Сельков Николай Никитич
| Сельков Николай Никитич | |
|---|---|
| Чужан лун | 1911 вося моз тӧлысь 15-ӧд лун |
| Чужанін | Коми Республика, Вуктыл район, (Саваяг) |
| Кулан лун | 1992-ӧд вося вӧльгым тӧлысь 11-ӧд лун (81 ар) |
| Куланін | |
| Мыйся уджыс | коми кыв туялысь |
| Ошканпасъяс да премияяс |
 |
Сельков Николай Никитич (1911 вося моз тӧлысь 15-ӧд лун, Вуктыл районса (Саваяг) сикт — 1992 вося вӧльгым тӧлысь 11-ӧд лун, Сыктывкар) — коми кыв туялысь[1].
Олантуй
Сельков Николай Никитич чужис 1911 вося моз тӧлысь 28-ӧд лунӧ Вуктыл районса (Саваяг) сиктын.
1928 воын Визинса II тшупӧда шӧр школа помалӧм бӧрын пырис велӧдчыны А. И. Герцен нима Ленинградса педагогическӧй институтӧ, лингвистическӧй факультетса фин-йӧгра кывъяс секцияӧ, да помаліс 1931 воын. Сылӧн велӧдысьӧн волис Д.В. Бубрих, сӧветскӧй финно-угроведениелы подув пуктысь [2].
1931 восянь 1941 воӧдз уджаліс строительнӧй техникумын преподавательӧн, Коми канмуса педагогика институтын коми кыв кафедраӧн заведуйтысьӧн.
1941-1945 воясӧ служитіс Гӧрд Армияын, участвуйтіс Айму вӧсна Ыджыд тышын.
1943 вося рака тӧлысь 20-ӧд лунсянь 1945 вося косму тӧлысь 14-ӧд лунӧдз вӧлі пленын. Репатриируйтӧма[3].
1945 восянь 1948 воӧдз Сельков уджаліс Коми АССР-ын СССР-са Наукаяс Академиялӧн научно-исследовательскӧй базаын кыв, гижӧд да история секторса младшӧй научнӧй сотрудникӧн.
Сэсся вӧлі школаса педагогическӧй училищеын преподавательӧн, велӧдысьясӧс бурмӧдан республиканскӧй институтын методистӧн, мыйкӧ дыра уджаліс сёрнитчӧм серти, лӧсьӧдіс коми кыв кузя учебникъяс, методическӧй разработкаяс да уджтасъяс.
1956 вося 1975 во помӧдз, 1976 вося тӧвшӧр тӧлысь 1 лунӧ пенсия вылӧ петтӧдз, Сельков вӧлі СССР-са Наукаяс Академиялӧн Коми филиалса Кыв, литература да история институтын младшӧй научнӧй сотрудникӧн. Тайӧ каднас сійӧ водзӧ уджаліс коми кыв кузя учебникъяс, уджтасъяс да методическӧй разработкаяс лӧсьӧдӧм кузя.
Наука удж
Н.Н. Сельковлӧн наука уджыс вӧлі уна сикас: диалектология, орфография, орфоэпия, грамматика, лексикография.
Сійӧ вӧлі «Коми орфографическӧй словарь» (Сыктывкар, 1959, 1976, 1985) авторъясысь ӧтиӧн, сыӧн лӧсьӧдӧма коми орфоэпиялысь правилӧяс «Роч-коми кывкудйын» (Сыктывкар, 1966).
Ыджыд пай Сельков пуктіс коми сёрнисикасъяс туялӧмӧ. Диалектологическӧй экспедицияяс дырйи сыӧн чукӧртӧм материалъясӧн вӧдитчисны «Сравнительный словарь коми-зырянских диалектов» лӧсьӧдігӧн (Сыктывкар, 1961). Сельков - «Ижемский диалект коми языка» (Сыктывкар, 1976) да «Печорский диалект коми языка» (Сыктывкар, 1976) монографияяслӧн авторъясысь ӧти[4].
Сельков Н.Н. гижис школаын 6-7 да 7-8 классын велӧдчысьяслы коми кыв кузя учебникъяс, 1961 восянь Сельков уджаліс «Современный коми язык. Ч. 2. Синтаксис» (Сыктывкар, 1967) вузъяслы учебник вылын. Сыӧн гижӧма «Обособленные второстепенные члены предложения», «Слова и группы слов, грамматически не связанные с предложением», «Отглагольные словосочетания», «Порядок слов в простом предложении» юкӧнъяс [5].
Н.Н. Сельков видліс ассьыс вынъяс и вуджӧдчӧмын, шуам, вуджӧдіс «Кыдзи овлісны му вылын медводдза йӧз».
Наградаяс
• «За боевые заслуги» медаль;
• «За победу над Германией в Великой Отечественной войне 1941–1945 гг.» медаль[6].
Монографияяс
• Сахарова М. А., Сельков Н. Н. Ижемский диалект коми языка. Сыктывкар: Коми книжное издательство, 1976.
• Сахарова М. А., Сельков Н. Н., Колегова Н. А. Печорский диалект коми языка. Сыктывкар: Коми книжное издательство, 1976.
Ыстӧгъяс
- ↑ Туркин А.И. Сельков Николай Никитич// Коми язык. Энциклопедия. - М.: Изд-во ДиК, 1998. - С.419-420.
- ↑ Попова Э.Н. Сельков Николай Никитич // Исследователи коми языка. Биобиблиографический указатель. — Сыктывкар: Анбур, 2017. — С. 257-259.
- ↑ Книга памяти Республики Коми.
- ↑ Мусанов А. Г., Федюнева Г. В., Цыпанов Е. А. Развитие коми лингвистической науки за 50 лет // Известия Коми НЦ УрО РАН. 2020. №2 (42).
- ↑ Сельков Николай Никитич // Ученые Института языка, литературы и истории Коми научного центра УрО РАН. Биографический справочник. — Сыктывкар: Коми научный центр, 2002. — С. 157.
- ↑ Сельков Николай Никитич