Коми Республикаса национальнӧй галерея

Босьтӧма Рувикиысь

Министерство культуры РФ

Gerb-big.png

Статьяын вӧдитчӧма материалъясӧн Россия Федерацияса Музей фондса канму каталогысь

    
Паськыдджыка
Gerb-icon.png

РФ-са культура министерство

Arrow-Right.png
Gerb-big.png
Статьяын вӧдитчӧма материалъясӧн Россия Федерацияса  Музей фондса канму каталогысь
Паськыдджыка
Коми Республикаса национальнӧй галерея
Усть-Сысольское духовное училище (Национальная галерея Республики Коми).jpg
Инпас Коми Республика, Сыктывкар, Киров улича, 44 керка
Директор Чернова Ирина Ивановна
Сайт ngrkomi.ru
Логотип РУВИКИ.Медиа Медиафайлы на РУВИКИ.Медиа

Коми Республикаса национальнӧй галерея (рочӧн Национальная галерея Республики Коми) — Коми Республикаын дзик ӧти художественнӧй музей. Галереяын видзӧны Рытыввыв Европаса, роч, сӧветскӧй, ӧнія россияса, коми искусствоысь да иконописьысь 10 000-ысь унджык произведение. Подувсӧ пуктӧма 1943 воын.

Национальнӧй галерея, Киров ул., 44 к.[1].

История

Коми Республикаса национальнӧй галереялы подувсӧ вӧлі пуктӧма 1943 вося ӧшым тӧлысьын. Таӧдз сійӧ жӧ вося тӧвшӧр тӧлысьын вӧлі котыртӧма СССР-са серпаслысь котырлысь Коми отделение, коді 1943 воын нуӧдіс кык выставка. Мӧд выставка восьтӧм водзвылын чужис серпас галереялӧн проект[2] да ӧшым тӧлысь 4-ӧд лунӧ вӧлі йӧзӧдӧма Республикаса художественнӧй музей котыртӧм йылысь индӧд. Учреждениелӧн медводдза уджалан воӧн фондъясӧ воис 35 удж, медсясӧ воисны коми серпасалысьяслӧн — В. В. Поляковлӧн, М. П. Безносовлӧн да В. Г. Постниковлӧн — уджъяс. 1947 воын галереялӧн фондын вӧлі нин 147 экспонат.

Зэв ыджыд пай музей фонд лӧсьӧдӧмӧ пуктіс Даниил Тимофеевич Янович (1879—1940) — учёнӧй-антрополог, этнограф да музейын уджалысь, коді тшӧтш туяліс Москваса, Петыркарса, Тверьса, Владимирса да мукӧд карса уна сикас музей фонд. 1925 воын войвыв войтыръяслы отсӧг сетан комитетса учёнӧй секретарӧн Д. Т. Яновичӧс мӧдӧдісны Коми обласьтӧ, кӧні сійӧ вӧзйис лӧсьӧдны краеведческӧй музей бердын художественнӧй отдел, босьтчис тӧждысьны сійӧс лӧсьӧдӧм вӧсна. Водзӧ вылӧ 1926—1928 воясӧ Канму музей фондлӧн (Москва) видзанінын учёнӧйлы удайтчис лӧсьӧдны XVIII—XX нэмлӧн медводдза коймӧд юкӧнса роч да рытыввыв Европаса художникъяслысь коллекция, кодӧс кык партияӧн вӧлі вайӧма Усть-Сысольскӧ. 1928 вося вӧльгым тӧлысьын вайӧм произведениеяссӧ вӧлі сувтӧдӧма ставлы видзӧдӧм вылӧ.

1952 воын Д. Т. Яновичлысь художественнӧй коллекциясӧ вуджӧдісны краеведческӧй музейсьыс художественнӧйӧ. Тасянь и заводитчис музейлӧн чужӧм-сӧвмӧмыс, сылӧн экспонатъяслӧн составыс да тэчасыс.

Водзӧ роч искусство чукӧртӧмсӧ комплектуйтлісны СССР-са да РСФСР-са культура министерстволӧн, Канму Роч музейлӧн, РСФСР-са художественнӧй фондлӧн выставкаяс дирекциялӧн, Россияса культура фондлӧн, «Росизопропаганда» управлениелӧн, Е. В. Вучетич нима Ставсоюзса художественно-производственнӧй объединениелӧн передачаяс тшӧт весьтӧ. 1980 воясӧ некымын серпас вӧлі ньӧбӧма йӧзлысь.

1970-ӧд вояс помын — 1980-ӧд вояс заводитчигӧн заводитӧны целенаправленнӧя комплектуйтны ӧнія россияса (сӧветскӧй) искусство юкӧн. Рытыв-войвыв регионса художественнӧй олӧмӧ музейыслӧн зіля пырӧдчӧмыс сетіс позянлун петкӧдлыны музейын Карелияса, Кардорса, Вӧлӧгдаса, Киров обласьтъясса художникъяслысь творчествосӧ. 1980-ӧд вояс заводитчигӧн учёнӧй-религиовед Ю. В. Гагаринлысь коллекциясӧ ньӧбӧм вӧсна галереяын лои православнӧй искусство петкӧдлысь юкӧн. Сэки жӧ музейса уджалысьяс кутісны ветлӧдлыны экспедицияӧн Коми Республикаса районъясӧ, медым лӧсьӧдны коми йӧзкостса искусстволысь коллекция.

Бӧръя воясӧ галереялӧн коллекцияыс водзӧ содӧ, ёнджыкасӧ козинъяс тшӧт весьтӧ. Бӧръя воясӧ медся тӧдчанаӧн лои Москваса коллекционер Н. И. Корниловлӧн козин, коді тӧдчымӧн паськӧдіс XX нэмся роч искусстволысь юкӧнсӧ.

Коллекция

Галереяын 10 сюрсысь унджык живопись, графика, скульптура, декоративно-прикладнӧй искусство произведение. Торъя юкӧнӧн лоӧ коми изобразительнӧй искусстволӧн коллекция. Тайӧ нырвизьыс вӧлі да кольӧ медтӧдчанаӧн художественнӧй коллекция комплектуйтӧмын. Галерея фондъясын видзӧны коми серпасалысьяслысь медбур уджъяссӧ, лӧсьӧдӧма республикаса медбур художникъяслысь монографическӧй коллекцияяс, петкӧдлӧма В. Поляковлысь, Н. Жилинлысь, П. Митюшевлысь, Н. Лемзаковлысь, А. Безумовлысь, Р. Ермолинлысь, Е. Ермолинлысь, С. Торлоповлысь, А. Кочевлысь, Ю. Борисовлысь, В. Мамченколысь, В. Рохинлысь, В. Смирновлысь, В. Краевлысь, А. Бухаровлысь, В. Игнатовлысь, Е. Борисевичлысь, В. Кисловлысь да мукӧдлысь творчествосӧ.

Роч изобразительнӧй искусстволӧн коллекцияӧ пырӧны И. Айвазовскийлӧн, Н. Бодаревскийлӧн, Ф. Боткинлӧн, А. Саврасовлӧн, В. Тропининлӧн, С. Ивановлӧн, В., Н. да К. Маковскихлӧн, А. Рыловлӧн, И. Шишкинлӧн, М. Антокольскийлӧн, М. Диллонлӧн да мукӧдлӧн серпасъяс. Д. Т. Яновичлӧн произведениеясыс сідзжӧ лоины подулӧн суйӧрсайса классическӧй искусстволысь коллекцияяс артмӧдӧмлы (А. Бирштадт, Р. Бонёр, И. Навратил да мукӧд), роч авангард искусство (В. Куприн, М. Матюшин, В. Чекрыгин да мукӧд), рытыввыв Европаса да роч дореволюционнӧй фарфор.

Рытввыв Европаса искусство зал

1950-ӧд вояссянь артмӧ сӧветскӧй да ӧнія россияса искусстволӧн коллекция РСФСР-са культура министерстволӧн да «Росизолӧн» запасникъясысь, Москваса да Петыркарса, Россияса войвыв регионса каръясысь тӧдчана художникъяслӧн мастерскӧйясыс. Галереялӧн тайӧ юкӧнын петкӧдлӧма Н. Ромадинлысь, Е. Моисеенколысь, В. Стожаровлысь, А. Грицайлысь, Ю. Кугачлысь, Ф. Глебовлысь, Н. Нестеровалысь, В. Тюленевлысь, Е. Романовалысь, В. Рахиналысь, Б. Шамановлысь, А. Пантелеевлысь, В. Корбаковлысь, И. Широковалысь, З. Церетелилысь, Т. Назаренколысь да мукӧдлысь уджъяссӧ.

Ӧні галереялӧн уджын медтӧдчана нырвизьясӧн лоӧны учёт-видзан да реставрация нуӧдан удж.

Стрӧйба

Художественнӧй музей керка (1962—1993)

1943 восянь 1947 воӧдз Республикаса художественнӧй музейлӧн эз вӧв аслас керка. Музейлӧн медводдза стрӧйбаӧн лоис кык патераа пу керка, коді вӧлі Киров нима культура да шойччан парклӧн мутасын (Киров ул., 21). Стрӧйбасӧ вайисны Княжпогостсянь 1946 воын Коми АССР-лы 10 во тырӧмлы сиӧм выставка вылӧ да вӧдитчисны сійӧн кыдзи ӧти павильонӧн. 1947 вося вӧльгым тӧлысь 7-ӧд лунӧ сэні кыпыда восьтісны Республикаса художественнӧй музей, кытчӧ быдӧн вермис волыны. Ӧнія кадӧдз стрӧйбаыс абу кольӧма.

1962—1993 воясӧ Республикаса художественнӧй музей вӧлі Кузьбожев купечьяслӧн вӧвлӧм вузасян керкалӧн кык судта стрӧйбаын (Коммунистическӧй ул., 6). Стрӧйбаыс лоӧ Коми Республикаса история да архитектура паметникӧн. Сійӧс вӧлі стрӧитӧма 1912 воын «модерн» стильӧн. Керкаыс вӧліс Усть-Сысольскса купеч Кузьбожевлӧн наследникъяслӧн. 1918—1920 воясӧ сэні вӧлі РКП(б)-лӧн уездса комитет, 1921—1931 воясӧ — ВКП(б)-лӧн коми обласьтса комитет, бӧрынджык вӧліны аптека, комсомол обком, сёян-юанӧн вузасянін, «Спорттовары» вузасянін, Гражданскӧй авиацияӧн веськӧдланін. Медводз Республикаса художественнӧй музейлы вӧлі сетӧма сӧмын юкӧн, 1970 воын сетісны став стрӧйбасӧ. Ӧні тані меститчӧма Коми Республикаса национальнӧй музейлӧн вӧр-ва юкӧн.

1993 восянь Коми Республикаса национальнӧй галерея меститчӧма вӧвлӧм духовнӧй училище зданиеын (Киров ул., 44), сійӧ сідзжӧ лоӧ Коми Республикаса история да архитектура паметникӧн. Кык судта из стрӧйбасӧ проектируйтіс Вӧлӧгдаса губернскӧй архитектор Фёдоров духовнӧй училищелы, мый вӧлі вуджӧдӧма Яренскысь Усть-Сысольскӧ. Стрӧитісны 1888—1890 воясся гожӧмын Паджгаса кресьтянин Н. Кононов, каменнӧй уджъяс кузя мастер юрнуӧдӧм улын. 1905—1906 воясӧ тайӧ жӧ стрӧитчысь бригадаыс кыпӧдіс пристройка архитектор Лебединский проект серти. Усть-Сысольскса духовнӧй училище вӧлі тайӧ стрӧйбаас 1890 восянь 1918 воӧдз. Гражданскӧй война воясӧ тані вӧлі Гӧрд Армиялӧн Войвыв фронтса Пинего-Печорскӧй крайса войскалӧн штаб. 1918 воын Усть-Сысольскса исполкомлӧн шуӧм серти стрӧйбасӧ вӧлі сетӧма уездса народнӧй образованиелы. Стрӧйбаын вӧліны педагогическӧй курсъяс, педтехникум, 1932—1938 воясӧ Комиын медводдза вылыс тшупӧда велӧдчанін — Коми канму педагогика институт, бӧрынджык — Велӧдысьясӧс бурмӧдан институт. 1990 воын стрӧйбасӧ сетӧма Коми АССР-са культура министерстволы. 1991—1993 воясӧ вӧлі капитальнӧя дзоньталӧма.

Директоръяс

• Постников Виктор Гаврилович (1944—1945)
• Латкин Н. Е. (1946—1947)
• Игнатов Василий Георгиевич (1947—1948)
• Дьяконова (Белых) Мария Степановна (1948—1950, 1958—1959)
• Оксёнова Н. И. (1950—1952)
• Юркин Павел Степанович (1952—1953)
• Ямаев Пётр Данилович (1953)
• Андреева С. Н. (1953—1954)
• Сидорова Софья Николаевна (1954—1958)
• Поповцева Фаина Кирилловна (1959—1979)
• Агошкова Любовь Стефановна (1979—1985)
• Поповцева Элеонора Константиновна (1985—1988)
• Светличная Светлана Константиновна (1988—1990)
• Кублицкий Валентин Васильевич (1990—1992)
• Атландирова Галина Николаевна (1992)
• Чуркин Виктор Куприянович (1993—1998)
• Беляева Светлана Андреевна (1999—2002)
• Коробов Валерий Иванович (2002—2006)
• Талянина Ольга Леонидовна (2006—2020)
• Чернова Ирина Ивановна (2020 восянь ӧніӧдз)

Скульптура сад

Скульптура сад арын
Скульптура сад гожӧмын

Национальнӧй галерея керка бердын эм неыджыд сад, сэні водзынджык гуляйтісны духовнӧй училищеса велӧдчысьяс. 1991 воын «Леспроект» экспедиция сійӧс реставрируйіс сы могысь, медым бӧр лӧсьӧдны историческӧй планировкасӧ, кыдзи позьӧ бурджыка видзны ӧнія быдмӧгъяссӧ, а сідзжӧ лӧсьӧдны галерея фондысь скульптура петкӧдлӧм вылӧ. Вӧлі бура видлалӧма да инвентаризуйтӧма пуяссӧ (144 пу, 8 пӧрӧда), нуӧдӧма история туялӧмъяс, тшӧтш и мутаслысь археологическӧй зондируйтӧм.

Садсӧ вӧчӧма пырся сад-парк юкланногӧн: территориясӧ юклӧма куим пельӧса боскетъяс вылӧ. Нёль аллеясӧ позьӧ казявны кольӧм важ пуяс (посни коръя ниаяс) серти. Раскопкаяс петкӧдлісны, мый тайӧ аллеяясыслӧн эз вӧв чорыд веркӧсыс, тыдалӧ, вӧлі киськалӧма лыаӧн. Ясыда тӧдчӧдӧм шӧрина аллеяяслӧн радъясыс мичмӧдісны садсӧ, а боскетъяслӧн могыс, гашкӧ, вӧлі утилитарнӧй.

2000 воын галереяса Учёнӧй сӧвет вынсьӧдіс «Скульптура сад» уджтас, коді урчитіс паськӧдны музей экспозициясӧ парк зонаын. Уджтаслӧн могыс — лӧсьӧдны сэтшӧм сикас экспозиция, кӧні видзӧдысь эськӧ топыдджыка йитчис искусство произведениеяскӧд, и коді эськӧ сетіс позянлун выль ногӧн гӧгӧрвоны вӧр-ва пространствосӧ, тӧдмавны сылысь донсӧ да сетны тайӧ донаторйыслы торъя статус. Тайӧ могсӧ збыльмӧдны отсалісны «Финн-йӧгра мир» скульптура симпозиумъяс. Симпозиумъяссӧ нуӧдісны галереяын «Россияса культура» федеральнӧй торъя мога уджтас серти 2002—2012 воясӧ. Симпозиумъяс бӧрын вӧчӧма ывла вылын экспозиция, кытчӧ пыртӧма финн-йӧгра мирса (Коми, Карелия, Удмуртия, Мордовия, Венгрия, Финляндия, Эстония) серпасалысьяслысь, а сідзжӧ Екатеринбургса, Петыркарса, Москваса да Арменияса скульпторъяслысь 30 вӧчӧмтор.

Серпасъяс

  • В. Тропинин. Золотошвейка. 1825

    В. Тропинин. Золотошвейка. 1825

  • С. Иванов. Обратные переселенцы. 1888

    С. Иванов. Обратные переселенцы. 1888

  • И. Тупылев. Плутовская игра

    И. Тупылев. Плутовская игра

  • А. Корин. Опять провалился. 1891

    А. Корин. Опять провалился. 1891

  • А. Корин. Панихида по Прянишникову. 1900

    А. Корин. Панихида по Прянишникову. 1900

  • А. Корин. Дочь Таня на окне. 1912

    А. Корин. Дочь Таня на окне. 1912

Скульптураяс

Галереяын видзӧны уна скульптура оз сӧмын коми авторъяслысь, но и россияса нималана скульпторъяслысь, шуам:
• «Пасьтӧм ань» Гавриил Шульцлӧн;
• «Отто Юльевич Шмидт» Никита Лавинскийлӧн;
• «Мамлун» Георгий Мотовиловлӧн;
• «Турун пуктӧм» Илья Тенеталӧн;
• «Саридз дорын» Яков Купреяновлӧн да уна мукӧдлӧн.

Пасйӧдъяс

  1. ↑ Государственное бюджетное учреждение Республики Коми "Национальная галерея Республики Коми". Госкаталог. Шыӧдчан кадпас: 4 рака тӧлысь 2025.
  2. ↑ Кочерган Л. И. Из истории Национальной галереи Республики Коми / V Научные чтения памяти Д.Т. Яновича (русский) // Национальная галерея Республики Коми : Сборник статей. — 2019. — С. 52—59.

Литература

  • Республика Коми: Энциклопедия. Том 2. Сыктывкар, 1990 — с. 324—325.
  • Город Сыктывкар. Энциклопедия. Сыктывкар, 2010 — с.187.
  • Павлюшин С. Е. Объекты культурного наследия Республики Коми. Чебоксары, 2015 — с. 23-29.
  • Первые художественные коллекции Национальной галереи Республики Коми. Каталог. Сост. Поповцева Э. К. Сыктывкар, 2010.
  • Поповцева Э. К. Изобразительное искусство Республики Коми. 1943—2000. Сыктывкар, 2011.

Ыстӧгъяс

Босьтӧма "https://kv.ruwiki.ru/w/index.php?title=Коми_Республикаса_национальнӧй_галерея&oldid=471794"-ысь