Коми кыв

Коми кыв
Коми кыв
Асним	Коми кыв
Странаяс	Рочму
Дінмуяс	Коми Республика,; Ханты-Манси асвеськӧдлан кытш — Йӧграму,; Ямал-Яран асвеськӧдлан кытш,; Тюмень обласьт,; Перым край,; Киров обласьт
Официал статус	Коми Республика
Сёрнитысь лыд	▼217 316 (2002); ▼156 099 (2010); ▼108 958 (2020)
Статус	есть угроза исчезновения[d]
Сикасалӧм
Категория	Евразияса кывъяс
	Урал кывъяс Финн-йӧгра кывъяс Перым кывъяс
Гижӧд	кириллича
Кыв код
ГОСТ 7.75–97	кои 320
ISO 639-1	kv
ISO 639-2	kom, kpv, koi
ISO 639-3	kom, kpv, koi
Атлас языков мира, находящихся под угрозой исчезновения (Atlas of the World’s Languages in Danger)	373
Ethnologue	kom
IETF	kv
Glottolog	komi1267

Видлалӧм гижӧд

Сыктывкарын Ӧ шыпаслы паметник

Коми кыв — финн-йӧгра кывъясысь ӧти, коми войтырлӧн чужан кыв.
Коми кыв ӧтувтӧ кык гижӧда кыв: коми да перым коми.
Коми кыв — Коми Республикаын канму кыв (кыдзи и роч кыв)^[4].
Комиӧн сёрнитӧны Коми Республикаса вужвойтыр — комияс.

Кыв семья да история

Коми кыв пырӧ финн-йӧгра кывъяс котырлӧн перым юкӧнӧ. Матысса рӧдвужӧн сылы лоӧны перым коми да удмурт кывъяс; ылысса рӧдвуж кывъясӧн лоасны суоми кыв, маддяр кыв, эст кыв, эрзя кыв, мокша кыв, мари кыв да мукӧд финн-йӧгра кывъяс. Коми кыв артмис прапермскӧй кыв-подув киссьӧм бӧрын, важ коми кыв новлӧдлысьяслӧн войвылӧ мунігӧн да перым комияслӧн пӧль-пӧчьясысь торйӧдчигӧн^[5].

Коми кыв пырӧ перым кыв чукӧрӧ да артмӧ куим ыджыд юкӧнысь: перым коми сёрниног, зыран коми сёрниног да язьва (либӧ ёдзва) коми сёрниног^[6].

Коми кывлӧн гижӧдыс зэв важъя. Официальнӧя коми кывйын гижӧда кыв артмӧмыс йитчӧма Перымса Степанкӧд, коді лӧсьӧдіс 1372 воын важъя коми анбур да вуджӧдіс вичко небӧгъяс коми кыв вылӧ. Но збыльвылас комияслӧн сэтчӧдз вӧлі нин гижӧд, сійӧс шуисны пасъясӧн. Коми гижӧд историяын позьӧ торйӧдны 5 юкӧн:
• XIV—XVII нэмъяс — анбур — аслыспӧлӧс коми графика - стефаница. Сійӧ эз паськав паськыда, сійӧн эз кутны вӧдитчыны 17 нэмын;
• XVIII нэм — 1918 во — кириллица подув вылын гижӧд;
• 1918—1932 да 1936—1938 вояс — В. А. Молодцовлӧн анбур подув вылын графика - молодцовица;
• 1932—1936 вояс — латин подув вылын графика - коми латиница;
• 1938 восянь — кириллица подув вылын ӧнія графика.

Коми кыв талунъя лунӧ — сӧвмӧм да вылыс тшупӧда кыв, кӧні эм став сикас колана формаыс: коми литературнӧй кыв да коми сёрнисикасъяс, вомгора кыв да гижӧда кыв.

Коми кывлӧн шӧр аслыспӧлӧслунъяс

• Коми кыв - тайӧ агглютинативнӧй кыв^[7]^[8], кӧні кывъясыс вежласьӧны торъя пӧрадок серти сьӧрсьӧн-бӧрсьӧн йитчысь суффиксъяс отсӧгӧн;
• Ӧнія коми фонетикаын эм 7 гласнӧй шы да 26 согласнӧй шы;
• Шуанног боксянь ударениеыс кывъясын абу вына, абу ёна тӧдчана, и усьӧ медводдза слог вылӧ;
• Фонетикаын тӧдчана пай босьтӧны аффрикатаяс да небыд согласнӧй шыяс;
• Коми кыв морфологияын тшӧтш эмӧсь аслыспӧлӧслунъяс. Коми кывйын 10 кывсикас;
• Нима кывсикасъясыс вежласьӧны лыд да вежлӧг серти, род категория комиын абу;
• Аслыспӧлӧс категорияӧн лоас индан-асалан категория;
• Кадакывлӧн эм вежласяна да вежласьтӧм формаяс;
• Вежласяна кадакыв формаясыс вежласьӧны кад, морт, лыд, наклонение серти. Торъялӧ 2 сикас спряжение - эскӧдана да соссяна;
• Коми синтаксисын медся тӧдчанаторнас лоас определениелӧн препозиция, абсолютнӧй деепричастие оборот, союзтӧм сложнӧй сёрникузяяслӧн ёна сӧвмӧм да с.в.;
• Коми кывворын ёнджыкасӧ паныдасьлӧны ӧти слога кывъяс (пу, му, ныв, ва) да наысь артмӧм сложнӧй кывъяс (вӧр-ва, бать-мам, кӧмкот);
• Коми кывйын эм унакодь заимствуйтӧм кыв, но бӧръя кадӧ коми кывйын зіля артмӧны ӧнія кадлы лӧсялана выль кывъяс^[5].

Коми сёрнисикасъяс

Коми сёрнисикасъяслӧн карта

«Азбука для зырян-ижемцев», 1895

Коми кывйын эм 10 сёрнисикас. Подув торйӧдан признакъяснас лоӧны мутас да фонетика серти (ёнджыкасӧ В//Л чередуйтчӧм) торъялӧмъяс. Ассьыныс нимъяссӧ сёрнисикасъясыс босьтӧмаӧсь ёнджыкасӧ ю нимъясысь, кӧні олӧны тайӧ сёрнисикас вылын сёрнитысь йӧз:
1. Сыктывкарбердса сёрнисикас;
2. Луза-Леткабердса сёрнисикас ;
3. Сыктывйывса сёрнисикас;
4. Сыктывшӧрса сёрнисикас;
5. Изьва сёрнисикас;
6. Емва сёрнисикас;
7. Удора сёрнисикас;
8. Печора сёрнисикас;
9. Эжвагорувса сёрнисикас;
10.Эжвайывса сёрнисикас.

Коми анбур

А а	Б б	В в	Г г	Д д	Е е	Ё ё
Ж ж	З з	И и	І і	Й й	К к	Л л
М м	Н н	О о	Ӧ ӧ	П п	Р р	С с
Т т	У у	Ф ф	Х х	Ц ц	Ч ч	Ш ш
Щ щ	Ъ ъ	Ы ы	Ь ь	Э э	Ю ю	Я я

Видзӧдӧй тшӧтш[вежны | Вежны кодировкаын]

• Молодцов анбур
• Коми латынь анбур
• Важ Перым анбур

Коми кыв туялӧм

Коми кыв туялӧм заводитчис медводдза коми грамматикаяс, кывкудъяс, небӧгъяс петӧмсянь. Коми сёрнисикасъяс да коми кывлысь кыввор туялісны XIX нэмын отечественнӧй да суйӧрса учёнӧйяс (П. И. Савваитов, И. А. Куратов, Г. С. Лыткин, А. М. Шёгрен, М. А. Кастрен, Ф. И. Видеман, Ю. Я. Вихман, Т. Э. Уотила, Д. Р. Фокош-Фукс).
Коми языкознание сӧвмӧмын выль тшупӧд пансис 1917 вося Октябрьскӧй революция бӧрын. Сійӧ йитчӧма нималана лингвистъяс Бубрих Дмитрий Владимирович, Лыткин Василий Ильич, Сидоров Алексей Семёнович, Серебренников Борис Александрович нимъяскӧд. Ыджыд пай сёрнисикас, кыв история, фонетика, морфология да синтаксис туялӧмӧ да фундаментальнӧй уджъяс гижӧмӧ пуктісны Сахарова Марфа Александровна, Колегова Нина Андреевна, Сельков Николай Никитич, Жилина Татьяна Ивановна, Тимушев Дмитрий Андреевич, Гуляев Евгений Семёнович, Бараксанов Геннадий Григорьевич, Ляшев Владимир Александрович, Цыпанов Евгений Александрович, Ракин Анатолий Николаевич, Карманова Альбина Николаевна, Некрасова Галина Александровна, Федюнёва Галина Валерьяновна, Лудыкова Валентина Матвеевна, Мусанов Алексей Геннадьевич да мукӧд.
Коми кывсӧ туялӧны Россияса, Эстонияса, Венгрияса, Финляндияса, Австрияса финн-йӧгра шӧринъясын, а сідзжӧ Германияса, Великобританияса, Францияса, Италияса, АӦШ-са, Японияса, Австралияса учёнӧйяс.

Медколана финн-йӧгра кывъяслӧн таблица

Коми кыв	вӧвны	выль	ур	вый	пон	ныр	куим	пу	пинь	ки	вой	ма
Перым коми кыв	вӧвны	виль	ур	ви	пон	ныр	куим	пу	пинь	ки	ой	ма
Мукӧд финн-йӧгра кывъяс
Удмурт кыв	луыны	выль	коньы	вӧй	пуны	ныр	куинь	писпу	пинь	ки	уй	му
Мари кыв	улаш	у	ур	ÿй	пий	нер	кум	пу	пÿй	кид	йÿд	мÿй
Меря кыв †
Эрзя кыв	улемс	од	ур	ой	киска, пине	нерь, судо, нёнё	колмо	чувто	пей	кедь	ве	медь
Мокша кыв	улемс	од	ур	вай	пине	нярь, шалхка	колма	шуфта	пей	кядь	ве	медь
Вепс кыв	olda	uz'	orav	voi	koir	nena	koume	pu	hambaz	käzi	ö	mezi
Карел кыв	olla	uuzi	orava	voi	koiru	nenä	kolme	puu	pii	käzi	yö	mezi
Финн кыв	olla	uusi	orava	voi	koira	nenä	kolme	puu	pii	käsi	yö	hunaja
Эст кыв	olema	uus	orav	või	koer, peni	nina	kolm	puu	hammas	käsi	öö	mesi
Лив кыв	volda	ūž	vorābõz	võidag	piņ	nanā	kuolm	pū	āmbaz	kež	īe	mež
Ижора кыв	olla	uuz	orraava	voi	koira	nenä	kolt	puu	hammaz, pii	kazi	öö	mezi
Водь кыв	õlla	uus	õrava	või	koira	nina	kõlmõd, kõm	puu	ammaz	katti	üü	mesi
Саами кыв
Вӧгул кыв							хурум
Ханты кыв		йитып		вуй	амп	нёт	хутым	юх	пенгк	ёш	атн
Маддяр кыв	lenni	új	mókus	vaj	kutya, eb	orr	három	fa	fog	kéz	éj	méz

Коми кывъя масс-медиа

Видзӧдӧй тшӧтш[вежны | Вежны кодировкаын]

Коми газет-журналъяс

Ӧнія газетъяс[вежны | Вежны кодировкаын]

• Коми му
• Кулӧмдін
• Парма гор (роча-комиа)
• Видза олан, Петрунь!
• Выль туйӧд
• Йӧлӧга (2020-ӧд воӧдз)

Ӧнія журналъяс[вежны | Вежны кодировкаын]

• Йӧлӧга (2020-ӧд восянь)
• Войвыв кодзув
• Би кинь
• Чужан кыв (роча-комиа)
• Чушканзі (роча-комиа)
• Арт (роча-комиа)

Ӧтуввезйын петасъяс[вежны | Вежны кодировкаын]

Паськыдджыка ӧтуввезйын коми кывъя петасъяс йылысь позьӧ аддзыны Кыв технология сӧвмӧдан шӧринлӧн сайтысь^[9].

Радио да телевидение[вежны | Вежны кодировкаын]

• "Коми Гор" ГТРК^[10];
• "Коми Гор" онлайн радио^[11];
• Коми йӧзкостса радио ^[12];
• ЮРГАН телеканал^[13].

Видзӧдӧй тшӧтш

• Коми сёрнисикасъяс
• Коми литературнӧй кыв
• «Ӧ» коми шыпаслы паметник
• Коми гижӧд лун

Содтӧд ыстӧгъяс

•Коми кыв портал
•Коми гижанног видлалан сервис
•Коми кыв велӧдан онлайн курс
•Коми онлайн небӧгаин
•Коми кыв корпус
•Роч-коми велӧдчан кывкуд
•Коми онлайн кывкудъяс
•Язык коми. Язык сердца пармы и светлой воды

Литература

• Коми язык. Энциклопедия. - М.: Изд-во ДиК, 1998.
• Лыткин В. И. Коми-зырянский язык. — Закономерности развития языков народов СССР в советскую эпоху. М., 1969;
• Основы финно-угорского языкознания. Марийские, пермские и угорские языки, т.3. М., 1976;
• Современный коми язык, ч. I. Фонетика, лексика, морфология. Сыктывкар, 1955;
• Современный коми язык, ч. II. Синтаксис. Сыктывкар, 1967;
• Современный коми язык. Лексикология. М., 1985;
• Хайду П. Уральские языки и народы. М., 1985.

Ыстӧгъяс

↑ Всероссийская перепись населения 2002 года (неопр.). Шыӧдчан кадпас: 7 косму тӧлысь 2023. Архивируйтӧма 23 рака тӧлысь 2023.
↑ Всероссийская перепись населения 2010 года (неопр.). Шыӧдчан кадпас: 7 косму тӧлысь 2023. Архивируйтӧма 25 рака тӧлысь 2023.
↑ Всероссийская перепись населения 2020 года (неопр.). Шыӧдчан кадпас: 7 косму тӧлысь 2023. Архивируйтӧма 26 рака тӧлысь 2023.
↑ Ст. 67 Конституции Республики Коми: «Государственными языками Республики Коми являются коми и русский языки». (неопр.) Архивируйтӧма 26 тӧвшӧр тӧлысь 2016.
↑ ¹ ² Ракин А.Н. Коми язык // Коми язык. Энциклопедия. - М.: Изд-во ДиК, 1998. - С. 190-193.
↑ Сажина С.А. Коми кывлӧн диалект тэчас
↑ Язык коми — все самое интересное на ПостНауке (рус.). postnauka.ru. Шыӧдчан кадпас: 13 тӧвшӧр тӧлысь 2022. Архивируйтӧма 30 моз тӧлысь 2021.
↑ ПЕ́РМСКИЕ ЯЗЫКИ́ : [арх. 1 тӧвшӧр тӧлысь 2022] / М. А. Живлов // П — Пертурбационная функция. — М. : Большая российская энциклопедия, 2014. — С. 710-711. — (Большая российская энциклопедия : [в 35 т.] / гл. ред. Ю. С. Осипов ; 2004—2017, т. 25). — ISBN 978-5-85270-362-0.
↑ Коми кывъя сайтъяс интернетын
↑ "Коми Гор" ГТРК
↑ "Коми Гор" радио
↑ Коми йӧзкостса радио
↑ "Юрган" телеканал

Финн-йӧгра кывъяс
Йӧгра котыр	Маддяр (венгер) кыв \| Манси кыв \| Ханты кыв
Перым котыр	Коми кыв (стандартъяс: зыряна коми \| перым коми \| ёдзва коми кыв) \| Удмурт кыв
Мари котыр	Мари кыв (стандартъяс: видзвыв мари кыв \| керӧсвыв мари кыв)
Мордва котыр	Мокша кыв \| Эрзя кыв
Фин котыр	Суоми кыв \| Эст кыв \| Выру кыв \| Сету кыв \| Вепс кыв \| Водь кыв \| Карел кыв \| Лив кыв (†) \| Ижора кыв
Саами котыр	Саами кыв (стандартъяс: инари \| войвыв саами \| кильдин \| колтта \| лунвыв саами \| луле)
Важӧн бырӧм кывъяс	Меря кыв † \| Мешшӧра кыв † \| Мурома кыв †

[1] Всероссийская перепись населения 2002 года (неопр.). Шыӧдчан кадпас: 7 косму тӧлысь 2023. Архивируйтӧма 23 рака тӧлысь 2023.

[2] Всероссийская перепись населения 2010 года (неопр.). Шыӧдчан кадпас: 7 косму тӧлысь 2023. Архивируйтӧма 25 рака тӧлысь 2023.

[3] Всероссийская перепись населения 2020 года (неопр.). Шыӧдчан кадпас: 7 косму тӧлысь 2023. Архивируйтӧма 26 рака тӧлысь 2023.

[4] Ст. 67 Конституции Республики Коми: «Государственными языками Республики Коми являются коми и русский языки». (неопр.) Архивируйтӧма 26 тӧвшӧр тӧлысь 2016.

[:1-5] ¹ ² Ракин А.Н. Коми язык // Коми язык. Энциклопедия. - М.: Изд-во ДиК, 1998. - С. 190-193.

[6] Сажина С.А. Коми кывлӧн диалект тэчас

[7] Язык коми — все самое интересное на ПостНауке (рус.). postnauka.ru. Шыӧдчан кадпас: 13 тӧвшӧр тӧлысь 2022. Архивируйтӧма 30 моз тӧлысь 2021.

[8] ПЕ́РМСКИЕ ЯЗЫКИ́ : [арх. 1 тӧвшӧр тӧлысь 2022] / М. А. Живлов // П — Пертурбационная функция. — М. : Большая российская энциклопедия, 2014. — С. 710-711. — (Большая российская энциклопедия : [в 35 т.] / гл. ред. Ю. С. Осипов ; 2004—2017, т. 25). — ISBN 978-5-85270-362-0.

[9] Коми кывъя сайтъяс интернетын

[10] "Коми Гор" ГТРК

[11] "Коми Гор" радио

[12] Коми йӧзкостса радио

[13] "Юрган" телеканал

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]