Шаренко Василий Петрович

Василий Петрович Шаренко
Чужан лун	1911 вося косму тӧлысь 4-ӧд лун
Чужанін	Юрасовка, Острогожск уезд, Воронеж губерния, Россия империя
Кулан лун	1985 вося рака тӧлысь 30-ӧд лун
Куланін	Подольск, Москва обласьт
Канму	СССР
Войска сикас	артиллерия
Служитан вояс	1932—1937, 1939—1940, 1941—1945
Звание
Часьт	Карельскӧй фронтса 7-ӧд армиялӧн 70-ӧд саридзвывса стрелкӧвӧй бригада
Чин	противотанкӧвӧй орудиеса командир
Тышъяс/вӧйнаяс	Сӧветско-финскӧй вӧйна, Айму вӧсна Ыджыд тыш
Наградаяс да премияяс
Медиафайлы на РУВИКИ.Медиа

Шаренко Василий Петрович (1911 вося косму тӧлысь 4-ӧд лун, Юрасовка слӧбӧда, Острогожск уезд, Воронеж губерния — 1985 вося рака тӧлысь 30-ӧд лун, Подольск, Москва обласьт) — Сӧветскӧй Армияса лейтенант, сӧветско-финскӧй да Айму вӧсна Ыджыд тышъясын участвуйтысь, Комиысь Сӧветскӧй Союзса Герой (1944). Карельскӧй фронтса 7-ӧд армиялӧн 70-ӧд саридзвывса стрелкӧвӧй бригадаын противотанкӧвӧй орудиеса командир.

Олантуй

Чужис 1911 вося косму тӧлысь 4-ӧд лунӧ Юрасовка слӧбӧдаын (ӧні — Воронеж обласьтса Ольховатскӧй район) кресьтянин семьяын. Украинеч. 1943 воӧ пырис КПСС-ӧ. Помаліс педагогика техникум. 1937 восянь оліс Москваын, уджаліс заводын токарӧн.

Служитіс Гӧрд Армияын 1932-1937 воясӧ, 1939-1940 воясӧ вӧлі Сӧветско-финскӧй вӧйна вылын да 1941 вося кӧч тӧлыссянь Айму вӧсна Ыджыд тыш вылын, командуйтіс противотанкӧвӧй орудиеяс взводӧн.

1941 вося йирым тӧлысьын Можайск дорын тыш дырйи Шаренколӧн взводыс бырӧдіс 22 танкысь куимӧс, мӧд тыш дырйи виӧмаӧсь красноармееч формаӧ пасьтасьӧм 6 немечӧс, босьтӧмаӧсь трофейнӧй автоматъяс. 1941 вося йирым тӧлысь помын старшина Шаренко чорыда ранитчис. Бурдӧдчис госпитальын Тюменьын, госпитальысь петӧм бӧрын босьтӧмаӧсь Лӧнь океанса флотлӧн 70-ӧд саридзвывса стрелкӧвӧй бригадаӧ. Бригадаыс мӧдӧдчӧма Ленинградса фронт вылӧ дорйыны Ладожскӧй ты вомӧн «Олӧм туй» йи трасса.

1944 вося лӧддза-номъя тӧлысь 23-ӧд лунӧ, Тулоксаса десант операция дырйи, канонерскӧй пыжъяс да бронекатеръяс вайӧдісны 70-ӧд саридзвывса бригадасӧ Тулокса да Видлица юяс костӧ, кӧні Шаренколӧн расчёт, шуйгавыв фланг вылын бур позиция босьтӧмӧн, бӧрыньтӧдіс враглысь контратакаяссӧ. Тыш дырйи орудие дорын колис ӧтнас Шаренко. Сійӧ ачыс заряжайтіс орудиесӧ, веськӧдліс, лыйліс, бӧрыньтӧдіс нӧшта 4 контратака. Но неылын сулалысь кӧрт туйладорсянь кутіс матыстчыны вражескӧй бронепоезд, сійӧс эз позь жугӧдны 45-миллиметраа снарадъясӧн. Сэки Шаренко снарадӧн жугӧдіс кӧрт туй полотносӧ да кутіс лыйлыны прӧтивниклысь салдатъясӧс, кодъяс петісны сувтӧм бронепоездысь, а бронепоезд муніс бӧр. Ставнас Шаренко бӧрыньтӧдіс 16 контратака, сувтӧдіс бронепоезд, эз лэдз шоссе кузя противниклысь ни ӧти машина, бырӧдіс неприятельлысь 150 гӧгӧр салдатӧс.

СССР-са Медвылыс Сӧвет Президиумлӧн 1944 во сора тӧлысь 21-ӧд лунся Индӧдӧн немецкӧй захватчикъяскӧд тыш нуӧдігӧн командованиелысь боевӧй заданиеяс образцӧвӧя олӧмӧ пӧртӧмысь да та дырйи повтӧмлун да геройство петкӧдлӧмысь старшина Шаренко Василий Петровичлы сетӧма Сӧветскӧй Союзса Герой ним Ленин орден да «Зарни Кодзув» медаль (4399 №) сетӧмӧн.

В. П. Шаренко воис Чехословакияӧдз, некымынысь сьӧкыда ранитчыліс, ӧтчыд фронтвывса газета весиг йӧзӧдіс некролог сылӧн пӧгибнитӧм йылысь, а гортас муніс кувсьӧм йылысь юӧр.

Москваын Вермӧм парад дырйи В. П. Шаренко нуис Гӧрд изэрд вывті Гӧрд Кодзув ордена Печенегса Краснознамённӧй 70-ӧд торъя саридзвывса стрелкӧвӧй бригадалысь дӧрапассӧ.

Вӧйна бӧрын демобилизуйтчис, служитіс МВД-са органъясын, 1947 воын помаліс МВД-лысь Ленинградса офицеръяслысь школа.

1951 воын В. П. Шаренкоӧс мӧдӧдӧмаӧсь служитны Вӧркута карӧ, 1954 воӧдз олӧма да уджалӧма «Воркутауголь» комбинатлӧн техническӧй веськӧдланінын механизация да автоматизация отделса инженерӧн.

1954 восянь запасын.

Оліс да уджаліс Москва обласьтса Подольск карын, кувсис сэні жӧ 1985 вося рака тӧлысь 30-ӧд лунӧ, дзебӧмаӧсь «Красная Горка» шойнаын.

Ольховаткаын бюст

Наградаяс

• Сӧветскӧй Союзса Герой (1944.06.21);
• «Зарни Кодзув» медаль (4399 №) (1944.06.21);
• Ленин орден(1944.06.21);
• Айму вӧсна Ыджыд тышса I тшупӧда орден;
• Гӧрд Кодзув орден;
• медальяс.

Паметь

• В. Шаренколысь нимсӧ сетісны Юрасовка слӧбӧдаын уличалы;
• Ольховаткаын сувтодӧмаӧсь геройлысь бюст да казьтылан стела;
• Шаренколы пуктӧма мемориальнӧй пӧв Подольск карын да Юрасовкаса школаын.

Пасйӧдъяс

Литература

• Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
• Героям Родины — слава! — 3-е изд., испр., доп. — Петрозаводск, 1985. — С. 236—237.
• Герои огненных лет. Очерки о москвичах — Героях Советского Союза. — Вып. 1.- М.: Московский рабочий, 1975.
• Черноусько А. Так на флотах ковали Победу. Дуэль с бронепоездом. // Морской сборник. — 2002. — № 5. — С.81—82.
• Книга памяти Республики Коми. Т. 9 / сост. В. М. Котельников, А. М. Калимова, А. А. Карпов. — Сыктывкар, 2002.
• Книга памяти Республика Коми. Т. 10 / сост. В. М. Котельников, А. М. Калимова, А. А. Карпов. — Сыктывкар, 2004.
• Книга памяти Республики Коми. Т. 12 / составители А. А. Карпов, О. А. Сергичева, Л. Н. Двинская. — Сыктывкар, 2013.
• Честь и слава героям, 1941-1945 : сборник статей и очерков / сост.: А. М. Калимова, А. А. Карпов. – Сыктывкар, 2007. – (Книга памяти Республики Коми).