Понъяслӧн войтыркостса лун
| Понъяслӧн войтыркостса лун | |
|---|---|
 | |
| Сикас | Абу официальнӧй |
| Пасйӧны | быд во |
| Кадпас | сора тӧлысь 2-ӧд лун |
Понъяслӧн войтыркостса лун — пон видзысьяслӧн да пон радейтысьяслӧн гаж, пасйӧны быд во сора тӧлысь 2-ӧд лунӧ[1].
Кӧть тайӧ гажыс абу официальнӧй, тайӧ лунӧ пон видзысьяс да пон радейтысьяс балуйтӧны ассьыныс пемӧсъяссӧ: ньӧбӧны налы чӧсмасянторъяс, чачаяс да амуниция, волонтёръяс нуӧны пон приютъясӧ кӧрым да лекарствояс.
История да традицияяс
2012 воын Йӧзкостса социальнӧй водзмӧстчӧмъяслӧн фонд сетіс ООН-ӧ шыӧдчӧм, медым лӧсьӧдны сора тӧлысь 2-ӧд лунӧ гаж. Официальнӧй тшупӧдын шыӧдчӧмсӧ эз вынсьӧдны, но гажсӧ кутісны нуӧдны пон видзысьяс мирса уна странаын [2].
Тайӧ лунӧ мир пасьтала кинологъяслӧн организацияяс котыртӧны пон пӧрӧдаяслысь выставкаяс. Нуӧдӧны благотворительнӧй акцияяс, кӧні чукӧртӧны понлы чӧсмасянторъяс, кӧрым, пон приютъяс лӧсьӧдӧм вылӧ материальнӧй средствояс. Волонтёръяс ветлӧны приютъясӧ, кӧні гуляйтӧдӧны понъясӧс да ворсӧны накӧд.
Понъяслӧн войтыркостса лунӧ нуӧдӧны лекцияяс, кӧні висьталӧны, мый колӧ видзчысьны пемӧсъяслы лёк вӧчӧмысь да ышӧдӧны отсавны понъяслы.
Йӧзӧс юӧртан средствояс петкӧдлӧны понъяс йылысь кинояс, висьталӧны кинолог службаяслӧн уджын налӧн тӧдчанлун йылысь да казьтылӧны медся нималана пемӧсъясӧс.
Интереснӧйторъяс
Дзоньвидзалун видзан ставмирса организация вылӧ ыстысьӧмӧн A-Z-Animals компаниялӧн юӧртӧм серти, 2022 воын мирын вӧлі 900 миллион гӧгӧр пон. На пиысь вӧля вылын вӧлі 75-85% мирса популяцияысь. Ставнас мирын вӧлі 200 миллион горттӧм пон, кодъяс, вӧрса понъяс серти асланыс олӧмын кутшӧмкӧ юкӧн олісны морткӧд да вӧліны гортсаӧсь[3].
2023 воын пемӧсъясӧс вердӧм да налысь бур олӧм туялан шӧрин да Ipsos туялан компания нуӧдісны туялӧм, мый серти Россия босьтіс нёльӧд места мирын гортса понъяслӧн лыд серти. Налӧн лыдыс вӧлі 25,5 млн[4].
Ӧткымын странаын пасйӧны понлысь ассьыныс лун. США-ын, Канадаын да накӧд матысса странаясын понмӧс аттьӧалан лун пасйӧны моз тӧлысь 26-ӧд лунӧ. Тайӧ луныс лоис 2004 воын США-ын понъяслӧн национальнӧй лунӧн гортса пемӧсъяслӧн оласног кузя эксперт Колин Пейджлӧн водзмӧстчӧм серти. Гаж лунсӧ вӧлі бӧрйӧма тӧдӧмӧн - буретш тайӧ лунӧ батьыс козьналӧма сылы медводдза понсӧ. Вочасӧн гажсӧ кутісны пасйыны и мукӧдлаын[5].
Непалын гажыс йитчӧма религиякӧд да пасйыссьӧ вит лунся Тихар, «бияс фестиваль», мӧд лунӧ. Понъясӧс Непалын лыддьӧны вежа пемӧсъясӧн, кодъяс сёрнитӧны Йама кувсьӧм енкӧд. Тайӧ лунӧ понъясӧс мичмӧдӧны дзоридза гирляндаясӧн да чӧсмӧдлӧны юмовторъясӧн[6].
Японияын став понлӧн луныс йитчӧма Хатико паметь лункӧд да пасйыссьӧ тӧвшӧр тӧлысь 11-ӧд лунӧ. Акита-ину пӧрӧдаа пон, коді лоӧ Японияын вернӧйлун символӧн, ӧкмыс во чӧж быд лун волывліс Сибуя станцияӧ, виччысис кулӧм кӧзяиныслысь бӧр воӧмсӧ. Сылӧн сьӧлӧмӧн сетчӧмыс сэтшӧма шензьӧдіс японечьясӧс, мый найӧ сувтӧдісны сылы паметник[2][7].
Видзӧдӧй тшӧтш
Пасйӧдъяс
- ↑ 2 июля – международный день собак. Российская кинологическая федерация (2 сора тӧлысь 2019). Шыӧдчан кадпас: 23 ода-кора тӧлысь 2024.
- ↑ 1 2 2 июля - Международный день собак. Центральная городская библиотека Северска (1 сора тӧлысь 2021). Шыӧдчан кадпас: 23 ода-кора тӧлысь 2024.
- ↑ Volia Schubiger. How Many Dogs Are In The World? (англ.). A-Z-Animals.com (29 кӧч тӧлысь 2022). Шыӧдчан кадпас: 23 ода-кора тӧлысь 2024.
- ↑ Численность домашних питомцев в России за три года выросла на 11% — опрос. Регнум. Шыӧдчан кадпас: 23 ода-кора тӧлысь 2024.
- ↑ Национальный день собаки в США. Мeet-usa.com (26 моз тӧлысь 2019). Шыӧдчан кадпас: 23 ода-кора тӧлысь 2024.
- ↑ Все лучшее - собакам: праздник в Непале, восхваляющий четвероногих друзей человека. Культурология. Шыӧдчан кадпас: 23 ода-кора тӧлысь 2024.
- ↑ В Японии отмечают сто лет со дня рождения пса Хатико. РИА Новости (11 вӧльгым тӧлысь 2023). Шыӧдчан кадпас: 23 ода-кора тӧлысь 2024.