореч пос проект лӧсьӧдӧмын, но заводитчӧм вӧйна вӧсна проектсӧ медводдза вид сертиыс эз пӧртны олӧмӧ. 1915 воын сійӧ участвуйтіс Волжско-Камскӧй банклӧн Петыркарса филиал проектъяслӧн конкурсын. 1916-1917 воясӧ Холоповлӧн проектъяс серти Крестовскӧй ді вылын стрӧитісны Морскӧй министерстволӧн гидропланъяслы ангаръяс да Мельцерлысь гидроавиационнӧй завод[4].

1918 воын семьяыскӧд вуджис Усть-Сысольскӧ, кӧні оліс 1925 воӧдз.
Сійӧ вӧлі Коми крайын медводдза велӧдчӧм архитекторӧн.
1918 воын веськӧдліс йӧзӧс велӧдан юкӧн бердын важся да искусство памятникъяс видзӧм кузя юкӧдулӧн[5].
Тайӧ кадӧ жӧ заводитіс веськӧдлыны Коми обласьтса краеведческӧй музейӧн (ӧні - Коми Республикаса национальнӧй музей).
1918-1925 воясӧ уджаліс ӧтув Коми му туялан котыркӧд.
Кор 1921 воын Коми лои автономнӧй обласьтӧн, А. В. Холопов лоис автономия юркарса штатнӧй архитекторӧн. Усть-Сысольскын Холопов пӧртіс олӧмӧ некымын проект, на лыдын Спорт керка, Йӧзкост керка, Искусство керка, метеостанцияяс да весиг вичкояс, кодъяс кольӧмаӧсь бумага вылын.
Вӧчӧмъяс пиысь: Кырувын (ӧні - Кируль) школа, сійӧс помалісны стрӧитны сӧмын 1928 воын; сійӧ кольӧма миян кадӧдз, но омӧль состояниеын.
Кольӧма сідзжӧ Сыктывдін районса Выльгорт сиктын земскӧй начальнӧй училищелӧн стрӧйба (ӧні - Сыктывдін районса история да культура музей), кодлысь проектсӧ вӧлі вӧчӧма 1912 воын на.

А. Холопов пырӧдчис и Зыряналы народнӧй образование институт (ЗИНО) восьтӧмӧ: лыддис искусство история, музейнӧй делӧ да прикладнӧй математика кузя лекцияяс, вӧлі физико-математическӧй отделениеса деканӧн[6].
Холоповъяслӧн семья активнӧя участвуйтіс Усть-Сысольскса театральнӧй олӧмын. Александр Холоповлӧн Ариадна нылыс петкӧдчылӧма театральнӧй постановкаясын, та вӧсна художник вӧчӧма нылыслӧн петкӧдчӧмӧн спектакльяс вылӧ театральнӧй костюмъяслысь некымын эскиз, оформитӧма любительскӧй спектакльяслысь декорацияяс да костюмъяс.

Художниклӧн Ариадна нылыс дас арӧсӧн, серпасалӧма Петров-Водкин, Холопов гозъялӧн ёрт

1925 вося тулысын Холопов гозъя[7] вуджисны Архангельскӧ, кӧні 1928 воын А. В. Холоповлӧн проект серти Мудьюг ді вылӧ вӧлі сувтӧдӧма «1918-1920 воясся интервенциялӧн жертваяслы» паметник. Найӧ сідзжӧ вӧчисны «Экспортлес» да «Северолес» трест правлениеяслысь стрӧйба проектъяс.

1932 воын, Ленинградӧ воӧм бӧрын, Холопов пырис уджавны «Ленпроект» трестлӧн 3-ӧд номера мастерскӧйӧ; участвуйтіс Щемиловка микрорайон проектируйтӧмын, оформитіс Всероссийскӧй алюминиево-магниевӧй институтлысь интерьеръяс, «Интурист» гостиницалысь зданиеяс. Тані сійӧ лоис СССР-са архитекторъяс Союзлӧн Ленинградса отделениеса членӧн.

Александр Холопов уна во чӧж ёртасис К. С. Петров-Водкин (сійӧ рисуйтіс Ариадна нывлысь портретсӧ), П. П. Кончаловский, Д. И. Митрохин, А. Бенуа художникъяскӧд, Каллистрат Жаковкӧд. Тӧдса вӧлі Временнӧй правительствоса первой премьер-министр А. Ф. Керенскийлӧн семьякӧд (отсаліс Ольга Керенскаялы недыр кежлӧ овмӧдчыны Усть-Сысольскӧ 1918 воын), кутіс йитӧдъяс Питирим Сорокинкӧд.

Гӧтырыскӧд пӧгибнитіс блокада дырйи Ленинградын.

Коми Республикаса Национальнӧй галереяын видзӧны серпасасьысь Ариадна Шмидт нылӧн сетӧм архитектура проектъяс, серпасъяс, акварельяс, эскизъяс.

Рӧдвуж

Фёдорова Анна Николаевна — коми литература туялысь, филология наукаясса кандидат; Николай Викентьевич вокыслӧн ныв.
Ариадна Шмидт нылыс лоис нималана серпасасьысьӧн.
Талун Петыркарын олӧ да уджалӧ архитекторлӧн правнучкаыс - Дарина Шмидт, роч режиссёр, художник, аниматор, сценарист, редактор. Персонажъяс серпасалысь, медводдза режиссёр да «Лунтик да сылӧн ёртъяс» нималана россияса анимационнӧй сериал лӧсьӧдысьясысь ӧти.

Пасйӧдъяс

  1. ↑ Кочерган Л.И. Холопов Александр Викентьевич // Город Сыктывкар. Энциклопедия.. — Сыктывкар, 2010. — С. 327.
  2. ↑ Сова В.А. Хранитель музея А.В. Холопов // История в событиях и лицах. Страницы истории Национального музея Республики Коми. — Сыктывкар, 2011. — С. 10-15.
  3. ↑ Вера помаліс Мариинскӧй нывъяслы гимназию Тверын да 1897 воын пырис велӧдчыны Живопись, ваяние да зодчество кузя Москваса училищеӧ: «наукаяс кузя вольнослушательницаӧн, а искусство кузя медводдза классӧ».
  4. ↑ Фирмаыс Медводдза мирӧвӧй вӧйна дырйи вӧчис гидропланъяс
  5. ↑ Беляева С., Куратов П. Холопов Александр Викентьевич // Республика Коми. Энциклопедия. Том III. — Сыктывкар: Коми книжное издательство, 2000. — С. 266.
  6. ↑ Холопов Александр Викентьевич
  7. ↑ Налӧн Ариадна нылыс 1923 аосянь оліс Ленинградын.

Литература

• Вехов Н. В. Первый коми архитектор // Московский журнал. — 2015. — № 9. — С. 78—96. — ISSN 0868-7110.
• Кочерган Л. И. Жизнь на сломе эпох : коми архитектор А. В. Холопов : [монография] / Л. И. Кочерган ; М-во культуры РФ, М-во культуры РК, Нац. галерея РК. – Сыктывкар : [б. и.], 2012. –223 с. : ил.
• Поповцева Ф. Архитектор А. В. Холопов // Молодежь Севера. 1987. 29 июля.
• Поповцева Ф. Зодчий Холопов // Молодежь Севера. 1993. 1 окт.
• Лощилов, М. Когда ломались эпохи, люди проектировали и строили дома / Михаил Лощилов // Правда Севера (Архангельск). 2012. 5 дек.
• Об уроженце Коми края, архитекторе А. В. Холопове, по проектам которого построены некоторые здания в Архангельске авторе памятника на о-ве Мудьяг.
• Кочерган, Л. Вне времени: о жизни архитектора Александра Холопова / Людмила Кочерган // Знай наших. 2012. № 4 (Сент. / Окт.). С. 48-49.
• Кочерган Л. Людмила Кочерган: «Общественная значимость и масштаб личности безусловны» / беседовала Людмила Борисевич // Регион. 2012. № 6. С. 38-39: фот.
• Сова В. А. Хранитель музея А. В. Холопов // История в событиях и лицах. Страницы истории Национального музея Республики Коми / В. А. Сова. Сыктывкар, 2011. С. 10-15.
• Холопов Александр Викентьевич, 1880-1942 // Изобразительное искусство Коми АССР: каталог. Сыктывкар, 1989. С. 150-160.
• Коллекция произведений А. В. Холопова из собрания Национальной галереи Республики Коми.

Ыстӧгъяс

Босьтӧма "https://kv.ruwiki.ru/w/index.php?title=Холопов_Александр_Викентьевич&oldid=471819"-ысь