Сыктывкар (аэропорт)
| Сыктывкарса аэропорт | |||||||
|---|---|---|---|---|---|---|---|
 | |||||||
| Аэропортлӧн ИАТА код: SCW – ИКАО: УУЫЫ (UUYY) | |||||||
| Информация | |||||||
| Аэропорт сикас | гражданскӧй | ||||||
| Страна | Россия | ||||||
| Ин | Коми Республика, Сыктывкар | ||||||
| Оператор | ОАО «Комиавиатранс» | ||||||
| Медшӧр аэропорт | Комиавиатранс | ||||||
| Саридз веркӧсвесьтса вылна | 103 м | ||||||
| Час кытш | UTC+3 | ||||||
| Уджалан кад | сутки чӧж | ||||||
| Сайт | komiaviatrans.ru | ||||||
| Карта | |||||||
|
Аэропортыс Коми Республика карта вылын |
|||||||
| Лэбзян-пуксян полосаяс | |||||||
|
|||||||
| Статистика (2021) | |||||||
| Вося пассажиропоток | ▲ 546 954[1] | ||||||
 Медиафайлы на РУВИКИ.Медиа | |||||||
.jpg)
Пётр Истомин нима Сыктывкарса аэропорт — федеральнӧй тӧдчанлуна войтыркостса аэропорт[2] Сыктывкарын, Коми Республикалӧн юркарын. 2018 воын «Великие имена России» ставроссияса конкурс бӧрын аэропортлы сетісны медводдза коми лётчик Пётр Истоминлысь ним[3][4].
Аэропортыс меститчӧ веськыда карын. Аэропорт дорас эм некымын гостиница, карса да каркостса автобусъяс сувтланін ( 3, 5, 174 да мукӧд маршрутъяс).
История
• 1925 вося моз тӧлысь 14-ӧд лунӧ - Усть-Сысольск дорын Сыктыв ю вылӧ пуксис Авиахимса Шӧр сӧветлӧн «Юнкерс» сикаса медводдза агитационнӧй самолёт-гидроплан. Самолётлӧн нимыс вӧлі «Карлӧн да сиктлӧн йитчӧм». Экипажын вӧлі куим морт (И. А. Вахлаков, В. Б. Копылов, Х. С. Клочко). Обласьтӧ самолёт воис моз тӧлысь 12-ӧд лунӧ. Тайӧ вӧлі Усть-Сысольскса да крайса лунвыв районъясын олысьяслӧн авиациякӧд медводдза тӧдмасьӧм.
• 1929 вося йирым тӧлысь 2-ӧд лунӧ «Добролёт» ставрочмувывса котырӧн веськӧдланінлӧн тшӧктӧдӧн вӧлі восьтӧма Архангельск-Сыктывкар авиалиния.
• 1930 вося урасьӧм тӧлысь 5-ӧд лунӧ Усть-Сысольскын Сыктыв юлӧн йи вылӧ Париж местасянь неылын пуксис «Добролёт» котырлӧн (Аэрофлот котырлӧн подув) «Дорнье-Комета» пассажиръяса медводдза самолёт, коді вӧчис медводдза рейс Архангельск-Котлас-Усть-Сысольск авиамаршрут кузя.
• 1930 воын Сыктывкарын лои медводдза лэбалан эрд.
• 1931 воын Сыктывкарын заводитісны стрӧитны мувывса аэродром да гидросамолётъяслы аэродром[5].
• 1933 вося урасьӧм тӧлысь 14-ӧд лунӧ Сыктывкар-Котлас, Березники-Кардор маршрутъяс кузя воссис пассажиръяслы, грузъяслы да почталы авиалиния. Сыктывкарысь самолёт лэбис урасьӧм тӧлысь 15, 18, 21, 24, 28 лунъясӧ 7 час 30 минутӧ асылын. Котласӧдз билетлӧн доныс вӧлі 120 шайт, Березникиӧдз 200 шайт; Кардорӧдз 270 шайт [5].
• 1934 воӧ лэбалан эрдсӧ вуджӧдісны Кируль посёлокӧ Киров нима колхозлӧн муяс местаӧ, сідзжӧ вӧлі лӧсьӧдӧма радиостанция, сы отсӧгӧн вӧлі йитчӧма Котласкӧд.
• 1935 воӧ вӧлі восьтӧма Р-5 самолёт вылын Архангельск-Нарьян-Мар-Усть-Уса-Абезь-Воркута авиамаршрут.
• 1936 воӧ воссис Сыктывкар - Ухта - Абзель авиалиния.
• 1936 вося тӧвшӧр тӧлысь 20-ӧд лунӧ заводитчисны Сыктывкар - Котлас - Архангельск авиарейсъяс. Тайӧ жӧ гожӧмнас вӧлі восьтӧма Мылдінын аэропорт.
• 1938 воын воссис Сыктывкар - Абъячой - Киров авиалиния. Лэбалісны По-2 самолётӧн
• 1940 воын Сыктывкарса лётчикъяс пыр кутісны могмӧдны меставывса сынӧд туй Ухтаӧ, Чилимдінӧ, Изьваӧ, Емдінӧ, Кӧджваӧ, Кулӧмдінӧ, Мылдінӧ, Абъячойӧ, Княжпогостӧ, Кировӧ, Котласӧ да Кардорӧ.
• 1948 воын Ли-2 самолётӧн вӧлі вӧчӧма медводдза пассажирскӧй рейс Москва - Горький - Сыктывкар - Воркута маршрут кузя. Тайӧ жӧ воас Сыктывкарын вӧлі восьтӧма штаба медводдза аэровокзал.
• 1951 воын заводитісны лэбавны Сыктывкарысь медводдза вертолётъяс.
• 1957 воын - воссьӧмаӧсь Москва - Горький - Киров - Сыктывкар - Воркута - Каменный - Норильск да Сыктывкар - Горький - Воронеж - Краснодар авиалинияяс, найӧс могмӧдісны Ил-14 самолётъясӧн.
• 1959 вося ӧшым тӧлысьын Сыктывкарӧ воис медводдза турбовинтӧвӧй уна местаа (132 пассажир) Ан-10 самолёт. 1960 восянь тайӧ лайнернас заводитісны регулярнӧя лэбавны Москваӧ да Россияса мукӧд карӧ.
• 1959 вося ӧшым тӧлысьын заводитісны выльмӧдны лэбзян-пуксян полоса: грунт полоса пыдди вӧлі стрӧитӧма бетонируйтӧмаӧс.
• 1970-ӧд воясӧ вӧлі стрӧитӧма аэровокзаллысь стрӧйбасӧ да сы гӧгӧр стрӧйбаяслысь комплекс.
_take_off_at_Syktyvkar_Airport.jpg)
• 1973 воын заводитісны лэбавны турбореактивнӧй самолётъяс Ту-134, а сэсся Як-40. Рака тӧлысь 12-ӧд лунӧ Сыктывкарса аэропортӧ вайисны авиационнӧй заводысь уджӧдӧм вылӧ Ту-134А медводдза турбореактивнӧй пассажирскӧй самолёт, кому тӧлысь 1 лунӧ Сыктывкарысь Ту-134А самолётӧн вӧлі вӧчӧма медводдза авиарейс.
• 1974 воын нюжӧдісны лэбзян-пуксян полоса, сылӧн кузьтаыс лои 2500 метр.
• 1974 вося ӧшым тӧлысьын Сыктывкарса аэропорт лоис СССР-ын кӧкъямысӧд аэропортӧн, коді вӧлі примитӧ медводдза международнӧй категорияа поводдя минимум серти самолётъяс. Самолётъяслысь пуксьӧмсӧ могмӧдӧма автоматическӧй режимын кымӧръяслӧн 60 метр судтаӧдз, кор горизонтальнӧя тыдалӧ 800 метр.
• 1978 воын воссис пассажиръяслы павильон, вуджанін отсӧгӧн вӧлі йитӧма аэропортлӧн важ стрӧйбакӧд.
• 1996 вося ода-кора тӧлысь 8-ӧд лунӧ РФ-са правительстволӧн 729-р №-а тшӧктӧмӧн Сыктывкарса аэропорт вӧлі восьтӧма войтыркостса рейсъяслы [6].
• 2013 воын капитальнӧя дзоньталӧма пытшкӧсса авиалинияяслысь терминалсӧ да ортсысяньыс косметическӧя дзоньталӧма кыкнан терминалсӧ.
• 2021 воын вӧлі капитальнӧя дзоньталӧма войтыркостса терминал [7].
Кытчӧ лэбалӧны
Авиалинияясыс Сыктывкар аэропортсянь вежласьӧны быд во[5]:
1957 – Москва–Горький–Киров–Сыктывкар–Воркута–Мыс Каменный– Норильск и Сыктывкар– Горький– Воронеж– Краснодар– Адлер.
1958 – Сыктывкар–Горький–Воронеж–Минеральные Воды.
1959 – Норильск–Воркута–Сыктывкар–Адлер и Воркута–Сыктывкар–Ленинград.
1961 – Сыктывкар–Киров–Ижевск–Свердловск.
1964 – Сыктывкар–Москва–Краснодар–Сочи и Сыктывкар–Архангельск.
1966 – Сыктывкар–Ижевск–Казань, Сыктывкар–Ижевск–Уфа и Сыктывкар–Киров–Пермь.
1967 – Сыктывкар–Казань–Минводы, Печора–Сыктывкар–Москва, Печора–Сыктывкар–Горький–Донецк–Симферополь, Печора–Сыктывкар–Горький–Киев, Архангельск–Сыктывкар–Свердловск, Сыктывкар–Ижевск–Казань–Саратов.
1968 – Сыктывкар–Киров–Пенза–Волгоград–Минводы, Сыктывкар–Киров–Пенза–Воронеж–Ростов-на-Дону, Сыктывкар–Ленинград–Минск–Киев–Одесса и Ухта–Сыктывкар–Ленинград.
1969 – Воркута–Сыктывкар–Горький–Донецк–Симферополь, Воркута–Сыктывкар–Горький–Краснодар–Сочи, Сыктывкар–Котлас–Ярославль и Воркута–Сыктывкар–Свердловск.
1970 – Сыктывкар–Киров–Пенза–Харьков, Сыктывкар–Салехард, Сыктывкар–Уфа–Куйбышев, Сыктывкар–Вологда–Новгород–Рига, Сыктывкар–Ленинград–Кишинев.
1972 – Сыктывкар–Свердловск–Омск–Барнаул.
1975 – Салехард–Ухта, Ухта–Салехард–Надым, Инта–Ухта–Киров–Надым, Сыктывкар–Куйбышев–Анапа, Архангельск–Нарьян-Мар–Воркута–Норильск.
1976 – Сыктывкар–Петрозаводск–Минск–Львов, Воркута – Анапа, Воркута – Харасавей.
1977 – Сыктывкар–Томск.
1978 – Кослан–Сыктывкар–София, Сыктывкар–Вуктыл, Сыктывкар–Изьва, Сыктывкар–Кослан, Ухта–Сочи, Сыктывкар–Кустанай–Семипалатинск, Сыктывкар–Усть-Каменогорск, Усинск–Киров–Казань и Усинск–Пермь–Ухта.
1979 – Сыктывкар–Чебоксары–Минеральные воды, Сыктывкар–Кокчетав, Сыктывкар–Новосибирск.
1985 – Сыктывкар–Варна.
1989 – Сыктывкар–Бургас.
Техническӧй мыччӧдъяс
В класса аэродром, вермӧ примитны татшӧм самолётъяс: Ан-12, Ан-148, Ил-76, Ту-154, Ту-204, Airbus A320-200, Airbus A320#A321, А321-200, A330-200, ATR 72, Boeing 737-800/900, Boeing 757-200, Embraer ERJ-145, Embraer E-190, Sukhoi Superjet 100 да кокньыдджыкъясӧс, а сідзжӧ став сикас вертолётъяс.
Лэбзян-пуксян полосаыс ИВПП 36/18, 2500х45 м. Лэбзян-пуксян полосаыслӧн классификация лыдыс (PCN) 49/F/D/X/T. Вевтасыс — асфальтобетон.
Удж петкӧдласъяс
| Пассажиропоток: | ||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|
| во | 2014 | 2015 | 2016 | 2017 | 2018 | 2019 | 2020 | 2021 | ||||||||||||
| сюрс пассажир | 450,4 | 440,5 | 449,1 | 511,6 | 564,0 | 549,7 | 370,5 | 547,0[1] | ||||||||||||
| Ӧшмӧс:[8][9][10][11] | ||||||||||||||||||||
Галерея
Самолёт трап аэропортлӧн лэбзян-пуксянінысын (2006)
Сыктывкар аэропорт (2008)
Аэропорт пытшкӧс (2008)
Лоӧмторъяс
• 1938 вося вӧльгым тӧлысь 7-ӧд лунӧ пармаӧ бытьӧн пуксис По-2 самолёт, мыйӧн Пезмӧгсянь Сыктывкарӧ лэбис Локчимлагса начальник Вульф. Пассажиръяс да лётчик колины ловйӧн [5].
• 1945 вося сора тӧлысь 16-ӧд лунӧ Сыктывкар-Ухта маршрут кузя лэбысь С-2 самолёт кежис туй вывсьыс да пуксис Соликамск карын [5].
• 1946 вося ода-кора тӧлысь 24-ӧд лунӧ Ухта районын вӧръясын патрулируйтысь С-2 самолётлӧн лоӧма авария. Лётчикъяс кӧсйӧмаӧсь вӧтлысьны йӧра бӧрся, лэччӧмаӧсь увлань да усьӧмаӧсь вӧрӧ. Некод эз кувсьы [5].
• 1947 вося урасьӧм тӧлысь 1 лунӧ лэбзьӧм кежлӧ омӧля лӧсьӧдчӧм вӧсна аварияӧ веськалӧма Чилимдінысь лэбзьӧм С-2 самолёт. Некод эз кувсьы [5].
• 1947 вося лӧддза-номъя тӧлысь 22-ӧд лунӧ Сыктывкарысь лэбзьӧм По-2 самолёт бытьӧн пуксис Киров обласьтса Важ Крюк грезд дорӧ. Некод эз кувсьы[5].
• 1960 вося сора тӧлысь 20-ӧд лунӧ Ленинградысь Сыктывкарӧ лэбысь Ил-14 самолёт усьӧма Архангельск обласьтын Сыктывкарса аэропортсянь рытыв-лунвывлань 87 км ылнаын. Неминучаыс артмис самолётлӧн гымалан кымӧръяс пӧвстӧ веськалӧм вӧсна; ыджыд перегрузкаяс вӧсна самолёт заводитіс жугласьны сынӧдын, воштіс веськӧдлӧмсӧ, уси вӧрӧ, взорвитчис да сотчис. Самолётлысь колясъяссӧ вӧліны аддзӧмаӧсь сӧмын сора тӧлысь 31-ӧд лунӧ. Пӧгибнитіс 23 морт.
• 1960 вося ӧшым тӧлысьын катастрофаӧ веськаліс Сыктывкарса авиагруппалӧн нӧшта ӧти Ил-14, коді лэбис Горький - Сыктывкар маршрут кузя.
• 1963 вося урасьӧм тӧлысь 8-ӧд лунӧ тренировочнӧй лэбӧм дырйи неминучаӧ веськалӧма Ан-10А самолёт Сыктывкар бердын. 7 морт пӧгибнитіс[5].
• 1966 вося урасьӧм тӧлысьын усис Свердловскӧ рейс вӧчысь самолёт. Борт вылын вӧліны ВЛКСМ Коми обкомса первой секретарь П. Ерахов да КПСС Коми обкомлӧн пропаганда отделӧн веськӧдлысь А. Пешкин. Пассажиръяс да экипаж пӧгибнитісны [5].
• 1986 вося сора тӧлысь 2-ӧд лунӧ усис Ту-134 самолёт. Кыпӧдчӧм бӧрын 12 минут мысти индӧм эшелонлӧн наборын 5600 м вылнаын экипажлӧн кабинаын заводитіс уджавны сигнализация «Бӧръя багажникын тшын». Нӧшта 4 минут мысти, 6700 метр вылнаын Сыктывкарса аэропортсянь 140 километр ылнаын, экипаж юӧртіс движение службаса диспетчерлы Сыктывкарса аэродромӧ бӧр локтӧм йылысь бӧръя багажникын пӧжар вӧсна да заводитіс экстреннӧя лэччыны. Та бӧрын 7 минут мысти экипаж юӧртіс пассажирскӧй салонын ёна тшынасьӧм йылысь да вӧрӧ вынужденнӧя пуксьыны кӧсйӧм йылысь, кӧні тайӧ кадас кымӧръяслӧн улыс дорыс вӧлі 200 м гӧгӧр, зэригӧн тыдалӧмыс - 6 км. Нӧшта 9 минут мысти Сыктывкарсянь 75 гӧгӧр километр ылнаын вӧрӧ пуксигӧнсамолётыс дзикӧдз жугаліс да сотчис. Пӧгибнитіс 53 морт, ловйӧн коли 38 морт [5].
• 1992 вося йирым тӧлысь 19-ӧд лунӧ Тимшер - Немдін - Сыктывкар рейс вӧчысь Ан-28 самолётлӧн авиакатастрофаын Немдін сикт дорын пӧгибнитіс 15 морт [5].
• 1947 вося моз тӧлысь 28-ӧд лунӧ Коми АССР-ын вӧлі гусялӧма Кулӧмдін - Керчомъя рейс вӧчысь С-2 самолёт. Преступникъяс виӧмаӧсь лётчикӧс да лэбӧмаӧсь Перым обласьтӧ, кӧні найӧс арестуйтӧмаӧсь [5].
• 1994 вося вӧльгым тӧлысь 24-ӧд лунӧ Вӧркутаысь вӧвлӧм шахтёр В. Божко гусяліс Сыктывкар-Санкт-Петербург-Минск рейс вӧчысь Ту-134 самолёт, медым мунны сійӧн Данияӧ. Самолёт пуксис Таллинӧ, кӧні кутісны террористӧс [5].
Пасйӧдъяс
- ↑ 1,0 1,1 Объемы перевозок через аэропорты России за январь-декабрь 2021 г. Росавиация. Дата обращения: 4 урасьӧм тӧлысь 2022. Архивировано 4 урасьӧм тӧлысь 2022 года.
- ↑ Распоряжение Правительства Российской Федерации от 20 апреля 2016 года № 726-р «Об утверждении перечня аэропортов федерального значения». Дата обращения: 4 вӧльгым тӧлысь 2019. Архивировано 8 ода-кора тӧлысь 2016 года.К:Рувики:Cite web (не указан язык)
- ↑ Указ Президента Российской Федерации от 31.05.2019 № 246 "О присвоении аэропортам имен лиц, имеющих особые заслуги перед Отечеством". Дата обращения: 4 вӧльгым тӧлысь 2019. Архивировано 3 лӧддза-номъя тӧлысь 2019 года.К:Рувики:Cite web (не указан язык)
- ↑ Сыктывкарскому аэропорту официально присвоили имя Петра Истомина. БНК. Дата обращения: 8 ӧшым тӧлысь 2019. Архивировано 8 ӧшым тӧлысь 2019 года.
- ↑ 5,00 5,01 5,02 5,03 5,04 5,05 5,06 5,07 5,08 5,09 5,10 5,11 5,12 5,13 Игорь Жеребцов. Комиретро: в Коми летчики появились раньше, чем самолеты. Комиинформ (25 сора тӧлысь 2016). Дата обращения: 29 тӧвшӧр тӧлысь 2022. Архивировано 29 тӧвшӧр тӧлысь 2022 года.
- ↑ РАСПОРЯЖЕНИЕ ПРАВИТЕЛЬСТВА РФ ОТ 08.05.96 N 729-Р ОБ ОТКРЫТИИ АЭРОПОРТА СЫКТЫВКАР ДЛЯ МЕЖДУНАРОДНЫХ ПОЛЕТОВ. www.lawrussia.ru. Дата обращения: 9 кӧч тӧлысь 2016. Архивировано 15 кӧч тӧлысь 2016 года.К:Рувики:Cite web (не указан язык)
- ↑ Международный терминал открылся после реконструкции в аэропорту Сыктывкара. Дата обращения: 2 урасьӧм тӧлысь 2022. Архивировано 2 урасьӧм тӧлысь 2022 года.
- ↑ Объемы перевозок через аэропорты России за январь-декабрь 2014-2015 гг. Росавиация. Дата обращения: 16 тӧвшӧр тӧлысь 2018. Архивировано 17 сора тӧлысь 2016 года.
- ↑ Объемы перевозок через аэропорты России за январь-декабрь 2016-2017 гг. Росавиация. Дата обращения: 28 рака тӧлысь 2018. Архивировано из оригинала 28 рака тӧлысь 2018 года.
- ↑ Объемы перевозок через аэропорты России за январь-декабрь 2018 года. Росавиация. Дата обращения: 4 моз тӧлысь 2019. Архивировано 30 ода-кора тӧлысь 2016 года.
- ↑ Объемы перевозок через аэропорты России за январь-декабрь 2019 года. Росавиация. Дата обращения: 4 урасьӧм тӧлысь 2020. Архивировано 30 ода-кора тӧлысь 2016 года.
Ыстӧгъяс
| Аэропортъяс Коми Республикаын |
| Вӧркута | Вуктыл | Емва | Изьва | Инта | Кулӧмдін | Печора | Сыктывкар | Уква | Ускар | Чилимдін |