Айму вӧсна Ыджыд тышын кӧр видзысьяслӧн транспортнӧй батальонъясын участвуйтысьясӧс казьтылан лун
| Айму вӧсна Ыджыд тышын кӧр видзысьяслӧн транспортнӧй батальонъясын участвуйтысьясӧс казьтылан лун | |
|---|---|
 | |
| Вынсьӧдӧма | 2024 во сора тӧлысь 29-ӧд лунся Коми Республикаса Юралысьлӧн индӧдӧн |
| Пасйӧны |
 Коми Республика |
| Кадпас | вӧльгым тӧлысь 20-ӧд лун (быд во) |
| Йитчӧма | 1941 вося вӧльгым тӧлысь 20-ӧд лунӧ странаӧс доръян канму комитетӧн «Коми АССР-ын да Кардор обласьтын кӧръясӧс да кӧръясӧс вӧтлысьясӧс (каюръясӧс) мобилизация йылысь» шуӧм вынсьӧдӧмкӧд |
Айму вӧсна Ыджыд тышын кӧр видзысьяслӧн транспортнӧй батальонъясын участвуйтысьясӧс казьтылан лун (рочӧн День памяти участников оленно-транспортных батальонов в Великой Отечественной войне ) — Коми Республикаын казьтылан лун, пасйӧны вӧльгым тӧлысь 20-ӧд лунӧ 2024 восянь[1].
Казьтылан лунсӧ вынсьӧдӧма 2024 во сора тӧлысь 29-ӧд лунся Коми Республикаса Юралысьлӧн индӧдӧн[2].
История
1941 вося вӧльгым тӧлысь 20-ӧд лунӧ Оборона кузя канму комитет вынсьӧдіс «Коми АССР-ын да Кардор обласьтын кӧръясӧс да кӧръясӧс вӧтлысьясӧс (каюръясӧс) мобилизация йылысь» шуӧм. Дорйыны Чужан мулысь войвыв мудоръяссӧ мӧдӧдчисны уна сюрс изьватас, ненеч, саами да манси кӧр видзысьяс. Карелия фронт, кӧні найӧ воюйтісны, лои СССР-лӧн границаса дзик ӧти участокӧн, кодӧс эз вермыны вуджны фашистъяс.
Кӧръяс, фронт вылӧ веськалӧм бӧрын, лоины тӧдчана оружиеӧн да салдатъяслӧн бур боевӧй ёртъясӧн. Найӧ вермисны унатор: кыскыны жугӧдӧм самолёт, нуны пушка-горняшка либӧ дас ящик снаряд, эвакуируйтны доймӧмаясӧс. Кӧръяс мунісны сэті, кыті эз вермы мунны некутшӧм техника: тундраті, туйястӧг, некымын метра джуджда лым вывті.
Боеч-кӧр видзысьяс отсӧгӧн фронт вылысь петкӧдісны 10142 доймӧм да висьысьӧс, боевӧй заданиеяс олӧмӧ пӧртӧм вылӧ вайисны 7985 военнослужащӧйӧс, нуисны 17082 тонна боеприпас да военнӧй груз, эвакуируйтісны тундраысь 162 аварийнӧй самолёт[1].
Пасйӧм
Уна районын да карын нуӧдӧны казьтылан лунлы сиӧм мероприятиеяс[3][4][5].
Коми Республикаса Юралысьлысь могъяс недыр кад кежлӧ олӧмӧ пӧртысь Р. Э. Гольдштейн шуис:
«Таво Коми Республикаын медводдзаысь пасъям Айму вӧсна Ыджыд тышын кӧр видзысьяслӧн транспортнӧй батальонъясын участвуйтысьясӧс казьтылан лун. Тайӧ луныс пырис миян регионлӧн казьтылан лунъяс календарӧ, медым пыдди пуктыны найӧс, кодъяс сьӧкыд воясӧ дорйисны миянлысь странанымӧс фашизмысь.
Воин-кӧр видзысьяс петкӧдлісны збыль героизм, йӧз вӧсна тӧждысьӧм да мужество. Войвывса кавалерияӧн вӧдитчисны сэні, кыті эз вермыны прӧйдитны вӧвъяс да техника. Сьӧкыда воӧдчан местаясті кӧдзыдъяс дырйи кӧр дадювъяс вайлісны передӧвӧй вылӧ боеприпасъяс да сёян-юан, петкӧдлісны доймӧмаясӧс. Кӧр батальонъясса боечьяс вӧчавлісны диверсияяс противник тылын.
Айму вӧсна Ыджыд тыш воясӧ миян пӧль-пӧчлӧн подвигыс нэм кежлӧ коляс войтырлӧн паметьын. Сійӧ ышӧдӧ миянӧс зіля пырӧдчыны Аймулӧн олӧмӧ, бура уджавны Россиялы да Коми Республикалы бур вылӧ!»[6]
Тӧдмасисны Войвывса геройяскӧд да налӧн аслыспӧлӧс военнӧй транспорткӧд и республикаса гӧсьтъяс — том йӧзлӧн восьса Арктикаса коймӧд «Дельфийскӧй ворсӧмъясын» участвуйтысьяс[7].
Ыстӧгъяс
- ↑ 1,0 1,1 Сегодня в Республике Коми впервые отмечается День памяти участников оленно-транспортных батальонов в Великой Отечественной войне
- ↑ Указ Главы Республики Коми от 29.07.2024 № 91 "Об установлении в Республике Коми Дня памяти участников оленно-транспортных батальонов в Великой Отечественной войне"
- ↑ День памяти оленно-транспортных батальонов
- ↑ В Коми впервые отмечается День памяти участников оленно-транспортных батальонов
- ↑ ТАКОЙ ДЕНЬ! 20 НОЯБРЯ-НОВАЯ ПАМЯТНАЯ ДАТА В РЕСПУБЛИКЕ КОМИ!
- ↑ Обращение в связи с Днём памяти участников оленно-транспортных батальонов в Великой Отечественной войне
- ↑ В Сыктывкаре открытие Арктических Дельфийских игр объединило представителей 13 стран