Биармия

Босьтӧма Рувикиысь
Биармия
Биармия мусерпас
Биармия мусерпас
Мӧд нимъяс Бьярмия, Бьярмаланд
Экзотопонимъяс Биармиясаяс либӧ бьярмаяс
География регион Асыввыв Европалӧн войвыв
Логотип РУВИКИ.Медиа Медиафайлы на РУВИКИ.Медиа

Биа́рмия, либӧ Бьярмия, либӧ Бьярмаланд (норвегия Bjarmeland) — тайӧ важ финн-йӧгра му, Асыввыв Европа войвылын сагаяс да летописьяс серти тӧдса историческӧй обласьт. Сылӧн юркар вӧлі Кардор. «Биармия» сідзжӧ Каллистрат Жаковлӧн поэма.

История ӧшмӧсъяс

Биармия казьтывсьӧ Скандинавияса сагаясын:

  • Мича юрси Харальд йылысь сага;
  • Руд Ку Харальд йылысь сага;
  • Вежа Олаф йылысь сага;
  • Куш кока Магнус йылысь сага;
  • Одда Стрела йылысь сага;
  • Ньяла йылысь сага;
  • Уджач Стурлауг йылысь сага[1].

Бӧръя сертиыс, кутшӧмкӧ вичкоын видзӧны зэв уна озырлун, медшӧрыс на пиысь — единорог Урахорнлӧн сюр, сійӧ дивӧ кодь, но тырӧма ас дінас кыскан вынӧн: инмӧдчывны сыӧ куш киӧн оз позь. Конунг свеев мӧдӧдӧ Стурлаугӧс тайӧ сюрла. Хундинг йӧз-пон страна пыр Стурлауг веськалӧ Биармияӧ. Хундингъяс кватитӧны сійӧс ёртъясыскӧд, но Стурлауглӧн артмӧ мынтӧдчыны. Биармияын корсян местаысь найӧ аддзӧны вичкосӧ, кӧні Тора идол водзын куйлӧ Урахорн, коді тырӧма ядӧн, код водзын служитӧны комын нывбаба. На пиысь ӧтиыс мунӧ Хель ен вылӧ — сійӧ ыджыд тушаа да пемыдлӧз рӧма. Стурлауглы сійӧ шуӧ скӧрысь: судьбаыс пӧ сылӧн — лоны лязӧдӧмаӧн мельнича изкиясӧн. Стурлауглӧн артмӧ нуны Урахорнсӧ да вины жрицаӧс. Тӧдчана, мый тайӧ сагаас Биармияын олысьяс быттьӧ юрбитӧны скандинавияса енъяслы. Тайӧ, тыдалӧ, чайтӧмъяс, но тӧдчана сійӧ, мый скандинавияса ӧти зэв важ сага зэв бура петкӧдлӧ тайӧ фантастическӧй странасӧ[2].

Оттаралӧн Холугаландысь Биармияӧ да Англияӧ чайтана туй[⇨]

Биармия йылысь казьтывсьӧ роч Иоакимовскӧй летописьын  (рус.) (коми, вензяна ӧшмӧсын, кодӧс ХVIII нэмын аддзӧма В. Н. Татищев. Сы вылӧ, мый Иоакимовскӧй летопись гижысьыслы тӧдсаӧсь войвывса сагаяс, индыліс Б. А. Рыбаков[3][4].

Биармия казьтывсьӧ «Калевала»  (рус.) (коми карел-финн эпосын (Войвыв му — Бьярма).

Биармия казьтывсьӧ Элиас Лённротлӧн 1828—1842 вося путешествие туйвывса заметкаясын, дневникъясын, письмӧясын (туйвывса гижӧдъяс дорӧ пасйӧдъясын).

Сы йылысь сідзжӧ тшӧкыда казьтывлӧ Саксон Грамматик  (рус.) (коми[5].

Ӧткымын архаическӧй сикаса картаяс вылын Биармия XVI нэмын на меститчӧма Кола кӧдж шӧрын (шуам, Carta Marina[6]). Скандинавиялӧн шӧр нэмъясся картаяс серти (Олаф Магнуслӧн саридзвыв карта да мукӧд серти) найӧс серпасалысьяс пуктылісны Биармиясӧ Онега ты да Еджыд саридзлӧн Онега лайкола костӧ. XVI нэмся Рытыввыв Европаса гырысь картографъяс Меркатор да Ортелий кольӧмаӧсь Биармия нимсӧ Кола кӧдж шӧр юкӧнлы. Тайӧ жӧ кадӧ англияса да голландияса саридз кузя ветлысьяслӧн юӧр вылӧ подуласьӧм картаяс вылын Кола кӧджсӧ петкӧдлӧма Биармиятӧг[7][8][9].

Йӧз

Биармиясаяс либӧ бьярмаяс — йӧз, буракӧ, финнъяс рӧдысь, Биармияын олысьяс. Викингъяслӧн юӧр серти, бьярмаяс сёрнитлӧмаӧсь «терфиннъяс» («вӧрса финнъяс») кыв кодь кыв вылын, коді ӧні абу тӧдса.

История

Биармия медводдзаысь казьтывсьӧ Холугаландысь Оттарлӧн ветлӧм йылысь висьтын, коді вӧлӧма 870—890 вояс костын. Кыдзи ачыс Оттар гӧгӧрвоӧдіс Англияса король Альфред Великийлы, Холугаланд вӧлі ӧнія Норвегиялӧн медся войвыв крайӧн. Войвывланьынджык овлӧмаӧсь сӧмын лапландсаяс (мӧд ногӧн кӧ — саамъяс). Медым тӧдмавны, кутшӧм муяс куйлӧны Лапландия сайын, Оттар мӧдӧдчис берег пӧлӧн войвылӧ, кымынкӧ лун мысти сійӧ вӧлі виччысьӧ ньылыд тӧв, медым кывтны асыввылӧ, а сэсся кежис лунвылӧ, кӧні сылӧн карабыс пырис ыджыд ю вомӧ. Сэні олісны эз лапландияса йӧз, а бьярмасаяс, кодъяслӧн кывйыс вӧлі важ финн кыв кодь, да та вӧсна Оттар да сыкӧд тшӧтг мунысьяс вермисны сёрнитны накӧд. Кочуйтысь лапландсаясысь найӧ торъялісны сыӧн, мый бьярмаяс олісны ӧти местаын, вӧдитісны му да вӧліны озырӧсь.

Тӧдсаӧсь сідзжӧ 920, 1026 да 1090 вояс гӧгӧрын Биармияӧ ещӧ некымын ветлӧм йылысь висьтъяс. Сэні висьтавсьӧ, мый викингъяс вузасьӧмаӧсь татчӧс олысьяскӧд, ньӧбӧмаӧсь ур, мой да низь куяс да мынтысьӧмаӧсь сьӧмӧн, а сэсся панӧмаӧсь тыш да грабитӧмаӧсь биармияса Юмал енлысь вежаинсӧ. Лыддьыссьӧ, мый тайӧ енмыс финнъяслӧн, но висьтъясын сійӧс петкӧдчӧ ёнджыкасӧ сэтшӧм ногӧн, мый культыс артмӧма Урал сайын.

Саксон Грамматик (1140-ӧд во кымын — 1216-ӧд во кымын) юӧртӧ, мый Гольтер король кадӧ Финляндияӧн да Биармияӧн веськӧдліс кутшӧмкӧ Кузон. Норвегияса король Харальд Харфагер вӧчис Биармияӧ военнӧй поход. Снорре летописьын тадзи висьтавсьӧ та йылысь[10]:

«Сэсянь сійӧ (Гаральд Харфагер) кывтіс Финмаркенлань[11] войвылӧ дзик Биармияӧдз, кӧні вӧлі тыш. Сійӧ вермис да босьтіс уна эмбур-кӧлуй»

Саксон Грамматик тадзи гижӧ бьярмиясаясӧн кимӧститчан искусствоӧн вӧдитчӧм йылысь, кор петкӧдлӧ Регнеркӧд тыш, мый бӧрын Лодброк бӧрыньтчис да аддзис куртъяс (куршъяс) да сембъяс (пруссъяс) дорын юр сюянін[12]:

«Сэки биармиясаяс вежӧмаӧсь ӧружиелысь вынсӧ асланыс кимӧститчан искусство вылӧ. Гӧгӧрбок кутісны юргыны гажтӧм сьыланкывъяс, ӧти здукӧн мича шондіа енэжын чукӧрмисны кымӧръяс да сувтса зэрмис. Матігӧгӧрын лоис шуштӧм да гажтӧм»

Дзик татшӧм сяма висьтсӧ ми аддзам Исландияысь летопись гижысь Стурлесонлысь[13].

1217 воын Биармияӧ воисны норвегияса кык судно, ӧтиыс на пиысь муніс водзӧ Роч му пыр Вежа муӧ, медым пырӧдчыны крестӧвӧй походӧ. Мӧд судноса экипажӧс бырӧдісны татчӧс олысьяс. Водзӧс босьтӧм могысь 1222 воын Хакон IV король мӧдӧдіс ассьыс кык военачальникӧс нёль ыджыд судно вылын ён войскаӧн. Найӧ мунісны Биармияті биӧн да мечӧн, а бӧрсӧ локтісны эзысь сьӧмӧн да дона куясӧн[14]. Та бӧрын Биармия дугдіс казьтывсьыны скандинавияса ӧшмӧсъясын. Биармияса олысьяс пиысь ӧткымынъяс мунісны паракодъясӧн Норвегияӧ, кӧні Хакон король 1240 воын сетіс налы овмӧдчӧм вылӧ Холугаландын Маланген обласьтын муяс.

ХIII нэм кежлӧ скандинавъяс дугдісны ветлыны Биармияӧ, а Биармия кыввежӧртасыс вошӧ историяысь.

Рытыввыв Европаын Биармия йылысь тӧдмалісны сӧмын XVI нэм заводитчигӧн Саксон Грамматикалӧн небӧгысь, кодӧс медводдзаысь йӧзӧдісны Парижын 1514 воын[15].

Сӧмын 1539 воын швед гижысь да картограф Олаус Магнус (1490—1557 вояс) «Войвывса войтырлӧн история» небӧгын да сыӧн лӧсьӧдӧм карта вылын сетіс Биармия йылысь тӧдмӧгъяс. Биармиясӧ сійӧ меститіс Финляндиясянь войвывланьджык да войвыв Карелия (ӧні Мурманск обласьтса Кандалакшскӧй районлӧн мутас) да Кола кӧдж гӧгӧрын. Саксон Грамматиклӧн тӧдмӧгъяс вылӧ мыджсьӧмӧн сійӧ торйӧдіс кык Биармия: Матысса да Ылысса. Матысса Биармияын сылӧн вӧліны джуджыд гӧраяс да сэні куйліс нэмӧвӧйся лым. Сэні эз вӧв позянлун овны да сійӧ кутіс Европаса олысьясӧс Ылі Биармияӧ пырӧмысь, кӧні олісны кӧр видзысь да чери кыйысь племяяс. Муыс сэні вӧлі бур, но олысьясыс видз-мусӧ эз вӧдитлыны[7][16]. Кыдзи и Саксон Грамматика Олаф Магнус сёр шӧр нэмъясын тадзи гижліс бьярмасаяс йылысь:

«Биармияын олысьяс кужӧны смилитны йӧзсӧ. Видзӧдласӧн, кывъясӧн либӧ кутшӧмкӧ мӧд вӧчӧмторйӧн найӧ кужӧны сэтшӧма йитны йӧзсӧ, мый найӧ воштӧны садьсӧ, воштӧны вӧлясӧда тшӧкыда вӧчӧны гӧгӧрвотӧмторъяс».

География да археология юӧръяс

Медся ёна паськалӧма сэтшӧм видзӧдлас (та вӧсна сійӧс медся ёна критикуйтӧны), мый Бьярмия меститчӧ Войвыв Вынва (Вина ю) ковтысын да нюжалӧ Перым крайлӧн муясӧдз. Ӧні Войвыв Вынва ю сёртасын олӧны рочьяс да сійӧ артмӧдӧ Войвыв Европаса рытыввыв да асыввыв финн войтыръяс костын юкӧд, кӧть эськӧ важӧн сэні сідзжӧ овлісны саамъяс да финн-йӧгра войтыр (заволчскӧй чудь, тоймичьяс). Шӧр нэмъясса авторъяс Адам Бременский да Снорри Стурлусон лыддисны, мый Бьярмияӧ туйыс мунӧ Еджыд саридз пыр. На бӧрын тайӧ гипотезасӧ вӧзйис Ломоносовлӧн оппонент Г. Миллер. Сійӧ лыддьыліс, мый Биармиялӧн шӧринӧн вӧлі Холмогоры, а Холмогорыысь нин варягъяс вуджисны Новгородӧ, нимтісны сійӧс Холмогоры ним кузя Хольмгардӧн[17]. Ломоносов босьтіс тайӧс тӧд вылӧ, сійӧ сувтіс паныд сӧмын сылы, мый Холмогорыыс шусьылісны Хольмгардӧн. Сэк жӧ Холмогорыын да сыкӧд орчча муясын нӧрысъясыс, ни гӧраясыс эз вӧвны[18].

Новгородса летописьын казьтывсьӧ, мый норманнъяс (мурманъяс) уськӧдчывлісны Ыджыд Новгородлӧн муяс вылӧ. Тадзи 1419 воын Войвыв Вынва вомӧ воисны Норвегияса олысьяс: «саридзсянь воисны Мурманъяс, 500 морт, тыш панӧм могысь, бусаӧсь да шнекъясаӧсь». Найӧ сотісны Ягры ді вылын Николо-Корельскӧй манастыр. 1445 воын: «…приидоша Свѣя Мурманѣ безвѣстно за Волокъ на Двину ратью, на Нёноксу, повоевавъ и пожгоша и людеи пересѣкоша, а иных в полонъ поведоша. Услышавше то двинянѣ, придоша вборзѣ, иных иссѣкоша, а иных прислаша въ Новъгород с четыредесятъ; а воеводы ихъ, Ивора и Петра и третьего, убиша; инѣи же, мало вметавшеся в корабли, отбѣгоша»[19]. Рочьяс пинясьлісныс норманнъяскӧд медсясӧ чери кыйӧм вӧсна, сы вӧсна мый сыысь Норвегияса олысьяс босьтлісны вуз-вот да тшӧкыда пыравлісны сэтчӧ грабитӧм могысь. Заволочьеса олысьяс талы воча асьныс уськӧдчывлісны Норвегияса муяс вылӧ (1349, 1411, 1419 да 1425 вояс)[20]. Тайӧ петкӧдлӧ, мый Шӧр нэмъясӧ йӧзыс вӧдитчывлӧмаӧсь Норвегиясянь Россияса войвылӧ мунысь саридз туйӧн, да XV нэмын Норвегияса олысьяс збыльысь волывлӧмаӧсь Войвыв Вынва берегъяс дорӧ.

Иоганн Шеффер «Лапония» небӧгын Биармиялысь мудоръяссӧ паськӧдӧма Ладога тыӧдз да Финн куръяӧдз, сэтчӧ тшӧтш пыртӧма ставнас Карелиясӧ[21].

1730 воын Ф. И. фон Страленберг вӧзйис татшӧм видзӧдлас, кӧні ӧткодялӧны Ыджыд Перымӧс да скандинавияса сагаясын казьтывлӧм Биармияӧс: «Мӧд пристаньыс вӧлі Биармияын либӧ Ыджыд Пермын Чердын кар дорын» да пасйис, мый «в Европе суть Великая Пермиа, которую древность Биармаланд называет, и прежде превеликую часть земли в себе заключала»[22]. История туялӧмъясын Перым-Биармия гипотезаыс ыджыдаліс ХІХ нэм заводитчытӧдз[23] да сійӧс примитлісны, торйӧн кӧ, В. Н. Татищев, М. В. Ломоносов да Н. М. Карамзин[24]. XIX—XX нэмъясӧ тайӧ гипотезасӧ критикуйтӧмаӧсь [⇨]. Торъя туялысьяс шуӧны, мый Биармиялӧн вермана местаясыс — тайӧ Балтикаберд, Карелия да Волгаса Булгария[1].

Перымса археолог А. А. Дмитриев тӧдчӧдліс, мый «нуӧдӧм корсьысьӧмъясыс петкӧдлісны, мый некутшӧм важся да вына Биармия абу. Сійӧ казьтывсьӧ преданньӧясын, сӧмын абу татчӧс, а бокӧвӧй — скандинавияса преданньӧясын», сідзкӧ, Перым да мифическӧй Биармия ӧткодялӧм йылысь сёрниыс оз вермы лоны[25].

С. К. Кузнецов чайтліс, мый Оттарлӧн Биармия вӧлӧма либӧ Варангер-фьорд дорын, либӧ Кола лайкола дорын, сы вӧсна мый буретш Варангер да Рыбачий кӧджъяс гӧгӧрын берегыс бергӧдчӧ лунвылӧ. Сылӧн видзӧдлас серти, «Войвыв Вынва берегъяс вылын да Ыджыд Перым пытшкын Биармияыс — тайӧ пӧрйӧг, наука боксянь ылӧдчӧм, кодӧс колӧ дугӧдны дзик пыр»[26].

А. М. Талльгрен чайтӧм серти Биармия вӧлі Ладога бердын, а биармасаяс вӧліны карелъясӧн[27].

1950-ӧд воясӧ историк Михаил Иванович Белов воис кывкӧртӧдӧ, мый Оттар эз вермы 15 лунӧн воӧдчыны Еджыд саридзӧдз, а сійӧ вермис кывтны сӧмын Баренц саридзса Кола лайкола берегъяс дорӧдз.

Г. В. Глазырина лыддьыліс, мый сагаяс висьталӧны кык регион йылысь: Беломорье да Ладога гӧгӧрса муяс йылысь. Оттар, сылӧн чайтӧм серти, некор эз вуджлы Еджыд саридзлысь Голясӧ, сувтліс Терскӧй берег вылӧ, гашкӧ, Воронов мыслы паныд. «Хальвдан йылысь сага» анализируйтӧм бӧрын Глазырина вӧчис кывкӧртӧд, мый Биармиясӧ иналӧма Ладога бердын[28].

Андрей Леонидович Никитин, Саксонияса король Альфредлы Оттар Вестфольдинглысь Биармияӧ кывтӧм йылысь висьталӧмсӧ да Снури Стурлуссонлысь скандинавъяс Карлиӧн да Торир Собакаӧн Биармияын Йомала/Юмала вичко грабитӧм йылысь «В круге земном» висьтсӧ датскӧй лоцияяс туялӧмкӧд йитӧмӧн, кодӧс нуӧдіс И. П. Шаскольский, йитӧ скандинавияса «Биармия», «Бьярмаланд», «беормъяслӧн» муяс, «бьярмаяс» терминъяссӧ Рига саридз («Гандвик») вадоркӧд да Рытыввыв Вынва (Вина/Дуна) увтасінъяскӧд, а бьярмаясӧн лыддьӧ ливъясӧс да куронъясӧс/куршъясӧс[29][30][4].

Ним артмӧм

К. Ф. Тиандер «Поездки скандинавов в Белое море» уджын вӧзйис чайтӧм сы йылысь, мый скандинавияса «berm» кывйыс петкӧдлӧ «берегдорса йӧз» вежӧртас[4][27]. Б. В. Бубрих чайтліс, мый Bjarmaland да Bjarmar вермасны лоны артмӧмаӧсь балтикабердса финн «peramaa» — «бӧрса му», «суйӧрсайса му» кывъясысь[31].

Хакон, Хакон пи йылысь сагаын гижӧма, кыдзи биармасаяс пышйисны монгол-тотараысь, а Эдмунд сагаын Ярославлӧн Киевса престол вӧсна тыш йылысь гижигӧн биармасаяс петкӧдчӧны историческӧй печенегъяс местаын[27].

Важ роч ӧшмӧсъяслы Биармия топоним абу тӧдса, та вӧсна туялысьяс, торйӧн нин XIX нэмын, ӧткодявлісны этимология боксянь матысса Бьярмия да Ыджыд Перым топонимъяс (сылӧн шӧр нэмъясса вежӧртасын), кыдзи Асыв-Войвыв Европаса финн-йӧгра муяс петкӧдлӧм. Тайӧ ӧткодялӧмыс мыджсис кык медшӧр видзӧдлас вылӧ. Ӧти-кӧ, Холугаландысь Оттар пасйыліс, мый бьярмасаяс сёрнитӧны пӧшти сійӧ жӧ кыв вылын, кыдзи и «финнъяс» (тадзи викингъяс шулісны саамъясӧс).

Ӧнія финн-йӧгратӧдысьяс серти, важ скандинавияса Bjarmaland кыв, кыдзи и важся роч Перемь, Перьмь кывъяс артмӧны финн perämаа, вепс perämaa «бӧръя му» кывъясысь. Медводзсӧ тайӧ кывъясыс петкӧдлісны Еджыд саридз берегдорса балтикаберд-финнса кутшӧмкӧ мутас. Важ роч колонизация дырйи Перым топоним вешйис асыввылӧ да вуджис комилӧн (Эжва Перым), а сэсся и перым коми (Ыджыд Перым) пӧль-пӧчьяслы[32].

Биармияӧс Перымкӧд да Еджыд саридз берегдоркӧд ӧткодялӧмлы паныд медводдзаӧн XVIII нэмын сувтіс В. В. Крестинин[33]. ХХ нэм заводитчигӧн С. К. Кузнецов гижліс, мый «Вынва берегъяс вылын да Ыджыд Перымын Биармия — тайӧ пӧрйӧг, наука боксянь ылӧдчӧм, кодӧс колӧ дугӧдны дзик пыр»[34].

Тӧдчанлун

  • Перымын Плеханов нима улича революцияӧдз шусис Биармскӧй уличаӧн[35].
  • Биармиялысь нимсӧ сетӧма Перым крайын аддзӧм синапсид биармозухлы.
  • Биармиялысь нимсӧ сетӧма астероидлы (1146), кодӧс 1929 вося ода-кора тӧлысь 7-ӧд лунӧ Симеизса обсерваторияын восьтіс сӧветскӧй астроном Григорий Неуймин[36].
  • Биармия (Biarmia) ним сетӧма Коми Республикаын вузасянінъяслы да тадзи шусьӧ тайӧ регионын флисысь паськӧм вӧчысь[37].

Биармия художествоа литератураын

  • Валентин Ивановлӧн «Повести древних лет» небӧгын висьтавсьӧ Новгородса олысьясӧн биармасаяскӧд медводдзаысь аддзысьлӧм, Войвыв Вынва вылын неыджыд овмӧдчӧмин стрӧитӧм да виччысьтӧг на вылӧ уськӧдчысь ярл Оттарлӧн викингъясысь ӧтвылысь дорйысьӧм йылысь, кӧні найӧ видзисны ассьыныс мунысӧ.
  • Биармиялысь наследиесӧ да гусяторъяссӧ корсьӧмлы сиӧма «географическӧй фантастика» жанрын гижӧм З. Троевлысь «Страна огненных лучей» висьтсӧ, кодӧс йӧзӧдӧма «Костёр» журналын (4 №, 1959 во)[38].
  • Карелия Республикаса национальнӧй театрын (Петрозаводск кар) пуктӧма Е. Сойнилӧн роч кыв вылын гижӧм пьеса серти В. Панченколӧн шылад вылӧ финн кыв вылын «Биармия» мюзикл.
  • «Биармия» — коми поэт Каллистрат Жаковлӧн поэма.
  • Осип Сенковскийлӧн (1800—1858 вояс) небӧгъясын[39] уна висьтавсьӧ Святославлӧн Биармиякӧд тыш йылысь, код улын гӧгӧрвосьӧ ӧнія Россиялӧн пӧшти став Асыв-Войвылыс.
  • Биармия кыдзи океан берегвывса му йылысь казьтывсьӧ А. Прозоровлӧн «Ведун. Воин мрака» небӧгын.

Пасйӧдъяс

  1. ↑ 1 2 Жикина Г. В. Биармия: в поисках истины. — 2001.
  2. ↑ Петрухин В.Я. Мифы финно-угров. — Москва: АСТ, 2005.
  3. ↑ 'Рыбаков Б. А. Древняя Русь. — М., 1963. — 37 с.
  4. ↑ 1 2 3 Никитин А. Л. Биармия и Древняя Русь // Вопросы истории. — 1976. — № 7. — С. 56—69.
  5. ↑ Саксон Грамматик. Деяния данов. Шыӧдчан кадпас: 11 кӧч тӧлысь 2025. Архивируйтӧма 27 моз тӧлысь 2017.
  6. ↑ 16 век — Кольские карты. Шыӧдчан кадпас: 11 кӧч тӧлысь 2025. Архивируйтӧма 5 лӧддза-номъя тӧлысь 2019.
  7. ↑ 1 2 Булатов В. Н. Русский Север. Заволочье (IX−XVI вв.). — Архангельск: Издательство Поморского государственного университета имени М. В. Ломоносова, 1997. — С. 14—33.
  8. ↑ 'Осипов И. А. Антоний Дженкинсон и карта России 1562 г..
  9. ↑ 'Савельева Е. А. Олаус Магнус и его «История северных народов». — Л., 1983. — С. 46—47.
  10. ↑ Иоганн Шеффер. Глава VI. О происхождении лопарского народа. — 1673.
  11. ↑ Тані Финмаркен улын гӧгӧрвосьӧ оз Финляндия, а Финнмарк, Норвегиялӧн войвыв обласьт.
  12. ↑ Грамматик Саксон. Деяния данов. — Т. 1. — С. 210.
  13. ↑ Иоганн Шеффер. «Лаппония», гл.11. Шыӧдчан кадпас: 10 кӧч тӧлысь 2025. Архивируйтӧма 4 рака тӧлысь 2016.
  14. ↑ A.M.Strinnholm. Svenska folkets historia fran aldesta till narvarande tider. — 1835.
  15. ↑ 'Джаксон Т. Н., Глазырина Г. В. Русский Север в древнескандинавской письменности: Отечественная историография вопроса о локализации Бьярмии XVIII—XIX вв. // История и культура Архангельского Севера (досоветский период). — Вологда, 1986. — С. 8.
  16. ↑ Савельева Е. А. Олаус Магнус и его «История северных народов». — Л., 1983. — С. 46—47.
  17. ↑ Фомин В. В. Ломоносов и Миллер. Два подхода к решению варяжского вопроса // История и историки. — 2004. — № 1.
  18. ↑ Леонтьев А. И., Леонтьева М. В. Биармия — северная колыбель Руси. — 2007.
  19. ↑ Новгородская первая летопись младшего извода
  20. ↑ Биармия // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907.
  21. ↑ Биармия. И как Татищев расшифровывал слово — Пермь! Шыӧдчан кадпас: 10 кӧч тӧлысь 2025.
  22. ↑ Корчагин П. А. Пермь. «Что в имени» // Вестник Пермского научного центра УрО РАН. — 2013. — № 4. — С. 4—5.
  23. ↑ A.M.Strinnholm. Svenska folkets historia fran aldesta till narvarande tider. — 1835.
  24. ↑ Корчагин П. А. Пермь. «Что в имени» // Вестник Пермского научного центра УрО РАН. — 2013. — № 4. — С. 5.
  25. ↑ Никитин А. Л. Тайна двух Биармий // Север. — 1984. — № 3. — С. 88—89.
  26. ↑ Кузнецов С. К. К вопросу о Биармии. — М.: Поставщик Двора Его Величества Т-во Скороп. А. А. Левенсон, 1905. — 95 с.
  27. ↑ 1 2 3 Марков А. А. К реконструкции представлений о локализации Биармии (Бьярмленда) в средневековых источниках.
  28. ↑ Леонтьев А. И., Леонтьева М. В. Биармия — северная колыбель Руси. — 2007.
  29. ↑ Никитин А. Л. Основания русской истории. Мифологемы и факты // Биармия / Biarmaland скандинавских саг. — М., 2001. — С. 672—700.
  30. ↑ Никитин А. Л. Королевская сага. — Москва: Молодая Гвардия, 1986. — 494 с.
  31. ↑ Бубрих Д. В. Происхождение карельского народа. — Петрозаводск: 1974. — 30 с.
  32. ↑ Напольских В. В. Введение в историческую уралистику. — Ижевск: УИИЯЛ УрО РАН, 1997. — С. 20, 56.
  33. ↑ Крестинин В. В. Начертание истории города Холмогор. — СПб.: изд. Озерецковского, 1790.
  34. ↑ Кузнецов С. К. К вопросу о Биармии. — М.: Поставщик Двора Его Величества Т-во Скороп. А. А. Левенсон, 1905. — 95 с.
  35. ↑ Справочник «Улицы Перми» (рус.). Пермский региональный сервер. Шыӧдчан кадпас: 11 кӧч тӧлысь 2025.
  36. ↑ Schmadel, Lutz D. Dictionary of Minor Planet Names (англ.). — Fifth Revised and Enlarged Edition. — B., Heidelberg, N. Y.: Springer, 2003. — P. 97. — ISBN 3-540-00238-3.
  37. ↑ «Бизнесмен из народа»: Наталья Холопова — директор известной фабрики «Биармия» (рус.). Комсомольская правда. Шыӧдчан кадпас: 11 кӧч тӧлысь 2025.
  38. ↑ Костер. 1959. № 04: Ежемесячный детский журнал. Шыӧдчан кадпас: 28 урасьӧм тӧлысь 2020. Архивируйтӧма 17 кӧч тӧлысь 2017.
  39. ↑ Собрание сочинений Сенковского (Барона Брамбеуса). — СПб.: тип. Имп. Акад. наук, 1858—1859. — Т. 1—9.

Литература

  • Рудаков В. Е. Биармия // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907.
  • Татищев Василий Никитич (1686—1750 гг.). История российская с самых древнейших времен / Неусыпными трудами чрез тритцать лет собранная и описанная покойным тайным советником и астраханским губернатором, Васильем Никитичем Татищевым. — Москва: Напеч. при Имп. Моск. ун-те, 1768—1848.
  • Леонтьев А. И., Леонтьева М. В. Биармия — северная колыбель Руси. — М.: Алгоритм, 2007. — 256 с.
  • Никитин А. Л. Королевская сага. — М.: Молодая Гвардия, 1986. — С. 333—493.
  • Никитин А. Л. Биармия/Bjarmaland скандинавских саг. — М.: АГРАФ, 2001. — С. 673—700.
  • Тиандер К. Ф. Поездки скандинавов в Белое море. — СПб.: Тип. И. Н. Скороходова, 1906. — 464 с.
    • Переизд.: Тиандер К. Ф. Поездки скандинавов в Белое море/ Под ред. С. Э. Ласточкина. — М.: Вече, 2020. — 400 с.

Ыстӧгъяс

Босьтӧма "https://kv.ruwiki.ru/w/index.php?title=Биармия&oldid=483145"-ысь