Варыш
Варыш (рочӧн ястреб, коршун[1], латин Accipitrinae) — яй сёйысь лэбачьяслӧн котыр. Паськыдджыка кӧ, варышӧн шуӧны тайӧ котырысь любӧй лэбачӧс. Россияын ёна паськалӧмаӧсь сьӧла варыш да дозмӧр варыш.
Комиын варышнас шуӧны и тайӧ жӧ рӧдысь мӧд сикас лэбачьясӧс (рочӧн сокол)[2].
Ортсы
Тылабордаяс пӧвстын найӧ медся гырысьӧсь. Увлань крукыльтчӧм нырныс ён да лэчыд. Коканыс гыжъясыс гырысьӧсь да ёнӧсь, синъясыс ылысь-ылысь аддзӧны. Познысӧ вӧчӧны джуджыд пуяс вылӧ. Пияныс колькйысь петӧны синма-гӧнаӧсь нин. Кӧть и азымӧсь, быдмӧны найӧ ньӧжйӧникӧн, лэбавны пондӧны сӧмын арланьыс, та вӧсна бать-мамныслы лоӧ вердны-дӧзьӧритны гожӧмбыд. Олӧны варышъяс во комын-нелямын.
Этимология
Варыш кывйыс зэв важся, удмуртъяслӧн да перым комияслӧн тшӧтш «варыш», финъяслӧн «варис», эмӧсь весьтасъяс сідзжӧ ӧнія мордвалӧн, яранъяслӧн, йӧгралӧн, лопаръяслӧн сёрниын, но ылыс рӧдвуж кывъясса нимъясыс лӧсялӧны сӧмын мыгӧрнас, а вежӧртаснас — оз, варышнас сэні ракаӧс шуӧны[3].
Сикасъяс
Коми муын паныдасьлысь варышъясӧс туялысь-тӧдысьяс торйӧдӧны на пӧвстысь дас сизим сикасӧс[4].
Варыш (рочӧн ястреб, коршун, латин Accipitridae) сикасъяс:
Варышъяслӧн вель уна ним артмӧма сы серти, кутшӧм сёянӧн найӧ пӧткӧдчӧны: дозмӧр варыш, курӧг варыш (рочӧн ястреб-тетеревятник), чери варыш, тшуж варыш (рочӧн скопа), еджыд бӧжа чери варыш (рочӧн орлан-белохвост), кеня варыш, кӧньварыш, кӧнью-варыш, тӧв юысь варыш, пивган варыш(рочӧн обыкновенный сарыч), шыр куталысь варыш (рочӧн полевой лунь), чушканзі сёйысь варыш (рочӧн осоед), ыджыд кутш (рочӧн орел беркут), кутш (рочӧн большой подорлик), тивти варыш (рочӧн черный коршун), гӧна кока варыш (рочӧн мохноногий канюк, зимняк), лёк варыш (рочӧн ястреб-перепелятник).
Варыш (рочӧн сокол, латин Falconidae) сикасъяс:
Сӧкӧл варыш, канэвей (изьва (рочӧн сапсан), байдӧг варыш (рочӧн кречет), кай варыш, тивти варыш (рочӧн чеглок), джыдж варыш (рочӧн дербник), дзоля варыш (рочӧн кобчик), шыр варыш (рочӧн пустельга).
Коми культураын ин
Варыш — зэв тӧдчана лэбач коми культураын.
Сійӧ лоӧ Коми Республикалӧн официал символӧн — серпасалӧма Коми Республикаса канпасын и Коми Республикаса кыпсӧ лӧсьӧдӧма Нёбдінса Витторлӧн «Варыш поз» сьыланкыв вылӧ подуласьӧмӧн.
Ыстӧгъяс
- ↑ Ракин А.Н. Пемӧс нимъяслӧн кывкуд. Сыктывкар: Коми небӧг лэдзанін, 2001. 264 лб.
- ↑ Безносикова Л. М., Забоева Н.К., Коснырева Р.И. Русско-коми словарь: Более 52 000 слов / Институт языка, литературы и истории Коми научного центра Уральского отделения Российской академии наук; под редакцией Л.М. Безносиковой. Сыктывкар: Коми книжное издательство, 2003. 1004 с.
- ↑ Ракин А.Н. Вӧр-васа олысьяс. — Сыктывкар: Анбур, 2017. — 240 л.б.
- ↑ Остроумов Н.А. Животный мир Коми АССР. Позвоночные. — Сыктывкар: Коми книжное издательство, 1972.