Сыктывкарса духовнӧй училище
| Стрӧйба | |
| Усть-Сысольскса духовнӧй училище | |
|---|---|
 | |
| 61°40′10″ с. ш. 50°50′33″ в. д.GЯO | |
| Страна |
 Россия |
| Сыктывкар | Киров ул., 44 |
| Проектлӧн автор | Федоров |
| Лӧсьӧдан кадпас | 1840 |
| Стрӧитӧм | 1888 вося ода-кора тӧлысь 20-ӧд лун — 1890 вося йирым тӧлысь 28-ӧд лун |
| Статус |
 Россияса войтыръяслӧн культура озырлун объект региональнӧй тӧдчанлуна. Рег. № 111410027080005 (ЕГРОКН). Объект № 1100003000 (БД Викигида) |
 |
|
 Медиафайлы на РУВИКИ.Медиа | |
Сыктывкарса духовнӧй училище (рочӧн Сыктывкарское духовное училище) — Сыктывкарын роч православнӧй вичколӧн Сыктывкарса епархияын шӧр специальнӧй велӧдчанін, революцияӧдз — роч православнӧй вичколӧн начальнӧй велӧдчанін.
История
Усть-Сысольскса духовнӧй училище
Духовнӧй училище вӧлі восьтӧма 1822 воын да медводз вӧлі Яренск карын ӧти судтаа пу керкаын. 1871 вося лӧддза-номъя тӧлысь 15-ӧд лунлы паныда войӧ училищелӧн жырйыс сотчис. Тайӧ кадас вӧлі шуӧма вуджӧдны Яренскысь училищесӧ Усть-Сысольскӧ.
1873 вося моз тӧлысь 17-ӧд лунӧ училищесӧ восьтісны Усть-Сысольскын да медводз меститісны Усть-Сысольскса соборса протоиерей Кокшаровлӧн кык судтаа пу керкаын. Частнӧй оланін стрӧйбаыс ньӧти эз лӧсяв сэтчӧ велӧдчанінлы. Сьӧм абутӧм вӧсна выль стрӧйба стрӧитӧмыс нюжаліс.
1886 воын училищеын ревизияӧн вӧлі Вежа Синод бердын Учебнӧй Комитетса член И. К. Зинченко, а 1888 воын училищеӧ воліс епископ Иоанникий, Вӧлӧгда епархияса викарий. Та бӧрын выль стрӧйба кыпӧдӧм кежлӧ дасьтысян уджыс муніс ӧдйӧджык.
1888 вося ода-кора тӧлысь 20-ӧд лунӧ вӧлі пуктӧма подув, а 1890 вося йирым тӧлысь 28-ӧд лунӧ вӧлі вежаалӧма да кыпыда восьтӧма Усть-Сысольскса духовнӧй училище. Сэки тайӧ стрӧйбаыс вӧлі Усть-Сысольскын медся ыджыдӧн[1].
Училище стрӧитӧмсянь нёль во чӧжӧн сэтчӧ волісны Учебнӧй комитетса член-ревизор П. Ф. Полянский, Вӧлӧгдаса епископъяс Алексий (Соболев), Никон (Рождественский) да Александр (Трапицын), Югдінса епископъяс Варсонофий (Курганов) (кыкысь), Антоний (Каржавин), Гавриил (Голосов) да Алексий (Бельковский) (куимысь), Вӧлӧгдаса губернаторъяс пиысь унаӧн. 1898 вося лӧддза-номъя тӧлысь 3-ӧд лунӧ училищеӧ воліс Его Императорскӧй Высочество Великӧй Князь Сергий Александрович.
1917 воын реквизируйтӧм зданиеын вӧлі Гӧрд Армиялӧн Войвыв фронтлӧн Пинега-Печӧра крайса войскаяслӧн штаб, а 1918 воын стрӧйбасӧ вӧлі сетӧма народнӧй образование уездса юкӧнлы да 1919 вося кӧч тӧлыссянь ӧткымын жыръясын вӧліны педагогическӧй курсъяс[1], мый подув вылын бӧрынджык вӧлі котыртӧма Коми канму пединститут — Коми муын медводдза вылыс тшупӧда велӧдчанін.
Ӧні Усть-Сысольскса духовнӧй училищелӧн вӧвлӧм стрӧйбаын меститчӧ Коми Республикаса национальнӧй галерея.
1959 вося вӧльгым тӧлысь 30-ӧд лунӧ Коми АССР-са Министръяс Сӧветлӧн 406 №-а Шуӧм серти училищелысь стрӧйбасӧ пыртӧма Коми Республикаса культурнӧй наследие объектъяс лыддьӧгӧ.
Сыктывкарса духовнӧй училище
1996 вося кӧч тӧлысь 6-ӧд лунӧ Трӧича да Степан нима Уллянаса манастыр бердын вӧлі восьтӧма Сыктывкарса духовнӧй училище[2]; историческӧй стрӧйбасӧ бергӧдны власьтъяс ӧткажитчисны.
2013 вося сора тӧлысь 16-ӧд лунӧ Вежа Синод шуис:
«Духовнӧй училищеяслы, кӧні дасьтӧны духовенстволы кадръяс, сетны куим во, медым найӧс пӧртны миссия да катехизация, том йӧзкӧд да социальнӧй удж юкӧнын приходскӧй специалистъясӧс дасьтан духовнӧй семинарияясӧ либӧ велӧдан учреждениеясӧ (шӧринъясӧ)»[3].
2013 вося кӧч тӧлысь 1 лунсянь училищеын велӧдісны заочнӧя да экстернатӧн. 2014 вося тӧвшӧр тӧлысь 15-ӧд лун кежлӧ тані велӧдчис 42 студент.
2014 вося урасьӧм тӧлысь 18-ӧд лунӧ Коми Республикаса Сыктывкарса ёрд шуис, мый 1996 воын духовнӧй училище лӧсьӧдӧмсянь велӧдан уджыс нуӧдсис лицензиятӧг, мыйкӧд йитӧдын тшӧктіс «Роч Православнӧй вичколӧн Сыктывкарса да Вӧркутаса епархияса „Сыктывкарса православнӧй духовнӧй училище“ шӧр уджсикас религиознӧй велӧдчанінлы босьтны велӧдан удж нуӧдан инӧд вылӧ лицензия тайӧ помшуӧмлӧн оланпас серти вынсялан лунсянь 3 тӧлысь чӧжӧн».
2016 вося сора тӧлысь 15-ӧд лунӧ Вежа Синод шуис сетны Сыктывкарса духовнӧй училищелы, кыдзи и некымын мукӧд бырӧдӧм духовнӧй училищелы, «катехизируйтан, миссионерскӧй, том йӧзлӧн да социальнӧй удж юкӧнын вичкоса специалистъясӧс дасьтан духовнӧй шӧрин» ним[3].
Вичкоын уджалысьясӧс дасьтан шӧрин
2017 вося сора тӧлысь 23-ӧд лунӧ Сыктывкарса епархияӧн веськӧдлӧмын вӧлі медводдза организационнӧй сӧвещание, кӧні вӧлі примитӧма Вежа Синодлӧн Шуӧм серти Сыктывкарын «Вичкоса специалистъясӧс дасьтан шӧрин» лӧсьӧдӧм йылысь помшуӧм, кӧні велӧдчӧмыс лоас кык во[4][5].
2024 вося ӧшым тӧлысь 31-ӧд лун вылӧ тані велӧдчис 39 морт, на пиысь куимӧн экстернат формаын[6].
Пасйӧдъяс
- ↑ 1 2 Усть-Сысльское духовное училище. Шыӧдчан кадпас: 1 йирым тӧлысь 2025. Архивируйтӧма оригинала 29 кӧч тӧлысь 2011 года.
- ↑ 6 сентября 1996 года открылось Сыктывкарское духовное училище при Троице-Стефановском Ульяновском монастыре (рус.). НБРК (6 кӧч тӧлысь 2018). Шыӧдчан кадпас: 1 йирым тӧлысь 2025.
- ↑ 1 2 Журналы заседания Священного Синода от 15 июля 2016 года / Официальные документы / Патриархия.ru. Шыӧдчан кадпас: 1 йирым тӧлысь 2025. Архивируйтӧма 18 сора тӧлысь 2016.
- ↑ Документы принимаются в концелярии епархии. Шыӧдчан кадпас: 1 йирым тӧлысь 2025. Архивируйтӧма 26 вӧльгым тӧлысь 2016.
- ↑ Сыктывкарский центр подготовки церковных специалистов (рус.). СЦПЦС. Шыӧдчан кадпас: 1 йирым тӧлысь 2025.
- ↑ Отчет о результатах самообследования Православной религиозной организации - духовной профессиональной образовательной организации «Сыктывкарский центр подготовки церковных специалистов» религиозной организации «Сыктывкарская Епархия Русской Православной Церкви (Московский Патриархат)» (рус.). СЦПЦС. Шыӧдчан кадпас: 1 йирым тӧлысь 2025.