Цифрӧвӧй шайтъясӧн пособие да пенсия мынтӧм

Босьтӧма Рувикиысь
Цифрӧвӧй шайтъясӧн пособие да пенсия мынтӧм
Цифровой рубль.jpg
Заводитчан кад 2025-2026
Ин Россия
Помка Вуджӧдӧм дырйи рӧскод чинтӧм

Цифрӧвӧй шайтӧн пособие да пенсия мынтӧм (рочӧн Выплата пособий и пенсий в цифровых рублях) — Россияын цифрӧвӧй шайт вочасӧн пыртӧм серти канмуӧн социальнӧй мынтӧмъяс цифрӧвӧй форматӧ вуджӧдӧм. Цифрӧвӧй шайт — сьӧмлӧн коймӧд форма, сійӧ ӧтувтӧ ас пытшкас наличнӧй да безналичнӧй мынтысянногсӧ[1].

2025 вося йирым тӧлысь 1 лунсянь федеральнӧй сьӧмкудйысь кутасны мынтыны ӧткымын сьӧм цифрӧвӧй шайтӧн. Тайӧ кутас инмыны и торъя социальнӧй пособиеяслы. 2025 вося сора тӧлысь пом кежлӧ мынтысьӧмъяслысь стӧч лыддьӧгсӧ правительство эз йӧзӧд. 2026 восянь канму вермас вӧдитчыны выль форматын быд сикас мынтӧм вылӧ, тшӧтш и пенсияяс да бюджетникъяслы удждон мынтігӧн[2].

Контекст

Цифрӧвӧй шайтлысь пилотнӧй проектсӧ Россияса Банк  (рус.) (коми заводитіс 2023 вося моз тӧлысьын. Тайӧ кадсяньыс торъя йӧз, банкъяс да компанияяс видлӧны вӧчны сьӧм операцияяс цифрӧвӧй шайтъясӧн[3].

2025 вося косму тӧлысь помын Россияса сьӧм овмӧс министр Антон Силуанов висьталіс, мый 2026 воын цифрӧвӧй шайтъясӧн мынтысьӧм лоас паськыда пыртӧма[4]. Сэк кежлӧ колӧ заводитны уджӧдны да видлавны колана финансӧвӧй инфраструктура.

Цифрӧвӧй шайтӧн кутасны вӧдитчыны виртуальнӧй пространствоын: Россияса банк кутас лэдзны цифрӧвӧй шайтсӧ цифрӧвӧй кодӧн, а выль валюталӧн тшӧтъясыс лоӧны Шӧр Банклӧн платформа вылын[1].

Сьӧмлӧн выль формаыс кутас видзсьыны торъя йӧзлӧн да юридическӧй кывкутысьяслӧн цифрӧвӧй кӧшельясын. Кӧшельыс оз ло йитчӧма торъя банккӧд, но вӧдитчыны цифрӧвӧй шайтнас позяс традиционнӧя: банкса приложениеяс отсӧгӧн. Сьӧмтӧ позяс босьтны любӧй банк пыр, кӧні могмӧдӧны клиентӧс. Чайтсьӧ, мый водзӧ вылӧ лоӧ позянлун вӧдитчыны цифрӧвӧй шайтӧн ӧтуввезйӧ пыртӧг[5].

Цифрӧвӧй шайтӧн позяс мынтысьны да вуджӧдны сьӧм, сійӧс сідзжӧ позяс вуджӧдны безналичнӧйӧ, а сэсся и босьтны, ковмас кӧ, сьӧмӧн. Торъя йӧзлы цифрӧвӧй шайтӧн вӧчӧм сделкаясысь оз кутны босьтны банкса комиссияяс. На вылӧ оз кутны инмыны кредитнӧй организацияяслӧн лимитъяс. Юридическӧй кывкутысьяслы урчитӧма ичӧт комиссияяс[6].

Власьтъяс тӧдчӧдӧны выль сикас валюталысь трансграничнӧй переводъяс да транзакцияяс бӧрся видзӧдӧм вылӧ бурторъяссӧ[1].

Цифрӧвӧй шайт пыртан график

2025 вося сора тӧлысь 15-ӧд лунӧ Госдума вынсьӧдіс цифрӧвӧй шайт вочасӧн паськыда пыртӧм йылысь оланпас[7], сійӧс президент кырымаліс 2025 вося сора тӧлысь 23-ӧд лунӧ. Выль оланпас серти, цифрӧвӧй шайтсӧ унаӧн пыртӧны 2026 вося кӧч тӧлысь 1 лунсянь. Тайӧ медводз инмас 120 миллион шайтысь унджык выручкаа медгырысь банкъяслы да вузасян сетьяслы, 2028 во кежлӧ став вузасьысьсӧ да банкъяссӧ йитӧмӧн.

2025 вося йирым тӧлысь 1 лунсянь цифрӧвӧй шайтӧн кутасны вӧдитчыны федеральнӧй рӧскод юкӧнын да торъя социальнӧй пособиеясын. Кутшӧмъясӧс — 2025 вося сора тӧлысь помын эз на вӧв тӧдса.

2026 вося тӧвшӧр тӧлысь 1 лунсянь цифрӧвӧй шайтӧн позяс вӧдитчыны федеральнӧй сьӧмкудйысь кӧть кутшӧм мынтӧм вылӧ нин. Тайӧ инмӧ пенсияяс, пособиеяс, стипендияяс да бюджетникъяслы удждон мынтӧмлы.

2027 воын цифрӧвӧй шайт лоӧ регионса мынтӧмъясын, а сідзжӧ бюджетӧ пырттӧм фондъяслӧн системаясын[2].

Ас кӧсйӧм серти принцип

Шӧр Банкын тӧдчӧдӧны, мый цифрӧвӧй шайт пыртӧм дырйи сёрниыс абу мыйкӧ мырдӧн вӧчӧм йылысь:

Граждана, кыдзи и ӧні, вермасны асьныс бӧрйыны, кутшӧм формаа шайтӧн вӧдитчыны — наличнӧйӧн, безналичнӧйӧн либӧ цифрӧвӧйӧн. Бӧрйыны кутас быд морт ачыс[8].

Россияса олысь кӧ оз кӧсйы вӧдитчыны цифрӧвӧй шайтъясӧн, сійӧ вермас прӧстӧ абу восьтыны цифрӧвӧй кӧшельсӧ[1]. Тайӧ инмӧ пособиеяс да пенсияяс босьтысьяслы: найӧ асьныс урчитӧны, кутшӧм ногӧн босьтны мынтӧмсӧ (безналичнӧй рӧштшӧт, наличнӧй сьӧм либӧ цифрӧвӧй шайт)[2].

Пособие мынтӧм

2025 вося урасьӧм тӧлысьын «Интерфакс» агентство юӧртіс, мый Россияса Банк Федеральнӧй казначействокӧд ӧтув кӧсйӧны заводитны социальнӧй пособиеяс да капитальнӧя стрӧитчӧм вылӧ рӧскод мынтӧм могысь цифрӧвӧй шайтӧн эксперимент. Агентстволӧн юӧр серти, тайӧс лоӧ вӧчӧма 2025 вося моз тӧлысь 25-ӧд лунсянь. «Интерфакс» ыстысьӧ бюджетнӧй процессын цифрӧвӧй шайтӧн вӧдитчӧм кузя «туй карта» вылӧ. Экспериментсӧ колӧ нуӧдны кӧч тӧлысь помӧдз. Сэк жӧ документын оз висьтавсьы, кутшӧм сикас мынтӧмъяс кутасны видлавны[9].

Примитӧм оланпас серти, 2025 вося йирым тӧлыссянь кутасны мынтыны сьӧма отсӧглысь юкӧнсӧ цифрӧвӧй форматын[2]. Та дырйи, кыдзи бара тӧдчӧдісны Шӧр Банкын, автоматическӧя восьтыны цифрӧвӧй кӧшель некодлы оз кутны[8].

Кыдзи пасйӧны экспертъяс, цифрӧвӧй шайтӧн мынтысьӧмыс власьтлы кивыв, сы вӧсна мый сетӧ позянлун канмулы видзӧдны сьӧм видзӧм бӧрся. Финансӧвӧй тӧдӧмлун сӧвмӧдан ассоциацияса генеральнӧй директор Вениамин Каганов та кузя гӧгӧрвоӧдіс:

…Бюджетлы важнӧ, медым казённӧй сьӧмсӧ видзисны стрӧга мог серти. Шуам, челядьлы пособие вылӧ верстьӧ йӧз эз ньӧбны аслыныс алкоголь да сигарет. Цифрӧвӧй шайтӧн тайӧ лоӧ збыльторйӧн)[6].

Пенсия мынтӧм

Рунетын  (рус.) (коми петавлісны юӧръяс власьтъяслӧн став пенсиясӧ цифраӧ вуджӧдны кӧсйӧм йылысь. Кыдзи юӧртсьӧ Россияса Банклӧн сайт вылын, татшӧм планъясыс абуӧсь[10].

2025 вося урасьӧм тӧлысьын Госдумаысь эмбур да му кузя комитетӧн веськӧдлысь Сергей Гаврилов шуис, мый социальнӧй везъясын юӧръясыс сы йылысь, мый «россияын олысьяс ӧні кутасны босьтны пенсиясӧ цифрӧвӧй шайтӧн, а ӧткажитчӧм могысь колӧ ыстыны шыӧдчӧм регуляторлы либӧ пенсионерӧс могмӧдысь банклы», абу збыльӧсь. Депутат пасйис, мый канму оз вермы лӧсьӧдны пенсияяс босьтан дзик ӧти ног, весиг сэк, кор сёрниыс мунӧ традиционнӧй банкса переводъяс йылысь, непӧштӧ цифрӧвӧй сьӧм йылысь, мый лоӧ выль инструментӧн[11].

А пенсионер кӧ ачыс кӧсйӧ босьтны пенсиясӧ цифрӧвӧй шайтӧн (2026 восянь), та могысь (кыдзи и цифрӧвӧй шайтӧн пособие босьтӧм могысь) ковмас восьтыны цифрӧвӧй кӧшель. Та бӧрын гижны Россияса социальнӧй фондӧ  (рус.) (коми шыӧдчӧм, медым юӧртны, мый кӧсъян босьтны мынтӧмъяс цифрӧвӧй кӧшель вылӧ да индыны сылысь номерсӧ. Кытчӧдз Россияса социальнӧй фонд оз босьт пенсионерсянь татшӧм шыӧдчӧмсӧ, мынтыны пенсиясӧ цифрӧвӧй шайтӧн оз кутны. Бӧрынджык сідзжӧ позьӧ ӧткажитчыны и цифрӧвӧй шайта пенсияысь, бӧр бергӧдчыны канмусянь мынтӧмъяс босьтан традиционнӧй ногъясӧ[12].

Пасйӧдъяс

  1. ↑ 1 2 3 4 Будут ли платить пенсии в цифровых рублях?, vtbnpf.ru. Шыӧдчан кадпас: 25 моз тӧлысь 2025.
  2. ↑ 1 2 3 4 С 1 октября 2025 года пособия и пенсии будут выплачивать в цифровых рублях. Что это значит для получателей, Банки.ру. Шыӧдчан кадпас: 25 моз тӧлысь 2025.
  3. ↑ Цифровой рубль | Банк России. cbr.ru. Шыӧдчан кадпас: 25 моз тӧлысь 2025.
  4. ↑ Силуанов ждет масштабного внедрения цифрового рубля в 2026 году, Interfax.ru (28 косму тӧлысь 2025). Шыӧдчан кадпас: 25 моз тӧлысь 2025.
  5. ↑ Цифровой рубль | Банк России. cbr.ru. Шыӧдчан кадпас: 25 моз тӧлысь 2025.
  6. ↑ 1 2 Социальные выплаты в цифровых рублях. Насколько это реально? Мнения экспертов - Российская газета, Российская газета (10 урасьӧм тӧлысь 2025). Шыӧдчан кадпас: 25 моз тӧлысь 2025.
  7. ↑ Госдума определила сроки массового внедрения цифрового рубля, РИА Новости (20250715T1513). Шыӧдчан кадпас: 25 моз тӧлысь 2025.
  8. ↑ 1 2 Что такое цифровой рубль, зачем он и как работает, нужно ли заявление на отказ от цифрового рубля. | Банк России. www.cbr.ru. Шыӧдчан кадпас: 25 моз тӧлысь 2025.
  9. ↑ ЦБ и Казначейство РФ намерены осенью протестировать выплату пособий в цифровых рублях, Interfax.ru (5 урасьӧм тӧлысь 2025). Шыӧдчан кадпас: 30 сора тӧлысь 2025.
  10. ↑ Миф 4. Все зарплаты бюджетников и выплаты для пенсионеров переведут на цифровые рубли, как когда-то заставили всех перейти на «Мир». | Банк России. www.cbr.ru. Шыӧдчан кадпас: 25 моз тӧлысь 2025.
  11. ↑ В Госдуме назвали фейком сообщения о переводе пенсий в цифровые рубли, TACC. Шыӧдчан кадпас: 25 моз тӧлысь 2025.
  12. ↑ sberbank.ru (рус.). www.sberbank.com. Шыӧдчан кадпас: 25 моз тӧлысь 2025.
Босьтӧма "https://kv.ruwiki.ru/w/index.php?title=Цифрӧвӧй_шайтъясӧн_пособие_да_пенсия_мынтӧм&oldid=482350"-ысь