Емва сёрнисикас

Рецензируйтӧм гижӧд

Рецензент: Мусанов Алексей Геннадьевич

Емва сёрнисикас - коми кывлӧн дас сёрнисикасысь ӧти, сійӧ пырӧ лунвыв сёрнисикасъяс группаӧ.

Паськалӧм

Паськалӧма Емва ю ковтысын, ю катыд да шӧр визувса оланінъясын, а сідзжӧ Синдор ты дорын. Районса административнӧй шӧринӧн лоӧ Емва кар (1985 воӧдз - Железнодорожнӧй посёлок).

Артмӧм да сӧвмӧм

Емва сёрнисикас абу ӧткодь. Сійӧ юксьӧ куим зона вылӧ: Вылыс Емва зона, Шӧр Емва сёрнисикасъяс да вуджан зона. Шӧр Емва сёрнисикасъяслӧн (Емва кар дорын матысса овмӧдчӧминъясын) эмӧсь кутшӧмсюрӧ фонетико-морфологическӧй (кыв артмӧм, кыв вежсьӧм) да лексическӧй торъялӧмъяс Вылыс Емва зонаса сёрниысь. Вуджан сикаса сёрнисикасъясыс артмисны Эжвагорувса сёрнисикас тӧдчӧм улын.

Аслыспӧлӧслунъяс

Емва сёрнисикаслӧн эмӧсь фонетика да морфология боксянь татшӧм аслыспӧлӧслунъяс:

• Медшӧр аслыспӧлӧслунӧн лунӧн лоӧны кузь гласнӧйяс - [ыы], [ӧӧ], [уу], [оо]: ныы «ныв», ныыка «нывка», кыы «кыв», вӧӧ «вӧв», пуу «пув», лоо «лов»;
• Эм гласнӧй шыяслӧн лабиализация серти абу тырвыйӧ аскодясьӧм, кор кывдінлӧн помся гласнӧйыс аскодялӧ сы бӧрын мунысь суффикслысь гласнӧйсӧ: воомыд «воӧмыд», лоомыд «лоӧмыд»;
• Пинь дорын артман согласнӧйяс водзын [дз],[ч], [дж], [тш] аффрикатаяс вежсьӧны: лэсьтан «лэчтан», визь нимъяс «видз нимъяс», ышта «ыджда»;
• Уна лыда суффиксын [й] шысӧ аскодялӧ воддза согласнӧйыс: даддяс «дадьяс», кынняс «кыньяс»;
• [г], [к] шыяс вежсьӧны [и], [е] шыяс тӧдчӧм вӧсна: дид «гид», терка «керка»;
• -ст, -сьт, -шт тэчасъясын бӧръя т шыыс усьӧ: рукӧсны «рукӧстны», весь «весьт», вайыш «вайышт»;
• Эмакывлӧн сетан вежлӧг -лы вермас лоны подлежащӧй да веськыд дополнение петкӧдлысьӧн индан да тӧдчӧдан функцияын: Челядьлы сьӧкта ме быттi «Сьӧкыда ме быдтӧ ассьым челядьӧс».
• Эмакывлӧн ылыстчан вежлӧг вермӧ петкодлыссьыны кык суффиксӧн — -сянь да -ыседз: Веслянаыседз йӧзыс волiсны «Веслянаысь йӧзыс волісны»;
• 1 да 2 морта нимвежтасъяслӧн эмӧсь вариантъяс: вуджан сёрниын менам, меям «менам», мукӧд сёрниын менам, меам, тэад и тэнад;
• Колян када соссяна кадакыв да тшӧктана кадакыв заводитчӧ [и] шысянь: иг сьыы «эг сьыв», ин сьыы «эн сьыв», из сьыы «эз сьыв»;
• Инфинитивлӧн индан-асалан формаыс артмӧ -ныам, -ныад, -ныас, -ныаным, -ныаныд, ныаныс суффиксъяс отсӧгӧн: сьыыныам «меным сьывны», сьыыныад «тэныд сьывны», сьыыныас «сылы сьывны», сьыыныаным «миян сьывны», сьыыныаныд «тіян сьывны», сьыыныаныс «налы сьывны»;
• Эмӧсь аслыспӧлӧс изобразительнӧй урчитанъяс: сярк пуан ва «ёна пуысь ва», тiрскӧб чеччис «тэрмасьӧмӧн чеччис», тшук суутiс «виччысьтӧг сувтіс»;
• Ёна паныдасьлӧны -укъян, -асся (-ясся), -тей, -ок лелькуйтан суффиксъяс да кывбердлӧн — иньдзик ичӧтмӧдан суффикс: Санюкъян «Санечка», зятясся «зятюшко», кысатей «кысук», тыок «тыук», ӧттӧминьдзи «оттӧмкодь».

Туялӧм

Емва сёрнисикассӧ заводитісны туявны XIX нэм помын. Медводдзаысь сійӧс казьтылӧма Н. П. Попов «Полный русско-зырянский словарь» уджын. Сэк тайӧ сёрнисикассӧ эз торйӧдны: емвайывса сёрниногсӧ йитісны Изьва сёрнисикаскӧд, а мукӧдсӧ — Эжвагорувса сёрнисикаскӧд. Медводдзаӧн торйӧдіс сійӧс Д. Р. Фокош-Фукс, коді воліс Коми муӧ да бӧрынджык (1916-1917 воясӧ) йӧзӧдіс гижӧм текстъяссӧ. 1946-50 воясӧ туялӧмаӧсь В. И. Лыткин да А. С. Сидоров. Сёрнисикасъяслысь лексикасӧ вӧлі петкӧдлӧма коми-роч кывкудйын да видлалӧма В. И. Лыткинлӧн некымын статьяын.
Тырвыйӧ туялӧвны заводитіс XX нэмся 40-ӧд воясын Т. И. Жилина. Сійӧ чукӧртіс материал Емдінын А. С. Сидоров юрнуӧдӧм улын, сэсся дорйис «Именные категории верхне-вымских говоров северного диалекта коми языка» кандидатскӧй диссертация (1951). Чукӧртӧм лексическӧй материалсӧ Т. И. Жилина содтіс «Сравнительный словарь коми-зырянских диалектов» уджӧ (1961). Сійӧ дженьыдика сикасалӧма сёрнисикассӧ «Образцы коми-зырянской речи» сборникын (1971).
Сёрнисикассӧ пыді туяліс и В. А. Ляшев.

Литература

• Лыткин В. И. Диалектологическая хрестоматия по пермским языкам. — М., 1955.
• Баталова Р. М. Коми(-зырянский) язык // Языки мира: Уральские языки. — М.: «Наука», 1993. — 214—229 с. — ISBN 5-02-011069-8.
• Ляшев В.А. Вымский диалект // Коми язык. Энциклопедия. — М.: Изд-во ДиК, 1998. — С. 68-70. — ISBN 5-7903-0045-6.
• Жилина Т.И. Вымский диалект коми языка. — Сыктывкар, 1998.
• Игушев Е.А. Коми сёрнисикасъяс. — Сыктывкар, 1996.
• Безносикова Л. М., Забоева Н. К., Айбабина Е. А., Коснырева Р. И. Словарь диалектов коми языка: в 2-х томах. — Сыктывкар: ООО «Издательство «Кола», 2012.
• Ляшев В. А. Фонетико-морфологические особенности вымского диалекта. Диссертация на соискание ученой степени кандидата филологических наук. Сыктывкар, 1977 (Рукопись. Научный архив Коми научного центра УрО РАН, ф.5., оп.2, ед.хр.218).

Пасйӧдъяс