Пыжа гаж

«Пыжа гаж» (Гулянье на лодках) - Кулӧмдін районса чери кыйысьяслӧн гаж.

"Пыжа гаж", 2023 во, Кулӧмдін район, Коми Республика

Нуӧданін

Кулӧмдін районса важ Керчомъя сикт пыр нимавлӧма чери кыйысьясӧн, а Вад тыысь кыйлӧмаӧсь уна чери.

«Пыжа гаж» («Гулянье на лодках») – тайӧ чери кыйысьялӧн гаж.

Сійӧ прӧдитӧ лӧддза-номъя тӧлысь помын Вад тыдорса сиктлы паныда мича видз вылын. Ты вылын тайӧ лунӧ ордйысьӧны пыжъясӧн сынӧмӧн, видз вылын мунӧны вӧвъясӧн скачитӧмъяс, спортивнӧй ордйысьӧмъяс, творческӧй котыръяслӧн петкӧдчӧмъяс. Сёрӧдз нуӧдӧны хороводъяс Керчомъяса гудӧкасьысьяслӧн гажа ворсӧм улӧ, мелодичнӧй коми сьыланкывъяс да задирнӧй частушкаяс улӧ.

Гажлӧн медся тӧдчанаӧн лоӧны татчӧс мастер-пыж вӧчысьяслӧн ордйысьӧмъяс: кодлӧн пыжыс бурджыка вӧчӧма, ва вылын зумыдджык да мунігӧн тэрыбджык. Гажыс помасьӧ ӧтувъя пыжӧн ветлӧм, видз вылын гуляйтӧмӧн да традиционнӧй коми сёян-юанӧн чӧсмасьӧмӧн.

Гаж вылӧ волывлӧны Коми Республикаса уна сиктысь йӧзкостса гудӧкасьысьяс, сьылысьяс, частушкаӧн ворсысьяс, йӧктысьяс, уна гӧсьт.

История

Гаж пансиг подув вылын сулаліс коми композитор Прометей Чисталёв. 1967 воын Керчомъя сиктса гудӧкасьысьяслы сійӧ гижис керчомъяса кадриль да уджаліс накӧд ӧтлаын.

Гудӧкасьысьяслӧн ансамбль ёна радейтісны сиктсаяс. 1969 воын коллектив муніс Сыктывкарӧ республиканскӧй фестиваль вылӧ. А 1970 воын муніс Ленинград карӧ тайӧ жӧ программаӧн.

Ставнысӧ пӧкӧритіс коми войтырлӧн мичлуныс, прӧстлуныс, сьӧлӧмсяньыс висьталӧмыс, тайӧ котыр йывсьыс петіс "Рытъя Ленинград" газетын гижӧд. Та бӧрын Керчомъяӧ воис Ленинградса кинематографистъяслӧн котыр. Нималана керчомскӧй гудӧкасьысьяслӧн сьылӧмӧн да ворсӧмӧн найӧ пыжъясӧн мунісны Вад ты кузя. Тадзи вӧчисны гудӧкасьысьяс да сьылысьяс йылысь документальнӧй фильм, кодӧс бӧрынджык йӧзӧдісны.

1993 воын татчӧс олысьяс, тайӧ лоӧмтор йывсьыс казьтыштӧм бӧрын, шуисны выльысь гажӧдчыны пыжӧн Вад ты вылын, гажсӧ нимтісны "Пыжа Гаж".
Гажыс босьтіс районса мероприятиелысь статус.