Козлов Евгений Валерианович

Рувикиын эмӧсь мукӧд йӧз йылысь статьяяс, кодъяслӧн овыс Козлов.

Козлов Евгений Валерианович
Чужан лун	1960-ӧд вося ода-кора тӧлысь 18-ӧд лун(1960-05-18) (66 арӧс)
Чужанін	Эжолты, Кӧжмудор сикт овмӧдчӧмин, Емдін район, Коми АССР, РСФСР, Сӧветскӧй Социалистическӧй Республикаяслӧн Союз
Страна	Сӧветскӧй Социалистическӧй Республикаяслӧн Союз  Россия
Мыйся уджыс	поэт, вуджӧдчысь

Козлов Евгений Валерианович (сайнимъяс — Е.Валериан, Е.Валери, Емеля Пилич, 1960-ӧд вося ода-кора тӧлысь 18-ӧд лун, Эжолты, Коми АССР) — коми гижысь, вуджӧдчысь. Россияса гижысь котырӧ пырысь (2012).

Олантуй

Евгений Козлов чужӧма 1960-ӧд вося ода-кора тӧлысь 18-ӧд лунӧ Коми АССР-ын Емдiн районса Кӧжмудор сикт улӧ пырысь Эжолты грездын. 1977 воын школа помалӧм бӧрын уджалӧма совхозын, служитӧма армияын (1978—1980). 1986 воын помалӧма Сыктывкарса канму университет.

1986—1987 воясӧ уджалӧма Коми небӧг лэдзанінын, 1987—1988 воясын вӧлӧма Коми АССР-са гижысь котырын литературнӧй консультантӧн. 1988—1989 воясын почтальоналӧма. 1990 восянь уджаліс корректорӧн да редакторӧн «Войвыв кодзув» журналын, а 2003 восянь вӧлі медшӧр редакторӧс вежысьӧн.

2010 восянь уджалӧ «Чушканзі» журналын.

Гижан удж

Евгений Козлов ёнджыкасӧ тӧдса кыдзи поэт. Кывбуръясыслы лӧсялӧ лиричносьт, пыді сьӧлӧм кылӧмъяс петкӧдлӧм. Сылӧн петавліс кывбуръяса куим чукӧр: «Водзкыв пыдди» (1989), «Узьтӧм войяс» (1994), «Кык книга» (2005). «Кык джын» небӧгӧ пыртӧма кывбуръяс да висьтъяс (2017).

Эмӧсь Е.Козлов творчествоын и прозаа гижӧдъяс. Ичӧтик гижӧдъяс петавлісны «Парма гор», «Миян грездса челядь», «Восьса ӧшинь дорын» да «Дзиръя ӧшинь дорын» ӧтувъя сборникъясын. Гижӧдъяссӧ пыртӧма коми кыв да литератураысь велӧдчан небӧгъясӧ.

Коми гижысь котырын 2012 восянь.

Евгений топыда уджалӧ республикаса театръяскӧд. Комиӧдіс налӧн корӧм серти Федерико Гарсиа Лорка, Лопе де Вега, Нина Мазур, Миклош Дярфаш, Николай Островскийлысь пьесаяссӧ. На серти сьпектакльяс пуктісны Сыктывкарса театръясын.

Евгений Козловлӧн кывбуръяс вылӧ гижӧма уна сьыланкыв, найӧ пырисны «ӧтчыд арын», «Jенэжва» (2006) да «Республика моя» (2008) дискъясӧ. Сьыланкывъяссӧ сьылӧны уна нималана коми сьылысь.

Небӧгъяс

• Козлов Е. В. Водзкыв пыдди. — Сыктывкар: Коми кн.изд-во, 1988.
• Козлов Е. В. Узьтӧм войяс. Кывбуръяс / Ред. А. В. Тентюков. — Сыктывкар: Коми книжное издательство, 1994. — 128 л.б.
• Козлов Е. В. Кык книга. — Сыктывкар: «Кола», 2005.
• Козлов Е. В. Кык джын: Кывбуръяс, висьтъяс. — Сыктывкар: «Арт» журнал редакция КР АУ, 2017. — 192 с.
• Козлов Е. В. Коймӧд аттьӧ: Кывбуръяс, висьтъяс / Серп. И. А. Авилова; ред. Е. Е. Афанасьева. — Сыктывкар: Коми Республикаса гижысь котыр, 2017. — 64 л.б. (тираж 690 экз.)
• Козлов Е. В. Юля-юла : кывбуръяс / серпасалic В. Клейман. — Сыктывкар : Ред. газеты «Коми му», 2011. — 14 л. б.

Вуджӧдӧмъяс

Евгений Козлов уна вуджӧдӧ коми кыв вылӧ роч да финн-йӧгра авторъясӧс: Варлаам Шаламовӧс, Игорь Шкляревскийӧс, Василий Климовӧс, Ар Сергиӧс, Альбертина Ивановаӧс, Елена Габоваӧс, Тамара Ломбинаӧс, Дмитрий Фроловӧс, Надежда Мирошниченкоӧс, Александр Суворовӧс, Андрей Поповӧс да мукӧдӧс. 1993 воын Евгений Козлов Ставроссияса культура фондлӧн Мурманск юкӧнкӧд ӧтвылысь уджаліс медводдза саам поэт Октябрина Вороновалысь «Ялла» (Олӧм) небӧг лӧсьӧдӧм вылын. Небӧгыс петіс саами, коми да роч кывъяс вылын.

Комиӧдӧма роч гижысь Юрий Николаевич Могутинлысь сідз шусяна «духовнӧй кывбуръяс» да йӧзӧдіс «Берба-бальысь югзьӧ лов» небӧг (2012).

• Могутин Ю. Н. Пахнет вербой каждый храм. Духовные стихи. Берба-бальысь югзьӧ лов. Духовнӧй кывбуръяс / Перевод Е. В. Козлова; Ред. Г. В. Бутырева, Худ. Е. П. Григорян. — Сыктывкар: ООО "Издательство «Кола», 2012. — 56 с. (рочӧн и комиӧн; тираж 1000 экз.)
• Пера-богатырь: Сказки финно-угорских народов [2-ое изд., исправ. и доп. / Перевод — Е. В. Козлов; Ред. И. В. Иванов, Худ. А. В. Мошев.] — Сыктывкар: Изд-во «Эском», 2012. — 208 с. (рочӧн и комиӧн; тираж 1000 экз.)

Наградаяс

• Журналистика юкӧнын Коми Республикаса Веськӧдлан котырлысь премия босьтысь (2012);
• Литература юкӧнын Коми Республикаса Веськӧдлан котырлысь премия босьтысь (2007);
• «Эзысь борд» республикаса литературнӧй конкурсын лауреат (2011);
• А. Е. Ванеев нима литературнӧй премия босьтысь (2015).

Пасйӧдъяс

Литература

• Коми Республикаса Национальнӧй библиотека
• Ельцова Е. В. Козлов Евгений Валерианович // Литература Коми: словарь школьника / Сост. В. Н. Головина, В. А. Лимерова. — Сыктывкар, 2005. — С. 80—87.
• Семяшкин А. Образ зимы в лирике Е.Козлова // Музеи и краеведение: труды Национального музея Республики Коми. — Сыктывкар, 2003. — Вып. 4. — С. 268—274.
• Уляшев И. И. «Ставыс лӧньӧм тыӧ сунӧма …» (Некымын мӧвп Е. Козлов лирика йылысь) // Уляшев И. И. Кад-образ-стиль: статьи о коми литературе. — Сыктывкар, 2003. — С. 14—20.
• Коми гижысь котыр сайтын Е. В. Козлов йылысь