Бугаев Виталий Анатольевич
| Виталий Анатольевич Бугаев | ||
|---|---|---|
 | ||
| Чужан лун | 1969 вося кӧч тӧлысь 30-ӧд лун | |
| Чужанін | Черкесск, Карачай-Черкесия АК, Ставрополь край, РСФСР, СССР | |
| Кулан лун | 2000 вося тӧвшӧр тӧлысь 9-ӧд лун | |
| Куланін | Аргун, Чечня, Россия | |
| Канму |
 Россия |
|
| Войска сикас | милиция | |
| Звание | Старшӧй сержант | |
| Тышъяс/вӧйнаяс |
Чечняын медводдза вӧйна, Чечняын мӧд вӧйна |
|
| Наградаяс да премияяс |
|
|
Бугаев Виталий Анатольевич (1969 вося кӧч тӧлысь 30-ӧд лун, Черкесск, Карачай-Черкесия АК, Ставрополь край, РСФСР, СССР — 2000 вося тӧвшӧр тӧлысь 9-ӧд лун, Аргун, Чечня, Россия) — милицияса старшӧй сержант, Чечняын медводдза да мӧд вӧйнаын участвуйтысь, Коми Республикаысь Россияса Герой (2000)[1][2].
Олантуй
Виталий Бугаев чужлӧма 1969 вося кӧч тӧлысь 30-ӧд лунӧ Ставрополь крайса Черкесск карын. Семьяыскӧд вуджис овны Вӧркутаӧ, кӧні помаліс шӧр школа да босьтісны армияӧ. 1995 вося лӧддза-номъя тӧлыссянь — Россия Федерацияса пытшкӧсса делӧяс министерство органъясын. Куим тӧлысся стажируйтчӧм бӧрын лоис Ылі Асыввывса УВД бердын ОМОН-са боечӧн. 1996 воын мӧдӧдчис аслас медводдза командировкаӧ Войвыв Кавказӧ. 1997 во помын босьтіс милиционер-взрывтехниклысь квалификация. 1999 вося ӧшым тӧлысьын Бугаев мӧдӧдчис мӧд командировкаӧ Войвыв Кавказӧ[3].
2000 вося тӧвшӧр тӧлысь 9-ӧд лунӧ Аргун кӧрт туй станция дорӧ матыстчисны уна лыда бандаяс, кодъяс атакуйтісны сійӧс дорйысь 30 омоновецлысь группа. Таӧдз Бугаев да сылӧн милиционер-уджъёртъяс Николай Виноградов да Владимир Тамгин мунісны разминируйтны Аргун ю вомӧн кӧрт туй пос дорысь аддзӧм кык взрыв вӧчантор. Найӧ кылісны лыйсьӧм да уськӧдчисны дорйысьысьяслы отсӧг вылӧ. Мунігмозыс налы удайтчис пуксьыны мунысь БМП-2 вылӧ. Но регыд и БМП-сӧ, и сійӧс колльӧдысь «Т-72» танксӧ вӧлі жугӧдӧма. Сотчысь машинаысь чеччыштӧм бӧрын Бугаев, Виноградов да Тамгин заводитісны тышкасьны. Сьӧкыда ранитчӧм Бугаев заводитлӧма взорвитны асьсӧ гранатаӧн, но абу удитӧма, сы вӧсна мый сійӧс веськыда лыйлӧмаӧсь боевикъяс. Сійӧ жӧ тышас пӧгибнитісны Виноградов да Тамгин. Куим взрывотехниклӧн действиеясыс сетісны позянлун кыскыны станция дорысь противниклысь вынъяссӧ да кокньӧдны отрядлысь положениесӧ, коді дорйысис нӧшта кык луна-воя[3].
Россия Федерацияса Президентлӧн 2000 во сора тӧлысь 26-ӧд лунся 1374 №-а Индӧдӧн милицияса старшӧй сержант Виталий Бугаевлы кувсьӧм бӧрас сетӧма Россия Федерацияса Герой ним да «Зарни Кодзув» медаль[3].
Паметь
• Вӧркутаса 35-ӧд номера школа стенӧ, кӧні велӧдчис Виталий Бугаев, сувтӧдӧма казьтылан пӧв, казьтылан кадпасъясӧ сы дорӧ пуктӧны дзоридзьяс[4].
• Быд во тӧвшӧр тӧлысь 9-ӧд лунӧ пытшкӧсса делӧяслӧн Ылі Асыввывса веськӧдланінын пасйӧны Чечняын усьӧм асланыс уджъёртъясӧс казьтылан лун[5].
• «Подвиг милиционера-взрывотехника Виталия Бугаева. Участник первой и второй чеченской. Герой России» видеосюжет.
Пасйӧдъяс
- ↑ Офицеры России. Бугаев Виталий
- ↑ Лобанов В. П. Книга памяти Республики Коми. Они живы в памяти нашей… Сыктывкар, 2023.
- ↑ 1 2 3 Бугаев Виталий Анатольевич (рус.). Сайт «Герои страны».
- ↑ Уроженцы Коми — Герои России: кто они
- ↑ Живые цветы возложены на могилы Героев России. MoiGorod.Ru (10 тӧвшӧр тӧлысь 2012). Шыӧдчан кадпас: 20 йирым тӧлысь 2012. Архивируйтӧма 18 ӧшым тӧлысь 2012.
Литература
• Герои России МВД РФ. — М., 2002;
• Лобанов В. П. Книга памяти Республики Коми. Они живы в памяти нашей… Сыктывкар, 2023.