Богоявленньӧ вичко (Ляй)
| Православнӧй вичко | |
| Богоявленньӧ вичко | |
|---|---|
 | |
| 62°16′34″ с. ш. 50°39′58″ в. д.GЯO | |
| Страна |
 Россия |
| Ин | Ляй |
| Епархия | Сыктывкарса епархия |
| Лӧсьӧдан кадпас | 1856 |
| Стрӧитӧм | 1852 во — 1856 во |
| Статус |
 Россияса войтыръяслӧн культура озырлун объект региональнӧй тӧдчанлуна. Рег. № 111610443810005 (ЕГРОКН). Объект № 1100103000 (БД Викигида) |
| Сайт | epiphania.cerkov.ru |
 |
|
 Медиафайлы на РУВИКИ.Медиа | |
Богоявленньӧ вичко (рочӧн Богоявле́нский храм) — Коми Республикаын Княжпогост районса Ляй грездын Роч православнӧй вичколӧн Сыктывкарса епархиялӧн приходскӧй вичко. Вичколысь шӧр престолсӧ вежаӧдӧма Богоявленньӧ серти.
XIX нэм шӧрса архитектура памятник. Вичкоыс сулалӧ Емва ю дорын, грезд шӧрын.
История
1798 вося «Яренск уездса вичкояс да попъяс йылысь» ведомосьтъясын юӧртӧма Ляйса кык вичко йылысь, кодъяс «тайӧ (1798) вося ода-кора тӧлысь 8-ӧд лунӧ сотчисны». Ляйса Богоявленньӧ вичколӧн 1907 вося клирӧвӧй ведомосьт серти, ӧнія изйысь вӧчӧм вичкосӧ вӧлі стрӧитӧма 1852-1856 воясӧ пуысь вӧчӧм пыдди. Вичколӧн джудждаыс медшӧр купол крестӧдз 47 м.
1929 воын вичкосӧ тупкисны да сылысь медводдза судтасӧ пӧртісны нянь видзанінӧ. Коми АССР-са Министръяс Сӧветлӧн 1969 во йирым тӧлысь 23-ӧд лунся 420 №-а Шуӧмӧн[1] вичко стрӧйбасӧ вӧлі шуӧма регион тӧдчанлуна культура озырлун объектӧн, но стрӧйбасӧ видзӧм кузя мераяс эз примитлыны. 1970-ӧд вояс помын Богоявленньӧ вичко кӧлӧкӧльня шпильӧ кучкис чардби, заводитчис пӧжар. Биын сотчис кӧлӧкӧльня ярусысь джодж джынйыс, вевтыслӧн тӧдчана юкӧныс, мыйысь киссис мӧд судтаса трапезнӧй сводлӧн юкӧныс. 1980-ӧд вояс заводитчигӧн тані бара лоӧма пӧжар. Биыс бырӧдіс трапезнӧйлысь, вичколысь джоджъяссӧ да гожся вичколысь алтарсӧ. Та дырйи дзикӧдз вошӧмаӧсь гожся да тӧвся вичкоысь ӧбразъяс, ӧшинь рамаяс, посъяс.
1992 воын стрӧйбасӧ дон босьттӧг сетісны православнӧй котырлы, а Коми Республикаса Каналан Сӧветлӧн 1999 во рака тӧлысь 24-ӧд лунся П-2/15 №-а шуӧмӧн бӧр сетісны Роч православнӧй вичколӧн Сыктывкарса епархиялы.
Архитектура
Богоявленньӧ вичколӧн эм куим престол: вылысса кӧдзыд храмын — Ен Мам Успенньӧ ним кузя, улысса шоныд храмын — Богоявленньӧ ним кузя да вежа Николай Чудотвореч ним кузя. Вичко фасадъяссӧ мичмӧдӧма карнизъясӧн, пилястръясӧн, ӧшиньяссӧ фигурнӧй карнизъясӧн. Вичкоыс лоӧ классическӧй вичко архитектуралӧн провинциальнӧй образецӧн, сійӧ торъялӧ стӧч пропорцияясӧн, стройнӧй да кокни силуэтӧн. Сылӧн аслыспӧлӧслунӧн лоӧ XIX нэм шӧр кежлӧ фасад декорын выль элементъясӧн вӧдитчӧм, найӧ лӧсялӧны архитектураын чужысь «роч стильлы». Вичкосӧ мичмӧдӧма ширинкаясӧн (стенын веськыд пельӧса гуранъясӧн), а сідзжӧ киль кодь да волюта кодь из карнизъясӧн.
Ӧнія кадӧ
2019 воын Ляйын Богоявленньӧ вичкоса настоятельӧн вӧлі индӧма иерей Владимир Левичевӧс. 2020 воын вӧлі заводитӧма уджъяс, медым видзны вичкосӧ лым-зэрысь. 2021 воын уджъясыс мунісны водзӧ: шашкаысь вӧчӧм кӧрт вевтӧн вевттьӧма шӧр куполсӧ, вичко гӧгӧрыс сувтӧдӧма потшӧс. 2021 вося лӧддза-номъя тӧлысь 5-ӧд лунӧ Сыктывкарса архиепископ Питирим вежаліс крестсӧ да куполсӧ, сэсся найӧс сувтӧдісны да крепитісны югыд барабанӧ[2].
Духовенство
Вичкоса настоятель — иерей Владимир Левичев.
Пасйӧдъяс
- ↑ Объекты культурного наследия регионального значения. Управление Республики Коми по охране объектов культурного наследия. Шыӧдчан кадпас: 5 моз тӧлысь 2025. Архивируйтӧма 30 вӧльгым тӧлысь 2021.
- ↑ Савенко Е. На Богоявленский храм в деревне Ляли в Коми водрузили золотую маковку с крестом (рус.). komi.kp.ru (5 лӧддза-номъя тӧлысь 2021). Шыӧдчан кадпас: 5 моз тӧлысь 2025. Архивируйтӧма 30 вӧльгым тӧлысь 2021.
| Княжпогост районын дінму тӧдчанлуна культура озырлун объектъяс | |
|---|---|
| |
