Зарни Ань (ансамбль)
| Зарни Ань | |
|---|---|
 | |
| Медшӧр юӧр | |
| Жанръяс | фолк, поп, этно-электроника |
| Вояс | 1996 восянь — ӧніӧдз |
| Страна |
 Россия |
| Ин | Сыктывкар |
| Лейблъяс | U-MAK Records |
«Зарни Ань» ансамбль — коми войтырлысь шыладсӧ да сьыланкывъяссӧ петкӧдлысь ӧнія кадся Коми Республикаса ансамбль.
История
«Зарни Ань» ансамбль артмис 1996 вося кӧч тӧлысьӧ Сыктывкарын кыдзи фольклорно-этнографическӧй котыр. Веськӧдлысьыс — Михаил Бурдин. 2006 восянь 2017 воӧдз ансамбльыс меститчис Сыктывкарса Коми культура шӧринын. Тайӧ каднас ансамбльлӧн пырся солисткаӧн да хореографӧн вӧлі Коми Республикаса нимйӧза артистка Любовь Бурдина.
Ансамбль вӧзйӧ коми йӧзкостса шылада ворсанъяса фолк стиля сьыланъяс. Сьыланкывъясыс подуласьӧны важся коми сьыланъяс вылӧ. Штаб-квартираыс Сыктывкарын.
Котырӧ пырӧдчысьяслӧн мича национальнӧй костюмъяс, юргӧм сертиыс интереснӧй йӧзкостса гӧлӧсъяс да инструментъяс, йӧктӧмъяс, ӧнія музыкальнӧй дизайн — ставыс тайӧ вӧчӧ ансамбльлысь уджтасъяссӧ вунӧдлытӧм спектакль-шоуӧн. Аслыспӧлӧс важся коми инструментъяс — сигудӧк, брунган, чипсан, шур-шар да мукӧд — сетӧны программалы аслыспӧлӧс колорит.
Медводдза дисксӧ «Зарни Ань» ансамбль гижис 1998 воын. Дискӧ пыртӧма коми йӧзкостса сьыланкывъяс да инструментальнӧй шылад ӧнія обработкаын. 2003 воын Михаил Николаевич «Premiers TV» агентствокӧд ӧтвылысь лэдзис выль альбом да «Кӧкӧй» сьыланкыв обработайтӧм вылӧ профессиональнӧй клип. 2008 воын Михаил Бурдин гижис «Ен нырд» диск, кӧні вӧліны языческӧй обрядъяслӧн шылад реконструкцияяс да heavy rock стильӧн вӧдитчӧм.
Ансамбльлӧн репертуарын аслысногӧн юргӧны ӧнія коми да роч композиторъяслӧн обработкаяс да произведениеяс, эпическӧй сьыланкывъяс да висьтъяс, важ изьваса да изьва-колваса сьыланкывъяс, кодъяс петкӧдлӧны важся да ӧнія коми кӧр видзысьяслысь да накӧд орчча войтырлысь культурасӧ да олӧмсӧ.
«Зарни Ань» ансамбль ёна гастролируйтіс Россия пасьтала. Ансамбльлӧн коллективыс — Германияын, Финляндияын, Эстонияын, Венгрияын, Швецияын, Болгарияын, Карелияын, Мордовияын, Удмуртияын, Марий Элын, Саха Республикаын (Якутияын), Москваын, Петыркарын, Вӧлӧгдаын да Кировын войтыркостса да республикаса фестивальяслӧн да конкурсъяслӧн лауреат да дипломант. Сідз, 2006 вося йирым тӧлысь 4-10 лунъясӧ Москваын да Москва обласьтын мунысь важ шыладӧн ворсысьяслӧн «Садко» II войтыркостса фестиваль вылын «Зарни ань» ансамбльӧс шуисны Россияса войтырлысь аслыспӧлӧс национальнӧй культурасӧ медбур пропагандистъясысь ӧтиӧн[1].
2018 воын Михаил Бурдин и тшӧтш ансамбльыс вуджисны овны Петыркарӧ[2].
2023 воын Михаил Бурдинлы 75 арӧс тырӧмлы вӧлі сиӧма «Ас му» концерт Сыктывкарын[3].
Ворсысь-сьылысьяс
• Бурдин Михаил — Россия Федерацияса культураын нимӧдана уджалысь, Коми Республикаса нимйӧза артист (2004);
• Любовь Бурдина — Коми Республикаса нимйӧза артист (2011 во);
• Тимушева Наталья — сьылысь.
Наградаяс
• Коми шылад тэчысьяслӧн да ӧнiя коми сьыланкывлӧн «Василей» XII республикаса конкурс-фестиваль дырйи медшöр козин (2005);
• И. А. Куратов нима канму премияа лауреат (2011 во).
Дискография
• Зарни Ань (2003);
• Ен Нырд (2007)[4].
Пасйӧдъяс
- ↑ Ансамбль «Зарни Ань» из Коми признан одним из лучших пропагандистов самобытной национальной культуры народов России (рус.). Комиинформ (16 йирым тӧлысь 2006). Шыӧдчан кадпас: 7 вӧльгым тӧлысь 2025.
- ↑ Романова П. Михаил Бурдин. Вернуться на круги своя (рус.). Регион (5 урасьӧм тӧлысь 2020). Шыӧдчан кадпас: 7 вӧльгым тӧлысь 2025.
- ↑ Артеев А. Главный шаман Коми отметил юбилей на сцене (рус.). Республика (12 кӧч тӧлысь 2023). Шыӧдчан кадпас: 7 вӧльгым тӧлысь 2025.
- ↑ Ансамбль «Зарни Ань» открыл для слушателей священную гору коми народа (рус.). Комионлайн (2 косму тӧлысь 2008). Шыӧдчан кадпас: 7 вӧльгым тӧлысь 2025.