Финн-угор этнокультурнӧй парк
| Финн-угор этнокультурнӧй парк | |
|---|---|
 Финн-угор этнокультурнӧй парк, 2011 | |
| Лӧсьӧдан кадпас | 2010-2012 |
| Подув пуктысь | Коми Республикаса Веськӧдлан котыр |
| Сайт | ethnopark-rk.ru |
Финн-угор этнокультурнӧй парк — финн-угор войтыръяслы сиӧм уна мога туризм комплекс, Коми Республикаса канму асшӧрлуна учреждение[1].
Уджалӧ 2011-ӧд восянь.
Учреждениелӧн талунъя учредитысьыс - Коми Республикаса культура, туризм да архив удж министерство.
Меститчӧм
Паркыс меститчӧ важся Ыб сиктса Сёрдын.
Тэчас
Паркын стрӧитӧма да уджалӧ 16 медшӧр да содтӧд инфраструктура объект (конгресс-холл, туй морт керка, кафе, коми керка, административнӧй здание, мероприятиеяс нуӧдӧм вылӧ площадкаяс да мукӧд), волысьяслы быд лун вӧзйӧны 20 сайӧ тӧдмӧдан-гажӧдан, спорт, велӧдан уджтас.
История
Этнопарксӧ лӧсьӧдісны да сӧвмӧдісны 2010-2012 воясӧ Коми Республикаса торъя мога уджтас серти[2].
Проект олӧмӧ пӧртан медводдза тшупӧдын сьӧмкуд инвестицияяссӧ веськӧдӧма парклӧн медводдза ӧчередьса капитальнӧй объектъяс (инженернӧй инфраструктура, пыран группа, конгресс-холл, туй морт керка) стрӧитӧм вылӧ. "Финн-йӧгра этнокультурнӧй парк" комплекс лӧсьӧдӧм" дыр кадся республиканскӧй торъя мога уджтас серти медводдза ӧчередьса объектъяс стрӧитӧм вылӧ сьӧмсӧ вичмӧдісны Коми Республикаса бюджетысь.
2012 восянь - тайӧ войтыркостса участвуйтӧмӧн федеральнӧй инвестиционнӧй проект[2].
2017 воын этнопарк заводитіс сӧвмӧдны «Коми - россияса промышленнӧй мусирлӧн чужанін» бренд да восьтіс «Чутскӧй вый» мусир искусстволысь мирын медводдза музей[3].
Удж нырвизьяс
Этнокультурнӧй парк уджалӧ куим медшӧр нырвизьын: кыдзи туризм комплекс, туристъяслы юӧр сетан дінму шӧрин да туроператор.
Этнопарклӧн медшӧр могыс – лоны подув учреждениеӧн, коді сӧвмӧдӧ пытшкӧсса туризм, лӧсьӧдӧ гӧсьтъяслы шойччанін, кӧні найӧс примитасны няньӧн-солӧн, кӧні найӧ вермасны нимкодясьны вӧр-ваӧн, интерактивнӧя тӧдмасьны финн-угор да яран войтырлӧн оланногӧн да культураӧн[4].
Финн-угор этнокультурнӧй парк - Коми мусӧ тӧдчӧдана ин, кӧні радейтӧны шойччӧдны гожӧмын да тӧлын, котыртӧны гырысь лоӧмторъяс, ворсӧдӧны-гажӧдӧны челядьӧс, а сідзжӧ нуӧдӧны конференцияяс, форумъяс да симпозиумъяс. Республикалӧн экология боксянь сӧстӧм да лӧнь тайӧ пельӧсын семьяясӧн коллялӧны шойччан лунъяссӧ. Быд во этнопаркӧ волӧ Коми Республикаысь, Россияса дінмуясысь да суйӧр сайысь 20 сюрсысь унджык гӧсьт.
Сійӧ кыскӧ ас дорас вӧрзьӧдлытӧм вӧр-васӧ да сӧстӧм сынӧдсӧ, сӧдз ю-тыяссӧ пыдди пуктысь да радейтысь йӧзӧс. Этнопаркӧ волысьяслы позьӧ кольны автомашинасӧ сувтӧданінӧ, овмӧдчыны туй морт керкаӧ, чӧсмасьны кафеын национальнӧй сёян-юанӧн, уджавны конгресс-холлын, аддзывны коми керка да овмӧс, изьваса чум, йӧра видзан ферма, ветлӧдлыны вӧрын тематическӧй ордымъясті, видзӧдлыны ывлавывса выставкаяс да уна мукӧдтор. Тані челядьлы да верстьӧ йӧзлы нуӧдӧны обзорнӧй да тематическӧй экскурсияяс, петкӧдлӧны шоу-программаяс, вӧзйӧны пырӧдчыны прикладнӧй да интерактивнӧй мастер-классъясӧ. Ыджыд гажъяс дырйи, шуам, «ШаньгаФест» войтыркостса сёян-юан фестиваль, сынӧдті лэбалӧмлы сиӧм «Ловъя сынӧд» ставроссияса фестиваль да мукӧд гаж дырйи, этнопаркӧ луннас волӧ некымын сюрс морт.
Этнопаркын 2017 воын воссис Туристъяслы юӧр сетан Коми Республикаса шӧрин. Сыктывкарын, Карл Маркс улича вылын 229 №-а керкаын эм сылӧн фронт-офисыс (Печать керка, пыраніныс веськыдвылас). Тані тӧдмӧдӧны Коми Республикаті путешествуйтан местаясӧн, тӧдчана лоӧмторъясӧн, аслыспӧлӧс вӧр-ва объектъясӧн да сиктъясын гӧститан керкаясӧн. Тані жӧ позьӧ ньӧбны туръяс да экскурсионнӧй маршрутъяс.
2017 восянь этнопарк выльмӧдіс Туристъяслы юӧр сетан Коми Республикаса портал. Портал юӧртӧ туристъяслы, кыдзи да кӧні позьӧ бура шойччыны Коми муын да этнопаркын, тӧдмӧдӧ нималанаторъясӧн, турмаршрутъясӧн, юӧртӧ, кыдзи позьӧ воӧдчыны сійӧ либӧ мӧд местаӧдз. Тайӧ жӧ восянь этнопарк лоис пытшкӧсса да войтыркостса туризмын операторӧн (РТО 019790), кутіс дасьтыны да нуӧдны культураӧн, лоӧмторъясӧн, сёян-юанӧн тӧдмӧдан, этническӧй, экологическӧй, паломническӧй, делӧвӧй, челядьлы, томуловлы да том йӧзлы сиӧм туръяс да экскурсияяс, а сідзжӧ шойччан лунся туризм. Кыдзи туроператор, этнопарк пырӧдчӧ федеральнӧй дінмукостса историко-культурнӧй да туризмлы сиӧм «Россиялӧн эзысь сикӧтш» проектӧ.
2018 воын ТурСтат аналитическӧй агентстволӧн юӧр серти Финн-угор этнопарк пырис Россияса 10 медбур этнопарк, этнография комплекс да музей лыдӧ, кодъяс меститчӧмаӧсь восьса енэж улын, да лоӧма на лыдын коймӧдӧн.
Ыстӧдъяс
- ↑ ОТДЫХ НА СЕМИ ХОЛМАХ... О ФИННО-УГОРСКОМ ЭТНОПАРКЕ
- ↑ 1 2 Финно-угорский этнокультурный парк (рус.). www.ethnopark-rk.ru. Шыӧдчан кадпас: 3 косму тӧлысь 2018. Архивируйтӧма 4 косму тӧлысь 2018.
- ↑ В Коми открыли Музей искусства нефти «Чутское масло» (рус.). novostienergetiki.ru. Шыӧдчан кадпас: 24 йирым тӧлысь 2018. Архивируйтӧма 24 йирым тӧлысь 2018.
- ↑ Этнопарк. Миян йылысь.