Мӧвпъяс збыльмӧдан коз

«Мӧвпъяс збыльмӧдан коз»
Сикас	бурвӧчан акция
Лӧсьӧдӧма	2018
Подув пуктысьяс	«Мӧвпав мекӧд» проект
Ин
Тӧдчана йӧз	Артур Орлов («Движение первых» правлениеӧн веськӧдлысь) Тимур Сафин ( «Движение первых» юралысьлӧн сӧветник)
Петкӧдланін	«Движение первых»
Удж юкӧн	буртор вӧчӧм, социальнӧя отсалӧм
Ӧктас	4 миллиардысь унджык шайт (став каднас, 2025 во вылӧ)
Пожертвованиеяс	320 сюрсысь унджык участвуйтысь (2025)
Доброволечьяслӧн лыд	120 сюрсысь унджык (2025)
Пырысьяслӧн лыд	1,5 сюрсысь унджык ёртасьысь организаций (2025)
Слоган	«Выль во паныдалӧм — тайӧ позянлун вӧчны кодлыкӧ мойдын кодь шензьӧданатор да сетны ки отсӧг виччысьысь йӧзлы»
Сайт	елкажеланий.рф

«Мӧвпъяс збыльмӧдан коз» (рочӧн Ёлка желаний) — Россияса бурвӧчан акция, кодӧс веськӧдӧма челядьлысь, олӧма йӧзлысь да дзоньвидзалунын дзескӧдӧм позянлуна войтырлысь выльвося кӧсйӧмъяссӧ збыльмӧдӧм вылӧ. «Движение первых» нуӧдӧ сійӧс быд во 2018 восянь Росмолодежь отсӧгӧн.

Проектын быд морт («збыльмӧдысь») вермӧ пӧртны олӧмӧ мӧд мортлысь («мӧвпалысьлысь») гуся мӧвпсӧ. Акция лоис Россияын медся гырысь бурвӧчан водзмӧстчӧмъясысь ӧтиӧн, ӧтувтіс страна пасьталаысь некымын сюрс участвуйтысьӧс да ёртасысь организацияӧс.

История

«Мӧвпъяс збыльмӧдан коз» акция лои «Мӧвпав мекӧд» бурвӧчан проектлӧн юкӧнӧн, коді заводитчис Татарстан Республикаын 2014 воын кыдзи волонтёръяслӧн водзмӧстчӧм. Проектлӧн медводдза мог — збыльмӧдны сьӧкыда висьысь челядьлысь да олӧма йӧзлысь кӧсйӧмъяссӧ, козьнавны налы ёнджыкасӧ абу материальнӧй козинъяс, а яръюгыд сьӧлӧмкылӧмъяс. Медводз вӧлі пӧртӧма олӧмӧ нывкалысь мӧвпсӧ, коді кӧсйис лэбзьыны самолётын да пукавны штурвал сайын.

2018 воын проект пырис «Россия — позянлунъяса страна» президентскӧй платформаӧ. Сійӧ жӧ вося ӧшым тӧлысьын Москваын Доброволечьяслӧн войтыркостса форум дырйи Россияса президент Владимир Путин тӧдмасис проектӧн да пырӧдчис сэтчӧ, збыльмӧдіс вит челядьлысь мӧвпъяссӧ. Регыд выльвося акцияыслы сетісны «Мӧвпъяс збыльмӧдан коз» ним.

Медводдза акцияыс вӧлі 2019 во водзын. 2018 вося ӧшым тӧлысь 27-ӧд лунӧ Москваса Кремльын Каналан Сӧветлӧн заседание кежлӧ сувтӧдісны Выль вося козъяс, кутшӧмъясӧс мичмӧдісны челядьлӧн мӧвпъясӧн открыткаяс. Веськӧдлан котырӧ пырысьяс, министръяс да губернаторъяс пырӧдчисны акцияӧ, босьталісны коз пуяс вылысь мӧвпъясӧн шаръяссӧ да пӧртісны найӧс олӧмӧ. Вочасӧн акцияӧ пырӧдчисны канмуса мукӧд уджалысь да коммерческӧй организацияясӧс петкӧдлысьяс, а сідзжӧ торъя йӧз.

2022 восянь акциясӧ котыртӧ «Движение первых» организация.

Владимир Путин «Мӧвпъяс збыльмӧдан коз» бурвӧчан акция дырйи (2023 во)

Удж

Акциялӧн медшӧр могыс — козьнавныйӧзлы яръюгыд сьӧлӧмкылӧмъяс да Выль вося шензьӧданаторъяс. Пырӧдчысьяс, «мӧвпалысьяс», кольӧны ассьыныс заявкаяснысӧ проектлӧн официальнӧй сайтын. Налысь мӧвпъяссӧ петкӧдлӧны виртуальнӧй либӧ збыль козъяс вылын, кутшӧмъясӧс сувтӧдӧма ёртъяслӧн площадкаясын.

Мӧвпалысьяслӧн категорияяс:

• 3 арӧссянь 17 арӧсӧдз челядь да 60 арӧссянь олӧма йӧз;
• бать-мамтӧм да бать-мам дӧзьӧртӧг кольӧм челядь;
• дзоньвидзалунын дзескӧдӧм позянлуна либӧ вермытӧм челядь да верстьӧ войтыр;
• сьӧкыда висьысь челядь;
• гӧля олысь семьяясысь челядь;
• торъя военнӧй операцияын участвуйтысьяслӧн семьяясысь челядь;
• челядь, кодъяс олӧны Донецк да Луганск Народнӧй Республикаясын, Запорожье да Херсон обласьтъясын, а сідзжӧ суйӧрдорса регионъясын, кодъяс веськалісны лыйлӧм улӧ.

Участвуйтысьясӧн кольӧм мӧвпъясыс вермасны лоны материальнӧйӧн (шуам, чачаяс, гаджетъяс, спорт инвентар) либӧ абу материальнӧйӧн (мӧд карӧ ветлӧм, нималана морткӧд аддзысьлӧм, мероприятие вылӧ ветлӧм). Козиныс сідзжӧ вермас лоны босьтысьыслы виччысьтӧмторйӧн — эм позянлун, кор «збыльмӧдысьыс» ачыс бӧрйӧ козинсӧ «мӧвпалысьлӧн» интересъяс да радейтанаторъяс вылӧ подуласьӧмӧн.

2025 воын быд окотитысь вермас лоны «збыльмӧдысьӧн» — бӧрйыны сайтысь кодлыськӧ мӧвпсӧ либӧ босьтны ёртасян шӧринъясын сувтӧдӧм ёлка вылысь открыткасӧ. Акцияӧ позьӧ пырӧдчыны кыдзи очнӧя, сідзи и дистанционнӧя. Торъя йӧз кындзи акцияӧ пырӧдчӧны компанияяс, канму учреждениеяс да ӧтйӧза организацияяс.

Бӧртасъяс да масштабъяс

2018 воын «Мӧвпъяс збыльмӧдан коз» акция дырйи вӧлі пӧртӧма олӧмӧ 450 кӧсйӧм. Воысь-во налӧн лыдыс содӧ:

• 2020 во: збыльмӧдӧма 13,5 сюрсысь унджык мӧвп;
• 2021 во: збыльмӧдӧма 38 сюрсысь унджык мӧвп;
• 2022—2023 вояс: збыльмӧдӧма матӧ 47 сюрс мӧвп;
• 2023—2024 вояс: збыльмӧдӧма 60 сюрс гӧгӧр мӧвп.

2025 во пом кежлӧ мыччӧдъяс серти став каднас акция дырйи вӧлі збыльмӧдӧма 4 млрд шайтысь унджык вылӧ 320 сюрс сайӧ мӧвп. Акцияӧ пырӧдчис 120 сюрсысь унджык збыльмӧдысь да 1,5 сюрс ёртасян организация. Акцияыс петіс войтыркостса тшупӧд вылӧ: сэтчӧ пырӧдчӧны Испанияын, Италияын, Францияын, Кипрын да Сербияын олысь россияна.

Уджъёртъяс

Акциялӧн медшӧр уджъёртӧн лоӧ Росмолодежь. Акциясӧ отсалӧны збыльмӧдны бурвӧчан фондъяс, ӧтйӧза да коммерческӧй организацияяс: шуам, «Внуки» фондкӧд ёртасьӧмӧн пӧртсьӧны олӧмӧ ӧтка олӧма йӧзлӧн кӧсйӧмъясыс.

Выль форматъяс

2025 восянь заводитісны збыльмӧдны акциялысь выль форматъяс:

• «Гаж пызан вылӧ» — «Русь» продовольствие фондкӧд да X5 Group-кӧд ӧтувъя акция. Мог — отсавны гӧля олысь семьяяслы сёян-юанӧн;
• «Внукъяс козинъясӧн» — олӧма йӧзлы отсалӧм могысь «Внуки» фондкӧд ёртасьӧмсӧ паськӧдӧм.

Пасйӧдъяс