Луза-Леткабердса сёрнисикас
Луза-Леткабердса сёрнисикас - коми кывлӧн дас сёрнисикасысь ӧти, пырӧ коми сёрнисикаслӧн лунвыв группаӧ[1].
Паськалӧм
Паськалӧма Луз ю ковтысын да Летка ю катыдын (Вятка ю вож), ёнджыкасӧ вӧдитчӧны Коми Республикаса Луздор районын. Тайӧ кыв вылын сёрнитӧны лузсаяс.
Артмӧм да сӧвмӧм
Кор овмӧдчис коми войтыр Луза вожӧ, стӧча шуны оз позь. Кыдзи юӧртӧны историкъяс, 1485-ӧд вося роч жалованнӧй грамотаын казьтывсьӧны пермякъяс Луза да Вилядь юяс пӧлӧн, но абу стӧчмӧдӧма, кутшӧм сиктъясын найӧ овлӧмаӧсь. Дерт, тайӧ вӧліны йӧзлӧн гырысь котыръяс, кодьяс овмӧдчавлӧмаӧсь Юг вом гӧгӧp. Вуджисны кӧ комияс Сыктывсянь Луза йылӧ, тайӧ вӧлі, бура важӧн нин: ХV нэмын татчӧс йӧз котыръяс вӧліны нин асшӧр олысьясӧн. Вермас лоны, мый сыктывсаяслӧн Луза вожӧ вуджӧмыс вӧлі Х-ХI нэмъясын на, кор коми войтыр заводитіс овмӧдчавны Эжва пӧлӧн.
Тӧд вылын колӧ кутны и мӧдтор: сійӧ жӧ 1485-ӧд вося жалованнӧй грамотаас висьтавсьӧ, мый Луза бердса муясӧ пырӧны и Кобра, и Летка, и Молома йывса муяс. А тайӧ – Вятка юлӧн войвыв вожъясыс. Сідзкӧ, позьӧ чайтны, мый Луза бердса коми войтыр важӧн кутлӧмаӧсь дзескыдджык йитӧдсӧ эз Сыктыв-Эжвакӧд, а веськыда вӧлі йитчӧма Кама йылын да Вятка вожын олысь перым комияскӧд, зырана комилӧн медся матыс рӧдвужыскӧд, та вӧсна и сёртӧдъясын найӧс нимтӧны Лузскӧй Пермцаӧн. ХII-ХV нэмъясын Луза дорын коми войтыр овлӧма паськыдджыка, овмӧдлӧма и Вилядь йыв, и Молома, и Летка, и Кобра юяс[2].
Луза-Леткабердса сёрнисикас артмӧм заводитчӧма, тыдалӧ, 17-18 нэмъясӧ.
Ӧнісӧ Луза-Летка вожын коми войтыр олӧ Абъячойын, Леткаын, Ношульын, Спаспорубын, Читаёвын, Мутницаын, Гуръевкаын, Прокопьевкаын да мукӧд гырысь да посни сиктын.
Аслыспӧлӧслунъяс
Луза-Леткабердса сёрнисикасын торъялӧны татшӧм аслыссикас признакъяс:
• Эмӧсь [ф] да небыд [рь] шыяс: фельшер "фельдшер", куфня "кухня", пӧварь "пӧвар";
• Литературнӧй [зь] пыдди шусьӧ [дз] аффриката:полдзыны "повзьыны", курдзыны "курзьыны";
• Эмакывлӧн сетан вежлӧгыс петкӧдчӧ -лӧ суффиксӧн: йӧзлӧ "йӧзлы", миянлӧ "миянлы";
• Эмакывлӧн ӧтвывтан вежлӧглӧн суффиксыс -мыд: гӧтырмыд"гӧтыркӧд", батьмыд "батькӧд";
• Ӧнія кадса уна лыда кадакывлӧн 3-ӧд мортын петкӧдчӧ -ӧнӧ суффикс: мунӧнӧ "мунӧны", пукалӧнӧ "пукалӧны";
• Качество тырмытӧмлун петкӧдлысь кывбердъяслӧн суффиксӧн лоӧ -гӧм: курыдгӧм "курыдкодь", шомагӧм "шомакодь", выльгӧм "неуна выль";
• Лексикаын эм вель уна аслыспӧлӧс кыв: нида "найӧ", тӧрсьыны "сёйны, сёйны", йӧрдӧс "дӧрӧм", пипӧв "челядь", васьтыны "чӧв овны", бынтны "быдмавны, котӧртны" да с. в.
Туялӧм
Луза-Леткабердса сёрнисикассӧ заводитӧмаӧсь туявны XIX нэмын. Сылӧн лексика йылысь юӧръяс эмӧсь П. И. Савваитовлӧн, Г. С. Лыткинлӧн, Ф. И. Видеманлӧн, Ю. Я. Вихманлӧн, Д. Р. Фокош-Фукслӧн да мукӧдлӧн кывкудъясын.
Сёрнисикассӧ тырвыйӧ босьтчисны велӧдны XX нэмся 50-ӧд воясӧ. Сійӧс туялӧмӧ ыджыд пай пуктіс Т. И. Жилина, коді чукӧртіс ыджыд материал, мый подув вылын йӧзӧдӧма монография.
Литература
• Лыткин В. И. Диалектологическая хрестоматия по пермским языкам. — М., 1955.
• Баталова Р. М. Коми(-зырянский) язык // Языки мира: Уральские языки. — М.: «Наука», 1993. — 214—229 с. — ISBN 5-02-011069-8.
• Лузско-летский диалект // Коми язык. Энциклопедия. — М.: Изд-во ДиК, 1998. — С. 240. — ISBN 5-7903-0045-6.
• Жилина Т. И. Лузско-летский диалект коми языка. — М., 1985.
• Игушев Е.А. Коми сёрнисикасъяс. — Сыктывкар, 1996.
• Безносикова Л. М., Забоева Н. К., Айбабина Е. А., Коснырева Р. И. Словарь диалектов коми языка: в 2-х томах. — Сыктывкар: ООО «Издательство «Кола», 2012.
Пасйӧдъяс
- ↑ Безносикова Л.М. Лузско-летский_диалект
- ↑ Игушев Е.А. Коми сёрнисикасъяс. — Сыктывкар, 1996.