Коми Республикаса опера да балет канму театр
| Коми Республикаса опера да балет канму театр | |
|---|---|
 | |
| Воддза нимъяс | Коми АССР-са шылада-драма театр, Коми АССР-са шылада театр |
| Театр сикас | Оперы да балет театр |
| Восьтӧма | 1992 во |
| Подув пуктысь | Борис Степанович Дейнека |
| Театр стрӧйба | |
| Ин |
 Сыктывкар, Коммунистическӧй ул., 32. |
| Видзӧдысь лыд | 760 мест[1] |
 |
|
| Веськӧдлысьяс | |
| Директор | Садовский Алексей Юрьевич |
| Медшӧр режиссёр | Илья Можайский |
| Медшӧр дирижёр | Иван Виноградов |
| Медшӧр балетмейстер | Андрей Меркурьев |
| Главный хормейстер | Ольга Рочева |
| Медшӧр серпасасьысь | Юрий Самодуров |
| Сайт | komiopera.ru |
 Медиафайлы на РУВИКИ.Медиа | |
Коми Республикаса опера да балет театр (рочӧн Государственный театр оперы и балета Республики Коми) — Коми Республикаын тӧдчана культура учрежденньӧ. Уджалӧ Сыктывкарын 1958 восянь.
История
1957 вося кӧч тӧлысь 28-ӧд лунӧ Коми АССР-са Министръяс Сӧвет примитіс «Сыктывкарын шылада театр котыртӧм йылысь» шуӧм.
Театрыс воссис 1958 вося моз тӧлысь 26-ӧд лунӧ П. И. Чайковскийлӧн «Евгений Онегин» операӧн, сійӧс пуктіс Ленинградысь корӧм профессор да композитор А. Киреев[1]. Медводз вӧлі шусьӧ «Республикаса шылада театр», 1992 восянь — «Коми Республикаса опера да балет театр».
1960 воын сылӧн сцена вылын пуктӧма «Гроза над Усть-Куломом» медводдза коми национальнӧй опера, а 1961 воын — «Яг Морт» медводдза коми национальнӧй балет.
1968 восянь театр уджалӧ выль керкаын, мый кыпӧдӧма А. Д. Турчанинов проект серти.
1991 восянь нуӧдӧны И. П. Бобракова нима Опера да балет искусстволысь «Сыктывкарса тулыс» войтыркостса фестиваль
1997 восянь нуӧдӧны финн-йӧгра канму да Россияса регионъяс пӧвстын балет искусстволысь «Зарни джыджъяс» фестиваль[2].
Медводз шылада театрса 104 морта творческӧй котыр уджаліс Б. С. Дейнека художественнӧй веськӧдлӧм улын. Медводз составса солистъяс пӧвстын вӧліны Б. Дейнека, В. Ищенко, С. Марков, И. Бобракова, В. Привальцева, К. Васильев, Г. Белов. Балетмейстер Г. Ваховский веськӧдлӧм улын балет труппаын вӧліны Перымса да мукӧд хореографическӧй училище помалысьяс, а сідзжӧ Коми АССР-са сьылан да йӧктан канму ансамбльысь артистъяс.
Фестивальяс
1991 восянь театр быд во нуӧдӧ опера да балет искусстволысь «Сыктывкарса тулыс» войтыркостса фестиваль, кодлы сетӧма сылы подув пуктысь Россияса нимйӧза артистка Ия Бобраковалысь ним. Фестиваль кутіс нимавны профессиональнӧй музыкантъяс да критикъяс пӧвстын, СМИ-ын. «Сыктывкарса тулыс» традиционнӧя ӧтувтӧ Россияса да суйӧрсайса регионъясысь солистъясӧс, музыкантъясӧс, театральнӧй котыръясӧс. Талун фестиваль — Коми Республикалӧн да Россиялӧн культура олӧмын паськыда тӧдса лоӧмтор.
1997 воын фестивальлы сетісны Коми Республикаса канму премия.
Финн-йӧгра войтыръяслӧн культурнӧй олӧмын тӧдчана лоӧмторйӧн да Коми Республикалӧн культурнӧй олӧмын тӧдчана лоӧмторйӧн, мый сетӧ позянлун тырвыйӧ петкӧдлыны финн-йӧгра странаяслысь да регионъяслысь культурнӧй наследиесӧ, лоӧ балет искусстволӧн войтыркостса «Зарни джыджъяс» фестиваль. Фестивальыс муніс Сыктывкарын 1997—2000 воясӧ и кажитчис видзӧдысьяслы и театральнӧй критикъяслы. Сыктывкарсаяс да юркарса гӧсьтъяс вермисны аддзыны выль постановкаяс да выль сьылысьясӧс. Фестиваль вылын петкӧдчисны и балет искусствоса кодзувъяс, и том йӧктысьяс. Бӧр лӧсьӧдӧмаӧсь 2014 воын, нуӧдӧны кык вонас ӧтчыд.
Театр талун
Талун театр видзӧ россияса шылада репертуар театрлысь традицияяссӧ, вӧзйӧ видзӧдысьяслы тӧдмасьны мирса шылада озырлунлӧн медбур произведениеясӧн, петкӧдлӧ коми авторъяслысь произведениеяс, видзӧ классика да национальнӧй компонентъяс костын баланс. Театрлӧн репертуар афишаын эм 60 сайӧ опера, балет, оперетта да мукӧд шылада жанр.
Став во чӧжӧн театр ветлӧдліс гастрольясӧн Россия пасьтала, а 2000 восянь нуӧдіс ыджыд удж войтыркостса ёртасьӧм кузя, бура петкӧдчис мирӧвӧй сценаяс вылын. Театрлысь балет да опера котырсӧ пӧся паныдалісны Швейцарияын, Германияын, Ыджыд Британияын, Австрияын, Испанияын, Португалияын, Турцияын, Финляндияын.
И талун театрлӧн планъясын выль постановкаяс, проектъяс, фестивальяс, Россия, республика да суйӧрсайса гастрольяс. Коми Республикаса опера да балет театр — тайӧ ыджыд творческӧй котыр, коді мунӧ кадкӧд ӧттшӧтш, видзӧ уна вося традицияяс, вочавидзӧ ӧнія видзӧдысьлӧн корӧмъяслы.
Видзӧдысьяслы пыр воӧны сьӧлӧм вылас театрлӧн постановкаяс, на лыдын и татшӧм операяс: «Тоска», «Чио-Чио-сан», «Травиата», «Риголетто» Джузеппе Верди, «Кармен», «Евгений Онегин», «Севильский цирюльник»; балетъяс: «Лебединое озеро», «Спящая красавица», «Щелкунчик», «Жизель», «Баядерка», «Дон Кихот»; опереттаяс: «Летучая мышь» да «Сильва»; мюзиклъяс «Мертвые души/ Гоглюцинации Чичикова», «Миллионерша» да мукӧдъяс.
Театрлӧн репертуарын Я. Перепелицалӧн «Яг Морт» национальнӧй балет да С. Носковлӧн «Куратов» опера. Театркӧд топыда уджаліс Коми Республикаса композиторъяслӧн котырӧн веськӧдлысь, Россия Федерацияса да Коми Республикаса искусствоын нимӧдана уджалысь, Россия Федерацияса да Коми Республикаса канму премияа лауреат Герцман Михаил Львович: сійӧ гижис шыладсӧ «Войпель», «Снежная королева» да мукӧд спектакль дорӧ[3].
Ж. Оффенбахлӧн «Сказки Гофмана» опера — «Состав» нимпасын «Онегин» Россияса национальнӧй опернӧй премия лауреат. Театрлысь уна премьернӧй да репертуарнӧй спектакль пасйӧма Коми Республикаса Веськӧдлан котырлӧн премия лауреатлӧн да Коми Республикаса Степан Ермолин нима театральнӧй конкурсса лауреатлӧн нимъясӧн.
1987 воын «Конёк-Горбунок» спектакльысь балетмейстер Б. Мягковлы, солистъяс В. Летовалы, Р. Чарыевалы да А. Грозновлы сетісны РСФСР-са Н. К. Крупская нима канму премия[3].
2023 вося кӧч тӧлысь 7-ӧд лунӧ лои тӧдса, мый театрӧ дирижёрӧн индӧма Иван Сергеевич Виноградовӧс. Иван Сергеевич велӧдчӧма П. И. Чайковский нима Москваса канму консерваторияын СССР-са нимйӧза артист Г. Рождественский классын, бура помаліс велӧдчанін «оперно-симфоническое дирижирование» специальносьт серти. Сійӧ ӧтув уджаліс Москваса консерваторияса, Шнитке нима Москваса канму шылад институтса, Москваса областнӧй шылад колледжса, «Свобода звука» ансамбльса да мукӧд коллективъяскӧд; сідзжӧ ӧтув уджаліс ГИТИС-кӧд, Москваса опера керкакӧд, Удмурт Республикаса опера да балет театркӧд[4].
Нималана артистъяс
Литература
Пасйӧдъяс
- ↑ 1 2 История (рус.). www.komiopera.ru. Государственный театр оперы и балета Республики Коми. Шыӧдчан кадпас: 2 ӧшым тӧлысь 2018. Архивируйтӧма оригинала 2 ӧшым тӧлысь 2018 года.
- ↑ Государственный театр оперы и балета Республики Коми (рус.). www.culture.ru. Минкультуры России, «Культура. РФ». Шыӧдчан кадпас: 2 ӧшым тӧлысь 2018. Архивируйтӧма 2 ӧшым тӧлысь 2018.
- ↑ 1 2 Клейн А., Плахотный В. Театр оперы и балета Республики Коми государственный // Республика Коми. Энциклопедия. Том III. — Сыктывкар: Коми книжное издательство, 2000. — С. 137—138.
- ↑ Иван Виноградов стал новым дирижёром театра оперы и балета Коми. komi.aif.ru. Аргументы и факты (7 кӧч тӧлысь 2023).
