Макарова Галина Валерьяновна
| Макарова Галина Валерьяновна | |
|---|---|
| Чужан лун | 1981 вося моз тӧлысь 15-ӧд лун |
| Чужанін | Коми Республика, Кӧрткерӧс районса Керӧс сикт |
| Страна | |
| Мыйся уджыс | «Коми йӧзӧдчан керка» КР АК-са директор, общественнӧй удж вӧчысь |
Галина Валерьяновна Макарова (Коми Республика, Кӧрткерӧс районса Керӧс сикт 1981 вося моз тӧлысь 15-ӧд лун) - «Коми йӧзӧдчан керка» КР АК-са директор[1].
Олан туй
Галина Валерьяновна Макарова чужис Коми Республика, Кӧрткерӧс районса Керӧс сиктын 1981 вося моз тӧлысь 15-ӧд лунӧ.
1998-2003 — велӧдчис Сыктывкарса канму университетын.
2003 воӧ Сыктывкарса канму университетын финн-йӧгра факультет помалӧм бӧрын сійӧс босьтісны корреспондентӧн том йӧзлӧн «Йӧлӧга» газетӧ.
2005 восянь вуджис велӧдан юкӧнса редакторӧ, кутіс йитӧд республикаса став велӧдчанінкӧд, сы отсӧгӧн абитуриентъяслы да студентъяслы газет лист бокъясысь сюрис ыджыд юӧр.
2007-2019 воясӧ — «Йӧлӧга» газетса шӧр редактор.
2019 воын индӧмаӧсь «Коми йӧзӧдчан керка» директорӧс вежысьӧн. Г. В. Макарова нуӧдіс холдинглӧн вит изданиеса шӧр редакторъясӧн ӧтувъя веськӧдлӧм. Ӧтув уджаліс Россияса Почтакӧд, регионса да ставроссияса тшупӧда типографияяскӧд. Петкӧдліс организациясӧ уна сикас мероприятие вылын: «Мича Райда», «Койташ» республикаса фестивальясын, аддзысьлӧмъясын да семинаръясын («Вермӧмлӧн формула» республикаса семинар), участвуйтіс респондентӧн «Коми гор» ВГТРК-лӧн да «Юрган» телеканаллӧн передачаясын[2]. Нуӧдіс детсадъясын челядьлы, школаын велӧдчысьяслы да студентъяслы журналистика кузя мастер-классъяс. Вӧлі коми кыв велӧдысьяслы семинаръяс вылын спикерӧн.
2020 восянь ӧттшӧтш уджаліс «Коми му» общественно-политическӧй газетса директорӧс вежысьӧн да шӧр редакторӧн. Редакцияӧн веськӧдлӧм бӧрын пӧшти пыр жӧ пыртӧма изданиеӧ дизайн вежсьӧмъяс, стӧчмӧдӧма юӧр сетӧмсӧ.
2022 вося косму тӧлысьын индӧма «Коми йӧзӧдчан керка» КР АК-са директорӧн.
Холдинглӧн изданиеяс сылӧн веськӧдлӧм улын пырӧдчӧны уна сикас конкурсӧ. 2022 да 2023 воясын «Коми йӧзӧдчан керка» КР АК-лӧн «Би кинь» да «Йӧлӧга» кык журнал ӧтпырйӧ лоӧны вермысьясӧн «Волшебнӧй кыв» челядьлӧн СМИ-яслӧн ставрочмувывса конкурсын. 2023 воын «Йӧлӧга» газетса том журналистъяс вермисны «Ас йӧз» самодеятельнӧй авторъяс пӧвстын восьса карса конкурсын. Холдингса журналистъяс быд во пырӧдчӧны «Ми – ӧтлаын» войтыркостса йитӧдъяс ладмӧдан юалӧмъяс медбура восьтӧм вылӧ республикаса конкурсын да лоӧны вермысьясӧн уна сикас номинацияын.
Г. В. Макарова — СМИ да небӧг лэдзан юкӧнын йӧзлы тӧдчана грант проектъяслӧн модератор: курируйтіс да нуӧдіс организационнӧй удж холдинглӧн изданиеясса главнӧй редакторъяскӧд, участвуйтіс проектъяс збыльмӧдӧмын кыдзи ас статьяяслӧн автор. Медым ёнмӧдны войтыркостса йитӧдъяс, финн-йӧгра костын ёртасьӧм да сӧвмӧдны национальнӧй СМИ, Г. В. Макарова выльысь заводитіс аддзысьлыны Россияса национальнӧй изданиеясса журналистъяскӧд опытӧн юксьӧм могысь. Сідз, сылӧн водзмӧстчӧмӧн вӧлі котыртӧма Удмуртияӧ ветлӧм, медым участвуйтны «Национальнӧй печатьлӧн издательскӧй керка» асшӧрлуна Удмурт Республикаса учреждениеысь уджъёртъяскӧд медиа-программаын. Кыпыд приём дырйи Удмурт Республикалӧн Каналан Сӧветса Веськӧдлысь вылӧ донъяліс «Коми йӧзӧдчан керка» КР АК-лысь уджсӧ, а сідзжӧ аттьӧаліс финн-йӧгра СМИ-са веськӧдлысьяскӧд татшӧмсяма аддзысьлӧмъяс выльысь панӧм кузя водзмӧстчӧмысь. «Коми йӧзӧдчан керка» КР АК зіля уджалӧ Сыктывкарса коми культура шӧринкӧд. Котыртлӧны ӧтувъя мероприятиеяс: Коми КВН, «Рака-стан», «Коми сиктлӧн лун», «Миян йӧз», «Мый? Кӧні? Кор?», «Сюзь пиян» да уна мукӧд.
Г. В. Макарова юрнуӧдӧм улын нуӧдӧны мероприятиеяс Коми Республикаса каръясса да районъясса велӧдан да культура учреждениеясын, медым паськыда тӧдмӧдны национальнӧй изданиеясӧн, вузасьны «Ордым» магазинлӧн небӧгӧн да сувенирнӧй прӧдукцияӧн. Холдингса печатнӧй СМИ редакцияясын коми петасъяс паськӧдӧм да журналистика юкӧнын профориентационнӧй удж могысь нуӧдӧма карса да районса велӧдчанінъясын велӧдчысьяслы, медиа-школаясӧ пырӧдчысьяслы дасысь унджык экскурсия.
2023 воын Г. В. Макаровалӧн водзмӧстчӧм серти котыртлісны «Коми йӧзӧдчан керка» КР АК-са медшӧр редакторъяслысь Коми Республикаса Юралыськод аддзысьлӧм, кӧні видлалісны коми кывъя газет-журналъяс сӧвмӧдӧм да налы отсӧг сетӧм.
2023 воын Г. В. Макарова котыртӧма да нуӧдӧма Кулӧмдін районса Керчомъя сиктӧ республиканскӧй да районса ЙЮС-ӧн веськӧдлысьяслы вылыс тшупӧдын пресс-туръяс. «Коми йӧзӧдчан керка» КР АК лоис «Кывйӧн сёрнитысьяс ордын гӧститӧм» Ставроссияса медиаобразовательнӧй блог-тур котыртан проектын партнёрӧн.
Общественнӧй удж
- Кӧрткерӧсса землячествоӧн веськӧдлысьӧс вежысь;
- «Коми войтыр» ӧтйӧза ӧтмунӧмлӧн делегат.
Наградаяс
- Коми Республикаса Юралысьлӧн аттьӧалӧм (2019);
- Коми Республикаса национальнӧй политика министерстволӧн Почёт грамота (2023);
- Коми Республикаса цифра отсӧгӧн сӧвмӧдан, связь да юӧр сетан министерстволӧн Почёт грамота.