Рассыхаев Алексей Николаевич
| Алексей Николаевич Рассыхаев | |
|---|---|
| Чужан лун | 1977 вося урасьӧм тӧлысь 8-ӧд лун |
| Чужанін | Коми Республика, Кулӧмдін |
| Страна | |
| Мыйся уджыс | туялысь, общественнӧй удж вӧчысь |
Рассыхаев Алексей Николаевич (Рассыхаев Микол Ӧльӧш) (1977, Кулӧмдін) - филология наукаяс кандидат, коми фольклор туялысь, Кыв, литература да история институтын старшӧй научнӧй сотрудник[1].
Олантуй
Чужис 1977 вося урасьӧм тӧлысь 8-ӧд лунӧ Коми Республикаса Кулӧмдін районса Кулӧмдін сиктын.
Помаліс Сыктывкарса канму университетысь финн-йӧгра факультет 1999 воын.
1999 восянь 2002 воӧдз велӧдчис Кыв, литература да история институтса аспирантураын "фольклористика" специальносьт серти.
Уджалӧ Кыв, литература да история институтын 1999 восянь: стажер-туялысь (1999 во), фольклор юкӧнын младшӧй научнӧй сотрудник (2002 во), научнӧй сотрудник (2006 восянь) да фольклор юкӧнын старшӧй научнӧй сотрудник (2016 восянь)[2].
Наукаын удж
Туялӧ коми челядь фольклор да йӧзкостса ворсӧмъяс. Зільӧ полевӧй фольклористика юкӧнын.
Кандидатскӧй диссертациялӧн темаыс - "Челядьлӧн коми ворсан фольклор: жанрӧвӧй да семантическӧй аспект" (2010 во)[3].
Гижис да йӧзӧдіс 120 сайӧ наука удж, на лыдын "Челядьлӧн коми ворсан фольклор: жанрӧвӧй аспект" монография (2014 во), "Коми фольклорнӧй традиция да устнӧй проза туялан история" (Сыктывкар, 2005; соавт.), "Коми ворсӧм да гаж: тӧрыт да талун" коми йӧзкостса ворсӧмъяслысь сборникъяс (Сыктывкар, 2007; соавт.), "Чинки, Киколь да Геч: коми йöзкостса ворсöмъяс" (Сыктывкар, 2011), "Ненеч асвеськӧдлан кытшын изьваса комияслӧн фольклор" фольклорнӧй гижӧд чукӧр (Сыктывкар - Нарьян-Мар, 2014, соавт.), Институтса фольклористъяслӧн уджъяслысь библиографическӧй указатель (Сыктывкар, 2006, соавт.), "Коми календарь. 2009 во" (Сыктывкар, 2008), "Челядьлы коми ворсöмъяс" (Сыктывкар, 2014), "Челядьлы коми ворсöмъяс" (Сыктывкар, 2015), "КЫВ ПОЗ – семейные практикумы по воспитанию билингвов" (Сыктывкар, 2018),«Детский фольклор коми: игры» (2023)[4][5]да с.в.
Коми йӧзлысь фольклор туялӧм могысь котыртіс да веськӧдліс Коми Республикаын, Перым крайса Коми-Перым кытшын, Тюмень областьса Ханты-Манси асвеськӧдлан кытшын, Кардор обласьтын фольклорно-этнографическӧй экспедицияясӧн.
Общественнӧй удж
- Финн-йӧгра войтырлӧн том йӧзлӧн ассоциацияса президентӧн (2007-2009 вояс),
- Коми му туялан котырӧн веськӧдлысь (2010-2017 вояс),
- Кыв, литература да история институтын том учёнӧйяслӧн сӧветӧ пырысь (2008-2013 вояс),
- "Коми войтыр" ӧтмунӧмлӧн Исполком Президиумӧ пырысь, "Коми войтыр" ӧтмунӧмлӧн Сыктывкарса представительствоӧн юрнуӧдысьӧс вежысь[6],
- Коми Республикаса Юралысь бердын Республиканскӧй термино-орфографическӧй комиссияӧ пырысь (2016 восянь),
- Сыктывкарса Общественнӧй сӧветӧ пырысь (2017 во).
А.Рассыхаев пуктіс ыджыд пай коми кывсӧ ӧтуввезйӧ пыртӧмӧ (Контактын да Телеграмын коми группаяс, коми блогъяс, коми википедия да с.в.).
Наградаяс
- РАН-лӧн Урал юкӧнса Почёт грамота (2015),
- Коми Республикаса уна сикас войтырлӧн министерстволӧн Почёт грамота (2008 во),
- Коми Республикаса йӧзӧс велӧдан министерстволӧн Почёт грамота (2010 во),
- "2010 вося Ставроссияса олысьяслысь перепись нуӧдӧмын заслугаясысь" медаль - Канму статистика федеральнӧй службалӧн ведомствоса отличие пас (2012 во),
- "Коми му туялан котыр. 1922" юбилейнӧй паметь медаль (2012 во).
- Коми Республикаса Почёт грамота (2024 во)[7].
Ыстӧгъяс
- ↑ Рассыхаев Алексей Николаевич
- ↑ Интервью с учёным-фольклористом Алексеем Рассыхаевым
- ↑ Рассыхаев А.Н. Детский игровой фольклор Коми: жанровый и семантический аспекты
- ↑ Рассыхаев Алексей Николаевич
- ↑ Презентация книги Алексея Рассыхаева «Детский фольклор коми: игры»
- ↑ "Коми войтыр" ӧтмунӧмӧн веськӧдлысьяс
- ↑ Жители Республики Коми удостоены государственных наград