Рочев Василий Васильевич

Рочев Василий Васильевич
Чужан лун	1980-ӧд вося йирым тӧлысь 23-ӧд лун(1980-10-23) (43 арӧс)
Чужанін	Сыктывкар, Коми Автономнӧй Сӧветскӧй Социалистическӧй Республика, РСФСР[d], Сӧветскӧй Социалистическӧй Республикаяслӧн Союз
Страна	Рочму
Мыйся уджыс	лыжный гонщик
Бать	Рочев Василий Павлович
Медиафайлы на РУВИКИ.Медиа

Рочев Василий Васильевич (1980) — лызьӧн коми котралысь, ставмирса чемпион, тӧвся Олимпиада (Турин, 2006) дырйи ыргӧн медаль шедӧдысь. Россияын лыжиӧн котралӧмысь спортса нимӧдана мастер.

Лыжиӧн котралысь семьяысь: батьыс — лызьӧн нималана коми котралысь, Олимпиадаса чемпион Василий Павлович Рочев, мамыс — тӧвся Олимпиадаын зысь медаль шедӧдысь Нина Петровна Рочева (Селютина), чой-вокыс да гӧтырыс, моньясыс сідзжӧ лыжиӧн котралысьяс. Тшӧкыдджыка шуӧны «томджык Василий Рочев».

Олантуй

Василий Рочев чужӧма 1980-ӧд вося йирым тӧлысь 23-ӧд лунӧ Коми АССР-са Сыктывкарын. Помалӧма Сыктывкарын 38-ӧд №-а шӧр школа (1997), Россияса юстиция министерство бердын право да экономикаысь Рязаньса институт (2001).

Семья

• Гӧтырыс — лызьӧн нималана котралысь, Олимпиадаса чемпион Чепалова Юлия Анатольевна. Быдтӧны вит челядьӧс: Олеся (2003), Васелина (2007), Василий (2012), Павел (2015), Алексей (03.02.2018).

Вермӧмъяс

Медводз Василий пырӧдчӧма конькиӧн исласьӧмӧ. 1992-ӧд вося гожӧмын нималана бать-мамыс сійӧс сетӧмаӧсь Олимпиада резерва челядьлы да томуловлы спорт школаӧ А. П. Кузнецов тренер дорӧ, мӧд во вуджӧма Ф. П. Сметанин дорӧ.

1998-ӧд воын Сыктывкарын В. Рочев шедӧдӧма 2 да 3 местаяс юниоръяс пӧвстын ставроссияса чемпионатын. 2000-ӧд воын юниоръяслӧн ставмирса чемпионат дырйи лоӧма чемпионӧн (эстафета котӧртӧмын 4х10 км) да эзысь медаль шедӧдысьӧн (30 км классика стильӧн котӧртӧмын).

Некымын во чӧж вӧлӧма россияса лызьӧн котралысь мужичӧй командаын капитанӧн. Сы бӧрын, кыдзи командаысь муніс да кутіс асшӧра дасьтысьны аслас бать да тренер В. П. Рочевкӧд, сы кыдди капитанавны кутӧма Николай Панкратов.

Россияса чемпионатъяс

• 2007-ӧд воын шедӧдӧма 1-дз места Россияса чемпионатын

Ставмирса чемпионатъяс

• 2005-ӧд воын спринтын чемпион (Оберстдорф, Германия), эстафетаын бронза (Николай Панкратов, Евгений Дементьев да Николай Большаковкӧд).
• 2007-ӧд воын кыкысь шедӧдӧма мӧд места ставмирса чемпионатын (Япония, Саппоро): командаса спринт (Николай Мориловкӧд) да эстафета (Николай Панкратов, Александр Легков да Евгений Дементьевкӧд). Тренерӧн сэки вӧлӧма Юрий Викторович Бородавко.

Олимпиада ворсӧмъяс

• XIX-ӧд тӧвся Олимпиада ворсӧмъясын Солт-Лейк-Ситиын 2002-ӧд воын 30 км котӧртӧмын босьтӧма 15-ӧд места.
• XX-ӧд тӧвся Олимпиада ворсӧмъясын Туринын 2006-ӧд воын призёр: спринт-эстафета 6х1,4 км — 3-ӧд места (Иван Алыповкӧд); 15 км классика стильӧн — 4 места, эстафета 4х10 км — 6 места, спринт 1,4 км свободнӧй стильӧн — 11 места.

Депутат

Вӧлӧма Сыктывкар карса сӧветын депутатӧн («Ӧтувъя Россия» ютырса список серти) (—2016).

Ӧшмӧсъяс

• Про Спорт11
• Коми Республикаса Вужвойтырлӧн небӧгаин