Агиней Руслан Викторович

Босьтӧма Рувикиысь
Рувикиын эмӧсь мукӧд йӧз йылысь статьяяс, кодъяслӧн овыс Агиней.
Руслан Викторович Агиней
Руслан Агиней 2019 воын
Руслан Агиней 2019 воын
Укваса канму техническӧй университетса
(мноп 2019.07.15 — 2020.02.11) Ректор
Уджмогъяс заводитчӧм 2020.02.11
Сы водзын уджалысь Дмитрий Беляев (мноп)
Ас йылысь юӧр
Чужан лун 1975 вося кӧч тӧлысь 17-ӧд лун
Чужанін Уква, Коми АССР, РСФСР, СССР
Страна  СССР →  Россия
Учёная степень техническӧй наукаяс доктор
Учёное звание профессор
Велӧдчис
Логотип РУВИКИ.Медиа Медиафайлы на РУВИКИ.Медиа

Агиней Руслан Викторович (1975-ӧд вося кӧч тӧлысь 17-ӧд лун, Уква, Коми Автономнӧй Сӧветскӧй Социалистическӧй Республика) — Укваса канму техническӧй университетын ректор, профессор, техническӧй наукаяс доктор[1], 2025 вося лӧддза-номъя тӧлысь 10-ӧд лунӧ выльысь индӧма ректорӧн 5 во кежлӧ[2].

Олантуй

Руслан Викторович Агиней чужис 1975 вося кӧч тӧлысь 17-ӧд лунӧ Уква карын. Помалӧма Уква карса 13-ӧд номера шӧр школа. 1997 воын помаліс Укваса индустриальнӧй институт «мусир да биару скважинаяс писькӧдӧм» специальносьт серти. 2004 воын босьтіс Укваса канму техническӧй университетын «ТЭК предприятиеяс вылын экономика да веськӧдлӧм» специальносьт серти отличиеӧн диплом.

1994 восянь 1998 воӧдз уджаліс Возейса куйлӧдын мусир перйӧм кузя операторӧн, Харьягаса, Печӧра-Кӧжваса да Печорогородскӧй мусир да биару куйлӧдъясын бурильщиклы отсасьысьӧн.

1999 восянь 2012 воӧдз вӧлі «Газпром ВНИИГАЗ» ичӧт кывкутана котырлӧн Уква карса филиалын инженерӧн, научнӧй сотрудникӧн, магистральнӧй биару проводъяслӧн зумыдлун да надёжность юкӧнса начальникӧн. Наукаын туялана юкӧн: трубопроводъяслӧн диагностика да видзана контроль, коррозияысь видзӧм, материал тӧдмалӧм, трубопроводнӧй конструкцияяслӧн крепыдлун да ресурс.

2012 воын сійӧс вуджӧдісны уджавны «Гипрогазцентр» акционер котырӧ наука кузя генеральнӧй директорӧс вежысьӧн.

2005 воын дорйис кандидатскӧй диссертация «Разработка методики оценки напряжённого состояния нефтегазопроводов по коэрцитивной силе металла» тема вылӧ, 2009 воын — «Разработка методов повышения противокоррозионной защиты объектов газотранспортной системы» тема вылӧ докторскӧй диссертация.

2006 восянь 2019 воӧдз вӧлі Укваса канму техническӧй университетын «Магистральнӧй биару да мусир проводъяс проектируйтӧм да уджӧдӧм» кафедраӧн веськӧдлысьӧн. Сідзжӧ ӧттшӧтш уджалӧма Нижегородскӧй канму техническӧй университетын «Биару-мусир проводъяс да биару-мусир видзанінъяс проектируйтӧм да уджӧдӧм» кафедраӧн заведуйтысьӧн.

2012 воын Р. В. Агинейлы сетісны профессорлысь учёнӧй ним йылысь аттестат. Сылӧн веськӧдлӧм улын дасьтӧма да дорйӧма дас кык кандидатскӧй да ӧти докторскӧй диссертация.

Агиней Р. — 200 гӧгӧр научнӧй уджлӧн, 51 изобретениелӧн да нёль пӧлезнӧй модельлӧн, монографияяслӧн, велӧдчан пособиеяслӧн, методическӧй уджъяслӧн автор. «Газпром» публичнӧй акционер котырлӧн нормативнӧй документъяс дасьтӧмын участвуйтысь.

Кандидатскӧй да докторскӧй диссертацияяс дорйӧм кузя кык диссертация сӧветӧ пырысь. Россия Федерацияса наука да вылыс тӧдӧмлун министерстволӧн Вылыс аттестационнӧй комиссияса экспертнӧй сӧветӧ пырысь.

А. М. Прохоров нима инженернӧй наукаяс академияса тырвыйӧ член.

2019 воын вӧзйис асьсӧ Укваса канму техническӧй университетӧ ректорӧ. Лӧддза-номъя тӧлысьын вӧлі аттестуйтӧма Россияса Минобрнаукалӧн Аттестационнӧй комиссияӧн да лэдзӧма бӧрйысьӧмъяс вылӧ[3]. 2019 вося сора тӧлысь 15-ӧд лунӧ нин пырӧма УГТУ-са ректорлысь могъяс недыр олӧмӧ пӧртысь чинӧ, тайӧ чинын вежис мунӧм недыр кадся ректор Дмитрий Беляевӧс.

Тайӧ кадӧ сійӧ паныдасис кризискӧд, мый эрдӧдіс сыӧдз недыр уджалысь Дмитрий Беляев, коді йӧзӧдіс Николай Цхадая дырйи артмӧм вузлысь уджйӧз йылысь юӧр[4][5]. Сідзжӧ ректоралӧм заводитчигӧн сылы паныд сувтіс коллективыс профсоюзнӧй организациякӧд да сэтчӧ пырысьяскӧд — профессорско-преподавательскӧй составкӧд да студентъяскӧд, кодъяс поддерживайтісны университетын воддза реформаяс нуӧдысьясӧс Дмитрий Беляев юрнуӧдӧм улын[6].Таысь кындзи, 2020 вося урасьӧм тӧлысь 5-ӧд лунӧ помасис университетлӧн велӧдан удж вылӧ аккредитацияыс. Татшӧм ногӧн, Укваса университет эз вермы ас кадӧ прӧйдитны аккредитациясӧ чӧжсьӧм уджйӧз вӧсна да водзӧ уджаліс лицензиятӧг[7][8].

2019 вося вӧльгым тӧлысь 20-ӧд лунӧ УКТУ-са уджалысьяслӧн да велӧдчысьяслӧн конференция вылын ректорӧс бӧрйӧм кузя сійӧс бӧрйисны университетса ректорӧн, 89-ысь сы вӧсна вӧлі 64 делегат[9]. Россияса наука министерстволӧн 2020 во урасьӧм тӧлысь 10-ӧд лунся 20-02-02/26 №-а тшӧктӧдӧн Агиней Руслан Викторович вынсьӧдӧма «Укваса канму техническӧй университет» вылыс тшупӧда велӧдан федеральнӧй канму сьӧмкуд учреждениеса ректор чинӧ 2020 во урасьӧм тӧлысь 11-ӧд лунсянь 2025 во урасьӧм тӧлысь 10-ӧд лунӧдз 5 во кежлӧ[10].

2025 вося лӧддза-номъя тӧлысь 10-ӧд лунӧ выльысь индӧма ректорӧн 5 во кежлӧ[2].

Общественнӧй удж

• «Ресурсный центр „Арктика“» фондлӧн попечительскӧй сӧветӧ пырысь[11].

Наградаяс

• «Газпром ВНИИГАЗ» ичӧт кывкутана котырлӧн, «Газпром трансгаз Ухта» ичӧт кывкутана котырлӧн, «Гипрогазцентр» акционер котырлӧн филиалъяслӧн Почёт грамотаяс;
• Коми Республикаса Юралысьлӧн да Нижегородскӧй областьса вузасян да промышленносьт министерстволӧн аттьӧалана письмӧяс;
• 2010 воын босьтіс «Профессиональнӧй инженер» ним да лоис «Мусир да биару промышленносьт (туялӧмъяс)» номинацияын «Вося инженер» ставроссияса конкурсын лауреатӧн;
• 2014 воын лоис наука да техника юкӧнын «Газпром» публичнӧй акционер котырлӧн премияа лауреатӧн да А. М. Прохоров нима премияа лауреатӧн[12].

Пасйӧдъяс

  1. ↑ Руслан Агиней приступил к работе в должности врио ректора УГТУ. Шыӧдчан кадпас: 26 кӧч тӧлысь 2019. Архивируйтӧма 20 сора тӧлысь 2019.
  2. ↑ 1 2 Руслан Агиней утвержден в должности ректора УГТУ сроком на пять лет. БНКоми (10 лӧддза-номъя тӧлысь 2025). Шыӧдчан кадпас: 11 лӧддза-номъя тӧлысь 2025.
  3. ↑ На должность ректора УГТУ аттестован Руслан Агиней. Шыӧдчан кадпас: 26 кӧч тӧлысь 2019. Архивируйтӧма 26 кӧч тӧлысь 2019.
  4. ↑ Преподаватели попросили Дмитрия Медведева помочь посчитать деньги. Шыӧдчан кадпас: 26 кӧч тӧлысь 2019. Архивируйтӧма 26 кӧч тӧлысь 2019.
  5. ↑ В УГТУ сокращают зарплаты, избавляются от институтов и корпусов. Шыӧдчан кадпас: 26 кӧч тӧлысь 2019. Архивируйтӧма 26 кӧч тӧлысь 2019.
  6. ↑ В режиме экономии. Главный вуз Ухты раздирают внутренние войны. Шыӧдчан кадпас: 26 кӧч тӧлысь 2019. Архивируйтӧма 26 кӧч тӧлысь 2019.
  7. ↑ УГТУ не может вовремя пройти аккредитацию из-за долгов. Шыӧдчан кадпас: 10 урасьӧм тӧлысь 2020. Архивируйтӧма 27 йирым тӧлысь 2020.
  8. ↑ Уведомление об истечении срока действия государственной аккредитации образовательной деятельности ФГБОУ ВО «УГТУ». Шыӧдчан кадпас: 10 урасьӧм тӧлысь 2020. Архивируйтӧма 24 йирым тӧлысь 2020.
  9. ↑ Руслан Викторович Агиней. Состоялись выборы ректора УГТУ. Шыӧдчан кадпас: 10 урасьӧм тӧлысь 2020. Архивируйтӧма 22 йирым тӧлысь 2020.
  10. ↑ Врио ректора УГТУ Руслан Агиней: «Я знал, что буду учиться только в УГТУ» (неопр.). Шыӧдчан кадпас: 19 вӧльгым тӧлысь 2019. Архивируйтӧма 3 рака тӧлысь 2022.
  11. ↑ Команда (рус.). Ресурсный центр «Арктика». Шыӧдчан кадпас: 9 кӧч тӧлысь 2025.
  12. ↑ Руслан Викторович Агиней (рус.). Российский союз ректоров. Шыӧдчан кадпас: 9 кӧч тӧлысь 2025.
Босьтӧма "https://kv.ruwiki.ru/w/index.php?title=Агиней_Руслан_Викторович&oldid=483076"-ысь