Кӧрт Айка (гаж)
| «Кӧрт Айка» дорччысьяслӧн регионъяскостса фестиваль | |
|---|---|
 «Кӧрт Айка» дорччысьяслӧн фестиваль эмблема | |
| Сикас | Уджсикас, йӧзкостса |
| Вынсьӧдӧма | 2014 во |
| Кадпас | пырджык сора тӧлысь 14-ӧд лунӧ |
«Кӧрт Айка» — дорччысьяслӧн регионъяскостса фестиваль. Быд во нуӧдӧны сора тӧлысьын Кӧрткерӧс районса Кӧрткерӧс сиктын, пырджык урчитӧны районлӧн лун кежлӧ (сора тӧлысь 14-ӧд лун)[1].
Фестивальлӧн сайт: https://kortaika.ru/site/index.
Контактын котыр: https://vk.com/club78869964.
История
Медводдзаысь фестивальсӧ нуӧдісны 2014 воын. Фестивальсӧ котыртіс «Кӧрткерӧс» муниципальнӧй районса администрация Кӧрткерӧс районлы 75 во тырӧмкӧд йитӧдын.
Фестивальсӧ нуӧдісны быд во 2020 воӧдз. 2020 да 2021 воясын фестивальсӧ эз нуӧдны коронавирус висьӧм понда, а 2023 воын сы пыдди муніс мӧд фестиваль - «Том лов» национальнӧй спорт сикасъяс серти фестиваль [2][3]. 2023 восянь «Кӧрт Айка» фестиваль лоас кык вонас ӧтчыдысь.
Фестивальыс топыда йитчӧма Кӧрт Айкакӧд, коми мифологияын тӧдчана геройкӧд. Легенда серти, сійӧ вӧлі Коми муын медводдза дорччысьӧн и пуктіс подув кузнечнӧй делӧлы.
2016 воын дорччысьяс вӧчисны сылы паметник да сувтӧдісны Кӧрткерӧс сиктӧ. Йӧзкотырын эз ӧтмоза донъявны сійӧс[4].
Ӧні тайӧ арт-объектыс лоис Кӧрткерӧслӧн символъясысь ӧтиӧн[5].
Фестивальсӧ котыртӧны «Кӧрткерӧс» муниципальнӧй районса муниципальнӧй юкӧнлӧн администрацияысь культураӧн да национальнӧй политикаӧн веськӧдланін да Кӧрткерӧс районса муниципальнӧй культура учреждениеяс.
Фестивальсӧ нуӧдӧны сы могысь, медым ловзьӧдны коми войтырлысь кузнечнӧй традициясӧ да петкӧдлыны Кӧрткерӧс районсӧ кыдзи мутас, кӧні чужис кузнечнӧй искусство. Фестивальлӧн могъясӧн лоӧны Коми Республикаын дорччан искусство кузя мастеръясӧс ӧтувтӧм, фестиваль видзӧдысьяслы дорччан искусство петкӧдлӧм да медбур опыт кузнеч-мастеръяс пӧвстын паськӧдӧм, художественнӧй дорччан традицияяс ловзьӧдӧм, культура юкӧнын ёртасьӧм да регионъяскостса да войтыркостса йитӧдъяс ёнмӧдӧм, Кӧрткерӧс районлысь имидж ёнмӧдӧм да сылӧн культурно-историческӧй позянлунъясӧн вӧдитчӧм да мукӧдтор[6].
Пасйӧм
Фестиваль дырйи нуӧдӧны уна сикас мероприятие:мастер-классъяс, гӧгрӧс пызанъяс, смотр-конкурсъяс, выставкаяс. Быд фестивальлӧн темаыс вермас вежсьыны[7].
Медшӧрнас лоӧ дорччысьяслӧн творческӧй ордйысьӧмъяс. Ӧти-кӧ, кузнечьяс аскӧдныс вайӧны гортын дасьтӧм удж, сійӧс донъялӧ профессиональнӧй жюри: кузнеч котыръясӧс да художникъясӧс петкӧдлысьяс. Сэк жӧ видзӧдысьяс гӧлӧсуйтӧны художественнӧй дорӧмлӧн медбур вӧчӧмтор вӧсна. Мӧд-кӧ, дорччысьяс вӧчӧны веськыда фестиваль дырйи кутшӧмкӧ удж. Фестивальлӧн практическӧй бӧртасӧн лоӧ сетӧм тема вылӧ фестивальлысь шӧр композиция — арт-объект вӧчӧм, мый дасьтӧмын участвуйтӧны фестивальса став пасйӧм участникъясыс.
Сійӧ кадӧ, кор кузнечьяслӧн пуӧ удж, гаж вылӧ воысьясӧс виччысьӧ гажа уджтас: сиктса овмӧдчӧминъяслӧн да гӧсьтъяслӧн национально-культурнӧй автономияяслӧн ярманга, челядьлы интерактивнӧй площадка, литературнӧй да историческӧй площадкаяс, мототехника петкӧдлӧм, квадроциклъясӧн да внедорожникъясӧн тест-драйвъяс, театрализованнӧй действие, концертъяс.
Фестиваль дырйи уджалӧны гожся кафе, вузасян радъяс, республика пасьталаысь да орчча регионъясысь декоративно-прикладнӧй творчествоын мастеръяслӧн выставка-вузасьӧм[8].
Ыстӧгъяс
- ↑ Межрегиональный фестиваль кузнечного мастерства «Кӧрт Айка»
- ↑ В 2023 году отменили фестиваль кузнечного мастерства “Корт Айка”
- ↑ Фестиваль кузнечного дела «Корт Айка» в этом году не состоится
- ↑ В Коми увековечили образ мифического борца с христианизацией
- ↑ Арт-объект «Кöрт Айка»
- ↑ Фестиваль кузнечного мастерства «Корт Айка»
- ↑ Ас му вылын. Межрегиональный фестиваль кузнечного мастерства "Кӧрт Айка"
- ↑ В селе Корткерос с размахом прошел восьмой фестиваль кузнечного мастерства "Корт Айка"