Коми Республикаса канпас
| Коми Республикаса канпас | |
|---|---|
 | |
| Детальяс | |
| Вынсьӧдӧма | 1994 вося лӧддза-номъя тӧлысь 6-ӧд лунӧ |
| РФ-са канму геральдика регистрын номер | 153 |
| Канпаслӧн автор | А. Неверов |
Коми Республикаса канпас (рочӧн Герб Республики Коми)— Коми Республикалӧн канму символ. Вынсьӧдӧма 1994 вося лӧддза-номъя тӧлысь 6-ӧд лунӧ.
Регистрируйтӧма 153 № улын Россияса канму геральдика регистрын[1].
Канпас гӧгӧрвоӧдӧм
Перымса зверинӧй стиль серти серпасалӧм гӧрд геральдическӧй пӧв вылын зарни варыш: лэбач морӧсас — аньлӧн чужӧмбан, кодӧс кытшалӧ квайт йӧра юр. Енлы эскан «Лэбач-морт-йӧра» композицияын тӧдчӧ комилӧн мифологическӧй видзӧдлас[1].
Символика
Сюжетлӧн символика:
•Канпасын эм унатор важ коми мифологияысь да вӧчӧма перым пемӧс стильын. Канпассӧ серпасалігӧн вӧлі подуласьӧма шевкнитӧм бордъяса зарни варыш вылӧ, кодлӧн морӧсас квайт йӧра юр кытшын аньлӧн чужӧм.
•Коми йӧзлӧн эскӧмъяс серти, лэбзьысь варышыс петкӧдлӧ шонді, власьт, медвылыс мир. Лэбачлӧн морӧсас аньлӧн чужӧмыс — Зарни аньлӧн, олӧм радейтысь шондіа ань енлӧн, мир кутысь мамлон, чужӧм. А йӧра — тайӧ вынйӧра да аслыссикас вӧрса пемӧс, йӧра петкӧдлӧ ёнлун, веськыдлун, мичлун. Космологическӧй петкӧдлӧмъясын сійӧ гӧгӧрвоӧдӧ мир гӧгӧрбок лӧсьыда артмӧдӧмлысь синтез.
•Шевкнитӧм бордъяса лэбачыс быттьӧ артмӧдӧ перна. Сійӧс позьӧ гӧгӧрвоны и кыдзи канму да духовнӧй власьтлысь пас[2].
Рӧмлӧн символика:
•Зарни да гӧрд рӧмъяссӧ канпасын ӧтлаалӧмыс петкӧдлӧ коми фольклорын асъя, тувсовъя, бур шонді, мамлун да чужӧм. Такӧд тшӧтш, ӧнія общественно-политическӧй гӧгӧрвоӧдӧмын гӧрдыс (фоныс) петкӧдлӧ войтырлысь да власьтлысь водзмӧстчӧмсӧ, авъялунсӧ, а пӧв формакӧд лӧсялӧмыс висьталӧ уна сикас войтыра Российскӧй государствоӧ пырысь коми войтырлӧн историческӧй олӧм йылысь[2].
История
XVI нэм помын канму печатьлӧн элементӧн Удораса руч кодь эмблема петкӧдліс Коми мусӧ, кыдзи ӧтувъя роч канмулысь юкӧн.
1937 воын вынсьӧдӧм Коми АССР-лӧн канпасыс вӧлі ӧткодь РСФСР-са канпаскӧд. Торъялӧмыс вӧлі сӧмын «РСФСР» да «Став мувывса пролетарийяс, ӧтувтчӧй!» гижӧдъясын. Найӧс вӧлі гижӧма кык кыв вылын: коми да роч. Тайӧ канпаснас вӧдитчисны 1994 воӧдз.
Обдориялӧн да Удориялӧн канпас (XVI нэм пом)
Коми АССР-са канпас (1937—1978)
Коми АССР-са канпас (1978—1994)
.png)
Видзӧдӧй тшӧтш
• Коми Республикалӧн дӧрапас
• Коми Республикаса кып
Пасйӧдъяс
- ↑ 1 2 Герб Республики Коми, Геральдика. Шыӧдчан кадпас: 26 рака тӧлысь 2025.
- ↑ 1 2 Коми Республикаса каналан пасъяс, Официальный сайт Республики Коми. Шыӧдчан кадпас: 26 рака тӧлысь 2025.
Ыстӧгъяс
• Коми Республикаса канму йылысь Коми Республикаса оланпас
• Коми - гербы и флаги
• Мерников А.Г. Геральдика России. М.: Мир энциклопедий Аванта, 2008. — С. 405-407, Гербовед. Шыӧдчан кадпас: 26 рака тӧлысь 2025..
• Сапрыков В. Птица Республики Коми, Геральдика. Шыӧдчан кадпас: 26 рака тӧлысь 2025..