Йӧлӧга (газет)
«Йöлöга» — Коми Республикаса томуловлы коми кыв вылын газет (2020-ӧд воӧдз).
Медшӧр юӧр
«Йöлöга» газет петіс 1991-ӧд восянь вежоннас öтчыд 2020-ӧд воӧдз.
Ыдждаыс – А4 формат, 16 лист бок. Уна рöма.
Тиражыс — 1260 экз. 2020, 700 гöгöр экз. (2011), 314 (2020).
Газетлöн история
1980-ӧд вояс помын «Ордым» литературнӧй клуб вӧзйис лӧсьӧдны коми челядьлы газет. Газетлӧн медводдза номерыс петіс 1991 вося йирым тӧлысь 15-öд лунö. А сыöдз «Югыд туй» газетын йöзöдлісны коми томуловлы «Йöлöга» лист бок[1].
«Йöлöга» газет – творческöй томуловöс, енбиа гижысьяс да журналистъясöс сöвмöдöм йылысь; финн-йöгра кывъяс, культура да традицияяс видзöм-сöвмöдöм, финн-йöгра том войтырöс нимöдöм да öта-мöдкöд ёртасьöм йылысь.
Воысь-во газет зiльö восьлавны визув олöмыскöд öтув – вежлалö газетлысь дизайн, восьтö выль рубрикаяс, юöртö выль конкурсъяс.
«Йöлöга» газет – дзик öти коми кывъя петас республикаса том йöзлы. Редакцияын уджалö нёль том да водзмöстчысь журналист. Сiдзкö, буретш сiйö водзмöстчысь томуловыс, кодi вермас гораа висьтавны ас йывсьыс, кодi радейтö ассьыс чужан кывсö, пыдди пуктö аслас войтырыслысь культурасö да традициясö.
Газетын уджалысьяс вöчöны ставсö, медым ышöдны том лыддьысьысьясöс. Журналистъяс тöдöны, мыйöн олö талунъя томулов, кутшöм майшасьöмъяс налöн бергалöны юраныс, мый медъёна найöс ышöдö.
Но пыр жö медшöр могыс «Йöлöгалöн» – тайö творческöй томуловöс, енбиа гижысьяс да журналистъясöс сöвмöдöм. Öд буретш на пыр и водзö сöвмö чужан кыв да культура.
«Йöлöга» газет – тайö абу сöмын юöр сетан газет, сiйö аслыспöлöс йитöд коми томулов да финн-йöгра войтыр костын. Газет кутö топыд йитöдъяс Россияса финн-йöгра культура шöринкӧд да Коми Республикаса финн-йöгра культура шöринкӧд, Сыктывкарса коми культура шöринкöд. Коми том войтырлöн «МИ» котыркöд öтув дасьтö да пöртö олöмö выль проектъяс, кодъяс йитчöмаöсь карса да сиктса том йöзкöд.
Нöшта ыджыд могöн газет дасьтысьяслöн лоö финн-йöгра кывъяс, культура да традицияяс видзöм-сöвмöдöм, финн-йöгра том войтырöс нимöдöм да öта-мöдкöд ёртасьöм.
Позьö стöча шуны, мый медся радейтана рубрикаясöн лоöны:
- «Пöчö кудйысь», кöнi лыддьысьысь вермас тöдмасьны коми войтырлöн культураöн, традицияясöн, обычайясöн да приметаясöн; танi эм тшöтш и фольклор, и важся гажъяс, и эскöмъяс йылысь уна колана материал;
- «Чужан му» рубрика – тöдмöдö Коми Республикаса кар-районъясöн да сикт-грездъясöн;
- «Коми паськöм» рубрикаысь лыддьысьысь тöдмалö республикаса районъяслöн коми национальнöй паськöмлöн аслыспöлöслун да торъялöм йылысь;
- «Кöсъя тöдны» рубрикаын колана йöз вочавидзасны юридическöй юалöмъяс вылö;
- «Йöлöгакöд» кö тэ олан – дзоньвидзаöн пыр и лоан» рубрикаын газетса журналистъяс асланыс примерöн ышöдöны томуловöс пырöдчыны спортö да овны дзоньвидза олöмöн.
Том йöзлöн политика, коми кыв да культура сöвмöдöм-видзöм, томуловлöн гражданскöй водзмöстчöм, велöдчöм, дзоньвидза олöмö ышöдöм, патриотическöя быдмöм – со медшöр нырвизьясыс, мыйöн олö талунъя «Йöлöга» газет.
2004 вося урасьöм тöлысьын Коми Республикаса правительстволöн индöд серти котыртчис «Коми му» газет редакция» Коми Республикаса государственнöй учреждение, кодi öтувтiс «Коми му» да «Йöлöга» газетъяс, «Би кинь» да «Чушканзi» журналъяс. Сiйö кадсяньыс тайö ыджыд котырнас директоралö коми гижысь Александр Ульянов. Налöн лои öтувъя бухгалтерия да компьютернöй цех.
«Йöлöга» газетын веськöдлiсны В.В. Иванова (1991—1997), Александр Павлович Юдин (1997—2002), Виктория Вячеславовна Пименова (2002-ӧд во, косму тӧлысь — 2007-ӧд во, йирым тӧлысь), Макарова Галина Валерьяновна (2007-ӧд во, йирым тӧлысь). 1991-ӧд восянь 2020-ӧд вося тӧвшӧр тӧлысьӧдз петӧма 314 номер (сы кадӧ тиражыс - 314 экз).
2020-ӧд вося урасьӧм тӧлысьсянь лоис «Йöлöга» журнал[2].
Редакциялöн адрес: Сыктывкар, Карл Маркс нима улича, 229 керка.
Мукӧд удж
Быд во «Йöлöга» газет нуöдіс аслас лыддьысьысьяс пöвстын творческöй конкурсъяс. А во помын нимöдіс вермысьясöс «Йöлöгакöд» Выль во» гаж вылын.
Коми Республикаса пöшти быд пельöсысь ныв-зон волісны тайö выльвося гаж вылас, öд буретш танi чолöмалöны быдöнöс коми Кöдзыд Пöль да Лымныв. Челядь ворсісны, сьылісны-йöктісны. И гöгöр кыліс сöмын чужан коми кыв. Редакцияын уджалысьяс асьныс тайö гаж вылас и артисталісны, и режиссёралісны.