Питирим Сорокин нима «Наследие» шӧрин
| Питирим Сорокин нима «Наследие» шӧрин | |
|---|---|
 | |
| Веськӧдлысьяс | |
| директор | Кузиванова Ольга Юрьевна |
| Лӧсьӧдӧма | |
| Лӧсьӧдан кадпас | 2010-ӧд вося вӧльгым тӧлысь 12-ӧд лун |
| Сайт | rksorokinctr.org |
 |
|
Питирим Сорокин нима «Наследие» шӧрин (рочӧн Центр «Наследие» имени Питирима Сорокина) — Коми Республикаса туялан-йӧзӧдчан шӧрин.
История
Республикаса шӧрин лӧсьӧдӧм йылысь мӧвпсӧ, коді эськӧ координируйтіс нималана учёнӧй Питирим Сорокинлысь наследиесӧ видзан, туялан да паськыда тӧдмӧдан юкӧнын уджсӧ, ошкисны Коми Республикаса веськӧдлысьяс. Шӧрин лӧсьӧдӧмӧ ыджыд пай пуктіс В. П. Марков, сэки Коми Республикаса Каналан Сӧветӧн веськӧдлысьӧс медводдза вежысь, водзті «Коми войтыр» ӧтмунӧмӧн веськӧдлысь.
Шӧринлӧн подулӧн лоис Сыктывкарса канму университетын П. Сорокин нима учебно-научнӧй шӧрин. Сійӧ дугдіс уджавны 2010 воын, а сылӧн веськӧдлысьыс, П. Кротов, вуджис уджавны «Наследие» шӧринӧ.
Коми Республикаса Веськӧдлан котырлӧн 2010 во вӧльгым тӧлысь 12-ӧд лунся 395 №-а шуӧм серти Сыктывкарын вӧлі котыртӧма «Питирим Сорокин нима „Наследие“ шӧрин» канму сьӧмкуд учреждение.
Шӧрин лоӧ Коми Республикаса национальнӧй политика министерстволӧн ведомствоувса учреждениеӧн[1].
Шӧринса медводдза директорӧн 2010 восянь 2012 воӧдз вӧлі история наукаяс доктор Э. А. Савельева, 2013 восянь ӧнӧдз Шӧринӧн веськӧдлӧ история наукаяс кандидат О. Ю. Кузиванова.
2011 вося урасьӧм тӧлысь 4-ӧд лунӧ кыпыда восьтісны П. Сорокин нима «Наследие» шӧрин, коді меститчис Сыктывкарлӧн историческӧй шӧринын Сӧветскӧй уличаса 30 номера керкаын.
Шӧр могъяс
«Наследие» шӧринлӧн медшӧр могъясӧн лоӧны:
• видзны, туявны, паськӧдны Питирим Сорокинлысь наследиесӧ да пыртны сійӧс Коми Республикалӧн социально-культурнӧй олӧмӧ;
• котыртны да координируйтны Питирим Сорокинлысь наследиесӧ Коми Республикаса политическӧй да культурнӧй олӧмӧ пыртӧм кузя проектъяс, а сідзжӧ нуӧдны Войвывлӧн колана мытшӧдъяс серти прикладнӧй социально-экономическӧй да политологическӧй туялӧмъяс;
• лӧсьӧдны Коми Республикаса научнӧй да культурно-политическӧй олӧмын Питирим Сорокинлысь ним нэммӧдӧм кузя уджтасъяс;
• нуӧдны Коми мулӧн историякӧд да культуракӧд йитчӧм мукӧд нималана уджалысьяс йылысь паметь видзӧм, налысь уджъяс туялӧм да паськыда тӧдмӧдӧм кузя туялӧмъяс, научнӧй, культурнӧй да велӧдан мероприятиеяс;
• лӧсьӧдны ӧтуввез-порталъяс, кӧні петкӧдлыны Коми Республикаын Питирим Сорокинлысь медшӧр уджъяссӧ да архивъясысь цифруйтӧм материалъяс.
Уджалан нырвизьяс
Шӧринын збыльмӧдсьӧ некымын медшӧр нырвизь: научно-организационнӧй, издательскӧй да просветительскӧй.
Наука туялӧмъяс да наука удж котыртӧм
Научно-организационнӧй нырвизьӧ пырӧны уна сикас научнӧй мероприятиеяс (гӧгрӧс пызанъяс, конференцияяс), небӧгъяс петкӧдлӧм, а сідзжӧ «Наследие» научнӧй журнал лэдзӧм.
2012 вося рака тӧлысь 26-29 лунъясӧ «Наследие» шӧрин нуӧдіс «Питирим Сорокин да ӧнія мир» ставроссияса конференция, кытчӧ волісны Коми Республикаысь, Москваысь, Петыркарысь да Кардорысь 60 сайӧ морт.
Быд во урасьӧм тӧлысь медводдза лунъясӧ нуӧдӧны П. Сорокинлӧн чужан лунлы сиӧм Гӧгрӧс пызанъяс (Сорокин лыддьысьӧмъяс). Гӧгрӧс пызан сайын сёрнитӧны татшӧм темаяс йылысь: «Интеллектуальнӧй да культурнӧй озырлунлӧн йӧзкотыр сӧвмӧдӧмын тӧдчанлун», «Питирим Сорокинлысь олӧмсӧ да творчествосӧ туялан перспективаяс», «Мортлӧн ин П. Сорокинлӧн да К. Жаковлӧн социокультурнӧй серпасын», «П. А. Сорокинлӧн „Роч дневникысь лист бокъяс“ (1917 вося Роч революциялы 100 во тыригкежлӧ)» да мукӧд.
П. Сорокинлӧн творчестволы сиӧм научнӧй мероприятиеяс котыртӧмкӧд тшӧтш «Наследие» шӧрин кутіс лэдзны татшӧм жӧ нима специализируйтӧм научнӧй журнал, кӧні йӧзӧдӧны нималана социологлӧн методологиялы, медшӧр мӧвпъяслы да концепцияяслы сиӧм статьяяс, йӧзӧдсьӧны историко-биографическӧй сяма материалъяс. Сійӧ петавліс быд во, 2014 восянь лои периодическӧй научнӧй журналӧн да ӧні петӧ вонас кыкысь. Журналын йӧзӧдсьӧны социология, социальнӧй философия, политология, культурология, история, литературоведение кузя статьяяс. Сылӧн лист бокъяс вылын йӧзӧдӧмторъяс серти позьӧ гӧгӧрвоны, кыдзи сӧвмӧ сорокиноведение, кӧть журналлӧн сюрӧсыс ёна паськыдджык — тайӧ дзоньнас россияса гуманитарнӧй интеллигенциялӧн идейнӧй наследие да ӧнія олӧмлӧн став социокультурнӧй слӧйсӧ сӧвмӧдан актуальнӧй юалӧмъяс.
Тайӧ нырвизьын Шӧрин топыда ёртасьӧ Петыркарса канму университетлӧн социология факультеткӧд, торйӧн нин социологиялӧн история да теория кафедракӧд. Сэні уджалысьяс пырӧны «Наследие» журналлӧн Редакционнӧй сӧветӧ да редколлегияӧ, а сідзжӧ лоӧны авторъясӧн.
Йӧзӧдчан нырвизь
Йӧзӧдчан нырвизьын медся шӧр могӧн лоӧ П. Сорокинлысь сочинениеяс чукӧр лэдзӧм. 2013 воын проектсӧ заводитігкежлӧ Россияын вӧлі нин йӧзӧдӧма учёнӧйлысь торъя уджъяс, но тайӧ нырвизьын системаыс эз вӧв. 1999 воын Петыркарын П. Сорокинлӧн чужӧмсянь 110 во тырӧмлы сиӧм войтыркостса симпозиум вылын профессор Ю. В. Яковец шуис, мый Сорокинлысь сочинениеяс чукӧрсӧ колӧ лэдзны роч кыв вылын, та могысь симпозиумлӧн резолюция балаын вӧлі шуӧма шыӧдчыны Россияса гуманитарнӧй научнӧй фондӧ, россияса, америкаса да войтыркостса социологическӧй организацияясӧ да ассоциацияясӧ, делӧвӧй кругъясӧ, медым найӧ отсалісны тайӧ водзмӧстчӧмыслы. Симпозиум бӧрын Сорокин-Кондратьевлӧн войтыркостса институт, мыйӧн веськӧдліс Ю. В. Яковец, йӧзӧдіс Сорокинлысь некымын удж, но Сорокинлысь сочинениеяс чукӧртан проектсӧ сідзи эз и вӧв пӧртӧма олӧмӧ, сы вӧсна мый коліс ыджыд организационнӧй удж и сьӧмӧн пыр могмӧдӧм. Коми Республикаын П. Сорокин нима «Наследие» шӧрин котыртӧм бӧрын республикаса правительстволӧн сьӧмӧн отсалӧмӧн, сочинениеяслысь сборник йӧзӧдӧм йылысь мӧвпыс, медбӧрын, кутіс збыльмыны. Ӧнія кад кежлӧ «Наследие» шӧрин лэдзис Сорокинлӧн сочинениеяс чукӧрысь 13 том[2]. Проектлӧн наука веськӧдлысьӧн, америкаса кадколастӧ Сорокинлысь унджык уджсӧ лӧсьӧдысьӧн да вуджӧдысьӧн лоӧ РАН-са Социология институтса научнӧй сотрудник В. В. Сапов, коді и дасьтіс Сорокинлысь 30 тома творческӧй наследиесӧ йӧзӧдан плансӧ. Ӧні кежлӧ кызвыннас йӧзӧдӧма Сорокинлысь роч кадся уджъяссӧ да АӦШ-ын гижӧм неыджыд юкӧн.
Зэв тӧдчана, мый Сочинениеяс чукӧр лэдзӧм кузя проект абу коммерческӧй. Пӧшти став йӧзӧдӧм томыс, кыдзи и «Наследие» шӧринлӧн мукӧд петасыс, йӧзӧдӧма Шӧринлӧн сайт вылын электроннӧя[3].
«Наследие» шӧрин йӧзӧдӧ и П. Сорокинлӧн наследиекӧд йитчӧм мукӧд удж. Сідз, медводдзаысь коми кыв вылӧ вуджӧдӧма П. А. Сорокинлӧн «Кузь туй», йӧзӧдӧма «Питирим Сорокин: суждения и афоризмы» небӧг, йӧзӧдӧма шӧр да ыджыд арлыдаяслы «Питирим Александрович Сорокин: жизненный путь и идейное наследие» брошюра.
Просветительскӧй удж
Тӧдчана нырвизьясысь ӧти — йӧзӧс, тшӧтш и том йӧзӧс, П. Сорокин йылысь тӧдмӧдан удж. Татшӧм уджлӧн шӧр формаӧн лоӧны быд сикас арлыдалы публичнӧй лекцияяс. Том йӧзлы тайӧ лекция-сёрни (дасьтӧма П. Сорокинлӧн да К. Жаковлӧн олӧм, удж, творческӧй наследие йылысь 8 тема), найӧс Шӧринын уджалысьяс нуӧдӧны школаясын[4].
Шӧрин котыртӧ велӧдчысьяслы да студентъяслы быдвося олимпиадаяс да творческӧй уджъяс серти конкурсъяс[5][6].
Нӧшта ӧти нырвизь том йӧзкӧд уджын лоӧ шӧрин бердын том йӧзлӧн дискуссионнӧй клуб[7]. Тані том йӧз сёрнитӧны-вензьӧны уна сикас тӧдчана темаяс йылысь.
Пасйӧдъяс
- ↑ ГБУ РК «Центр «Наследие» имени Питирима Сорокина» (рус.). МНП РК. Шыӧдчан кадпас: 25 лӧддза-номъя тӧлысь 2025.
- ↑ Собрание сочинений Питирима Сорокина (рус.). Центр "Наследие". Шыӧдчан кадпас: 25 лӧддза-номъя тӧлысь 2025.
- ↑ Журнал "Наследие" (рус.). Центр "Наследие". Шыӧдчан кадпас: 25 лӧддза-номъя тӧлысь 2025.
- ↑ Лекции-беседы (рус.). Центр "Наследие". Шыӧдчан кадпас: 25 лӧддза-номъя тӧлысь 2025.
- ↑ Центр «Наследие» имени Питирима Сорокина проводит ежегодный Республиканский конкурс исследовательских работ (рус.). МНП РК. Шыӧдчан кадпас: 25 лӧддза-номъя тӧлысь 2025.
- ↑ Центр «Наследие» подвёл итоги Республиканской олимпиады «Жизнь и творчество Питирима Сорокина» (рус.). МНП РК. Шыӧдчан кадпас: 25 лӧддза-номъя тӧлысь 2025.
- ↑ Дискуссионный клуб (рус.). Центр "Наследие". Шыӧдчан кадпас: 25 лӧддза-номъя тӧлысь 2025.