Иовлева Мария Вячеславовна

Иовлева Мария Вячеславовна
Чужан лун	1990-ӧд вося урасьӧм тӧлысь 18-ӧд лун(1990-02-18) (36 арӧс)
Чужанін	Вуктыл
Страна	Сӧветскӧй Социалистическӧй Республикаяслӧн Союз  Россия
Мыйся уджыс	биатлонист
Ошканпасъяс да премияяс

Иовлева Мария Вячеславовна (1990-ӧд вося урасьӧм тӧлысь 18-ӧд лун, Вуктыл) – Ванкуверын 2010-ӧд вося X тӧвся Паралимпиада ворсӧмъясын лызьöн котралöмын кыкысь медводдза места да öтчыдысь мöд места босьтысь, Россияын лызьöн котралöмысь витысь медводдза места босьтысь, Россияын спортса заслуженнöй мастер (2010).

Олантуй

Чужис 1990 вося урасьӧм тӧлысь 18-ӧд лунӧ Вуктыл карын. Ичöтдырсяньыс инвалид. Мамыс эновтiс кагасö чужтöм бöрас.
• 2002-öд вося кöч тöлысьсянь котралö лызьöн Россияса заслуженнöй тренер Александр Поршнев веськöдлöм улын, ветлöдлö «Олимпиада резервлӧн республикаса специализированнӧй челядьлы да томуловлы спорт школаӧ».
• 2006-öд восянь пырö Россияса паралимпиадаса öтувтöм котырö. Петкöдчö кöляскаа инвалидъяс пöвстын лызьöн котралöмысь да биатлонысь ордйысьöмъясын. Аслас категорияа йöз пöвстын (LW 12 висьöм) сiйö лыддьысьö медвына котралысьöн.
• Гора ас йывсьыс Мария Иовлева юöртiс 2004-öд вося рака тöлысьö инвалидъяс костын лызьöн котралöмын Россияса чемпионат дырйи, кодi мунiс Перым карын. Сэки сiйö босьтiс нёль медводдза места.
• Мукöд воас некымынысь вермылiс инвалидъяс пöвстын Россияса чемпионатъясын. 2008-öд воын Сыктывкарын инвалидъяслöн I тöвся Россияса Спартакиада вылын босьтiс кык медводдза места.
• 2006-öд воын Германияын мирса Кубок дырйи котралöмын вöлi 6-ӧд мортöн.
• 2007-öд воын Солефтеа карын (Швеция) да Воукатти карын (Финляндия) мирса Кубок дырйи босьтiс эзысь да кык ыргöн медаль.

Ӧні Мария Иовлева уджалӧ «Адаптивнӧй спорт сикасъяс серти сборнӧй командаясӧс спортивнӧя дасьтан да адаптивнӧй физкультура сӧвмӧдан шӧрин» Коми Республикаса канму сьӧмкуд учреждениеын спортсмен-инструкторӧн да водзӧ пырӧдчӧ ки-кок висьӧмъяса йӧзлӧн спорт кузя Россияса чемпионатъясӧ да Мирса кубоклӧн этапъясӧ (лызьӧн ордйысьӧмъяс, биатлон).

Вермöмъяс

2010-öд вося X тöвся Паралимпиада ворсöмъяс дырйи награда сетiгöн. Биатлон. Олена Юрковская (Украина, зарни), Мария Иовлева (Россия, эзысь), Людмила Павленко (Украина, ыргöн).

• Ванкуверын 2010-ӧд вося X тöвся Паралимпиада ворсöмъяс дырйи 3х2,5 км вылö эстафестаын зарни: кад – 20.23,2 (Мария Иовлева, Михалина Лысова, Любовь Васильева).
• Ванкуверын 2010-ӧд вося тöвся X Паралимпиада ворсöмъяс дырйи 2,4 км вылö котöртiгöн биатлонын – эзысь. Норматив тыртöмысь сетöма «Россияын спортса заслуженнöй мастер» почётнöй спортивнöй звание.
• Сочиын Россияса чемпионат дырйи 10 км вылö пукалысь спортсменъяс пиын биатлонын – зарни (2012, рака тöлысь 6 лун). Ордйысьöмъясыс мунiсны 2014-ӧд вося тöвся XI Паралимпиада ворсöмъяслöн тест-трассаяс вылын. Вермасисны спортсмен-инвалидъяс, кодъяслöн торкöма ветлöдлöмыс да синмыс.
• Сочиын Россияса чемпионат дырйи гонка-биатлонын – зарни (2012 вося рака тӧлысь 7-ӧд лун).
• Сочиын Россияса чемпионат дырйи 6 км вылö спринт котöртiгöн гонка-биатлонын – зарни (2012 вося рака тӧлысь 9-ӧд лун).
• Сочиын Россияса чемпионат дырйи лызьöн спринт котöртiгöн – зарни (2012 вося рака тӧлысь 10-ӧд лун).
• Сочиын Россияса чемпионат дырйи 5 км вылö лызьöн спринт котöртiгöн – зарни (2012 вося рака тӧлысь 11-ӧд лун).
• 2013 воын Соллефтеа карын (Швеция) лои инвалидъяс пӧвстын мирса чемпионкаӧн лызьӧн ордйысьӧмын — спринтын, эстафетаын, а 10 км дистанция вылын биатлонӧн ордйысигӧн босьтіс мӧд места.
• Участвуйтіс 2014 вося тӧвся Паралимпийскӧй ворсӧмъясын Сочи карын да 2018 вося тӧвся Паралимпийскӧй ворсӧмъясын Пхёнчан карын, Лунвыв Корея.

Наградаяс

• Почёт орден (2010) — «Физическӧй культура да спорт сӧвмӧдӧмӧ ыджыд пай пуктӧмысь, Ванкуверын (Канада) 2010-ӧд вося X тöвся Паралимпиада ворсöмъясын ыджыд спортивнӧй вермӧмъясысь»;
• Коми Республикаса физическöй культура, спорт да туризм агентстволöн Почёт грамота (2007) – «Спортын ыджыд вермӧмъясысь да физическӧй культура да спорт пропагадируйтӧмысь»;
• Россия Федерацияса президентлӧн аттьӧалӧм (2024).

Пасйӧдъяс

Ыстöдъяс

• Указ Президента Российской Федерации от 26 марта 2010 года № 373
• Профиль на сайте Паралимпийских игр 2010 года в Ванкувере
• Мария Иовлева: как сейчас живёт паралимпийская чемпионка из Коми