Чушканзі (журнал)
«Чушканзі» — Коми Республикаса шмонь да серам радейтысьяслӧн коми кывъя журнал.
История
Шмонь да серам радейтысьяслöн «Чушканзi» журнал — Коми Республикаса йöзöданторъяслöн медся арлыдаяс пиысь öти.
Медводдзаысь Коми муын сатира петас вӧлі йӧзӧдӧма 1923 вося рака тӧлысь 4-ӧд лунӧ, кор Усть-Сысольскын роч кывйӧн петіс «Оса» сатира лист бок, кыдз «Jугыd туj» газет дорӧ содтӧд[1].
Журналлӧн медводдза номерыс петіс 1957 вося моз тӧлысьын "Коми колхозник" (сёрӧнджык «Югыд туй», ӧні Коми му) газет дорӧ содтӧдӧн. 1978 восянь журнал кутіc петны торъя изданиеӧн[2]. 2004 воын «Чушканзі» пырис Коми му" газет редакция" Коми республикаса автономнӧй учреждение борд улӧ.
Журналлöн уджын шöр нырвизьясöн вöлiны да кольöны: демократия — морт право гарант — сöвмöдöм; национальнöй политика — коми кыв, литература, история да культура — видзöм; Коми Республикаса оланпас пыртан да олöмö пöртысь власьтлысь удж юöртöм-донъялöм; социальнöй юалöмъяс — сикт-карлысь, семьялысь, том да олöма войтырлысь мытшöдъяс — видлалöм; морт олöмын, сылöн вежöрын лёк петкöдчöмъяскöд тышкасьöм. «Чушканзiлöн» тöдчанаторйöн лоö сiйö, мый редакцияын зiльысьяс кутöны топыд йитöдъяс асланыс лыддьысьысьяскöд, öд буретш налöн шыöдчöмъяс отсöгöн чужöны журналлы ёсь кывъя гижöдъяс.
«Чушканзiлы» подув пуктысьяснас вöлiны енбиа коми сатирикъяс Александр Михайлович Матвеев, Иван Андреевич Симпелев, Семён Николаевич Кынев, нималана журналистъяс Александр Васильевич Сажин, Александр Степанович Петрунёв, Виталий Иванович Осипов, республикаса медводдза карикатурист Степан Александрович Холопов.
Уна во чöж журналлöн лист бокъясын йöзöдчисны республикаын да бокын нималысь коми гижысьяс, поэтъяс, драматургъяс: Серафим Попов, Геннадий Юшков, Владимир Тимин, Егор Рочев, Николай Щукин, Александра Мишарина, Юрий Васютов, Алексей Попов, Евгений Козлов да мукöд.
«Чушканзiлöн» петасъясын торъя ин вичмöдöма карикатураяслы. Журнал сöвмöмö ыджыд пай пуктiсны серпасасьысьяс: Валентин Поляков, Рем Ермолин, Станислав Торлопов, Михаил Безносов, Леонид Потапов, Рудольф Пластинин. Медводдза номеръяссянь öнöдз на «Чушканзiкöд» ёртасьöны карикатураяслöн ставмирса конкурсын вермысь Владимир Пунегов, Россияса конкурсъясын вермысьяс Аркадий Мошев, Аркадий Размыслов, Леон Рохин, карикатура жанрын водзмöстчысьяс Владимир Осипов, Олег Павлюк, Рудольф Анпилогов, Владимир Моторин, Валентин Клейман, Виктор Токарев, Вадим Кудаков. Лыддьысьысьяслы сьöлöм вылö воöны тшöтш и том карикатуристъяс Павел Климовицкийлöн, Владимир Кармановлöн, Инна Авиловалöн, Маргарита Беллонлöн, Наталья Коносовалöн, Евгений Дружининлöн уджъяс.
Уна во чöж «Чушканзiлöн» редакция зiльö республикаса дзик öти серамбана журнал нимöдöмын: котыртö лыддьысьысьяскöд аддзысьлöмъяс, нуöдö велöдчысьяслы да студентъяслы мастер-классъяс, пöртö олöмö теле- да радиокомпанияяскöд, шылада-драмаа национальнöй театркöд öтувъя проектъяс. Талун «Чушканзi» журналтö тöдöны оз сöмын Комиын, но и мукöд регионъясын олысьяс. Став Россияса, регионъясса йöзöданторъяскöд топыд йитöдъяс кутöм отсöгöн «Чушканзi» редакцияö воöны Ярославльысь, Волгоградысь, Москваысь, Казаньысь, Сочиысь, Йошкар-Олаысь, Санкт-Петербургысь, Ижевскысь да мукöд каръясысь гижöдъяс.
2005 воын редакцияын уджалысьяс СГУ-са искусствояс факультетысь студентъяскöд öтвыв дасьтiсны журналлысь выль дизайн. Сiйö кадсяньыс жö «Чушканзi» мöдiс петны бур кабала вылын. Дерт, тайö содтiс петаслы мичлун, журнал лоис синмö шыбитчанаджыкöн. «Чушканзiлысь» öнiя дизайн да полиграфия вылi донъялiсны журналистъяслы тöдöмлунъяс содтöм кузя Москваса институтысь велöдысьяс.
«Чушканзiлысь» уна вося да тöдчана удж донъялöмöн лоö и сiйö, мый 2003-2010 воясö став Россияса фестивальяс дырйи журнал витысь помся вöлi «Финн-йöгра шмонь» номинацияын вермысьöн. 2007-2009 воясö «Пресса» ставмирса выставкаяс дырйи «Чушканзi» куимысь наградитлiсны «Прессалöн зарни фонд» пасöн. 2008 воын журнал лои республикаса «Признание» творческöй конкурсын «Йöзöданлöн дизайн» номинацияысь вермысьöн. Но медся ыджыд наградаöн «Чушканзiлы» вöлi и кольö лыддьысьысьяслöн муслун да пыдди пуктöм.
Адрес
167000, Сыктывкар, Карл Маркс ул., 229 керка, 428 жыр.
Ӧтуввез-листбок
Коми йӧзӧдчан керка холдинглӧн эм асшӧр ӧтуввез сайт:http://komikerka.ru/[3] , а «Чушканзi» журналлӧн торъя лист бок: http://komikerka.ru/smi/chushkanzi[4].
«Чушканзi» журналлӧн Контактын эм торъя группа: https://vk.com/chushkanzi[5].